San Lucas 21

1Yiey ja vatishjanjavat ti yivanesh pa Jesús papi acôsshiin ti yuqu'een pava lhpesoc pa t'ajuya. 2Yivanesh shta lhpa ôsch'acche ts'aclaay ti yuqu'e vitsha pava napu' lhtinshanhjay; 3pa yit'esh pa Jesús:

—Yijô' ti jayeetshelh'a, anôque ôsch'acche ts'aclaay ya'sheshc'oya nap'elh java yuqu'een; 4lhayaash ti lhacôm'a japi yuqu'een java lhpesoc ya'shemtaj ts'ivee; lhan'e lhavaatsha anôque ts'aclaay pa yipjôclônem claa java yivantaj lhech lha lht'ajô'jem.

Pa Jesús nifac pa vatishjanjavat ti chiyvômjat jayu

(Mt 24.1-2; Mr 13.1-2)

5Caaj papi yasinôqui ja vatishjanjavat ti iseem, isisem java utes shi' jant'ajôôj java matas vatcufayjates. Pa lhechesh pa yit'esh pa Jesús:

6—Nam jayu pa nalhu ti yôfalhsha'ne jayu lhacôm'a nava lhavanelh nôqueesh, navôque utes tanca pava ca ve'lhaa ca nôv'apee pav'elh utes.

Pava chinôclit ca chintôyesha ca nôjtajeshch'e jayu pava nalhus

(Mt 24.3-28; Mr 13.3-23)

7Pa lhechesh pa niyôsesh ts'ivee pa yit'esh:

—Vanqu'eyjatsjan, ¿Ta t'elhesh jayu ca navclan cavôque? ¿Pa ta t'e lhjunash jayu ca nôôc, jaspa chintôôysha ca navclantaj lhacôm'a cavôque?

8Pa yit'esh pa Jesús: “Anujumatsenelhjulh jaspa tanca nacôjôsjatelh papu. Lhayaash ti aclôj jayu papi nam yit'eshlhavne: ‘Yivaatsha ya Cristo’; yit'eshlhavne jayu shta: ‘Nôqueesh nam na nalhu.’ Taj ti ya aj ca avo'elhch'e. 9Ca aya'tajelhjulh papi vaclônsha'ne, ja't'ajesha papi vapecva'ne ti vatcônitshi, pa ya aj ca natôyiyjatelh; lhayaash ti lhech lha lhjunash tatsha jayu, taj ti nilhecha ca naôclheeshc'oya jayu ca nôjtajeshch'e pava nalhus.

10Pa lhechesh pa yit'esha shta:

—Vatcôvfachi jayu lhacôm'a pava yitsates shi' pava vatcootsjativshay. 11Ujaesh jayu ca nayuuynayuya'ch'e na cotsjaat, vaclan jayu shta pa yipcu' shi' pa vatayyasha lhanô' yi'shi' pava nayie'in vatavtsates. Caaj jayu shta pava tôlhshaam na vôôs us chinôclit tôlhshaam pa vatjovayi.

12Taj ti vatjutsac'oya jayu ca chinvo'elh'ay. Chinachajelh'ôcji jayu pava vatvanqu'eyjatsjanjavtes shi' pava vatvanc'ôcfajaytes, ja't'ajesha ti chinavatsavatjatelh'e t'ajuyish jayu shta papi us lhcaanvacles, lhayaash ti lhnetôneshelh ca yey. 13Nôque lhjunash lhtots'ôteyelh jayu pa isajop ca atsasinôquielh. 14Ya aj ca ats'ufeyeshelh pa ca at'eshelh ca chinachaajtajelh pa aniyitelhjulh papu; 15lhayaash ti yivaatsha jajutelh'ay jayu pa aclishelhjop shi' pa acajôyshaelhjop, jaspa a'shelh'apee jayu papi naac'utsfaseelh, pa sasemjop jayu ca nacu'lhelh.*xf* 16Vooy avaatsheelh chinafaclelh jayu, nafaclelh jayu papi atataclelh, shi' papi acheclavot'elh, shi' papi avelhavot'elh, shi' papi ac'utsfaselh. Caaj jayu shta papi tôlhelh'atsham chiyiclônsha'ne. 17Nacônitshielh jayu lhacôm'a papi yie' na cotsjaat, lhayaash ti tôlh'ejop ca yey ti lhanfacle'lhem. 18Taj ti nive'lhaa pa ayees ca chinvôôm yiesh nava ashatjeselh. 19Ca nafiiytajelh pa avanelh pa amônlhajayashelh. #21.14-15 Lc 12.11-12.

20Ca avantajelh ti yamjop papi nilhc'utsfasa ja yitsaat Jerusalén pa nataôyshelh ti chiyvôôm jayu tatsha. 21Pa lhechesh papi yie' ja cotsjaat Judea, pa iseemjop ti yiclôtey java uticuy; papi yie' ja yitsaat Jerusalén pa iseemjop shta ti yichfach'ee, vooy papi yie' pa joot ya aj ca napecley pa yitsaat.*xg* 22Pava lhech nalhus vaclan jayu pa vatclôyitsjayash, pan t'ônasheshch'e lhacôm'a cava Vani'sesh'e. 23¡Yiya'lhavachis papi nivacchey yitumasha'ne shi' papi vancafitsjansha'ne ca nivooytajesh pava lhech nalhus! Lhayaash ti vaclan jayu pa uj vat'aôyteyash nash'apee na cotsjaat pa uj ti chiyclôyit jayu napuque nivacle. 24Caaj jayu papi chiyclônshi pa vatvatclônjayash, vooy pap'elh chiyôcfasha'ne jayu pa chiychajey pava yitsates; vooy papi nilhchifasa nit'ôseshch'een ja yitsaat Jerusalén pa namjeylhac'o' ca nôjtajeshch'e pava nalhus papi nilhchifasa pa Israel. #21.22 Os 9.7.

Pa lhjunash jayu ca natpectaj pa Nivacle Lhô'sesh

(Mt 24.29-35, 42-44; Mr 13.24-37)

25Pa lhechesh pa chinôclitesh pa lhjunash na jumcuclaay shi' na jive'cla shi' nava catiis; vooy papi yie' na cotsjaat tastay'in jayu pa lhjunash, lhayaash ti nitôyiyjach'e jayu pa uj t'ôjôj pa uj yinôôt shi' pava usch'e.*xh* 26Papi nivacle yivômjat'e ts'ivee jayu pa t'ajovayi, lhayaash ti yaychavalha pava vaclan jayu ti nash'apee na cotsjaat; pa lhechesh pa naacjut pa vat'unaj na vôôs. 27Pa lhechesh pa avanelh jayu na Nivacle Lhô'sesh ca natajeshicham lhpa vôse', pa uj jayu pa t'unaj shi' pa lhasnôycheyash.*xi* 28Meelh ca nich'a navclantaj côque, pa avantôyitelh'in pa apôyelhchisham, lhayaash ti shalheelhc'oyaam pa anilhjenjayash. #21.25 Is 13.10; Ez 32.7; Jl 2.31; Ap 6.12-13.,#21.27 Dn 7.13; Ap 1.7.

29Yisnatshem shta pa vatovalhjayasheyjop pa yit'esh: “Ovalhelheyjop lhpa higoyuc shi' pav'elh aacjuy. 30Ca avantajelh ti nich'a tôôlh pava lhsashay, pa natôyjatelha ti yujeey ca yincôp'eesh. 31Lhech lhjunash jayu, ca avantajelh ca navclantaj côque, pa natôyjatelha ti yujeey ca nam ja Dios lhanvacleyash.

32Yijô' ti jayeetshelh'a, ti vaclan jayu cavôque matas ti jôjjeclay ninôj'e napuque nivacle. 33Na vôôs shi' na cotsjaat chiyvômjat jayu, taj cava yasinôc ti tanca chinvômjat.

34Anujumatsenelhjulh, jaspa tanca nicaclecleyan pava acachiclelh pava sasch'esha'ne shi' pa vat'etsjeyash shi' pava vataychavalhjayasha na vatmônlhyayash yiey na cotsjaat, pa jaspa tanca natôyiyjatelh pa lhech nalhu ca namtajelh'ay jayu. 35Jan lhjunash lhja vatc'aôvte ti vatpecvatjulh, pa nôque jayu lhjunasha ca namtaja napi yie' na cotsjaat pa lhech nalhu. 36Istaa ca avaatsheelh ca avatvaclhitelh, ca a'lhelh nava nalhus ca jaspa tanca namelh'atsham cavôque matas ti vaclan, pa jaspa chinanelh'e t'ajuyish na Nivacle Lhô'sesh.

37Pa Jesús nalhu'ey ti vanqu'eyjatsjan'e ja vatishjanjavat, vooy ti tulh'in pa yichey lhja utiyuc yie' ja Olivochat.*xj* 38Lhacôm'a papi nivacle ti vachiyofey'in ja vatishjanjavat pa tach'anaan. #21.37 Lc 19.47.

Chinachan pa Jesús ca chinôcfa'

(Mt 26.1-5, 14-16; Mr 14.1-2, 10-11; Jn 11.45-53)

Currently Selected:

San Lucas 21: NIVA

Highlight

Copy