Génesis 45

Pa Josê ti yitôyjatlhavne papi lhcheclavot

1Pa Josê nilhaajulh t'ôyish'e papi yi'jop papi t'acumem'in, pa yisitsenesh ti yit'esh: “¡Ayelh'e lhacôm'a nôque!” Nôque lhjunash pa ampapu papi lhcavos yiey pa lhech'e ti yitôyjatlhavne pa Josê papi lhcheclavot.*xc* 2Lhechesh pa uj ti yip'in lhe'naa ca nitô'yish shta papi Egipto lhavos, pa yamey shta ti yitô'ya pa faraón. 3Pa Josê yit'esha papi lhcheclavot:

Ya lhech ya Josê. ¿Jôjjeclay mônlha ja tata?

Vooy papi lhcheclavot uj ti nijovayvatsham'in, pa yistan'in pa ca niteesh ca nicuulh. 4Pa yit'esha shta pa Josê:

—Tajulhey ca anc'uyelhyi.

C'oya ti shalheema pa yit'esha:

—Ya lhech ya Josê lhasch'inishelh, nan lhatcashaayshelh na Egipto. 5Taj ti tajulhey ca ya aj ca natacshinjayanelh'in pa ya aj ca caclecleelh'am ti lhatcashayelhyish, lhayaash ti vooy pa Dios nôque tsichen'e ti tsinôyinjat ca jaspa c'alhjeneshelh pa amônlhajayashelh. 6Pa'lha yich'e' cava napu' yincôpes na yipcu', pa jôjjeclay amc'oya pava ve'lhanôjesh yincôpes ti tanca nicaaj pa vatcavcalhech, lha'ma ca chinvancutaj. 7Taj pa Dios tsichenee ti tsinôyinjatelh'ac'oya ca jaspa nicaaj papi catsicles yiey na cotsjaat, shi' ca chinalhjeneshelh pa amônlhajayashelh pa chinashjateshelh pa anfanashelh.

8Nôque lhjunash ti lhech pa Dios tsicheney nôque pa tanca alhecheelh. Lhavaatsha tsinvacleyan'e yiey ja lhajpôyich ja yinvacle faraón. Pa tsinvacleyanesh shta nan tuc'a'e na Egipto. 9Mapeclelh clap yiey ja tata pa at'eshelha: ‘Nôque yit'esh ja aôs Josê: Pa Dios tsanshi' ti tsinvacleyanesh nan tuc'a'e na Egipto. Ninach ca nasvan. Ya aj ca clet'ac'oya. 10Nôv'e' jayu yiey ja cotsjaat Gosên. Nôvelh'e papi acles shi' papi lhantôclishjes, shi' lhacôm'a pava aclôy shi' pava lhavan. Pa jaspa shalhaayam jayu. 11Lhech'e jayu ca jajutey pa lhôc shi' pa ajôôjam, shi' lhacôm'a papi yi'ajop, jaspa tanca ameemc'oya pa'na. Lhayaash ti jôjjeclay ve'lhanôjesh pava yincôpes amc'oya ti caaj jayu pa yipcu'.”*xd* 12Na yich'inish Benjamín lhasvaneshelh ti ya lhech jayeetsha cavôque. 13Anfacle'lhem ja tata cavôque ti jayinch'anjayesh lhacôm'a nava yie' na Egipto, shi' lhacôm'a nava lhavanelh yiey nôque. ¡Ifaclitelhey, ca meelhey ca anchajeelh ja tata!

14Pa Josê yechepjalh pa lhch'inish Benjamín, lhechesh pa yip'in. Pa Benjamín yip'in yitsha ti yechepjalh pa Josê. 15Nijooylha pa Josê ti yifin lhacôm'a papi lhcheclavot pa yip'in shta ti tanechepjalhelh. Ti tifeshch'e côque lhechesh pa yifiiysha ti tasinôyelh papi lhcheclavot.

16Pa lhjunash pa taneeyjay ti yamey pa lhajpôyish pa faraón ti namey papi lhcheclavot pa Josê. Pa nishamesh pa faraón papi tanefenelh. 17Pa yit'esha pa faraón pa Josê:

—Anfacleem papi acheclavot ca nasclan'apee pava lhclôy ca napecley pa cotsjaat Canaán, 18pa istaa ca ninôôychiyiy pa lhtata shi' pa t'ajôôjamsha'ne. Jajutey na ya'shesh ti is'e' cotsjaat yiey na Egipto. Pa nituj jayu nava yaash ti isis tô'lha na cotsjaat. 19Ayôjiesha ca nichaaj nava caletas yiey na Egipto ca nanchaaj papi lhjayas shi' papi taôvclas shi' shta pa atataelh. Istaa ca nam 20pa ya aj ca naychavalhaan pavan caajem nôqueesh, lhayaash ti nava ya'shesh ti isis yiey na Egipto yitsôt'ajesh jayu.

21Papi lhcles pa Israel pa yisnatesh côque. Pa Josê yijutey pava caletas pavan yiyôjiesha pa faraón, pa yijutem shta pa lhôc ti t'ajuych'e pa nôyish. 22Yijutem shta pava nich'ac t'uyjatshiyis ca nuych'e. Vooy pa Benjamín yijutey pava trescientos tashaay pesoc shi' pava ve'lhanôjesh isis t'uyjatshiyis. 23Vooy pa lhtata yicheney pava napunôjesh cuvôyutas yinesh'apee pava yaash ti isis yie' pa Egipto. Vooy pav'elh napunôjesh cuvôyutas yinesh'apee pa trigo shi' pava yucuvec shi' pa lhôc pa nituj pa lhtata yiey pa nôyish. 24Vooy ti vaneecjuelh pa Josê papi lhcheclavot pa yit'esha:

—Ya aj ca ashanelhshisha'ne pa nôyish.

Lhechesh pa yich'in. 25Tay'e pa Egipto pa yamey pa Canaán, yiey pa lhtata Jacob. 26C'oya ti chinfacleem pa Jacob ti jôjjeclay mônlha pa Josê, ti lhech lhavaatsha ti lhcaanvacleesh'e pa cotsjaat Egipto, nintô'yish pa ca nasnatesh shi' pa ca niteesh, yicacuqu'e pava chinfacleem. 27Taj ti c'oya ti chinfacleem lhacôm'a pava yit'esh'in pa Josê, pa yi'van shta pava caletas pavan yicheney pa Josê, pa uj ti c'u'sem'in. 28Lhechesh pa yit'esh: “¡Tajulhey ti lhastôyjatelha ja yaôs Josê ti jôjjeclay mônlha! Jôquey jayu ca ja'van ti jôjjeclay ya mônlha.”

Currently Selected:

Génesis 45: NIVA

Highlight

Copy