Génesis 44

Pa t'iyôjatshi pa Josê

1Ti yivaclhitesh côque, pa yiyôjiesha pa Josê pa lhcavo:

—Anemch'e nava lhvonsac napuque nivacle ja trigo ca nichaaj. Pa ane'meyshi shta nava lhvonsac nava lhpesoc. 2Vooy na is yiyôjatshi ane'meyshi lha lhvonsa na lhch'inish taôvclajesh shi' shta nava lhpesoc nava yishayanesh na trigo.

Pa lhcavo pa Josê yisnatesh pavan yit'eshem. 3Ti nich'a vacha' na jumcuclaay pa yivashan pa Josê papi lhcheclavot ca nôqu'in shi' pava lhclôy cuvôyutas. 4Jôjjeclay nitojach'e c'oya pa yitsaat, ti yit'esha pa Josê pa lhcavo:

—Meelhch'e japi nivacle, pa at'eshelha ca ôfiistajelh: ‘¿Ta lhayaash ti t'uyjatelh'ôcji pa is pa niysa'? ¿Ta lhayaash ti lhatcuteshelh ja is vatyôjatshi 5ja yiyôôj'in ja yinvacle ti yivoesh'ôcji pa? ¡Uj ti lhasnatshelh pa niysa'!

6C'oya ti yofiis pa lhcaanvacleesh, pa yachajeshch'e pavan chiyit'eshem, 7pa yicuulh papi lhech:

—¿Ta lhayaash ti nôque afanishelhyish ti lhniyôjeelhyi? Tanca yisnatshelh pa cat'elheesh pa lhech lhjunash! 8Ti jatpecleelh ti jatôlhelh'e ja Canaán pa janachajelh java pesoc javanelhch'e java yivonsaclelh, ¿ta lhayaash ca jaycuteshelhc'oya pa nôcshi' clesanilh tanca lhecha pa cojiyaj clesanilh yiey ja lhajpôyich ja anvacle? 9¡Tajulhey ca nivaf papu ca chinvantajesh japi acavos pa t'iyôjatshiy, pa yachi'elh jayu shta ca lhcavoseelhyish!

10Lhechesh pa yit'esh pa lhanvacleesh:

—Chinasnatesh jayu cava lhteetshelh, taj ti ve'lha papi yiey ja vat'iyôjatshiy yicavosesh jayu; vooy nap'elh ampa jayu ca nitôlh'ejop.

11Pa ve'lha ts'ivee ti lhfanishesh'in ti yinesha cotsjaat pava lhvonsac, pa nic'atch'esha'ne. 12Pa lhcaanvacle tifesh'e pava vonsac ti nic'atch'esha'ne, tôlhesh'e pa c'utsajesh pa yamjey pa taôvclajesh, pa yivanch'e lhpa lhvonsa pa Benjamín pa vat'iyôjatshiy. 13Lhechesh papi lhech yic'asteshlhtapee pava t'uyjatshiyis tanôclitesh ti aôytejem. Pa yachaj'apee shta pava lhclôy cuvôyutas pa vapecley shta pa yitsaat. 14C'oya ti yamey pa Judá shi' pap'elh pa lhajpôyich pa Josê, jôjjeclay mônlhee pa lhech'e. Lhechesh pa tanjuyshichamch'e yamja cotsjaat ti yiesh'e t'ajuyish. 15Lhechesh pa yit'esha pa Josê:

—¿She pa lhasnatshelh? ¿Ninatô'yelha pa ve'lha nivacle nan yijunash tsitô'yish ti tsivo'yesh'ôcji pa?

16Pa yicuulh pa Judá:

—¿Shepa isjop ca c'acuulhshelh? ¿Nisa'jop ca vatfich'eshelh pa niycajôyshaaelh? Pa Dios tsivanshelh pa sasch'e. Nôque jôvelh'e ti lhantsôt'ajelhyish, pa acavoselhyish shi' nan caajem ja vat'iyôjatshiy.

17Taj ti yit'esh pa Josê:

—Tanca lhech lhjunasha. Ve'lha na lhech nan caajem na yiyôjatshiy na lhech yicavo jayu. Vooy nap'elh isjop ca napecley pa lhajpôyich pa lhtata. Tanca naclôquielh papu.

Pa Judá vatants'aclanjop pa Benjamín

18Pa Judá tac'uya pa Josê pa yit'esha:

—Jatants'aclan'a avaatsha, lhcaanvacle, ca avashanyam ca jaycutesh'a pa ca jayeesh. Istaa ca ya aj ca asuyayi, avaatsha c'ajôney jayu ca alhecha pa faraón. 19Avaatshaa lhtsiôseshelh ca'na ca nicaaj pa tataelh shi' ca nicaaj pa yich'inishelh. 20Pa yivaatsheelh c'acu'lhshelh ti caaj ja tataelh c'utsaaj shi' na yich'inishelh jôjjeclay nich'ayech, na lhech nivat'aj ti p'alha c'utsaaj ja tataelh. Pa jayeetshelh shta ti yen jum ja tataelh, lhayaash ca lhchecla' ti vaf. 21Lhechesh pa lht'aalhshelhyi ca janôôychielh'ay ca jaspa natô'ya. 22Yivaatsheelh jayeetshelh ti ninvashan ja lhtata na lhech nich'ayech, lhayaash ca nivashantaj pa ca nôcji' pa vaf jayu ja lhtata. 23Taj ti avaatsha lhteetshelhyi ca nintatvo'tajeelhyich'e pa tanca acu'melhyijulh.

24“C'oya ti jamelhey ja tata pa janfaclelhem lhacôm'a java lhteetshelhyi. 25Lhechesh pa niyôjieshelhyi ja tataelh: ‘Mapeclelhey ca acashayelha shta pa tiqu'in trigo’; 26taj ti jayeetshelha yivaatsheelh: ‘Tanca yicheelh ca nintatvotajeelhyich'e na taôvclajesh yich'inishelh; lhayaash ca nitanôôychitajeelh tanca yiche'lhey jô lhech lhcaanvacle.’ 27Pa yit'eshelhyi ja tata: ‘Avaatsheelh natô'yelha lhca yich'acfa ti napu' atesha japi yicleselh. 28Ve'lha ja apis ti tayyijop pa niyvan t'ôyish'e. Jalheclôjesh ti tuj pa ve'lha suy yaquiset. 29Ca achaajtajelh shta neelh yaôs nan mônlhayijop, ca navclantajem pa'na niysa', avaatsheelh tôlhelh'a jayu ca nivômjat na lhc'utsaaj pa lhtacshinjayash.’

30Nôque lhjunash pa lhamônlhajayash ja tata ve'lheelhsham pa lhamônlhajayash na nich'ayech ca jatpectajelh, 31ja tataelh yivômjat jayu ca ninvantaja. Nôque lhjunash pa tôlhelhyiyijop jayu ca nivômjat ja lhc'utsaaj tataelh pa lhtacshinjayash. 32Jayeetsha yivaatsha ja tata ti jayasinôy'apee jayu na nich'ayech, pa jayeetsha shta: ‘Ca ninachajtajeelh, pa tôlhyiyijop jayu pan lhavôôj pa amônlhajayash.’ 33Lhe'naa ti jatants'aclan'a avaatsha ca at'eshyam ca yamônlhaae ca acavoayish pa jancayôj'e na nich'ayech. Istaa ca nivoqu'e napi lhcheclavot. 34Lhayaash, niyit'esh ca vapecley ja tata ca mônlhaae na nich'ayech. Niyit'esh ca yivanesh pa uj lhtacshinjayash ja tata.

Currently Selected:

Génesis 44: NIVA

Highlight

Copy