Génesis 43

Pa Benjamín ti chiychajey yiey pa Egipto

1Pa uj yipcu' yiey pa lhech'e cotsjaat. 2C'oya ti tif pa Jacob shi' papi lhcles pa trigo tôlheshey pa Egipto, pa yit'esha pa Jacob:

—Meelhey shta ca acashayelha pa tiqu'in trigo ti t'ajuyjoo:

3Taj pa yit'esh pa Judá:

—Jô lhech nivacle niyôjieshelhyiin: ‘Ca nianôôychitajeelh pa ach'inishelh taôvclajesh, pa tajulhey ca ya aj ca anachelhyiy.’ 4Ca avashantajelhyich'e ca jatanôycheelh, pa jôqueelh jayu ca jaycasha'yelha pa trigo. 5Taj ti ca niavashantajeelhyich'e pa tanca yicheelh. Jô lhech nivacle niyôjieshelhyi: ‘Ca nianôôychitajeelh pa ach'inishelh taôvclajesh, pa tajulhey ca ya aj ca anachelhyiy.’

6Lhechesh pa yit'esh pa Israel:

—¿Ta lhayaash ti lhasnatshelhyam pa uj niysa'? ¿Ta lhayaash ti lhanfacle'lhem pa lhech nivacle ti caaj naelh ach'inishelh?

7Pa yicuulh papi lhech:

—Tôlh'ejop ti uj ti tsiyôseshelh'in na casjôjelhsha'ne. Yit'eshelhyi: ‘¿Jôjjeclay mônlha pa atataelh? ¿Caaj peelh ach'inishelh? Vooy yivaatsheelh jacuulhshelhjulh, ninôstôyeshelhjulh ti niyôjieshelhyi jayu ca jôôycheelh na yich'inishelh.

8Pa Judá yit'esha pa lhtata Israel:

—Ca shteetajesh ca casmônlha, pa avashan na nich'ayech pa janujumatsenesh jayu pa jôqueelh jayu tastsha. Pa nôque lhjunash pa tanca avaf yachi'elh shi' napi catsicles. 9Yivaatsha jaculhjanem jayu na lhech; pa atsiyôsesh pa ca lhjunashtaja ca navclantajem. Ca ninachajtajeey yiey nôque, yivaatsha tôlhyi'yijop jayu lhacôm'a pa lhavôôj pa amônlhajayash. 10Ca nicaspitojaaesh côque, ¡p'alhataja ca napuesh ca yicheelh ca namelh shta!

11Lhechesh pa yicuulh pa lhtata:

—Ti ampa caelhchaa ca lhanfanasha pa nôque afanisheeshelh jayu: acha'jelh pa ca atisshelh pa lhech nivacle. Acha'jelhey nava yaash ti isis tô'lha na cascootsjat: pa tiqu'in vatfetaas acôjji lhey bálsamo, pa tiqu'in shnacuvjataj t'i', pa vatshatshivo, pa mirra shi' pava lhay almendras. 12Acha'jelh shta pava napu'jam pesoc, pa atsôôtjateshelh ca ajutelhey lhpa peso lhpa lhachajelhey; ameesh ti sasesha'ne ca'na. 13¡Meeelh! Pa ôôychielh na ach'inishelh ca meelhey shta pa lhech nivacle. 14Vooy pa Dios ampa ca nintô'yeesh yefenelh'ash jayu ca chinatcavts'aclayelh'ash pa chinuqueesh jayu shta jeelh chiyôcfa' shi' na Benjamín. Vooy yivaatsha ca amtaja japi yicles, ¡pa istaa ca ama papi yicles!

15Papi lhcles pa Jacob pa yichaaj pava lhcufayjavtes, pava napu'jam lhpesoc shi' pa Benjamín pa yichey pa Egipto. C'oya ti yamey pa Josê, 16pa yi'van pa Josê pa Benjamín ti yi'shi' papi lhech, pa yit'esha pan yinvacleyanesh pa lhajpôyich:

—Acha'jey napuque nivacle ja yijpôyich. Aclôn lhpa ve'lha vôcô pa asnatesh pa vatôc, lhayaash ti jaytsaccunelh jayu ca nalhcachitaja. 17Pan yinvacleyan pa Josê yisnatesh pa chiyôji'sha, pa vatsôôtjatesh ti yichaaj. 18Taj ti nijovayshi papi lhech, lhayaash ti chiychajey pa Josê lhajpôyich, pa yit'eshvane:

—¡Yitôlhjateyjop atesha côque! Nôque shinchaj'e tôlh'ejop jayu cava nachajjooy ca'na pesoc. Nivalhjoo jayu ca shincumjat nan lhjunash papi vatcavos shi' nava catsiclôy.

19Vooy ti yamey pa lhashi pa jpôyich pa tac'uya pan chiyinvacleyan ti tasinô'yelh, 20pa yit'esha:

—¡Pa yijô lhcaanvacle! Jaelh nalhu yijô ti janachelhey ca jaycashayelha pa trigo, 21taj ti vooy ti jamelhey ja jayichayelh'e ja tulh, pa jancat'elhch'e java yivosaclelh. Pa tanvoychisham nava pesoc yalhacôm'aelh. Nava pesoc lhet lha lht'ajôjqu'e. Nôqueesh janchajeelh ca jachajelh'ay. 22Pa janchajeelh shta lheelh peso ca jaycashayshelha peelh trigo. Taj ti ninastôye'lha pan yie' papu yanch'e java yivonsaclelh.

23Pa lhcaanvacle yicuulh:

—Acanoeelh, ya aj ca anjova'yelhshi. Pa a'Dioselh shi' pa atataelh lhech jayu yanch'e' pava pesoc pava avonsaclelh, lhayaash ti apis ti chinjutyi lhja peso lhjan lhshayaneshelh.

Pan lhcaanvacleesh nuqueesh pa Simeón, pa yicha'jey pan yie' papi lhech. 24Ti yivaclhitesh pa yichaj'ôcji pa lhajpôyich pa Josê, pa yijutshey pa yinôôt ca nicleshesha'ne pava lhafoc pa yijutem shta pa lhôc pava lhclôy cuvôyutas. 25Lhan'e pa yisclanvatich'e pava tisesh jayu pa tach'anc'oya pa Josê ca namtaj ti nalhcachi, lhayaash ti apis ti yitô'ya ti tsaccunelh jayu.

26C'oya ti namey pa Josê pa lhajpôyich, pa yijutem pava tisesh nichaaj, pa tanjuyshichamch'e yamja cotsjaat. 27Pa Josê niyôsesh pa lhjunash ts'ivee, pa niyôsesh shta:

—¿Ta lhjunash pa atataelh pa c'utsaaj pan lhanfacleelhyam? ¿Jôjjeclay mônlha?

28Pa t'avuyeshshicham ti yit'esh:

—Ja tataelh, ja acavo, ampa ca nijumteey, jôjjeclay mônlha.

29Pa Josê yiclôvalhch'e pa yi'van pa Benjamín, lhch'inish jô' ve'lha pa lhtata shi' lhpa lhamimi, pa yit'esh:

—¿Lhech nôque taôvclajesh ach'inishelh, na lhanfaclelhyam ca'na? ¡Vooy pa Dios yit'esh'am jayu pa is, yaôs!

Ti yit'esh côque, 30pa Josê yamqu'een pa uj lhshamitjayash ti yi'van pa lhch'inish, pa tanlhatajem ca nôyan. Pa yich'ôcji nishi peelh lhtôvash pa yip'in. 31Vooy ti tajulhjulh pa t'ôpjayaash, pa vômcô' pa yichfach'ee, pa yit'esh: “¡Atujelh clap na vatôc!”

32Pa Josê chiyinesh'e peelh vattsaccunjavat, vooy papi lhcles pa Jacob yiesh'e peelh. Caaj pap'elh Egipto lhavos tsaccunjop pa Josê, lhayaash papi Egipto lhavos nichinvashanem ca nivancufanelh papi hebreos. 33Papi lhcheclavot pa Josê yich'esha'ne pan lhjunash pa lhfanishesh pa Josê. Ti yivayjatvatjulhsha'ne papi t'ôplhuvatich'e papi tavay pa yamjey papi taôvclasesh, pa uj ti nitôyiyjat, pa vanovalhsha'ne shta. 34Pa Josê yijutshey pa vatôc lhjunashjulh pa yiey pa tsaccunch'e. Vooy pa Benjamín yashjatesh c'oya pa yijutey pap'elh. Pa Josê shi' papi lhcheclavaot yiyôelhsha'ne pa nishamvatsham'in shta.

Currently Selected:

Génesis 43: NIVA

Highlight

Copy