Éxodo 24
24
Pava yijô' ti chivatpeya'esh ti chiyisnatesh
1Pa Lhcaanvacle yit'esha pa Moisês:
—Anachelh'apee lha utiyuc na Aarón, na Nadab shi' na Abiú, pa chi' shta napi setenta nitaôvclasa napi Israel, pa anachelhey yiey na jôv'e'; taj ti ya aj ca anamelhyi jô, pa lhech acjatsuyelh'eshicham. 2Pa ave'lhaa ca anachyi; ca ashalhaaayam; pa vooy nap'elh ya aj ca shalhaaayam, pa chi' shta nap'elh nivacle ya aj ca nach'apee.
3Pa Moisês ti vapec pa nifaclem lhacôm'a papi lhchifas pava yit'esh pa Lhcaanvacle pa yisclanvatich'e, pa lhacôm'a ti yicu'lhesh:*xv*
—¡Jech, jasnatshelh jayu lhacôm'a pava niyôjeeshjooy pa Lhcaanvacle!
4Pa lhechesh pa yi'sesh'e lhacôm'a pa Moisês pava yit'esha pa Lhcaanvacle. Pa vooy ti nich'a nalhu pa nitshaam pa yisnatesh pa itôvat yiey pa lhavôj'e lhpa utiyuc. Pa yan'e pava napu'nôjesh napu'yama utes lhasnôyjes, pa ve'lhee ts'ivee pan t'ajôôjam papi israelitas. 5Pa tatsha ti yicheney papi nich'acsha'ne israelitas pava vôcôc jayanjas pa yiclôn pa tisesh pa Lhcaanvacle pa lhjunashjulh ti tcufayeshlhnôcji pa jaspa ve'lheelhsham. 6Pa Moisês t'acum'e pava ch'alhu'esh pava lhavoyey pa yanshi' pa titech, pa vooy pav'elh ch'alhuesh pa yisichat'apee pa itôvat. 7Pa lhechesh pa t'acum'e pa vatqu'isjayanach t'ajuya pava vatpeya'esh pa yetônemch'e papi lhchifas, pa lhechesh pa yit'esh ts'ivee:
—Jayeetshelh jayu yalhacôm'aelh ca jaych'anelha pava yit'esh pa Lhcaanvacle.
8Pa lhechesh pa Moisês pa t'acum'e pava lhavoyey pa yisichat'apee papi nivacle, pa yit'esha:
—Navôque lhavoyey apis ti chivatpeya'shelh*xw* pa Lhcaanvacle ti yisnatshelh'am avaatsheelh, cava lhech lhtatsuqu'esh lhacôm'a pava lhclishay.*xx*
9Pa Moisês yich'apee lhpa utiyuc shi' pa Aarón, pa Nadab, pa Abiú pa nôquee papi setenta nitaôvclasa papi israelitas. 10Pa lhech yivan'e pa lh'Dios papi Israel: pava lhafoc yi'ôcji pava nôcshi'sha'ne lhjunashjulh pava climsha'ne ti chiyan'ôcji pa jpôyich pa nôcshi' nan lhjunash na vôôs. 11Pa Dios ampa ca lhfanisheesh papi lhech nivacle tôlhshaam papi israelitas, papi yi'van pa Dios pa tsaccunelh pa yiyô'elh shta.
Pa Moisês yi'apee lhpa utiyuc Sinaí
12Pa Lhcaanvacle yit'esha pa Moisês:
—Anach'apee lha utiyuc yiey na jôv'e', pa lhech ach'an'eyic'oya. Pa jajut'ay jayu nava napu' utes t'iyas navan janshi' nava yiyôjijates pa jaspa eyjatsjanesh napi israelitas.
13Pa Moisês netshaam pa yich'apee lhpa lh'utiyuc pa Dios. Pa tanôôycheelh pa yôsjat'e t'ajuyish Josuê. 14Pa yit'esha papi nitaôvclasa:
—Nôque ach'anelh'eyic'oya cum, vooy ca jatpectajeelh. Pa lhech mônlhee na Aarón shi' na Hur mônlheelh'ajop jayu. Pa vooy ca nicaajtaj pava tavijatayem papu, pa istaa ca nanfaclelh'am napi lhech.
15Ti tifeshch'e ti nifaclem pa Moisês pa yich'apee lhpa utiyuc, lhpa lhech tif'apee lhpa vôse'. 16Pa lhôclôjqueyash pa Lhcaanvacle namjeyshicham lhpa utiyuc Sinaí, pa yicheshch'e pava ve'lhayama nalhus lhpa vôse' ti tif'apee lhpa utiyuc. Pa vooy lhpa napu'yama nalhu pa Lhcaanvacle yiyôjeey pa Moisês yi'apeejop lhpa vôse'. 17Pa lhôclôjqueyash pa Lhcaanvacle yiesh'e t'ajuyish papi israelitas pa lhjunashjulh pa itôj ti chiyvaney, ti yi'apee lhpa ujquishaam utiyuc. 18Pa Moisês yitshaam lhpa vôse' ti yich'apee lhpa utiyuc, pa lhech mônlhee cuarenta pava nalhus shi' pava tulhis.*xy*
Pava vatcufayjates t'ajuya pa is'ôcji lhtôvash
(Ex 35.4-9)
Currently Selected:
Éxodo 24: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
