Éxodo 23

Pava vatyôjijates ca chinasnatesh pava yivo'yeshch'e

1“Ya aj ca at'esha pava yôôlhjôn'in,*xk* pa ya aj ca môôjelha papi ojiyis ca efeneshelh pava ninvo'yeshch'e.

2“Ya aj ca anach'itesha papi t'ajôôjjô pava yisnatesh niysisa.

“Pa vooy ca nicaajtaj pava ca nafactajeshelh papi t'ajôôjjô pa istaa ca ya aj ca navaych'aclajelh pava ninvo'yeshch'e ca môôjelha. 3Pa nilhecha pa ts'aclaay ca avenchat ti caaj pava tôlh'ejop.*xl*

4“Ca avantaj pa vôcô ja't'ajesha pa cuvôyutaj pa lhclô' pa niac'utsfaa pan tastay'in, pa istaa ca acha'jey. 5Ya aj ca avô'mesh ti t'efen papi ti nacônitshi; ca avantaj pa lhclô' cuvôyutaj ti nicôt'esha'ne pava tilhôôj pa efenesh ca anclanem'apee.*xm*

6“Ya aj ca vena afanisheeshem pa ts'aclaay pava vatyôjijates yiey pa chiyie'.

7“Ayjop pava lhclishay ninvo'yeshch'e, pa ya aj ca efenesh papin yiclôn pa nivacle ampa ca natmeneshlhavach, lhayaash ti jivalha jayu papi caaj pa tameneshlhavach.

8“Ya aj ca acuumjulh pava chinashayanesh ninvo'yeshch'e, lhayaash pava lhech yivintacluquiyan pa nivacle pa yac'oyjatesh pa ampa ca natmeneshlhavach pava caajtajem.*xn*

9“Ya aj ca imaj'e pa'na pa niachifaa, lhayaash ti lhech ajunashelh lhtô'lhelhey ja Egipto, lhayaash ti apis ti natô'yelha pava lhfanishlhavach pap'elh yiey pav'elh yitsates.*xñ*

Pa vat'ichayash ti chiynôôclhanita

10“Pa acôjiyanjan'e pa acac'ovat pa anayjatva'ne pa acavcalhech pa môôjqu'e pava ve'lhayama yincôpes, 11Pa vooy pa napu'yama nincôôp pa ya aj ca acôjiyanjan'e: pa istaa ca ichayanelh, pa vooy papi nivacle ts'aclaaysha'ne yiey pan lhôvelh'e yitsaat pa istaa ca nituj pava tôlhjaclacuy yi'shi' pa acac'ovat. Pa chi' shta pava yaquisetes pa nituj pava ca mônlhatajach'e. Pa lhech lhjunash shta pava ôtjayetas shi' pava olivos.*xo*

12“Pa môôjqu'e ca asnatesh pava ve'lhayama nalhus lhacôm'a pava lhen ca asnatesh, pa vooy pa napu'yama nalhu pa ichay,*xp* ca jaspa nit'ichay yitsha pa aclô' vôcô ja't'ajesha pa cuvôyutaj ca jaspa nit'un'in pa acasha shi' pa tojc'oya.

13“Anc'ashamesh lhacôm'a cava jayôjeeshelh'a, lhayaash ti niyit'esh ca c'apeyeeshelh pav'elh ca atseyfayanshelh.

Pava pu'jana chiyashjat vatc'ayasheshva'ne

(Ex 34.18-26; Dt 16.1-17)

14“Asnatshelh pa atc'ayashelhva'ne t'ajuya pa yôclôjqueyashesh pava pu'jana'esh pa ve'lha yincôôp. 15Pa lhech vatôclôjqueyashesh vatc'ayasheshvane lhpa yucuve ninôveyshi pa yicap'ofiyanshi,*xq* pa aychavalhshelhch'e ca yônashesh ti jasclaneelhsha'ne'am. Pa atujelh lhpa lhech yucuve ninôveyshi pa yicap'ofiyanshi pa môôjelhch'e pava napu'yama nalhus. Lhayaash ti lhech t'aplhuqu'e ja jive'cla ti Abib, lhayaash ti lhech pa lhech jive'cla ti tay'e pa Egipto. Pa ampapu ca tsi'shaasha'ne ca nincha'ja pa'na.

16“Pa caaj shta pa vatshamitjayashesh ti chitc'aeshva'ne pava vatjutsa' vatcavcalhech, pava vatjutsa' lhay pava chiycôjiyanshi pa tavashay.*xr* Pa lhech lhjunash shta pa yôjesh'esha'ne nincôôp ti chitc'aeshva'ne pava nijooylha ti chiycôjiyan ti lhech yôj'e'.*xs*

17“Pa lhacôm'a papi nivacle pa tajulhey ca nôv'e' t'ajuyish ts'ivee pa Lhcaanvacle pava pu'jana'esh ti tc'aeshva'ne ti ve'lha nincôôp.

18“Pa vooy ca asnatajeshyam pa acufayjat pa aclô', pa ya aj ca anamjateshnee pava lhavoyey shi' lhpa yucuve ninôveyshi pa yicap'ofiyanshi, pa ya aj ca asclan pa lhôtje pa ajuyjata peelh nalhu.

19“Pava ya'shesh ti isis lhcôjiyan pava vatjutsa' lhay pa istaa ca acha'jey ja lhishjanjavat a Dios.*xt*

“Pa ya aj ca nitatayeshc'oya pava tashinshtayche lhcles pa lhtsoos lhpa lhamimi.*xu*

Pa lh'ángel pa Lhcaanvacle

20“A'va yivaatsha jachen'ay jayu na yi'ángel ca nôv'e' ajuyish, pa jaspa ninujumatsen'ash yiey na nôyish, ca jaspa nacha'jey pa lhôv'e' jayu, pan chiyisclansha'ne'am. 21Pa ya aj ca atojeema pa lhech; anc'ashamesh pa ya aj ca ni'ujana, lhayaash papu ca ninu'tajeesha na yey pa tanca nivômjatelhch'e'am pava asasch'eclelh avaatsheelh. 22Taj ti ca c'avantajelh ti lhanc'ashamshelhyam ca asnatajeshelh lhacôm'a cava jayôjeeshelh'a pa tanca yic'utsfaaesh papi naac'utsfaseelh, pa c'ashjatelh'apee jayu papi yaashtajelh'atapee. 23Na yi'ángel vanôyin'ac'oya jayu ca nacha'jey ja lhavtsaat japi amorreos shi' japi hititas, japi ferezeos, japi cananeos, japi heveos shi' japi jebuseos, japi lhech jayjat'e jayu jô. 24Pa ya aj ca môôja pa niysa' lhfanishlhavach japi lhech. Pa ya aj ca acjatsuy'e t'ajuyish pava yidiosiyan, pa ya aj ca ôclôj shta pava lhech. Pa istaa ca avômjatsha'ne lhacôm'a pava lhech utes lhasnôyjes. 25Ôclôj na anvacle Dios, na lhech nefenesh jayu lhpa ayucuve shi' pa avinôt.

“Pa jatontey'am jayu pa vatayyash. 26Pa jasnatesh'am jayu ca ni'avafa ca amtajeeyjop pa a'nalhu. Pa tanca nôvji' jayu shta na avtsaat lhpa ve'lha ôcjeclô ca nitônômat, pa amlhapa jayu shta ca ôcts'ôtachea.

27“Yivaatsha jatontey'am jayu pa vatjovayi pa chiypeya' jayu pa t'ôjôj papi ninfiiysha'ne ti yie'ajuyish pa ca nôôvtaj'e pa yitsaat yiey pan lhatjuyshi. Pa jasnatshelh'am jayu papi naac'utsfaseelh ca niclotelh'ac'oya. 28Jasnatesh'am jayu pa ca anaashtaj'e ca ninfi'yasha'ne pa jaspa niclôt'ac'oya japi heveos, japi hititas shi' japi cananeos. 29Tanca yifanisheesh'in ca yayjatshi pa ve'lha yincôôp, ca ya aj ca chinac'oyesh ja cotsjaat, ca jaspa ya aj ca aclojee pava yaquisetes suy ca jaspa ninu'elh'a. 30Pa yajatesh jayu ca juc'aan ca c'ac'uyjatelh pa vooy ca amtajelhey ca aclojtajeelh papi acleselh, pa lhecheesh pa amelhey lhac'o na cotsjaat. 31Pa janôôclhanitey jayu pava yôj'esha'ne pa acootsjat'elh: Yôj'e' jayu ja Tovôc Yucshi pa yamey jayu ja tovôc yitsôt'ajesh japi filisteos, pa yôj'e' shta ja cotsjaat ampa ca nôv'e' pa yôj'e' jayu shta ja tovôc Éufratas. Yivaatsha qu'efenesh jayu japi lhech yie' ja yitsaat pa lhclôtsjatelh jayu japi lhech.

32“Ya aj ca môôja pava lhfanishlhavach papi lhech, pa ya aj na shta pava yidiosiyan. 33Ya aj ca an'ateelh ca nôvji' pa avtsat'elh, jaspa tanca nasnatshiyinesh pa sasch'e, ca jaspa ajuyeshyijulh. Pa jaspa ya aj ca amjelhey ca ôclôjelh pava ca adiosiyanelh, jaspa tanca nacuclôntajelh'in.”

Currently Selected:

Éxodo 23: NIVA

Highlight

Copy