Felepiɛŋ 2

Kôrai ŋɔmaa-yeŋ da ŋɔmaa-tɛi

1Mɛni ma à kɛ̀ ŋa-nɛnɛ káa Kôrai kponôi, wɛli-kɛ-maa kpɔŋ-maa, kámɔlêŋ ni ka-kɛ-zu-tɔnɔɔi, da wɛli-kɛ-maa, é pɛ́lɛ maloŋ-kaa ma, 2ka ŋálii-nɛ̃ɛi lá fɛ́ɛ a kili-ŋa-sia tɔnɔ, wɛli-kɛ-maa tɔnɔ, a gɛ́ɛ ká kɛ́ zu tɔnɔɔ kili-ŋa-sia tɔnɔ é kɛ́ káyêei. 3Káfe ŋɛi-kpala-mɛni kélee da kɛ̀ kpaa máŋ yoŋka-mɛni kélee, kɛ́lɛ, ka kákpîŋ maa yeŋ, ka káƃarâai siɣe a nûa lɛ́lɛɛ e tɛɛ káa kpîŋ kâa. 4Káa tɛi-tɛi ŋí káfe kákpîŋ-mɛni su kàa nɔ́, kɛ́lɛ ka káƃarâai dímɛni su kaa máŋ. 5Gili-ŋa-siai ŋí kɛ́ kákili ŋá, nyíi kɛ̀ Zîsɛ Kôrai kponôi. 6Berei máŋ è kɛ̀ la a Ɣâlai, ve kánaŋ ni Ŋɔɣâla-laai ma. 7Kɛ́lɛ, e Ŋɔɣâla-mɛnii làa, é gbîŋ kɛ́ yɛ̂ɛ luɛ. Dí zɔlɔ ƃo yɛ̂ɛ núu-kpune. 8Gɛ́ɛ yɛ̂ɛ núu-kpune, è gbîŋ maa yeŋ é kɛ́ a woo-mɛni-nuu. Ŋɔwoo-mɛnii ŋí è gɛ̀ kpɔ́ é fáa a gɛ́ɛ é sáa. È sàa máŋ wúru su-tíyeŋɔɔ ma. 9Maa-mɛni ma Ɣâla è m̀aa tɛ̂ a gɛ́tɛ, é láa see ma nyíi dɛɛ̂i láa kélee mai, 10a gɛ́ɛ Zîsɛ láai su núu kélee dí pɛlɛ díŋumɛ ŋá, diai kélee díkaa ŋ̀elei sui, kpaa máŋ diai kélee díkaa ǹɔii mai, kpaa máŋ diai kélee díkaa ǹɔii mu-perei, 11a gɛ́ɛ ŋɔ́nɔ la-gbɔ kélee é m̀o a gɛ́ɛ Zîsɛ Kôrai káa a Kúnuu-namui Kúnâŋ-Ɣala ŋɔfólo-laai mɛni ma.

Díkaa fólôi yɛ̂ɛ kwaa-ponoɔɔ ŋ̀éniɛi su

12Mɛni ma ŋáwɛli-kɛ-maa-ƃelai, yɛ̂ɛ berei ka wɔ́lɔ woo mɛni kɛ̀ lai, ka nâa kákpîŋ ƃalo-laa kɔri a yao-maa da maa kpɛ̃liŋ. Vè kɛ̀ nɔ́ a ŋ́ɛi, kɛ́lɛ, fɛ̂ɛ nɔ́ ká gɛ́ máŋ ŋ́ɛi pôlu. 13Kpɛ́ni fêi, Ɣâla káa tíi kɛ̂i kákponôi a gɛ́ɛ ká ŋɔnîa-mɛnii kɛ́ ká tíi kɛ́ ŋɔnîa-mɛni lɛ́lɛɛi mɛni ma.

14Ka mɛni kélee kɛ́, káfe káŋuŋ-su-woo sàa, káfe mare-kɛɛ kɛ̀, 15a gɛ́ɛ kásɔŋ fè kɛ̀ kâa kámaa é waa, kákɛ a Ɣâla ǹônii nyíi-ŋai dísɔŋ fé diai, tãi kákaa la ŋulu-ƃelai da moo-ƃelai sama, nyíi-ŋai ka fôlo dísama yɛ̂ɛ kwaa-ponoɔɔ ŋ̀éniɛi sui. 16Ka vulu-laa-wooi sóŋ a gbanaŋɔɔ, a gɛ́ɛ tãi Kôrai ŋɔɣelei a seri lai, ŋá kɛ́ a ńii nɛ̃ɛ a gɛ́ɛ fé kîrɛ sìɣe ni kpɛni, kpaa máŋ fé tíi kɛ́ ni kpɛni. 17À kɛ̀ máŋ da ŋ́ãa pù zâla-sɛŋ ma nyíi gáa a kálaa-lai da kátii kɛ́ɛ Ɣâla mɛni mai, ńii nɛ̃ɛ̂i kwa kâa-ni kú kɛ́ lii-nɛ̃ɛ kula kúkelee. 18Bere nɔ́ ƃe fɛ̂ɛ káa máŋ kálii é nɛ̃ɛ la kwa kâa-ni kú lii-nɛ̃ɛ kula.

Temete da Ipafulɔditɔ

19Kili-kɛ-zu káa ńyêei Kúnuu-namui Zîsɛ kponôi a gɛ́ɛ ŋá Temete tɛɛ kápɔ naa a maa félaa a gɛ́ɛ ńii é nɛ̃ɛ a kámɛi-tuŋ mɛniɛɛ. 20Núu da fé ńyêei é kɛ́ yɛ̂ɛ ǹyaa, nyíi gbaaŋɔɔ̂i kámɛni ma kpɔ́ a tɔ̃yâi. 21Da díkpîŋ-mɛni su kàa, kɛ́lɛ, Zîsɛ Kôrai ŋɔi fei. 22Kɛ́lɛ, Temete káa a tii-kɛ-nuu lɛ́lɛɛ, ka gɔ́lɔŋ, berei kwa ǹyaa kwa tíi kɛ́ la Duŋ Lɛ́lɛɛi su yɛ̂ɛ loŋ-nuu da nàŋ-nuui. 23Mɛni ma gáa ŋ́gili ŋá a gɛ́ɛ ŋá dɛ̀ɛ kpɔ́ a maa félaa à kɛ̀ ŋà mɛ̀ni berei ḿaa-mɛni a pâi kɛ̂i lai. 24Ŋ́gili káa Kúnuu-namui ma a gɛ́ɛ ńyãa kpîŋ máŋ ŋa pâi naa nɔ́ tãi kpua yêe mu.

25Ŋa ŋ́gili ŋá sía ŋa gáa a gɛ́ɛ ǹɛ́lɛɛ̂i ŋa Ipafulɔditɔ tɛɛ kápɔ naa. Gáa a ḿarâŋ nuu, gɛ ƃo a ḿarâŋ tii-kɛ-nuu. Gáa ŋɔ́nɔ a ḿarâŋ-kɔkuluƃa. Gáa a kákela da ŋákpɔŋ-mâa-nuu. 26Kpɛ́ni fêi, è kɛ̀ ŋ̀wɛ̂lii é kákelee kákaa kpɔ́ a maa félaa, ǹyaŋ mɛni-kpɔ̂lu è kùla ma, kpɛ́ni fêi, ká mɛ̀ni a gɛ́ɛ è kɛ̀ kɔ́lɛ̂i. 27Tɔ̃yâ ma è kɛ̀ kɔ́lɛ̂i. È kɛ̀ pâi saâi. Kɛ́lɛ, Ɣâla è m̀alôŋ kàa. Ǹyaa tɔnɔ nɔ́ fei, kɛ́lɛ, è ḿalôŋ kàa ńyãa máŋ a gɛ́ɛ malôŋ támaa fé tôo má. 28Mɛni ma ŋa ŋ̀wɛ̂lii kpɔ́ a gɛ́ɛ ŋa dɛɛ a gɛ́ɛ kà gàa ka lii-nɛ̃ɛ kula ŋɔ́nɔ, a gɛ́ɛ ŋɔ́nɔ ńii fé sɛlɛŋ a dámaa. 29Mɛni ma ka káyee see mù a lii-nɛ̃ɛ Kúnuu-namui kponôi. Ka ƃâa kɛ́ núu kɛ́ɛ ŋí ma. 30Kpɛ́ni fêi, è kɛ̀ pâi saâi Kôrai ŋɔtíi mɛni ma. È ǹɛ̃wo see a sɛɣɛ a gɛ́ɛ é kákpɔŋ-mâai láa fɛ́ɛ ḿɛni ma.

Currently Selected:

Felepiɛŋ 2: KWB

Highlight

Copy