Lûu 4
4
Zîsɛ ŋɔsu-kɔɔŋ
(Maafîu 4:1-11; Mâki 1:12, 13)
1Zîsɛ e kùla Zɔdiŋ Ya-leei ma e pene pôlu, ǹáa fɛ̂ɛ a M̀ɔlêŋ Maa Waai. Nya ƃe M̀ɔlêŋ e lì la vɛ̃ɛ-kpâlaŋ su. 2E gɛ̀ naa a ɣele-kuu buu náaŋ, Dɛ̂ƃele kɛ́ zu kɔɔŋ. Maa-ɣele-ŋai ti su Zîsɛ fé sɛŋ da mii ni. Díkɛɛ da kpɛɛi, puru e gɛ̀. 3Nya ƃe Dɛ̂ƃele e mò ma, ǹyɛɛi, “À kɛ̀ íkaa a Ɣâla Ǹóŋ, gɔnii ŋi kɛ́ e pene a kpólo.” 4Zîsɛ e ŋ̀óo su tòo, ǹyɛɛi, “Bɔ̃yɛɛ̂i, ‘Núu fa ŋɔfúlu-laai kɛ̀ nɔ kpólo mii-mɛni ma.’ ” 5Gɛɛ ti, dɛ̂ƃele è zìɣe e tɛ la ɣelêi, e ŋ̀éniɛi su-kaloŋ-laai kélee lɛ ma a naa maa felaa a tãi tɔnɔ, 6nya ƃe Dɛ̂ƃele e mò ma, ǹyɛɛi, “Ŋa pâi ŋwála-wala-laai ŋi kélee tɛɛ̂i ípɔ bɛlɛɛ dífolo-laai ma, kpɛ́ni fêi, dɛɛ̂i ḿbɔ, ǹyaŋ, ǹúui kélee ŋa ŋ̀wɛli ŋa dɛɛ bɔi, ŋa dɛ̀ɛ bɔ. 7À kɛ̀ yà pɛ̀lɛ ŋ́gɔɔ mu, gélee a pâi kɛ̂i a ípɔɔ.” 8Zîsɛ e ŋ̀óo su tòo, ǹyɛɛi, “Bɔ̃yɛɛ̂i,
‘Ínuu-namui Ɣâla fɛli
í tíi kɛ́ nɔ mì ǹyaa tɔnɔ.’ ”
9Gɛɛ ti, e lì la Zerusâlɛŋ, é zee kpɔ́ Ŋ̀âla-pɛrɛ Kɛ́tɛi tôŋ su póŋ-póŋ, ǹyɛɛ mai, “À kɛ̀ íkaa a Ɣâla Ǹóŋ, kula í too, 10kpɛ́ni fêi, bɔ̃yɛɛ̂i, ‘A pâi ŋɔkéla-ŋai tɛɛ̂i ípɔ a gɛɛ dí ímɛi kaa.’ 11Bɔ̃yɛɛ̂i ŋɔ́nɔ, ‘Da pâi díyee seêi ímu dí li a yá a gɛɛ ífa lâa íkɔɔ tua la kɔni ma.’ ”
12Zîsɛ e ŋ̀óo su tòo, ǹyɛɛi, “M̀ôɔi, ‘Ífe Ínuu-namu Ɣâla su kɔ̀ɔŋ.’ ”
13Dɛ̂ƃele kɛ́ɛ a kpɛɛ ŋɔsu-kɔɔŋ sii kélee mai, è siɣe gɔ̀lɛ é lí é lɛɛ la zu é tãi lɛ́lɛɛ kaa.
Zîsɛ è pɛ̀lɛ ŋɔtíi ma
(Maafîu 4:12-17; Mâki 1:14, 15)
14Nya ƃe Zîsɛ e pène pôlu M̀ɔlêŋ ŋɔwala-walai su, e li Galalii-lɔii su. Nya ƃe maa-tuŋ e tàa ǹɔii kɔlɛ ma gwaa kélee. 15E Ɣâla-woo lɛ̀ Díɣâla-fɛli-kêre-ŋai mu, díkelee dí ǹáa maa tɛ.
Dí dípôlu tɔ̀ɔ Zîsɛ ma Nâzarɛ
(Maafîu 13:53-58; Mâki 6:1-6)
16Nya ƃe e pà Nâzarɛ ƃɛi dí wɔ́lɔ ŋ̀á kɔ̀ŋ naai. Yɛ̂ɛ berei e kâa gɛ̀ lai, e lì Ŋ̀âla-fɛli-kerei mu a Vii-tɔɔ-ɣelei. E m̀u sìɣe e tɔɔ a gɛɛ e kɔlɔ lono. 17Nya ƃe, dí Ɣâla ŋɔlóno-kɛ-nuui Azaya ŋɔkɔlɔi tɛɛ bɔ. E gɔlɔi lá ƃò, e ƃɛi kaa dí bɔ̃̀yɛ naa, dîyɛɛi,
18“Kúnuu-namui Ŋɔmɔ̂leŋ Maa Waai kaa ḿɛi,
kpɛ́ni fêi, a wulɔ pu ŋ́ûa a gɛɛ ŋa tuŋ lɛ́lɛɛ ƃo gôlo-ƃelai dîa.
A ńdɛɛ a gɛɛ ŋá ŋuŋ-ma ƃo-mɛni ƃo gɔ-soŋ-ŋai dîa,
ŋá ŋɛi-pu-ƃelai díkwaa káa mɛni ƃo,
a gɛɛ ŋa ǹûai ŋuŋ ma ƃó diai díkaa mɛni kpɔ̂lu sui,
19a gɛɛ ŋá Kúnuu-namui ŋɔyee-see mu-koraŋ maa-mɛ̂ni ƃó.”
20Nya ƃe è gɔlɔi kpîniŋ é dɛɛ gɔlɔ mɛi-kaa-nuui pɔ́ pôlu, é sée. Ǹûai kélee kɛ̀ Ŋ̀âla-fɛli-kêrei mui, dí díŋɛi pìlaŋ mà. 21E pɛ̀lɛ lonoɔ ma dípɔ, ǹyɛɛi, “Sâai ŋi ƃe Ŋ̀âla-wooi ŋi ŋa-see a nâa kɛ́ la káwôlii.” 22Díkelee dí ǹáa maa tɛ̂. Dípɛlɛ e pù e pìlaŋ mɛlɛ-see woo-ŋai dîa kùla ǹái. Nya ƃe dí mò, dîyɛɛi, “Zosɛ ǹóŋ fei ŋi?” 23Gɛɛ ti e mò, ǹyɛɛi, “Tɔ̃yâ ma, ka pâi zaŋ ŋi sɔɔ̂i mî, ‘Sále-kɛ-nuu, ye íkpîŋ ƃálo. M̀ɛni-ŋai kélee kwa mɛni a gɛɛ í gɛ̀ Kapɔ̂niai ye gɛ́ ƃɛ íkpɔɔi-lɔii su.’ ” 24Kɛ́lɛ, e mò, ǹyɛɛi, “Tɔ̃yâ ma, ŋá m̀ó kâa, Ɣâla ŋɔlóno-kɛ-nuu da kélee fé naa ƃâa e kɛ́ mà gbɔɔ̂i-lɔii su. 25Ŋá m̀ó kâa a tɔ̃yâ, pɔɔ-nɛni támaa dí kɛ̀ Eezuɛ-lɔii su Ilaiza ŋɔtãi su, tãi ŋele-kɔlɔŋ lá e tɛ̀ la a kóraŋ saaƃa ɣáloŋ lɔ́ɔlu mɛi dai, puru kɛ́tɛ e pà ǹɔii gwaa kélee, 26kɛ́lɛ, dífe Ilaiza tɛɛ ni díta tɔnɔ pɔ naa, fɛ̂ɛ pɔɔ-nɛni tɔnɔ nyii kɛ̀ Zarefa Sidɔŋ-lɔii sui. 27Gbôdo-ƃela támaa dí kɛ̀ Eezuɛ-lɔii su Ɣâla ŋɔlóno-kɛ-nuui Ilasa ŋɔtãi ma. Kɛ́lɛ, díta tɔnɔ fé ƃalo ni fɛ̂ɛ Siria-naloŋ Neemaŋ.” 28Tãi dí m̀ɛnii ŋi mɛ̀ni lai, diai kɛ̀ Ŋ̀âla-fɛli-kerei mui dílaa e fɛ̀ɛ a lii-ŋwana. 29Dí dímu sìɣe dí gbɛ daai su, dí li la ǹyéei tôŋ su botoi mɛi, ƃɛi dítaai e kɛ̀ a dɔɔ naai, a gɛɛ dí bili e pîlaŋ a dôŋ. 30Kɛ́lɛ, e tɛ̀ɛ dísama e li.
Nyînaŋ nyɔ́mɔɔ kɔlɔ-fela-naloŋ
(Mâki 1:21-28)
31Gɛɛ ti, e lì Kapɔ̂nia Galalii-lɔii su, e Ɣâla-woo lɛ dîa Vii-tɔɔ-ɣelei ma. 32Nya ƃe dípɛlɛ e pù a ŋɔsɛŋ-lɛɛi, kpɛ́ni fêi, ŋ̀óoi e kɛ̀ a wala-wala-laa. 33Nalôŋ tɔnɔ ƃe kɛ̀ Ŋ̀âla-fɛli-kerei mu, nyînaŋ nyɔ́mɔɔ kɛ́ ƃo bôlu. È làɣi a ŋ̀óo su kɛ́tɛ, 34ǹyɛɛi, “Aá, Nâzarɛ Zîsɛ, lé mɛni ƃe íyeêi í gɛ a kûa? Ya pá a gɛɛ í kúsu kara? Ŋa íkɔlɔŋ. Yá ƃa Ɣâla Ŋɔnúu maa waai.” 35Kɛ́lɛ, Zîsɛ e gbèra, ǹyɛɛi, “Ímɛi sáa, í siɣe bôlu!” Nya ƃe, nyînaŋ nyɔ́mɔɔi e nalôŋ tôo ǹɔii ma ǹûai sama, e siɣe bôlu, ve ŋ̀wana ni. 36Nya ƃe díkelee dípɛlɛ e pù, díkɛ lono díkîe-ni pɔ, dîyɛɛi, “Lé wôo ƃe ŋi? Kpɛ́ni fêi, a lôno nyînaŋ nyɔ́mɔɔ-ŋai pɔ a wóo kpanaŋ da wala-wala-laa, dí kula ǹûai pôlu.” 37Nya ƃe maa-tuŋ e tàa ǹɔii gwaa kélee ma naa kɔlɛ ma.
Zîsɛ e Pitɛ ǹyuâra ƃàlo
(Maafîu 8:14-17; Mâki 1:29-34)
38Nya ƃe e mu sìɣe e kula Ŋ̀âla-fɛli-kerei mu, e lɔ Samaŋ ŋɔpɛ́rɛi mu. Samaŋ ǹyuâra kɔlɔ e kɛ̀ a vãa ma a ŋánaa. Nya ƃe dí m̀arê kɛ̀ a gɛɛ é kpɔŋ ma. 39Nya ƃe e tɔ̀ɔ m̀ɛi e lono gɔlɔ-fãa-maai ma a gbanaŋɔɔ. Gɔlɔ-fãa-maai ǹyaŋ e tee ma. A naa maa felaa e mu sìɣe, e dímii-sɛŋ kpɛtɛ.
Núu támaa dí ƃàlo a ɣele-wulii
40Volo-kaoi kɛ́ɛ toôi, ǹúui kélee kɔlɔ-fela-nuu e kɛ̀ ǹyêei, dí pà a dia bɔ. Nya ƃe e ǹyée pɛlɛ díkelee dîa tɛi-tɛi e díƃalo. 41Ǹyînaŋ nyɔ́mɔɔ-ŋai máŋ dí kùla dámaa-ɣele pôlu. Dí kɛ̀ wɔ́lɔ̂i, dîyɛɛi, “Yá ƃa Ɣâla Ǹóŋ!” Kɛ́lɛ, e díkpèra, ve faa ni a gɛɛ dí lono. Kpɛ́ni fêi, dí gɔlɔŋ a gɛɛ ǹyaa ƃe kɛ̀ a Kôrai.
Zîsɛ è lì Ɣâla-woo ƃo-sia ma
(Mâki 1:35-39)
42Ɣele kɛ́ɛ a ƃɔ́i e kùla naa e li dɔnɔ kwaa ma. Nya ƃe gbɔŋ-su-ƃelai dí kɛ̀ gɔ́rii, dí pa bɔ, díkɛ kɔ a gɛɛ dí gbera va lâa dílɛɛ la naa, e li. 43Nya ƃe e mò dîa, ǹyɛɛi, “Fɛ̂ɛ ŋa Ɣâla ŋɔkâloŋ-laai maa-tuŋ lɛ́lɛɛi ƃo daai gbeli-ŋai su máŋ, kpɛ́ni fêi, maa mɛni ƃe dí ńdɛ̀ɛ la.” 44Nya ƃe e kɛ̀ Ɣâla-woo ƃôi Ŋ̀âla-fɛli-kêre-ŋai mu Zuda-lɔii su.
Currently Selected:
Lûu 4: KWB
Highlight
Share
Copy
Want to have your highlights saved across all your devices? Sign up or sign in
