Zôo 28
28
Táre maa laa maa tɛ
1“Kwaa mâ káa naa ƃɛ́i núu a pɔ̂ri káne kulâi naai.
Kwaa mâ káa naa ƃɛ́i núu a pɔ̂ri gôo seɣenii naai.
2Kɔli-kula ƃela da ǹɔii síŋ dí kɔli kúla naa.
Dí kɔni séɣeŋ dí ƃara kúla zu.
3Da lɔ́ kpɔ́ ǹɔii mu ƃɛ́i naa kpíniɛɛi,
díkɛ ǹɔii kpóŋ ma kɔ̀ri,
díkɛ ǹɔii sîŋ gbíni su kɔni mɛ̂ni ma.
4Da lí kpɔ́ kwaa koyâa ma ƃɛ́i núu fa kɛ̂ naai,
dí ǹyêei su síŋ.
Da kɛ́ naa díkɛ tíi kɛ̀ dítee-tee kwaa ma.
Dí kɛ́ ƃò sɛlɛni ɣɛli ma díkɛ lì díkɛ pa ǹóai su.
5Mii-sɛŋ a lɛ̂lɛ ǹɔii ma.
Kɛ́lɛ ǹɔii mu pere karâi yɛ̂ɛ sɛŋ ƃé ŋɔŋ a ǹaa kèreŋ.
6Sãâ sɔ̃ɔ kpanaŋɔɔ-ŋa díkaa gɔni-ŋai ŋí su.
Gôo fũa káa máŋ dísama.
7Ŋɔni sôŋ ŋɔni da fa berei kâa nyii a lî gɔni kuláai ŋí sui.
Kpãaŋ kpîŋ fé tá naa káa-ní.
8Lɔ̀ɔ-fɛnɛ-sãa dífa sia a berei kpîŋ.
Yala-sulu fé tá sia ní a berei ŋí.
9“Gɔni siŋ-ƃelai da gɔni kpanaŋɔɔi ŋai sîŋ,
dí ǹyée-ŋai pene dí bɛlɛ.
10Da lóa tèe gɔni-ŋai su,
dí gɔni-ŋai maa kpɛ́ɛ a ǹɛ́lɛɛ kɔni-sɔ̃ɔ kpanaŋɔɔ-ŋa mɛni ma.
11Da ǹyái ɣìri a gɛɛ ve ɣîliŋ.
Da gɛ̀ tí dí zɛŋ káa nyii da gɔ̂rii.
12Kɛ́lɛ, mí ƃé núu a táre kàa naai?
Kɛ́lɛ, mí ƃé kwa mɛni-ŋa káa maa kɔ̂ri naai?
13“Núu fa táre kàa núu-kpune-ŋa sama.
Núu da fé zɔ̃ɔ kpîŋ-kpîŋ kɔ́lɔŋ.
14Ǹyá lêei da m̀u-pere kélee dí m̀o dîyɛ
táre fé díyêei.
15Núu fa táre yà a gôo,
kpaa máŋ a káne.
16Núu fa ǹya a gôo
kpaa máŋ kɔni sɔ̃ɔ kpanaŋɔɔ.
17Zɔ̃ɔ kpanaŋɔɔi é tɛ̂ɛ gôo da mɛ̃lɛ-mɛ̃lɛ lɛ́lɛɛ dîa.
Núu fa pɔ̂ri maa fáleni a gôo-sɛŋ folo sɔ̃ɔ kpanaŋɔɔ.
18Táre sɔ̃ɔ kpanaŋɔɔi é tɛ́ɛ
kɔni lɛ́lɛɛ sɔ̃ɔ kpanŋɔɔ ma.
19Núu fa pɔ̂ri târe kɔ̂ɔni
kɔni sɔ̃ɔ kpanaŋɔɔ kɛ́ɛ yɛ̂ɛ tópazi da gôo lɛ́lɛɛ dîa.
20“Gɛ̀ ní mí ƃé táre è kùla naai?
Mí ƃé kwa mɛni-ŋa káa maa kɔ̂ri naai?
21Fûlu-sɛŋ da kélee da fa gàa.
Ŋ̀ɔni-ŋai da kwaa kâa a ŋánaai, dífa gàa.
22Saa da su-kara
dí m̀o a gɛɛ duŋ nɔ́ ƃé da mɛ̀ni.
23“Ɣâla ǹya tɔ̂nɔ nɔ́ ƃé berei kɔlɔŋ.
Ǹya nɔ́ ƃé ƃɛ́i kɔlɔŋ táre káa naai.
24Ǹyaa nɔ́ ƃa ǹɔii kɔ̃yɛ̂ŋ ma kàa.
Ɣâla ǹya tɔ̂nɔ nɔ́ ƃa sɛŋ kélee kâa ǹɔii ma.
25Tãi Ɣâla è wála-wala laa tɛ̀ɛ la vãai pɔ́i,
è yúo ŋɔ ŋa kɛ̂tɛi kɔ̃yɛ̂ŋ lɛ̀.
26Tãi Ɣâla è ƃɛ́i lɛ̀ la a gɛɛ tuna é pú naai,
è berei lɛ̂ ƃɛ́i ŋ̀ele-gbana-kao a tɛ̂ɛ naai.
27M̀aa tãi tí ƃé è táre kâa la, é ŋɔwála-wala-laai su kɔ̂ɔŋ,
é ǹyée sée m̀aa mɛ̂ni m̀u.
28“Ɣâla è m̀o núu-kpune ma
a gɛɛ à kɛ̀ ŋ̀wɛ̂lii é táre sɔlɔ ƃó, fɛ̂ɛ é yao ǹyaa Ɣâla ma.
À kɛ̀ ŋ̀wɛ̂lii a gɛɛ é táre, fɛ́ɛ é bôlu tɔɔ mɛni nyɔ́mɔɔ kɛ́ɛ ma.”
Currently Selected:
Zôo 28: KWB
Highlight
Share
Copy
Want to have your highlights saved across all your devices? Sign up or sign in
