Zôo 15
15
Dí zɛpɛ-wooi veerɛi
(15:1--21:34)
Ɛlifa è lòno Zôo pɔ́
1Tema-nuui Ɛlifa è Zôo wóo su tòo ǹyɛɛ mai,
2“Zôo, táre-nuu kɛ́ɛ yɛ̂ɛ yá fé kɛ̀ lônoi nyii ŋuŋ fé ma.
3Zôo, ífe lòno nɔ́ kpɛ́ni,
kpɛ́ni fêi, ífe pâi sɛŋ da kulâi ílono-woo su.
4Ya Ɣâla ŋɔyao-maai mɛni foɣânii yâ.
Ya Ɣâla fɛli mɛni kɛ́ a gbanaŋɔɔ ǹûai ŋɛ́i.
5Ya lônoi a bere-sii tí kpɛ́ni fêi,
í ŋwana-lɔ̂ɔi. Ínɛŋ káa íla feerɛ.
6Ḿve ímɛnii ŋá tée-ni.
Íkpɔɔi wooi ƃé m̀ɛnii lɛ̂ɛ yâ.
7“Zôo, yá ƃa núu-kpune maa-ŋuŋ nyii díwɔlɔ maa sɔlɔ ƃôi?
Díwɔlɔ ímaa sɔlɔ ƃô Ɣâla é lɛ́ɛ pâi ǹyée-ŋai kpɛtɛ̂i?
8Tãi Ɣâla è ŋɔkɔyɛŋ tòo la Ɣâla-taai íkɛ̀ naa?
Í íwoli tɔ̀ɔ m̀ɛnii ma è kɛ̀ môi?
Ya tɔnɔ nɔ́ ƃa ǹúui nyii dáreɛɛ̂i?
9M̀ɛnii í gɔ́lɔŋ da fé naa nyii kúfe gɔ́lɔŋ.
Ǹyaŋ m̀ɛnii nyii kélee í gɔ́lɔŋ, kúa máŋ kú gɔ́lɔŋ.
10Táre-ƃela pɔlɔ-pɔlɔ-ŋa nyii-ŋai díkɛ̀
a dítɛɛ ínâŋ mai ƃé wɔ́lɔ dárei ŋí lɛ̀ kûa.
11“Íkaa niî ŋánɛnɛ da kpɛ́ni wɛ̂lii é tée Ɣâla ŋɔi mâ?
Kúlòno ípɔ a maa-yeŋ pere.
12Lé mɛni ƃé ílii a kɔ̂i la ípɔi?
Lé mɛni ƃé ya íŋɛi-gao kulâi la kûai?
13Lé mɛni ƃé ílii ŋwânai la Ɣâla ma
íkɛ wóo-ŋa kɛ́ɛ tí ƃò mai?
14“Núu da fé naa nyii maa waai.
Núu da fa pɔ̂ri kɛ̂i a deniŋ ƃôɔɔ Ɣâla ŋɛ́i-tuɛ.
15Gáa a tɔ̃yâ a gɛɛ Ɣâla fé láa ní a gbîŋ kela-ŋai.
Dí maa fé waa ní ŋ̀ɛi-tuɛ.
16Núu-kpune láa fɛ̂ɛi a sɔnyɔ̂ŋ.
A sɔnyɔ̂ŋ kɛ̀ a zu kɛ́tɛ yɛ̂ɛ núu ƃé yá kpelêi.
17“Íwoli tɔ́ɔ.
Ŋa pâi mɛni da ŋáa lɛ̂i yâ nyii ŋaâ gaai.
18M̀ɛnii dáre-ƃelai dí mò ḿâi ŋá gɔ́lɔŋ.
Zɛŋ-lɛɛi nyii dáre-ƃelai dí gɛ̀i è kùla dínâŋ-ni yêei.
19Ɣâla è ǹɔii ŋí tɛ̀ɛ nɔ́ dáre-ƃelai pɔ́ dítee-tee.
Ǹyaŋ lɔii da kpɛ́ni su nuu da fé tá gɛ́ ní dí kúla Ɣâla pôlu.
20“Ɣâla a ŋ̀wana-lɔ̂ɔ-ƃelai kula maa kɛ̂.
Da pâi lɛɛ̂i mɔ̃lɛ̂i é lɛ́ɛ la zu dí saa.
21A núu maa yao-woo sii támaa mɛni.
Tãi nɔ́ a gàa la yɛ̂ɛ sɛŋ ƃé ŋuŋ ma ƃôɔɔi lai,
maa tãi tí ƃé ŋúma-ƃela da pɛ̂lɛ la mà.
22Pere sii kélee da fé naa ǹúu nyɔ́mɔɔi tí é pú saa yêei.
Núu da a kɛ̂ nɔ́ maa kpɛnîi a gɛɛ é bàa a ƃóa-sɔ̂kpɔ.
23À kɛ̂ ɣilînii gɛ́ gɔ́nɔŋ kɔ̀ri.
È gɔ́lɔŋ a gɛɛ núu da a pâi baâi.
24Mɛni kpɔ̂lu a pâi lâai mà gbínii su.
Ǹíi a pâi toôi pôlu, malôŋ é tóo mà yɛ̂ɛ kâloŋ kpɔara-ƃela da kɔ́ pɛ̀lɛ mà.
25È Ɣâla maa fôo a gɛɛ va pɔ̂ri tɔɔ̂i ŋ̀ɛ́i namu su.
È nɛ̀ a gɛɛ a pɔ̂ri tɔɔ̂i Ŋ̀wála-wâla kélee Ɣalai ma.
26Ŋ̀wana-lɔ̂ɔ-nuui a gbîŋ maa kɔ̃̀ɔ
é kirɛ̂ siɣe gɛ́ lì pɛlɛ̂i Ɣâla ma.
27Gbono kɛ̂tɛi, dɔ́ɔ, gɛ́tɛɛ gbîŋ ŋɛ́i.
28“Gáa taa pîleŋ ŋá nyii zu-ƃelai da wɔ́lɔ pui.
Gɛ́ nyìi pɛ́rɛ-ŋa mu nyii maa fé nɛ̃ɛ ní núu é nyíi mui.
29Vé pâi lɛɛ̂i a dɔɔ a tãi su kôyaa.
Ŋɔtɔɔ-sãai su a pâi karâi.
30Vé pâi pûi gbínii yêei.
A pâi kɛ̂i yɛ̂ɛ wúru, ǹyaŋ ŋɔŋ a pâi ŋ̀owo kérenîi.
Ɣâla a pâi vɛ̂ɛi a ǹɛ̂wo.
31Vé gíli tɔ̀ɔ ŋɔtɔɔ-sãai dîa.
A gɛ̀ tí, da pâi bɛlɛ̂i.
32Gáa yɛ̂ɛ wúru-woŋo a kpàla
ŋɔtãi é lɛ́ɛ pâi serîi nyii vé ŋɔ́nɔ pâi kɛ̂i a ŋúnu.
33A pâi kɛ̂i yɛ̂ɛ ƃá-kpɔmɔ nyii m̀á a pû mù
é lɛ́ɛ pâi kpɔlûi, boa kɛ́ pù yɛ̂ɛ ɔle-wuru.
34Núu-kpulu nyii vé láa-ni a Ɣâlai a pâi kpɛɛ̂i.
Ŋɔŋ a pâi dípɛrɛ-ŋai kérenîi nyii dí dɔ̀ɔ a yee-pɛlɛ ǹá sɛŋ-kaoi.
35Ǹûai ŋí ƃé da mɛni kpɔ̂lu kpɛ̀tɛ díkɛ mɛni nyɔ́mɔɔ kɛ̀.
Ǹyaŋ dílaa fɛ̂ɛi a núu pɛlɛ mɛni-ŋa.”
Currently Selected:
Zôo 15: KWB
Highlight
Share
Copy
Want to have your highlights saved across all your devices? Sign up or sign in
