Zôo 16
16
Zôo è Ɛlifa wóo su tòo
1Nya ƃe Zôo è ŋ̀oo su tòo,
2“Káfe ŋá mɛni kpɔ̂lui su saa ní.
Ka gɛ́ ńii é tóo pôlu a ŋánaa káfe kpɔnîi ḿâ.
Ka gɛ̂i nɔ́ ŋ́gɛ mɔ̃lɛ a ŋánaa.
3Ka pâi kɛ̂i nɔ́ lônoi kpɛ́ni-kpɛni káfa káfii tɔ̂ɔ?
Lé ƃé lɛ̀ɣɛ yâ a gɛɛ í ŋ́oo su tooi?
4Eêi kɛ̀ íkɛ ƃò tɔ̂ɔi ńdɔɔi,
ńyãa máŋ ŋâi pɔ̂ri ŋ̀óo sîi tɔnɔi ŋí ƃôi yâ.
Ŋ́gɛ ŋuŋ kpɛ̂mɛŋ a ɣɛlɛ-maa pere a yá.
5Ŋ́âi pɔ̂ri ká lia-woo ƃôi a ńɛŋ-ŋa woo a gɛɛ ŋá kákponôi kpanaŋ.
Ǹyaŋ ŋ̀óo-ŋai ŋâi kɛ̀ môi diî ká ŋá nɛnɛ dí kákula ká mɔ̃lɛ-laai su.
6“É máŋ kɛ́ tí ńono-woo fa pɔ̂ri ŋá mɔ̃lɛ-laai su saâi.
Ŋá máŋ kpîŋ ḿɛi sáa, ŋá mɔ̃lɛ-laai su fé pâi saâi.
7Tɔ̃yâ ma, Ɣâla a ŋáwala-wala-laai kúla ńyêei.
Ɣâla a ńzuu kélee su kara.
8Ɣâla a ńzoŋ kpɔ́ a ŋ̀ánaa.
A ŋ́gbono milîŋ pú ma nyii-ŋai dísêre-wooi tɔɔ̂i mai.
A ŋ́gɛ ŋa lɛɛ a ŋ́gao nyii ŋɔsêre wooi tɔɔ̂i ḿâi.
9“A ḿvala-fala yɛ̂ɛ fɛnɛ-sɛŋ líi ŋwánaa
gɛ́ ǹyíŋ pìlaŋ gîe ma yɛ̂ɛ sɛŋ ƃé a kɛ̀ a ŋ́gbɔara-nuu, gɛ́ ŋ́gàa a lii-ŋwana pere.
10Da díla tàɣa ḿâ yɛ̂ɛ lɔɔ-fɛnɛ sãa díkɛ ḿaa yâo.
Dí ńokwa ŋ́goma ma díkɛ ɣɛ́lɛ-maa kùla ŋ́gbonôi.
Dí díŋa tɛ̀ gîe ma a gɛɛ dípɛlɛ ḿâ.
11Ɣâla a ńdɛɛ ŋwana-lɔ̂ɔ-ƃela pɔ́,
a ńdoo díyee ŋá.
12Tãi ńii è kɛ̀ a ǹáa lai,
Ɣâla è pà é ńzoŋ kpɔ́ a ŋánaa é ŋ́gula naa.
È ńzôŋ a ŋ́gɔna é ńdoo é ŋ́gao ɣále-ɣale.
A gɛ́ díkɛ ŋ́gɔ̀ a kpoloŋ.
13Gboloŋ kɔ́-ƃelai da tínaŋ ḿâ díkɛ ḿòŋ a dítɔ̃a-ŋai m̀éla kélee ma.
È ḿòŋ a dɔ̃a-ŋai ŋ́goi kɔni-kao ma.
Vé kpîŋ ŋ́ɛi malôŋ káa ní,
ŋ́goi-sãa kɛ́ pù ǹɔii ma.
14È pìli ḿâ yɛ̂ɛ kɔ-kuluƃa,
gɛ́ ŋwàna gîe mɛi.
15Ŋá maloŋ-too maa-seɣe tòo ḿâ.
Ɣâla a ńdoo muluŋ su.
16“Ŋa lɛɛ wɔ̂lɔi ŋ́ɛi a fɛ́ɛ-fɛ̂ɛ.
Ŋ́ɛi-gao a kpɔlu ḿva ŋɔ́nɔ kwaa kâa.
17É máŋ kɛ́ tí, ḿve niî mɛni nyɔ́mɔɔ kélee da kɛ́ ní, ńyee maa waâi.
Ŋa ƃaa kɛ́-maa tɛ̂ɛ Ɣâla pɔ́ ŋá Ɣâla fɛliɛɛi su.
18“Ŋ́gaa yɛ̂ɛ núu nyii dí baai.
M̀ɛni ma, núu da fé ḿbaa mɛnii lôo.
Núu da fé ŋ́gbèra wɔ̂lɔi ŋá mɛnii su too mɛni ma a teniŋ ƃô-pere.
19Ŋáserei káa Ɣâla-taa nyii pâi tɔɔ̂i ḿɛni ma.
Tɔ̃yâ ma núu da káa naa nyii pâi ḿaa sêre-faa kɛ̂i a gɛɛ ŋá mɛnii é lɛ́lɛ.
20Ḿbarâai nyii-ŋai lônoi ḿaa mɛni mai da ɣɛ́lɛ-maa kulâi ŋ́gbonôi.
Ŋa wɔ̂lɔi a gɛɛ Ɣâla é kpɔ́ŋ ḿâ.
21Ŋa ŋ̀wɛ̂lii a gɛɛ ŋásêrei é lóno Ɣâla pɔ́ ḿaa mɛ̂ni ma.
Ŋa ŋ̀wɛ̂lii núu da é lóno kúloai kwa Ɣâla yɛ̂ɛ à kɛ̀ lônoi ḿbarâŋ-nuu mɛni ma.
22Ŋá kɛ̀-ɣeniɛi su fé ŋɔ́nɔ kôyaa ni.
Ǹyaŋ ŋá máŋ lí, ḿve ŋɔ́nɔ pâi siâi ƃɛ́-pere.”
Currently Selected:
Zôo 16: KWB
Highlight
Share
Copy
Want to have your highlights saved across all your devices? Sign up or sign in
