Zɔ̂ŋ 21

Zîsɛ è kùla ŋɔpôlu-ƃelai ǹɔ́ɔlu mɛi feerɛ ŋɛ́i

1Nyíŋi pôlu ma Zîsɛ e ŋɔ́nɔ gbîŋ lɛ̀ ŋɔpôlu-ƃelai dîa Tabiria Yuo-loŋ kɔlɛ; ǹyaŋ e gbîŋ lɛ̀ dîa bere-sii ŋi su. 2Samaŋ Pitɛ, Tama nyii da dòli a Ǹyuâi, Natɛnia Kena-nuui Galalii-lɔii su, Zɛƃɛdi ǹônii, da ŋɔpôlu-ƃelai gbeli feerɛ, dí kɛ̀ díkîe-ni ma. 3Samaŋ Pitɛ e mò dîa, ǹyɛɛi, “Ŋa liî nyɛ̃ɛ kpɛ̂i.” Dí mò ma, dîyɛɛi, “Kwa kâa-ni kwa liî.” Dí lì dí píli géleŋ su. Kɛ́lɛ, maa-kpinii ti dífe sɛŋ da kélee soŋ ni.

4Ɣele kɛ́ɛ ƃɔ́i Zîsɛ è kɛ̀ tɔɔ̂ni ŋãyai ma, kɛ́lɛ, ŋɔpôlu-ƃelai dífe kɛ́ ní a gɔ́lɔŋɔɔ a gɛɛ è kɛ̀ a Zîsɛ. 5Zîsɛ è dímarê kɛ̀, “Ńônii, kâa nyɛ̃ɛ soŋ?” Dí ŋ̀óo su tòo, dîyɛɛi, “Kpao.” 6È mò dîa, ǹyɛɛi, “Ka deɣaŋ píli laa-mii yee-mɛi-pere géleŋ kɔlɛ. Ka pâi da kâai.” Nya ƃe dí deɣaŋ pìli, dífe pɔ̂ri ni kpîŋ a gɛɛ dí gula ǹyái su. Kpɛ́ni fêi, nyɛ̃ɛi e kɛ̀ a dámaa. 7Bôlu-nuui nyíti Zîsɛ e ŋ̀wɛ́li níi, e mò Pitɛ ma, ǹyɛɛi, “Kúnuu-namui ká ti!” Tãi Samaŋ Pitɛ è mɛ̀ni la a gɛɛ è kɛ̀ a Dínuu-namui, è ŋɔseɣei tòo mà, kpɛ́ni fêi, è kɛ̀ a maa kpôloŋɔɔ tíi-kɛ mɛni ma, é píli ǹyái su. 8Kɛ́lɛ, bôlu-ƃelai gbéli-ŋai dí pà géleŋ su, díkɛ deɣaŋ ɣâla, ǹáa fɛ́ɛ kpɔ́ a nyɛ̃ɛ. Kpɛ́ni fêi, dímaa fé kɛ́ ni a gôyaa zîŋ ma, kɛ́lɛ. Ŋɔkôyaa è kɛ̀ yɛ̂ɛ wãaŋ buu lɔ́ɔlu.

9Tãi dí tɛ̀ la zîŋ ŋái, dí tiɣi-ŋɔŋ kàa, nyɛ̃ɛ kɛ́ ƃo ŋá, da kpólo. 10Zîsɛ è mò dîa, “Ka pá a ǹyɛ̃ɛi da nyii ka nâa zoŋ.” 11Nya ƃe Samaŋ Pitɛ e lì géleŋ su e deɣaŋ tɛ zîŋ ŋá. Ǹáa fɛ́ɛ a nyɛ̃ɛ kpaya-kpaya. Dí kɛ̀ a nyɛ̃ɛ ŋuŋ tɔnɔ pôlu buu lɔ́ɔlu kao saaƃa. Berei máŋ dí kɛ̀ a dítamaa lai, deɣaŋ fe kɛ́ ni a válaa. 12Zîsɛ è mò dîa, ǹyɛɛi, “Ka pá ku kúlaa míi.” Ǹyaŋ ŋɔpôlu-ƃelai dɔnɔ da fe pɔ̂ri ni é m̀arê kɛ́, ǹyɛɛi, “Gbɛ̂ɛ ƃa yá?” Dí kɛ̀ a gɔ́lɔŋɔɔ a gɛɛ è kɛ̀ a Dínuu-namui. 13Zîsɛ è pà é gbóloi siɣe é dɛɛ dípɔ, è gɛ̀ tí máŋ a ǹyɛ̃ɛi. 14Tãi zaaƃai ká ŋi nâa Zîsɛ è gbîŋ lɛ̀ la ŋɔpôlu-ƃelai dîa, tãi e mu sìɣe la saa yêei pôlu ma.

Ŋáƃala-ŋai ŋá kɔ́ŋ

15Tãi dí kpɛ̀ɛ la dílaa miî, Zîsɛ è mò Samaŋ Pitɛ ma, ǹyɛɛi, “Samaŋ, Zɔ̂ŋ ǹóŋ, í ŋ́wɛli ni é tɛ́ɛ nyiŋi-ŋai ŋi dîa?” È mò ma, ǹyɛɛi, “Ooei, Ŋánuu-namui. Í gɔ́lɔŋ a gɛɛ ŋá íwɛli ni.” 16È mò ma, ǹyɛɛi “Ŋáƃala-loŋ-ŋai ŋá kɔ́ŋ.” Veerɛ-ɣelei è mò ma, ǹyɛɛi, “Samaŋ, Zɔ̂ŋ ǹóŋ, í ŋ́wɛli ni?” È mò ma, ǹyɛɛi, “Ooei, Ŋánuu-namui. Í gɔ́lɔŋ a gɛɛ ŋá íwɛli ni.” È mò ma, ǹyɛɛi, “Ŋáƃala-ŋai mɛi káa.” 17È mò ŋɔ́nɔ ma a zaaƃa-ɣelei, ǹyɛɛi, “Samaŋ, Zɔ̂ŋ ǹóŋ, í ŋ́wɛli ni?” Malôŋ è tòo Pitɛ ma, kpɛ́ni fêi, è m̀arê kɛ̀ a zaaƃa-ɣelei, ǹyɛɛ ma, “Í ŋ́wɛli ni?” Nya ƃe è mò ma, ǹyɛɛi, “Ŋánuu-namui, í mɛni kélee kɔ́lɔŋ. Í gɔ́lɔŋ a gɛɛ ŋá íwɛli ni.” Zîsɛ è mò ma, nyɛɛi, “Ŋáƃala-ŋai ŋá kɔ́ŋ. 18Tɔ̃yâ kpîŋ, ŋa m̀ó yâ, tãi í kɛ̀ a lôloŋ í seɣe tôo yâ, í sía ƃɛ́i í ŋ̀wɛli; kɛ́lɛ, tãi yà pɔ̀lɔ lai, ya pâi íyee tɛ̂i ɣelêi. Núu da kpɛ́ni a pâi seɣe toôi yâ é lí a yá ƃɛi ífe ŋ̀wɛ̂lii í lí naai.” 19(È nyiŋi ƃò a gɛɛ e zaai lɛ Pitɛ a pâi Ɣâla ŋɔfólo-laai ma tɛ̂i lai.) Ǹyaŋ nyiŋi pôlu ma e mò ma, ǹyɛɛi, “Pîlaŋ ḿbôlu.”

Bôlu-nuui nyii Zîsɛ è ŋ̀wɛ́li níi

20Pitɛ è tìnaŋ é bôlu-nuui, nyii Zîsɛ è ŋ̀wɛ́li níi, káa gɛ́ lɛ̀ɛ dípôlu, nyii kɛ̀ tíɣîŋ ni mà teƃelei mai, nyii mò, ǹyɛɛi, “Kúnuu-namui, gbɛ̂ɛ ƃa ǹúui pâi kulâi ípôlui?” 21Tãi Pitɛ è gàa lai, è Zîsɛ marê kɛ̀ ǹyɛɛi, “Kúnuu-namui, ǹúui ŋi ǹyaŋ?” 22Zîsɛ è mò mà, ǹyɛɛi, “À kɛ̀ gáa a ńîa-mɛni a gɛɛ é lɛ́ɛ ƃɛ é lɛ́ɛ la zu ŋá pá, ímɛni káa naa? Lɛ́ɛ ḿbôlu!” 23Ŋ̀óoi ŋí è tàa-taa bôlu-ƃelai sama a gɛɛ ŋɔpôlu-nuui ŋí fé pâi saâi. Kɛ́lɛ, Zîsɛ fé mò ní ma a gɛɛ ve pâi saâi, kɛ́lɛ, è mò ma, ǹyɛɛi, “A kɛ̀, gáa a ńîa-mɛni a gɛɛ é lɛ́ɛ zu ŋá pá, ímɛni káa naa?”

24Ŋɔpôlu-nuui ŋi ƃe gáa mɛni-ŋai ŋí maa-sere-faa kɛ̂i. Ǹyaa ƃe ŋɔ́nɔ mɛni-ŋai ŋí pɔ̃yɛɛ̂i. Ǹyaŋ ku gɔ́lɔŋ a gɛɛ ŋɔsêre-wooi káa a tɔ̃yâ.

25Kɛ́lɛ, mɛni támaa da kpɛni-ŋa máŋ káa naa nyii Zîsɛ è gɛ̀. Eêi kɛ̀ gélee eêi pɔ̃yɛɛ̂i, ńaâi la a gɛɛ ǹɔii kpîŋ fei pɔ̂ri gɔlɔ-ŋai mu nyii eêi pɔ̂ri pɔ̃yɛɛ̂i.

Currently Selected:

Zɔ̂ŋ 21: KWB

Highlight

Copy