Zɔ̂ŋ 20

Mu-sìɣe saa-yêei

(Maafîu 28:1-8; Mâki 16:1-8; Lûu 24:1-12)

1Ŋ̀ele-kûui duɛ-tuɛi ma nɔɔkuui su, Mere Madalini è pà m̀olôŋ lá a ɣele-wâla pɛ-pɛ, tãi kpíni è kɛ̀ a bɛlɛɛ niî lai, è gàa a gɛɛ da vɛ̃ɛ-ƃelai kúla m̀olôŋ lá. 2Nya ƃe è lì a kîrɛ Samaŋ Pitɛ pɔ́ da ŋɔpôlu-nuui gbéli nyii Zîsɛ è ŋ̀wɛ́li níi, é mó dîa, ǹyɛɛi, “Daâ Kúnuu-namui kúla m̀olôŋ su, ǹyaŋ kúfe ƃɛ́i kɔ́lɔŋ dí ǹaa naai.” 3Nya ƃe Pitɛ da m̀arâŋ dí kùla dí lí m̀olôŋ lá. 4Dífeerɛŋɔɔ dí lì a kîrɛ. Kɛ́lɛ Pitɛ m̀arâŋ è ǹɛɛ é seri m̀olôŋ lá tuɛ. 5È maa pɛ̂lɛ é nàa káa, é zeɣe kôlei káa laâni naa. Kɛ́lɛ, vé lɔ́ ní zu. 6È kɛ̀ tí, Samaŋ Pitɛ è pà bôlu é lɔ́ m̀olôŋ su. È zeɣe kôlei kàa laâni naa, 7da zeɣe kpuâi kɛ̀ a ŋ̀iriɛɛ ŋuŋ mai, vé kɛ́ ní laâni zeɣe kôlei kɔlɛ. Kɛ́lɛ è kɛ̀ a gbíniŋɔɔ ǹáa a ŋɔpere tee. 8È kɛ̀ tí, bôlu-nuui gbélii nyii lì m̀olôŋ lá tuɛi, ǹyaa máŋ è lɔ̀ zu, é nàa káa, é láa la. 9Kɛ́lɛ dífe niî kɛ̀ táre ní Ŋ̀âla-kɔlɔi wóo su, a gɛɛ fɛ̂ɛ é mu siɣe saa yêei. 10Nya ƃe ŋɔpôlu-ƃelai dí lì pôlu dípɔ naa.

Zîsɛ è kùla Mere Madalini ŋɛ́i

(Maafîu 28:9, 10; Mâki 16:9-11)

11Kɛ́lɛ Mere è lɛ̀ɛ tɔɔ̂ni naa gɛ́ wɔ̀lɔ m̀olôŋ lá, gɛɛ wɔ̂lɔi, è maa pɛ̂lɛ é m̀olôŋ su káa. 12È Ɣâla-taa kela feerɛ kàa seɣe kôle su seêni ƃɛ́i dí Zîsɛ pomai lâa naai, dɔnɔ kɛ́ ƃò ŋuŋ tûɛ, dɔnɔ kɛ́ ƃò gwara. 13Dí m̀arê kɛ̀, dîyɛɛ ma, “Nɛnîi, le ƃe kɛ̀ ya wɔ́lɔ̂i?” E mò dîa, ǹyɛɛi, “Kpɛ́ni fêi, da Ŋánuu-namui síɣe, ǹyaŋ fe ƃɛi kɔ́lɔŋ dí ǹaa naai.” 14E nyiŋi ƃò nɔ e tinaŋ e Zîsɛ kaa tɔɔ ni. Kɛ́lɛ, ve kɛ́ ni a gɔ́lɔŋɔɔ a gɛɛ e kɛ̀ a Zîsɛ. 15Zîsɛ e m̀arê kɛ̀, ǹyɛɛ ma, “Nɛnîi, le ƃe kɛ̀ ya wɔ́lɔ̂i? Gbɛ̂ɛ ƃe ya gɔ́rii?” È kɛ̀ gaâi yɛ̂ɛ zûai mɛi káa-nuui, nya ƃe è mò ma, ǹyɛɛi, “Nalôŋ, à kɛ̀ yá ƃe zìɣei, m̀ó ḿâ ƃɛi í ǹaa naai. Gɛ̀ ní ŋa pâi liî naa ŋa ziɣe.” 16Zîsɛ è mò ma, ǹyɛɛi, “Mere.” È tìnaŋ è m̀o Zîsɛ ma Ibulu-wooi su, ǹyɛɛi, “Laƃônii!” (nyii zu-kulâi ƃa Kaamɔ̂ɔ). 17Zîsɛ è mò ma, ǹyɛɛi, “Ífe ńzòŋ, kpɛ́ni fêi, fé niî tɛ́ ní Nàŋ-nuui pɔ́naa. Kɛ́lɛ, lí ńêɣe-ni pɔ í m̀ó dîa a gɛɛ ŋa tɛ̂i Ńâŋ pɔ́naa da Kánâŋ, Ŋáɣâlai pɔ́naa da Káɣâlai.” 18Mere Madalini è lì é m̀o Zîsɛ ŋɔpôlu-ƃelai dîa, ǹyɛɛ dîa, “Ŋaâ Kúnuu-namui káa”. È mò dîa ŋɔ́nɔ a gɛɛ ǹyaa ƃe mɛni-ŋai ŋí ƃò mà.

Zîsɛ è kùla ŋɔpôlu-ƃelai ŋɛ́i

(Maafîu 28:16-20; Mâki 16:14-18; Lûu 24:36-49)

19Ŋ̀ele-kûui tí maa ɣele-wulii nɔɔkuui ŋɔɣele-kuui duɛ-tuɛi mâ, bɛ́rɛi lá kɛ́ɛ a dɛ́ɛi, ƃɛ́i ŋɔpôlu-ƃelai dí kɛ̀ naai, dí kɛ́ɛ yáôi Zûu-ŋai dîa maa-mɛni mai, Zîsɛ è lɔ̀ é tɔ́ɔ dísama, é m̀o dîa, ǹyɛɛi, “Lii-see é kɛ́ káyêei.” 20Tãi è nyiŋi ƃò lai, è ǹyée-ŋa lɛ̀ dîa da bɛ̂rɛ ma. È kɛ̀ tí, ŋɔpôlu-ƃelai líi è nɛ̃ɛ a ŋ̀ánaa tãi dí Dínuu-namui kàa lai. 21Zîsɛ è ŋɔ́nɔ mò dîa, ǹyɛɛi, “Lii-see é kɛ́ káyêei. Berei Ńâŋ-nuu è ńdɛ̀ɛ lai, bere nɔ ƃe ŋa kátɛɛ̂i la.” 22Ǹyaŋ tãi è nyiŋi ƃò lai, è nɛ̃wo pù dîa é m̀o dîa, ǹyɛɛi, “Ka M̀ɔlêŋ Maa Waai maa sɔlɔ ƃó. 23À kɛ̀ kà núu da kélee ŋɔsɔnyɔ̂ŋ su-mɛni lɛ̀ɛ, dísɔnyɔ̂ŋ su-mɛni lɛɛ̂i; à kɛ̀ kà núu da kélee ŋɔsɔnyɔ̂ŋ lɛ̀ɛ ma, dísɔnyɔ̂ŋ a pâi kɛ̂i nɔ dîa.”

Tama fé láa ni la

24Nya ƃe Tama, núu puu kao feerɛi dɔnɔ, nyii da dòli a Ǹyuâi, ve kɛ́ ni dísama tãi Zîsɛ è pà lai. 25Nya ƃe bôlu-ƃelai gbeli-ŋai dí mò ma, dîyɛɛi, “Kwâa Kúnuu-namui káa.” Kɛ́lɛ, è mò dîa, “Fɛ̂ɛ ŋá nerêi pɔ́ɔ káa ǹyée ŋá, ŋá ńyee kpua pîlaŋ bɔ́ɔ su, ŋá ńyee pîlaŋ bɛ̂rɛ ma, à wàla kɛ́ tí, fé pâi lâai la.”

26Ɣele-kuu lɔ́ɔlu mɛi saaƃa è tɛ̀ɛ, ŋɔpôlu-ƃelai dí kɛ̀ bɛ́rɛi mu ŋɔ́nɔ. Tama ǹyaŋ è kɛ̀ dísama. Gbôŋ lá è kɛ̀ a dɛ́ɛ, kɛ́lɛ, Zîsɛ è pà é tɔ́ɔ dísama é m̀o dîa, ǹyɛɛi, “Lii-see é kɛ́ káyêei.” 27Nya ƃe è mò Tama ma, ǹyɛɛi, “Pá í íyee kpua pîlaŋ ƃɛ í ńyee ŋá káa. Í íyee síɣe í bîlaŋ ḿbɛ̂rɛi. Ífe kɛ́ a ǹúui laa-la fé ǹyêei. Kɛ́lɛ, laa-la é kɛ́ íyeêi.” 28Tama è ŋ̀óo su tòo, ǹyɛɛi, “Ŋánuu-namui da Ŋáɣâlai!” 29Zîsɛ è m̀arê kɛ̀, ǹyɛɛ ma, “Ya nâa láa la, kpɛ́ni fêi, ya ŋ́gaa? Lûwa káa diai dîa dífe niî ŋ́gaa ni, kɛ́lɛ, ǹyaŋ da láa la.”

Zɛŋ kpîŋ gɔlɔi káa mɛni mai

30Nya ƃe Zîsɛ è ŋɛi-kɛ-maa da kpɛni támaa kɛ̀ ŋɔpôlu-ƃelai sama, nyii ve pɔ̃yɛ ni gɔlɔi ŋi sui. 31Kɛ́lɛ, nyiŋi-ŋai ŋi pɔ̃yɛɛ̂i a gɛɛ ká láa la a gɛɛ Zîsɛ ƃe gáa a Kôrai, Ɣâla Ǹóŋ, a gɛɛ ǹyaŋ kà làa la, fulu-laa é kɛ́ káyêei ǹáai su.

Currently Selected:

Zɔ̂ŋ 20: KWB

Highlight

Copy