Zĩi 4

Ŋ̀éniɛi ŋɔwɛli-kɛ-maa-nuui

1Lé ƃe pà a ǹaa-sâai da namu-kɔ̂ɔi kásamâi? Vé a kátûa-pere-nyɔŋ maa-sɛŋ-wɛliɛi nyíi gáa namu kɔ̂i kákponôi? 2Kákaa sɛŋ wɛ̂lii, kɛ́lɛ, vé káyêei. Mɛni ma ka núu pàa. Ka sɛŋ maa-lii tèe, kɛ́lɛ, káfa zɔ̀lɔ ƃô. Mɛni ma ka laa-sâa tèe, kákɛ namu kɔ́. Sɛŋ fé káyêei, kpɛ́ni fêi, káfa mare-kɛ̂ɛ kɛ̀. 3Ka sɛŋ maa-mare-kɛ̂ɛ kɛ̀ káfa zɔlɔ ƃo, kpɛ́ni fêi, káfa maa-mare-kɛɛ kɛ̀ pere sii sãa su. Ka gɛ̀ a gɛɛ ká tíi kɛ́ la kátûa-pere nyɔŋ maa-sɛŋ wɛliɛi mɛni ma. 4Núu sã́a fa káa! Káfe gɔlɔŋ a gɛɛ ǹúui a ŋ̀éniɛi kɛ̀ a ŋɔwɛli-kɛ-maa sɛŋ, gáa a Ɣâla kpɔara mɛni? Mɛni ma ǹúui kélee a ŋ̀wɛli a gɛɛ é kɛ́ a ŋ̀éniɛi ŋɔwɛli-kɛ-maa nuui, a gbîŋ kɛ̀ a Ɣâla kpɔara nuu. 5Kpaa máŋ gáa kákili ŋá a gɛɛ m̀ɛnii Ŋ̀âla-kɔlɔi a mò, nyɛɛi, “Ɣâla è Mɔlêŋ pù kúkponôi nyíi kúwɛli ní a tólo perei,” gáa nɔ́ kpɛ́ni-kpɛni? 6Kɛ́lɛ, Ɣâla a ƃɛlɛ-sêe támaa tɛ̀ɛ. M̀ɛni ma Ŋ̀âla-kɔlɔi a mò, nyɛɛi, “Ɣâla tɔɔ̂i ǹyoŋka-ƃelai dîa, gɛ ƃɛlɛ-sêe tɛɛ maa-yeŋ-ƃelai pɔ.” 7Mɛni ma ka kákpîŋ tɛ̀ɛ Ɣâla pɔ́. Ka tɔ̂ɔ Dɛ̂ƃelei mâ, gɛ̀ ní a pâi pûi é siɣe kápôlu. 8Ka lɛ̂ɣɛ a Ɣâla, a kɛ̀ tí a pâi lɛɣɛ̂i a káa. Sɔnyɔ̂ŋ-ƃela, ka káyee ŋáwaa. Ka kálii sú kpɛ̀tɛ káai kákili-ŋa-siai ŋáa kɔ́lɛ̂i. 9Malôŋ é tóo kâa, ká malôŋ-see ƃó, ká wɔ́lɔ. Tɔɔ káɣɛlɛ̂i é kɛ́ a maloŋ too-maa. Kálii-nɛ̃ɛi é kɛ́ a ŋumɛ. 10Ka kákpîŋ maa yéŋ Kúnuu-namui ŋɛ́i-tuɛ, gɛ̀ ní a pâi kámaa tɛ̂i.

Káfe káƃarâai dímɛni ŋá tèe

11Ŋánûa, káfe kákîe-ni láa nyɔ́mɔɔ ƃo. Ǹúui a m̀arâŋ-nuu láa nyɔ́mɔɔ ƃò, kpaa máŋ é ŋɔmɛnii ŋá téei, gɛ̀ ní a lóno nyɔ́mɔɔ kɛ́ a pîlaŋ dɔ̂ŋ ma, a dɔ̂ŋ ŋɔmɛnii ŋá tée. Kɛ́lɛ, à kɛ̀ yà dɔ̂ŋ ŋɔmɛnii ŋá tèe, gɛ̀ ní ífe a dɔ̂ŋ ŋɔtûa-kɛ-nuu, kɛ́lɛ, íkaa a mɛni-ŋa-tee-nuu. 12Tɔ̂ŋ-tɛɛ-nuu tɔnɔ da mɛni-ŋa-tee-nuu tɔnɔ nɔ́ ƃe naa, nyíi pɔ̂ri káa mì a gɛɛ é ƃálo-laa tɛ̀ɛ, kpaa máŋ é su-kara tɛɛ̂i. Kɛ́lɛ, gbɛ̂ɛ ƃa yá a gɛɛ í íkɔlɛ-ma-nuui ŋɔmɛnii ŋá téei?

Káfe tínaa maa yoŋka tèe

13Ka tɔ̀ɔ, káai ka mò kâa, “Sâa, kpaa máŋ tínaa, kwa pâi liî daai ŋí su, kpaa máŋ daai tí sú kú kóraŋ tɔnɔ kɛ́ naa kú pɔni tɔ́ɔ kú geni sɔlɔ ƃó.” 14Káfe mɛni da kɔ́lɔŋ é pîlaŋ tínaa ma. Káfulu-laai ƃa le? Káai kákaa nɔ́ a lúu nyíi a pɛ̂lɛ nɔ́ a tãi kpua, naa à kɛ̀ tí é táai. 15M̀ɛnii fɛ̂ɛ ka mói, ǹyaa ƃa, “À kɛ̀ Kúnuu-namui à fàa ma, kwa pâi kɛ̂i ɣele ma, gɛ̀ ní kwa pâi m̀ɛnii ŋí kɛ̂i, kpaa máŋ m̀ɛnii tí.” 16Yɛ̂ɛ berei gáa lai, m̀ɛnii ka gbɛ̀tɛ kákili ŋái, ǹya ƃe ka maa yoŋka tèe. Ǹyoŋka sii tí kélee káa a mɛni nyɔ́mɔɔ. 17Ǹúui m̀ɛnii kɔ́lɔŋ ǹɛ́lɛɛ̂i a gɛɛ é gɛ́i, à wàla gɛ̀, gɛ̀ ní gáa a sɔnyɔ̂ŋ maa-nuui tí mɛni ma.

Currently Selected:

Zĩi 4: KWB

Highlight

Copy