Zĩi 2

Su-ɣɛ̂ɛ-mɛni maa-lia-woo

1Ŋánûa, su-ɣɛɛ-mɛni kélee da fé kɛ̀ kásama tãi kákaa la Kúnuu-namui Zîsɛ Kôrai ŋɔlaa-lai su, nyíi gáa a Kúnuu-namui ŋɔfólo-laa namui. 2Kpɛ́ni fêi, à kɛ̀ tɔɔ-nuu, nyíi gôo-gbono káa ǹyée ma, seɣe lɛ́lɛɛ kɛ́ ƃo mai, à pà kásama da kôlo-nuu nyíi seɣe-sâa káa mai, 3kà káwoli tɔ̀ɔ ǹúui ma seɣe lɛ́lɛɛ káa mai, kâa mà, “Seêi káa naa,” ká m̀ó gôlo-nuui ma, “Tɔɔ ƃɛ ti,” kpaa máŋ, “See ŋ́gɔɔ mu,” 4gɛ̀ ní káfe su-ɣɛɛ-mɛni kɛ̂i káa kpîŋ káloai, kákɛ ƃo a mɛni-ŋa tee-ƃelai nyíi-ŋai kili-ŋa-sia nyɔ́mɔɔ káa dîai? 5Ka káwoli tɔ́ɔ, ŋáwɛli-kɛ-maa ƃelai. Ɣâla fé gôlo-ƃelai lɛ́ ní ŋ̀éniɛi ŋí su a gɛɛ dí tɔ́ɔ laa-la su dí kɛ́ a Gâloŋ-laai sɔlɔ-ƃo-ƃela, nyíi è maa-kono-tee kɛ̀ diai yêei dí ŋ̀wɛli níi? 6Kɛ́lɛ, ka ƃâa kùla gôlo-nuui ma. Dɔɔ-ƃelai dífa káluaŋ? Dia fa pâ a káa m̀ɛni-sâa ƃô kelei mui? 7Dia fa ǹúui nyíi-ŋai da lôno a nyɔ́mɔɔ é pîlaŋ maa-kɛ-maa laai nyíi Ɣâla é zèe kaai mai?

8À kɛ̀ kà dɔ̂ŋ kɛ́tɛi mɛi kâa kpɔ́ a ǹɛ́lɛɛ yɛ̂ɛ berei Ŋ̀âla-kɔlɔi a mò la, nyɛɛi, “Fɛ̂ɛ í íkɔlɛ-maa-nuui wɛ́li yɛ̂ɛ yá kpîŋ,” gɛ̀ ní ka gɛ́ a ǹɛ́lɛɛ. 9Kɛ́lɛ, à kɛ̀ su-ɣɛɛ-mɛni à kɛ̀ kásama, gɛ̀ ní ka sɔnyɔ̂ŋ kɛ̀, ǹyaŋ gɛ̀ ní kákaa a tɔ̂ŋ-kara-ƃela dɔ̂ŋ lá-wooi ma. 10Kpɛ́ni fêi, ǹúui a dɔ̂ŋ kélee mɛi kâa, kɛ́lɛ, é gbua da karai, gɛ̀ ní a gélee kara. 11Kpɛ́ni fêi ǹúui mò, nyɛɛi, “Ífe wulu-wulu kɛ̀i,” è mò máŋ, nyɛɛi, “Ífe núu paa.” Ǹyaŋ à kɛ̀ yà wàla wulu-wulu kɛ́, kɛ́lɛ, í núu páa, gɛ̀ ní, íkaa a dɔ̂ŋ kélee kara-nuu. 12Ka lóno ká m̀aa tûa kɛ́ yɛ̂ɛ ǹûai da pâi dímaa-mɛni ŋá têei ŋuŋ-ma-ƃo ŋɔtɔ̂ŋ mui. 13Kpɛ́ni fêi, maloŋ-kaa fé mɛni-ŋa-teɛɛ su diai mɛni ma dífa maloŋ-kaa kɛ̀i. Kɛ́lɛ, maloŋ-kaa a mɛni-ŋa-teɛɛ yée mɛi ɣàle.

Naa-laai nyíi tíi fé zui zaâi

14Lé ƃe núu a pɔ̂ri gulâi nyíŋi su, ŋánûa, à kɛ̀ núu à mò, nyɛɛi, laa-la káa ǹyêei, kɛ́lɛ, va m̀aa tîi kɛ̀. Ŋɔlaa-lai a pɔ̂ri m̀álôi? 15À kɛ̀ seɣe sáâi káƃarâŋ nuu ma, mii-sɛŋ fé ǹyêei, 16kátɔnɔ da é m̀ó mà, nyɛɛi, “Lí lii-sêe su, íkponôi é fãa í péla,” ǹyaŋ zɛŋ gáa ŋ̀wɛ̂lii gbonoi mɛni mai, ve dɛ̀ɛ ní bɔ̀, gɛ̀ ní, lé ƃe a pɔ̂ri gulâi nyíŋi sui? 17Mɛni ma laa-la ǹyaa tɔnɔ, à kɛ̀ tíi fé zu, gɛ̀ ní zaâi.

18Kɛ́lɛ, núu da a pâi m̀ôi, nyɛɛi, “Laa-la káa íyeêi, ǹyaŋ tíi kɛ̀ ƃo ńyêei.” Ílaa-lai lɛ́ mâ é kúla ítii pôlu. A kɛ̀ tí, ńyaŋ ŋa pâi ŋálaa-lai lɛ̂i yâ a ŋátii. 19Ílaâi la a gɛɛ Ɣâla káa nɔ́ tɔnɔ? Gɛ̀ ní mɛni lɛ́lɛɛ ká ti. Nyînaŋ nyɔ́mɔɔ-ŋai máŋ lâai la-díkɛ kpɛ̃liŋ. 20Íƃoo-nuui ŋí ya ŋ̀wɛ̂lii dí ǹɛ́ yâ a gɛɛ laa-la ǹyaa tɔnɔ, tíi à wàla kɛ́ zu, gáa nɔ́ kpɛ́ni-kpɛni? 21Ɣâla fé kúnâŋ Eberaɣɛ̃ɛ kɛ́ ní a tɔ̃yâ-nuu ŋɔtíi sarâi, tãi è ǹóŋ Aise kùla la a sâla Ŋ̀âla-teƃelei mai? 22Ya nâa gáa a gɛɛ laa-la da ŋɔtíi dí tíi kɛ̀ gîe ma, ǹyaŋ laa-la láa è fɛ̀ɛ a tíi. 23Ŋâla-kɔlɔi ŋa-see è kɛ̀ nyíi a mò, nyɛɛi, “Eberaɣɛ̃ɛ è làa a Ɣâla, ǹya ƃe Ɣâla è ŋɔlaa-lai sìɣe a tɔ̃yâ-laa.” Ǹya ƃe gɛ̀ gɛ́ ƃô a Ɣâla ŋɔwɛli-kɛ-maa nuu. 24Ka nâa gáa a gɛɛ Ɣâla a núu kɛ̀ a tɔ̃yâ-nuu tíi sarâi, kɛ́lɛ, laa-la tɔnɔ nɔ́ fêi. 25Ǹyaŋ bere sii tɔnɔi tí sú nɔ́ fé máŋ Ɣâla è ŋwulu-wulu-nɛnii Leea kɛ̀ la a tɔ̃yâ-nuu tíi-kɛɛ sarâi, nyíi gela-woo ƃó-ƃelai sɔlɔ ƃô é dítɛɛ a pere da kpɛnii? 26Mɛni ma berei núu kpono nyíi mɔlêŋ fé zui zaâi lai, bere nɔ́ ƃe ǹaa-lai nyíi tíi fé zui zaâi la.

Currently Selected:

Zĩi 2: KWB

Highlight

Copy