Ibulu 3
3
Zîsɛ mɛni tɛɛ̂i Mose ma
1Mɛni ma, m̀arâa maa waa-ŋai, káai kwa kâa-ni kú ŋ̀âla-taa toli-wooi mɛnii, ka kákili ŋá sía é pîlaŋ Zîsɛ ma, nyíi gáa a zia-nuui da zâla láa soŋ-nuu kɛ́tɛi yɛ̂ɛ berei kúlaa-lai káa lai. 2È kɛ̀ a núu sã́a Ɣâla ŋ́ɛi nyii ziɣe zu a gɛɛ é tíi sã́a kɛ́, yɛ̂ɛ berei Mose máŋ è kɛ̀ la a núu sã́a Ɣâla ŋɔpɛ́rɛi mui. 3Dí Zîsɛ kàa a ǹúui maa nɛ̃ɛ̂i fólo-laa támaa é kɛ́ ma é tɛ́ɛ Mose ma yɛ̂ɛ berei ƃaa-kɛ́-maa támaa káa la pɛ́rɛ-tɔɔ-nûu ma é tɛ́ɛ la bɛ́rɛi kpîŋ mai. 4Kpɛ́ni fêi, pɛ́rɛ kélee da dɔ̀ɔi núu ƃa dɔ̀ɔ, kɛ́lɛ, zɛŋ kélee kpɛtɛ-nuui ƃa Ɣâla. 5Mose è kɛ̀ a núu sã́a Ɣâla ŋɔpɛ́rɛi mu gwaa kélee yɛ̂ɛ Ɣâla yée-mu-nuu a gɛɛ é mɛni-ŋai maa-sere-faa kɛ́ nyíi-ŋai pâi ƃôi a tãi dai. 6Kɛ́lɛ, Kôrai è kɛ̀ a núu sã́a Ɣâla ŋɔpɛ́rɛi mɛi yɛ̂ɛ ǹóŋ. Ǹyaŋ kúa ƃa ŋɔpɛ́rɛi à kɛ̀ kwa kúlaa-lai sôŋ a gbanaŋɔɔ é seri gɔ̃yɛŋ ma da kúlii-nɛ̃ɛ̂i kúkili-kɛ-zui su.
Fii-tɔɔ káa Ɣâla ŋɔnûai mɛni ma
7Mɛni ma yɛ̂ɛ berei M̀ɔlêŋ Maa Waai a mò la, nyɛɛi,
“Sâa kà ŋ̀óo mɛ̀ni,
8káfe ká lii kpànaŋ yɛ̂ɛ berei ǹûai dí wɔ́lɔ gɛ̀ la a Ɣâla láa
a zu-kɔɔ̂ŋ-tãi nyíi kɛ̀ vɛ̃ɛ-kpâlaŋ sui,
9ƃɛi kánâŋ-ni dí su-kɔɔ̂ŋ tɛ̀ɛ naa ḿbɔ
dí ŋátii-ŋai káa kóraŋ buu náaŋ yée mui.
10Mɛni ma ńii è ŋwàna ŋ̀éniɛi tí su-ƃelai dîa,
ŋá m̀ó, ńyɛɛi, ‘Da siɣe pere ma a tãi kélee dílii su-pere.
Dífe niî ńdûa-perei kɔ́lɔŋ ní.’
11Yɛ̂ɛ berei ŋá ḿvòo la ŋálii-ŋwanai sui,
‘Dífe pâi wɔ́lɔ liî ŋáfii-tɔɔi su.’ ”
12Ḿarâai, ka kámɛi káa, à wàla kɛ́ tí mɛni nyɔ́mɔɔ a pâi kɛ̂i kákponôi, líi nyíi ve a laa-la-lii é kɛ́ kákoi, nyíi pâi kákɛ̂i ká kákɛ̂i kôyaa vulu-laa Ɣalai mai. 13Kɛ́lɛ, ka kákîe-ni lia-woo ƃó a ɣele kélee, a gɛɛ kátɔnɔ kpîŋ káfe kálii kpanaŋ a sɔnyɔ̂ŋ ŋɔnúu pɛlɛɛ, tãi nɔ́ ŋ̀óoi da kɛ́ mà “sâa” nyii gáa Ŋ̀âla kɔlɔi sui káa niî naa nyíi bîlaŋɔɔi kûai. 14Kpɛ́ni fêi, kwa pâi Kôrai sɔlɔ ƃôi, à kɛ̀ nɔ́ kwa kúlaa-lai maa-ŋuŋ sôŋ a gbanaŋɔɔ é seri gɔ̃yɛŋ ma. 15M̀ôɔi a gɛɛ,
“Sâa, kà ŋ̀óo mɛ̀ni,
káfe kálii kpànaŋ yɛ̂ɛ berei ǹûai dí wɔlɔ gɛ̀ la a Ɣâla láai.”
16Gbɛɛ-ni ƃe dí mɛ̀ni, kɛ́lɛ, dí wɔ̀lɔ a Ɣâla láai? Diai kélee kùla Ize Mose kɛ́ ƃo dímɛi a núu kɛ́tɛi dia fêi? 17Ǹyaŋ gbɛɛ-ni ƃe è kɛ̀ a ǹíi ŋwánaa dîa kóraŋ buu náaŋ yée mui? Diai da sɔnyɔ̂ŋ kɛ̂i dia fêi, nyíi-ŋai sàa vɛ̃ɛ-kpâlaŋ sui? 18Diai woo-mɛni fé kɛ́ ni díyêei dia fé è vòo dímɛni ma a gɛɛ dífe wɔ́lɔ pâi liî ŋɔfii-tɔɔi sui? 19Mɛni ma kwa gáa a gɛɛ pɔ̂ri fé kɛ́ ni dîɛ dí li ŋɔfii-tɔɔi su, kpɛ́ni fêi, laa-la fé kɛ́ ni díyêei.
Currently Selected:
Ibulu 3: KWB
Highlight
Share
Copy
Want to have your highlights saved across all your devices? Sign up or sign in
