Ibulu 2

Ƃálo-laa kɛ́tɛ!

1Mɛni ma fɛ̂ɛ m̀ɛnii kú m̀ɛnii, kú kúwoli tɔ́ɔ ma kpɔ́ a gbanaŋɔɔ, à wàla kɛ́ tí kwa pâi folônii mà. 2Ŋ̀orɛ̂-wooi ŋ̀âla-taa kela-ŋai dí mò kúnâŋ-pɔlɔ-ŋai diai é kɛ̀ a tɔ̃yâ. Kɛ́lɛ diai dífe díyee see ní m̀ui kpaa máŋ dí fáa mai, dí tɔ̀ŋ-kpɛ́-maa láa fɛ̂ɛ sɔlɔ ƃó. 3Gɛ̀ ní kwa pâi kula-pere kɛ̂i leŋ tɔŋ-kpɛ́-maa yêei, à kɛ̀ kwa kúŋɛi nàɣîŋ ƃalo-laa kɛ́tɛ kɛ́ɛ tí mɛi? Kúnuu-namui ƃe mò a maa-ŋuŋ, diai ŋ̀óo mɛ̀nii dí m̀ó kûa, dí ǹɛ a gɛɛ gáa a tɔ̃yâ. 4Ɣâla è maa sere-faa kɛ̀ máŋ a ŋɛ́i-kɛ-maa-ŋa, da mɛni kpaya-kpaya, da wála-wala sii tamaa-ŋa, é pɛ́lɛ M̀ɔlêŋ Maa Waai ŋɔsama-sãai dîa nyíi-ŋai Ɣâla è díŋaa kɔ̀lɛ yɛ̂ɛ berei gbîŋ nia-mɛnii káa lai.

M̀álo-laai kɔ́ɔ pîlaŋ-nuui

5Kpɛ́ni fêi, ŋ̀éniɛi kúkaa lônoi gɛ́ pìlaŋ mai nyíi pâi pâi, Ɣâla fé gɛ̀ ní ɣâla-taa kela-ŋa yée mu. 6Da maa-sere-faa kɛ́ tɔ̃yâ-pere su kwaa da ma, díyɛɛi,

“Lé ƃa núu m̀aa-mɛni a pɔ̂ri kɛ̂i íkili ŋái,

kpaa máŋ lé ƃa núu-kpune ǹóŋ a gɛɛ ya pɔ̂ri kpáanîi mɛ̀ni mai?

7Í gɛ̀ ŋ̀âla-taa kela-ŋai mu-pere a da-loŋ.

Í fólo-laa da ƃaa-kɛ-maa ƃɔrɔ sèe ŋ̀ûa,

í zee íkpɛtɛ-sãai kélee mɛi,

8í sɛŋ kélee pu gɔ́ɔ mu.”

Ǹyaŋ Ɣâla kɛ́ɛ sɛŋ kélee pûi núu-kpune kɔ́ɔ mui, vé sɛŋ da kélee lɛ̀ɛ ní nyíi núu-kpune fé kɛ́ ní mɛ̀i. Yɛ̂ɛ berei gáa lai, kúfe niî sɛŋ kélee káa ní núu-kpune kɔ́ɔ mu. 9Kɛ́lɛ, kwa Zîsɛ kàa nyíi Ɣâla è gɛ̀ ŋ̀âla-taa kela-ŋai mu-pere a da-loŋ. È fólo-laa da ƃaa-kɛ-maa ƃɔrɔ sèe ŋ̀ûa, kpɛ́ni fêi, è mɛni-soli kàa saa yêei a gɛɛ Ɣâla ŋɔƃɛlɛ-sêei sarâi é sáa kɔɔ̂ŋ núu kélee mɛni ma.

10Kpɛ́ni fêi, è kɛ̀ a mɛni lɛ́lɛɛ Ɣâla mɛni ma nyíi sɛŋ kélee káa ɣele ma maa-mɛni ma da nyíi gɛ̀ a gɛɛ sɛŋ kélee é kɛ́ ɣele ma a báa a ǹônii támaa fólo-laa sui, fɛ̂ɛ é díƃalo-laa kpɛtɛ-nuui kɛ́ a maa waa mɛni-soli káa sarâi. 11Ǹúui a núu maa waai da diai a dímaa waai díkelee dí kùla kwaa tɔnɔ ma. Mɛni ƃe va ŋumɛ la a dítoliɛ a m̀arâai. 12A mò ǹyɛɛi,

“Ŋa pâi ílaa ƃôi ḿarâai dîa,

ŋa pâi ílaa maa tɛ̂i Gbɔŋ-su-ƃelai sáma.”

13È ŋɔ́nɔ mò ǹyɛɛi,

“Ŋa pâi lâai la.”

È ŋɔ́nɔ m̀o ǹyɛɛi,

“Ńyãa ká ŋí kwa ǹîa-pɛlɛɛi Ɣâla è dítɛ̀ɛ ḿbɔi.”

14Mɛni ma berei nɔ́ ǹîa-pɛlɛɛi díkaa la a núu-kpunei, bere nɔ́ ƃe Zîsɛ máŋ káa la a núu-kpune a gɛɛ saa sarâi é ǹúui su kara nyíi ŋwála-walai káa ǹyêei saa mɛi. Maa-nuui ƃa Dɛ̂ƃele. 15È diai kélee ŋuŋ ma ƃò dí kɛ̀ a fúlu-laa su kôyaa ŋɔluɛ-ŋa saa ŋɔyao-maai sarâi. 16Tɔ̃yâ ma vé pá ní a gɛɛ é kpɔ́ŋ ŋ̀âla-taa kela-ŋai dîa, kɛ́lɛ, è pà a gɛɛ é kpɔ́ŋ Eberaɣɛ̃ɛ ŋɔsuui-su-ƃelai dîa. 17Mɛni ma fɛ̂ɛ é kɛ́ yɛ̂ɛ m̀arâai pere sii kélee su, a gɛɛ é kɛ́ a sâla láa soŋ-nuu kɛ́tɛ nyíi maloŋ-kâa káa ǹyêei zã́a Ɣâla ŋɔtíi su, a gɛɛ é ǹûai dísɔnyɔ̂ŋ maa-sala kula. 18Pɔ̂ri káa mì a gɛɛ é kpɔ́ŋ diai dîa su-kɔɔ̂ŋ a pâ dípɔ̂i, kpɛ́ni fêi, ǹyaa kpîŋ a mɛni-soli támaa káa, su-kɔɔ̂ŋ a pá bɔ.

Currently Selected:

Ibulu 2: KWB

Highlight

Copy