Ibulu 13
13
Kôrai-ƃelai dítii
1Tɔɔ ŋ̀wɛli-kɛ-maai káyêei kákîe ni mɛni mai, é lí nɔ́ tuɛ-pere. 2Káfe kpera ŋɔ̃yâ sonîi a ǹɛ́lɛɛ, kpɛ́ni fêi, ŋɔ̃yâ soŋɔɔ a ǹɛ́lɛɛ su, núu da-ni da ɣâla-taa kela-ŋa soŋ a ǹɛ́lɛɛ dítɛ̂i-pere. 3Ka kákili ŋá sia é pîlaŋ diai dîa díkaa kpini-pɛrɛ mui yɛ̂ɛ kà dîa-ni kà kɛ̀ naa. Ka kákili ŋá sia é pîlaŋ diai dîa da dísoŋ a nyɔ́mɔɔi, tãi nɔ káa máŋ kákaa la a ǹúu-kpune-ŋai. 4Tɔɔ nɛnî-kula-mɛni é kɛ́ a ƃaa-kɛ-maa pere sii kélee su. Ǹɛnî-kula-pɛrɛi mu fé kàra. Kpɛ́ni fêi, Ɣâla a pâi goyaŋ-wulu-wulu kɛ́-ƃelai da ŋwulu-wulu kɛ́-ƃelai dímɛnii ŋá têei. 5Sɛŋ-kao-wɛli fé kɛ̀ kâa káfulu-laai su. Zɛŋ nyíi gáa káyêei, kálii é láa m̀ɛni ma. Kpɛ́ni fêi, Ɣâla è mò, nyɛɛi, “Fé pâi wɔ́lɔ têei yâ, kpaa máŋ fé pâi ńyee kulâi ímu.” 6Mɛni ma kwa pɔ̂ri m̀ôi a lii-kpele pere kuɛi,
“Kúnuu-namui káa a ŋákpɔŋ mâa-nuu,
fé pâi yáôi.
Lé ƃe núu-kpune a pɔ̂ri gɛ̂i a ńyãa?”
7Ka kákili ŋá sia é pîlaŋ kátuɛ-ƃelai dîa nyíi-ŋai Ɣâla ŋɔwóoi ƃò kâai. Ka kákili ŋá sia é pîlaŋ la m̀ɛnii mâ kɛ̀ a dífulu-laai, ka dílaa-lai pɔ́ɔ kɔɔ̂ŋ. 8Zîsɛ Kôrai káa nɔ́ a ǹyaa Zîsɛ Kôrai wɛ́ɛ, sâa, da wɔlɔ-wɔlɔ. 9Káfe nɛ̀ɛ naa sɛŋ-lɛɛ nina sii da kpɛni-ŋa díka kásiɣe pere ma. Kpɛ́ni fêi, ǹɛ́lɛɛ̂i a gɛɛ Ɣâla ŋɔƃɛlɛ-sêei é núu líi su kpanaŋ, kɛ́lɛ, zu fé kpànaŋ a mii-sɛŋ sii da miɛɛ, nyíi mii-ƃela dífa mɛni lɛ́lɛɛ kùla zui. 10Ɣâla-teƃele káa kúyêei nyíi vé a sɛŋ a gɛɛ diai da sâla kùla Ŋ̀âla-pɛrɛi mui, dí dílaa míi mai. 11Kpɛ́ni fêi, zua-ŋai zâla láa soŋ-nuu kɛ́tɛi a pâ a díŋãa Gwaa Maa Waai ma a sâla sɔnyɔ̂ŋ mɛni mai, da díkèreŋ daai kɔlɛ, dífa díkèreŋ daai su. 12Mɛni ma Zîsɛ ǹyaa máŋ è mɛni-soli káa ziɣãŋ pôlu-pere a gɛɛ é ǹûai maa waa a ǹyaa kpîŋ ŋãai. 13Mɛni ma kwaa kúla daai sú kú lí bɔ dí kú ŋɔŋumɛi da sɔlɔ ƃó. 14Kpɛ́ni fêi, taa-lêe fé kúyêei ƃɛ́ nyíi gáa wɔ́lɔ nɔ naai, kɛ́lɛ, kúkaa daa-leei kɔ́rîi nyíi pâi pâi. 15Mɛni ma kwaa laa-maa-tɛ sala kúla Ɣâla ma a tãi kélee zarâi, ǹyaa ƃa ǹáa tóli-wooi nyíi a kúla núu lái. 16Káfii fé kpɛ̀ɛ a mɛni lɛ́lɛɛ kɛ́ɛ da zɛŋ gáa káyêei da tɛɛ nûa pɔ́ mɛni, kpɛ́ni fêi zâla sii-ŋai tí a Ɣâla líi làa.
17Ka kátuɛ-ƃelai wóo mɛni ká kɛ́ dímu. Kpɛ́ni fêi, díkaa kámɔlêŋ mɛi kâai yɛ̂ɛ ǹûai fɛ̂ɛ dí díkoraŋ ƃoi. Tɔɔ dí gɛ́ a lii-nɛ̃ɛ, dífe gɛ a lii-too pôlu, kpɛ́ni fêi, à kɛ̀ da kɛ̀ a lii-too pôlu, gɛ̀ ní káfe pâi mɛni lɛ́lɛɛ kulâi zu.
18Ka Ɣâla fɛ́li kúmɛni ma, kpɛ́ni fêi, kúlaai kpɔ́ la a ǹɛ́lɛɛ a gɛɛ kúkili-ŋa-siai maa waâi, kúkɛ ŋ̀wɛli a gɛɛ kúmɛni kélee kɛ́ ƃaa-kɛ-maa pere su. 19Ŋa m̀ôi kâa kpɔ́ a gbanaŋɔɔ a gɛɛ ká nyíŋi kɛ́ a gɛɛ ŋá pá ŋɔ́nɔ kápɔ pôlu a maa félaa.
Ŋ̀âla fɛliɛɛi gbɛɛ-ŋái
20Ǹii-see Ɣalai nyíi Zîsɛ Kôrai kùla saa yêei é pá la pôlu a ŋwɔlɔ-wɔlɔ kpanaŋ-woo-kɛɛi maa-ŋãai, nyíi gáa a m̀ála-ŋai mɛi-kaa-nuu kɛ́tɛi, 21é zɛŋ lɛ́lɛɛi kélee tɛ́ɛ kápɔ a gɛɛ ká ǹîa-mɛni kɛ́. É tíi kɛ́ kákponôi a zɛŋ nyíi ǹɛ́lɛɛ̂i ŋ̀ɛi, Zîsɛ Kôrai sarâi. Fólo-laa é kɛ́ m̀a wɔlɔ-wɔlɔ da wɔlɔ-wɔlɔ. É kɛ́ tí.
22Ŋa kákpera fêi, ŋánûa, ka káwoli tɔ́ɔ ǹá-woo-ŋai ŋí dîa, kpɛ́ni fêi, ŋa kɔlɔ kpua-loŋ nɔ pɔ̃yɛ kápɔ naa. 23Fɛ̂ɛ ká táre zu a gɛɛ kúƃarâŋ Temete ŋuŋ mâ a nâa ƃó. Tãi kpɔ́ nɔ́ a pâi lai, kwa ǹyaa kwa pâi pâi kú kákaa. 24Kú fáa kálaa tuɛ-ƃelai kélee dîa da Ŋ̀âla-ƃelai kélee. Diai kùla Etelei dí fàa kâa. 25Ƃɛlɛ-sêe é kɛ́ kákelee kâa. É kɛ́ tí.
Currently Selected:
Ibulu 13: KWB
Highlight
Share
Copy
Want to have your highlights saved across all your devices? Sign up or sign in
