Zɛnɛse 25

Eberaɣɛ̃ɛ da Kitura dísuui pîlaŋ-pere

(Kɔlɔnikɔ Maa-ŋuŋ 1:32, 33)

1Eberaɣɛ̃ɛ è nɛnî da kpɛ́ni kùla, nyii ǹáa è kɛ a Kɛtura. 2Da Eberaɣɛ̃ɛ dílônii láa ƃé kɛ̀ a Zimiraŋ, Zosaŋ, Medaŋ, Midiɛŋ, Isiba da Sua. 3Zosaŋ è kɛ̀ a Siƃa da Dedaŋ dínâŋ. Dedaŋ ǹônii ƃé kɛ̀ a Asuriŋ-ŋai, Letusa-ŋai da Leumiŋ-ŋai. 4Midiaŋ ǹônii ƃé kɛ̀ a Ifa, Ifɛ, Anɔ, Abida da Ɛɛdaa. Dîai ŋí kélee dí kɛ̀ a Kɛtura ǹônii.

5Eberaɣɛ̃ɛ è gɔ̃liŋ kélee tɛ̀ɛ Aise pɔ́. 6Kɛ́lɛ Eberaɣɛ̃ɛ è sama-sãa tɛ̀ɛ nɔ́ ŋɔnɛnî gbeli-ŋai dílônii pɔ́ é díkula ǹóŋ Aise kɔlɛ a tãi Eberaɣɛ̃ɛ è kɛ̀ niî la ɣele mai, é dítɛɛ vóloi ƃelai-pere lɔii su.

Eberaɣɛ̃ɛ è sàa dí nòo

7Eberaɣɛ̃ɛ è pɔlɔ a ŋánaa. È kɛ̀ ɣele mâ a kóraŋ ŋuŋ tɔnɔ pôlu buu lɔ́ɔlu mɛi feerɛ káo lɔ́ɔlu (175). 8Eberaɣɛ̃ɛ kɛ́ɛ a pɔlɔ kpɔ́ a ŋánaa pere lɛ́lɛɛ sui, è sàa dí ǹoo ŋɔnûai da wɔ́lɔ saai díkɔlɛ. 9Eberaɣɛ̃ɛ ǹônii Aise da Isimai, dí nòo Mapela kɔni-woloi su nyii kɛ̀ Ita-nuui Zoaa ǹóŋ Ɛfɔŋ ŋɔlɔii ma, Mamera ŋɛ́i-tuɛi. 10Eberaɣɛ̃ɛ è wɔ́lɔ ǹɔii tí yà Ita-ŋai yêei. Ǹyaŋ naa ƃé dí nòo naa da ŋɔnɛnîi Seera. 11Eberaɣɛ̃ɛ saa pôlu ma, Ɣâla è lûwa làa ǹóŋ Aise ma. Aise è ƃûu tɔ̀ɔ “Vúlu-laa Ɣalai Nyii Ŋ́gâai Ŋ̀ɔyá-loai lá.”

Isimai suu pîlaŋ-pere

(Kɔlɔnikɔ Maa-ŋuŋ 1:28-31)

12Eberaɣɛ̃ɛ ǹóŋ Isimai, nyii Ize nɛnii Eega, nyii kɛ̀ a Seera yée mu nɛnii è maa sɔlɔ ƃô Eberaɣɛ̃ɛ mìi, ŋɔsuui pîlaŋ-pere ká ŋí. 13Isimai ǹônii-sinaai láa ká ŋí yɛ̂ɛ berei dímaa sɔlɔ ƃó-pere káa lai. Nibayo nyii kɛ̀ a Isimai ǹóŋ maa-ŋuŋ, Kedɛ, Adebi, Misaŋ, 14Misima, Duma, Masa, 15Aada, Tema, Zɛtɔ, Nafisi da Kidima. 16Isimai ǹônii-sinaai ká ŋí da dílaa yɛ̂ɛ berei dítaa-ŋai da díƃûu-ŋai díkaa lai. Dí kɛ̀ a kâloŋ puu káo feerɛ yɛ̂ɛ berei dísîi káa lai. 17Isimai è kɛ̀ ɣele ma a kóraŋ ŋuŋ tɔnɔ pôlu buu saaƃa káo lɔ́ɔlu mɛi feerɛ (137) é lɛ́ɛ saâi. È sàa é lí ŋɔnûa pɔlɔ-ŋai pɔ́. 18Isimai ŋɔsuui è sèe ǹɔii-kpiniŋ su nyii kɛ̀ Avila da Suɔ loai. Naa è kɛ̀ Ize vóloi kulâi-pere, núu à kɛ̀ liî Asiria. È sèe a maa kôyaa ŋɔnûai dîa.

Isɔɔ da Zeeka dímaa sɔlɔ ƃó-pere

19Eberaɣɛ̃ɛ ǹóŋ Aise ŋɔsuui pîlaŋ-pere ká ŋí. Eberaɣɛ̃ɛ è kɛ̀ a Aise ǹâŋ. 20Aise è kɛ̀ a kóraŋ buu náaŋ tãi è Araŋ-nuui Bɛtuɛ ǹóŋ-nɛnii Lubɛka kùla la a nɛnîi. Bɛtuɛ è kùla Mɛsopotemia. Lubɛka ǹyaŋ è kɛ̀ a Araŋ-nuui Laƃaŋ zaaƃɔlɔ. 21Nya ƃe Aise è Yâwɛɛ fɛ̀li ŋɔnɛnîi mɛni ma, kpɛ́ni fêi, è kɛ̀ a gbómaa. Yâwɛɛ è ǹyée sèe ŋɔɣâla-fɛli-wooi mu, ŋɔnɛnîi, Lubɛka é nâa koo sîɣe. 22Kɛ́lɛ ǹîa-pɛlɛɛi díkɛ kɔ̂i díkîe-ni pɔ́ nɛnîi koo-ƃɔlɔŋ su. Nya ƃe nɛnîi è mò ǹyɛɛi, “A kɛ̀ bere ƃé a pɔ̂ri kɛ̂i la a ńyãa, gɛ̀ ní ŋa pɔ̂ri kɛ̂i ɣele ma lé mɛni ma?” Nya ƃe è lì é Yâwɛɛ marê kɛ́.

23Nya ƃe Yâwɛɛ è mò ma ǹyɛɛi,

“Lɔii-ŋuŋ feerɛ káa íkponôi.

Núu sîi feerɛ, nyii-ŋai ƃa pâi

dímaa sɔlɔ ƃôi, da pâi kɛ̂i a

díŋaa kɔlɛ́ɛ.

Dɔnɔ a pâi kɛ̂i a ŋ̀wála-walaa

é tɛ́ɛ m̀arâŋ ma.

Ǹia-nuui a pâi kɛ̂i a ǹeɣe-nuui

yée mu-nuu.”

24Tãi maa fúloŋ tãi è sèri lai, è nyũa maa sɔlɔ ƃô. 25Ǹôloŋ maa-ŋuŋ kɔlɔ è kɛ̀ a gbɔlɔɔ ma, gɔlɔ-leɣa kɛ́ ƃò gwaa kélee yɛ̂ɛ sua lêɣa yokpo. Nya ƃe dí ǹáa sèe a Isɔɔ. 26Nàa pôlu ma dí ǹêɣe maa sɔlɔ ƃô, ǹyee kɛ́ ƃò Isɔɔ túme ma. Mɛni ma dí ǹáa sèe a Zeeka. Aise è kɛ̀ a kóraŋ buu lɔ́ɔlu mɛi da a tãi Lubɛka è ǹîa-pɛlɛɛi ŋí maa sɔlɔ ƃô lai.

Isɔɔ è ŋɔpɔɔ-sɛŋ kɔ̂lɛ

27Tãi zinâa-nɛyâai dí kɛ̀tɛ lai, Isɔɔ è kɛ̀ a loŋso lɛ́lɛɛ, gɛ́ ƃò nɔ́ gbâlaŋ ŋá. Kɛ́lɛ Zeeka è kɛ̀ a ŋumɛ-nuu, gɛ́ ƃò nɔ́ ŋɔsua kɔlɔ seɣe pɛrɛi mu. 28Aise è kɛ̀ a Isɔɔ wɛ́liɛɛ, kpɛ́ni fêi, a kâa ŋ̀á kɔ̀ŋ a fɛnɛ-sɛŋ. Kɛ́lɛ Lubɛka è kɛ̀ a Zeeka wɛ́liɛɛ.

29Tãi tɔnɔ da Zeeka è kɛ̀ láo ɣîlii. Nya ƃe Isɔɔ è kùla nɔ̀ɔi su, puru ŋánaa kɛ́ ƃò mà. 30Nya ƃe Isɔɔ è mò Zeeka ma ǹyɛɛi, “Tɔɔ ŋá ǹáo kpɔlui tí da mii, kpɛ́ni fêi, puru káa ŋ́gɛ̂i.” (Mɛni ma dí dòli a Idɔŋ. Zu-kulai ƃa sɛŋ kpɔ̂lu.)

31Zeeka è mò ma ǹyɛɛi, “Fɛ̂ɛ í ípɔɔ-sɛŋ kɔ́lɛ ḿâ fúlɔi.”

32Isɔɔ ǹyɛɛi, “Ŋa kɛ́ pâi saâi, lé ƃé bɔɔ-sɛŋ a pɔ̂ri gɛ̂i ḿî?”

33Zeeka è mò mà ǹyɛɛi, “Ífoo fúlɔi.”

Nya ƃe è vòo, é ŋɔlûwai kɔ́lɛ Zeeka mà. 34Nya ƃe Zeeka è kpólo da tɔɔŋ lao tɛ̀ɛ Isɔɔ pɔ́. Isɔɔ è mìi, é gbele é mu siɣe é lí. Bere ƃé Isɔɔ è ǹyée kùla la ŋɔpɔɔ-sɛŋ mu.

Currently Selected:

Zɛnɛse 25: KWB

Highlight

Copy