Ifisiɛŋ 3
3
Pɔ̂ɔ è Ɣâla-woo ƃo Zɛ̃tai-ŋai dîa
1Sâpoi ŋí ma, ńyãa Pɔ̂ɔ, ńyãai ŋ́gaa a kpini-pɛrɛ mu Zîsɛ Kôrai mɛni ma káai a Zɛ̃tai-ŋai kámaa-mɛni mai, ŋa pɛlɛ ŋume ŋá Ǹaŋ-nuui ŋɛ́i túɛ. 2Tɔ̃yâ ma ká m̀ɛni berei Ɣâla a ŋɔƃɛlɛ-sêei tɛ́ɛ la ḿbɔ a gɛ́ɛ ŋá tíi kɛ́ kàai, 3berei noo-mɛnii a lɛ́ la mâ Ɣâla ŋɔmɛni-lɛɛi sarâi, yɛ̂ɛ berei ŋá mò la kâa nɔ́ a gbuâi. 4Kà nyíŋi lòno, ka pâi ŋámɛni-ŋa-kaai kɔ́lɔnîi naa è pîlaŋ Kôrai ŋɔloo-mɛnii ma. 5Ɣâla fé niî kɛ̀ nɛ ni núu-kpune ma ŋ̀énia pɔlɔi su, yɛ̂ɛ berei a ǹɛ́ la ŋɔsia-ƃela maa waa-ŋai dîa da ŋɔlóno kɛ́-ƃelai M̀ɔlêŋ sarâi. 6Nya ƃa, berei Zɛ̃tai-ŋai díkaa la a pɔɔ-sɛŋ-namela dia máŋ. Díkaa a gbono tɔnɔi su-ƃela da, dí ƃo a gono-teei sɔlɔ-ƃo-ƃela da Zîsɛ Kôrai kponôi Duŋ Lɛ́lɛɛi sarâi.
7Dí ŋ́gɛ̀ a Duŋ Lɛ́lɛɛi ŋí maa tii-kɛ-nuu, yɛ̂ɛ berei zama-sɛŋ káa la, nyíi gáa a Ɣâla ŋɔƃɛlɛ-sêei, nyíi è dɛ̀ɛ ḿbɔ ŋɔwála-walai ŋɔtíi kɛɛi sui. 8Ɣâla è m̀ɛlɛ-seei ŋí tɛ̀ɛ ḿbɔ a gɛ́ɛ ŋá Kôrai ŋɔtɔɔ-laai maa-mɛni ƃo Zɛ̃tai-ŋai dîa, nyíi dɛɛ̂i kúkili-ŋa-siai mai, berei máŋ ŋ́gaa la a Ɣâla ŋɔnûai kélee dídoo-mui. 9Ɣâla è m̀ɛlɛ-seei ŋí tɛ̀ɛ ḿbɔ a gɛ́ɛ ŋá gɛ́ núu kélee é noo-mɛnii káa nyíi zɛŋ kélee kpɛtɛ-Ɣalai è nòo a tãi su kôyaai, 10a gɛ́ɛ Ɣâla è nâa ŋɔtáre sii támaai lɛ́ nuu-mɛi-ƃelai dîa da ŋwála-wala-ƃelai díkaa Ɣâla-taai Kôrai-toli-kpɔŋ sarâi. 11Nyíŋi è kɛ̀ yɛ̂ɛ berei Ɣâla ŋɔwɔlɔ-wɔlɔ mɛni-kpɛtɛɛi káa la nyíi è gɛ̀ Kúnuu-namui Zîsɛ Kôrai sarâi, 12nyíi lii-kpele káa kúyêei gbonôi, da tɔ̃yâ-pere nyíi a lî a kúa Ɣâla pɔ kúlaa-lai sarâi Kôrai kponôi. 13Mɛni ma ŋa kámarê kɛ̂i a gɛ́ɛ káfii fé kpɛ̀ɛ ŋámɛni-soli-kaai ma kámɛni ma, nyíi gáa a káfolo-laai.
Kôrai ŋɔwɛli-kɛ-maai
14Nyíŋi mɛni ma ŋá pɛ́lɛ ŋ́ume ŋá Nàŋ-nuui kɔ́ɔ mu, 15nyíi núu-suu kélee gáa Ɣâla-taa da ǹɔii ma dílaa-seei a kûla ǹyêei, 16a gɛ́ɛ berei è ŋɔfólo-laai kɛ̂tɛi lai, é kákɛ kákponôi é kpanaŋ a wála-wala-laa núu-kpune kponôi Ŋɔmɔlêŋ sarâi, 17a gɛ́ɛ Kôrai é kɛ́ kálii su laa-la sarâi. A gɛ́ɛ gbɛɛ ŋái tãi kásame à lɔ̀ lai, káseêi é kpanaŋ wɛli-kɛ-maa su, 18gɛ̀ ní wála-wala a pâi kɛ̂i káyêei ka Ŋ̀âla-ƃelai kélee ka táre zu berei wɛli-kɛ-maa ŋɔŋa-kɛtɛ, ŋɔkôyaa, da ŋɔtɔɔ mɛi káa lai, da berei ziŋɔɔ̂i lai, 19a gɛ́ɛ ŋɔ́nɔ ká Kôrai ŋɔwɛli kɛ́-maai kɔlɔŋ nyíi dɛɛi táre mai, a gɛ́ɛ kálaa é fɛ́ɛ a Ɣâla ŋɔlaa-fɛɛi.
20Ǹyaŋ ǹúui pɔ̂ri káa mì a gɛ́ɛ é m̀ɛnii kɛ́ é tɛ́ɛ mɛni kélee ma kwa mare-kɛ̂ɛ kɛi, kpaa máŋ kú kúkili ŋá sía mai, yɛ̂ɛ berei ŋɔwála-walai káa tíi kɛ̂i la kúkponôi, 21maa-nûui tí ƃé vólo-laai é tɛ́ɛ bɔ́ Kôrai tóli-kpɔŋ su da Zîsɛ Kôrai núu kélee mɛni ma wɔ́lɔ-wɔlɔ da wɔlɔ-wɔlɔ. É kɛ́ tí.
Currently Selected:
Ifisiɛŋ 3: KWB
Highlight
Share
Copy
Want to have your highlights saved across all your devices? Sign up or sign in
