Ifisiɛŋ 1
1
La-ti-maa
1Ńyãa Pɔ̂ɔ, ŋ́gaa a Zîsɛ Kôrai ŋɔsia-nuu yɛ̂ɛ berei Ɣâla ŋɔnîa-mɛnii káa lai, Ŋ̀âla-ƃelai, (nyíi-ŋai díkaa Ɛfesɛi), nyíi-ŋai díkaa a laa-la-ƃela máŋ Zîsɛ Kôrai kponôi:
2Ƃɛlɛ-sêe da lii-sêe dí kɛ́ káyêei é kúla Kúnâŋ Ɣâla yêei da Kúnuu-namui Zîsɛ Kôrai.
Kúmɔlêŋ maa-lûwai gáa Kôrai kponôi
3Lûwa é kɛ́ Ɣâla ma nyíi gáa a Kúnuu-namui Zîsɛ Kôrai Ǹâŋ, nyíi a lûwa láa kûa Kôrai kponôi a Ŋ̀âla-lûwai kélee kùla Ɣâla-taai. 4É lɛ́ɛ pâi ŋ̀éniɛi kpɛtɛɛ kɔ́ɔ pîlanii è kúlɛ̀ Kôrai kponôi a gɛ́ɛ kú kɛ́ a kúmaa waa kúsɔŋ fè kɛ̀ kûa ŋ̀ɛi wɛli-kɛ-maa su. 5A kúlɛ nàa tuɛ a gɛ́ɛ kúkɛ a ǹônii Zîsɛ Kôrai sarâi, yɛ̂ɛ berei ŋɔnîa-mɛni lɛ́lɛɛi káa lai, 6a gɛ́ɛ kú ŋɔfólo-laa ƃɛlɛ-sêei maa tɛ́, nyíi è dɛ̀ɛ kúpɔ a dámaa Ŋɔwɛli-kɛ-maa Loŋ kponôi. 7Kwa ŋuŋ-ma-ƃo sɔlɔ ƃô gbonôi ŋɔŋãai sarâi, nyíi zu-kulâi ƃa kútɔ̂ŋ karaai ŋɔsu-mɛni-lɛɛi, yɛ̂ɛ berei ŋɔƃɛlɛ-sêei su kɛ́tɛ̂i lai, 8nyíi è dɛ̀ɛ kúpɔ kpɔ́ a dámaa táre sii kélee su da mɛni ŋá káai. 9A ŋɔnîa-mɛnii su-loo-mɛnii lɛ́ kûa, yɛ̂ɛ berei ŋɔnîa-mɛni lɛ́lɛɛi káa la, nyíi gáa a ŋɔmɛni kpɛ́tɛɛi Kôrai kponôi. 10Ɣâla a gbɛtɛ gíli ŋá a gɛ́ɛ tãi à sèri, é ŋ̀elei-su sãai da ǹɔii-ma sãai kélee pú gîei Kôrai kponôi.
11Dí kúwɔ̂i lɛ̀ kûa Kôrai kponôi. Dí kúlɛ̀ nàa tuɛ, yɛ̂ɛ berei ŋɔsapoi káa lai, nyíi a mɛni kélee kɛ̀ yɛ̂ɛ berei ŋɔnîa-mɛnii ŋɔmɛni kpɛtɛɛi káa lai. 12A gbɛtɛ gíli ŋá a gɛ́ɛ kúai kili-kɛ-zu è kɛ̀ kúyêei Kôrai kponôi a maa-ŋuŋ kú pá a laa-maa-tɛ ŋɔfólo-laai pɔ. 13Káa máŋ ka dɔ̃yâ-wooi mɛni, nyíi gáa a m̀álo-laai maa-tuŋ lɛ́lɛɛi, ka láa a Kôrai. Ɣâla è M̀ɔlêŋ Maa Waai tɛ̀ɛ kápɔ nyíi è góno tèe la káyêei. Bere ƃe Ɣâla è kálɛ-mɛnii su kpanaŋ la Kôrai kponôi. 14M̀ɔlêŋ Maa Waai ƃa nɛ̀ nàa tuɛ a gɛ́ɛ kwa pâi kúpɔɔ-sɛŋ sɔlɔ ƃôi Ɣâla yêei, kú lɛ́ɛ pâi zɔlɔ ƃôi. Mɛni ma kwa ǹáa maa tɛ̂ ŋɔfólo-laai mɛni ma.
Táre da mɛni kɔlɔŋɔɔ maa-Ɣala-fɛliɛ
15-16Sâpoi ŋí ma fé níi kpera ni sɛɣɛi-fei tɛɛ̂i kámaa-mɛni ma, kpɛ́ni fêi, ŋa kálaa-lai maa-mɛni ƃó nyíi gáa Kúnuu-namui Zîsɛ kponôi da káwɛli-kɛ-maai nyíi gáa Ŋ̀âla-ƃelai mɛni mai. Kámaa-mɛni káa ŋ́gili ŋá Ŋáɣâla-fɛliɛɛi su, 17a gɛ́ɛ Kúnuu-namui Zîsɛ Kôrai Ŋɔɣâlai nyíi gáa a fólo-laa-Naŋ é táre tɛ́ɛ kámɔlêŋ pɔ́ da mɛni-ŋa-kaa m̀aa-mɛni kɔlɔŋ mɛni ma, 18a gɛ́ɛ é kákili ŋá pono a gɛ́ɛ ka gɔ́lɔŋ zɛŋ gáa a gíli-kɛ-zui nyíi a kátoli mai da ŋɔfólo-laa pɔɔ-sɛŋ kɛ́tɛi nyíi gáa Ŋ̀âla-ƃelai kponôi, 19da ŋɔkɔyɛŋ-fe-maa wála-wala kɛ́tɛi gáa kúkponôi kúai laa-la káa kúyêei, yɛ̂ɛ berei ŋɔtíi kɛɛi káa la ŋɔwála-wala kɛ́tɛi sui. 20È ŋɔtíi kɛ̀ Kôrai kponôi tãi è m̀u siɣe la saa yêei é zee ǹáa-mii-yee mɛi Ɣâla-taa. 21Nàa ƃe Kôrai káa naa ǹúu-mɛi-ƃelai kélee mɛi-pere póŋ-póŋ, ŋwála-wala-ƃelai, nuu-namela, da laa-see kélee nyíi zeɛɛ̂i. Ŋ̀éniɛi ŋí su nɔ́ fei, kɛ́lɛ, nyíi pâi pâi máŋ. 22Ɣâla a sɛŋ kélee pú gɔ́ɔ mu, a gɛ́ a zãâi kélee mɛi-nuu Kôrai-toli-kpɔŋ mɛni ma, 23nyíi gáa a ŋɔkponoi nyíi ǹáa fɛɛ̂i a ǹyaa kpîŋ, gɛ sɛŋ kélee láa fɛ̀ɛ a pere-sii kéleei.
Currently Selected:
Ifisiɛŋ 1: KWB
Highlight
Share
Copy
Want to have your highlights saved across all your devices? Sign up or sign in
