Kolasiɛŋ 1

La-ti-maa

1Ńyãa Pɔ̂ɔ, ńyãai ŋ́gaa a Zîsɛ Kôrai ŋɔsia-nuu yɛ̂ɛ berei Ɣâla ńîa mɛnii káa lai, kwa Temete nyíi gáa a kúƃarâŋ nuui.

2A liî kúƃarâa Korai-ƃelai díkaa Kolasai, nyíi-ŋai laa-la káa díyêei máŋ Kôrai kponôi dípɔ:

Ƃɛlɛ-sêe da lii-sêe dí kɛ́ káyêei é kúla Kúnâŋ Ɣâla yeei.

Ɣâla-mɛni ŋɔtárei maa-Ɣala-fɛliɛ

3Kwà kɛ̀ Ɣâla fɛlîi kámɛni ma, kwa Ɣâla sɛɣɛ̂i fe a tãi kélee, nyíi gáa a Kúnuu-namui Zîsɛ Kôrai Ǹâŋ, 4kpɛ́ni fêi, kwa kálaa-lai maa-mɛni mɛni Zîsɛ Kôrai kponôi da ŋ̀wɛli-kɛ-maai gáa káyêei Ŋ̀âla-ƃelai kélee mɛni mai. 5Kálaa-lai da káwɛli-kɛ-mâai da kûla gili-kɛ-zui su nyíi ǹáâi kɛ́ɛ̂i kámɛni ma Ɣâla-taai. Ká gili-kɛ-zui ŋí maa-mɛni mɛ̀ni a maa-ŋuŋ dɔ̃yâ-wooi su, nyíi gáa a Duŋ Lɛ́lɛɛi. 6Duŋ Lɛ́lɛɛi a pá kápɔ. Gáa ƃâi ǹɔii su gwaa kélee gɛ ƃɔlɔ. Bere ƃé è kɛ̀ la kásama tãi ká Ɣâla ŋɔƃɛlɛ-sêei maa-mɛni mɛ̀ni la ká táre zu tɔ̃yâ sui, 7yɛ̂ɛ berei Ɛpafɔlɛ è nɛ̀ la kâai, nyíi gáa a kúƃarâŋ-wɛli-kɛ́-maa yée-mu-nuui. Gáa a Kôrai ŋɔtii-kɛ-nuu sãa kúpɔɔ ŋá. 8A káwɛli-kɛ-maai lɛ́ kûa M̀ɔlêŋ su.

9Mɛni ma é síɣe tãi ma kú mɛ̀ni lai, kúfe niî kpera ni Ɣâla fɛlîi kámɛni ma, a gɛ́ɛ kálaa é fɛ́ɛ a ǹîa-mɛnii kɔ́lɔŋ-pere Ɣâla-mɛni ŋɔtáre su da ŋɔmɛni ŋá-kaai, 10a gɛ́ɛ kútûa-perei é kɛ́ a maa nɛ̃ɛ Kúnuu-namui mɛni ma, ǹíi é láa kpɔ́ a ǹɛ́lɛɛ, ká ƃá tíi lɛ́lɛɛ kélee su, ká ƃɔlɔ Ɣâla mɛni kɔlɔŋɔɔ su. 11Kákponôi é kpánaŋ a wála-wala kélee ŋɔfólo-laai ŋɔwála-walai sarâi lii-kpele kélee mɛni ma da mɔ̃lɛ su-koyaa a lii-nɛ̃ɛ. 12Ka sɛɣɛi-fei tɛɛ Nàŋ-nuui pɔ nyíi kúkpɛtɛ a gɛ́ɛ kú kɛ́ a Ŋ̀âla-ƃelai tûa-perei da kɛ-ƃela gwaa-ponoɔi sui. 13A kúkula kpini ŋɔwála-walai su a li a kua ŋɔwɛli-kɛ-maa-Loŋ ŋɔkâloŋ-laai su, 14nyíi kúŋuŋ-ma-ƃoi káa gbonôi, nyíi gáa a kúsɔnyɔ̂ŋ su-mɛni-lɛɛi.

Ɣâla a pá a kúa pôlu Kôrai ŋɔsaai sarâi

15Gáa a Ŋ̀âlai nyíi kúfa gâai bɔkɔɔŋ, gáa a ǹúui maa-ŋuŋ ŋ̀éniɛi su kpɛtɛ-sãai kélee tuɛ. 16Kpɛ́ni fêi, sɛŋ kélee è kpɛ̀tɛ gbonôi, ŋ̀elei su-sãai kélee da ǹɔii ma-sãai kélee, nyíi-ŋai kwa díkâai da nyíi-ŋai kúfa díkaâi, é máŋ kɛ́ a kâloŋ-laa, kpaa nuu-namu-laa, kpaa nuu-mɛi-ƃela, kpaa máŋ wála-wala-ƃela-sɛŋ kélee è kpɛ̀tɛ zarâi, m̀aa-mɛni ma. 17Gáa sɛŋ kélee tuɛ, sɛŋ kélee kɛ́ gîe-ni sòŋ gbonôi. 18Gáa a gbonoi ŋuŋ nyíi gáa a Kôrai-toli-kpɔŋ. Gáa a gɔɔ-pîlanii, gɛ ƃo a ǹúui maa-ŋuŋ kùla saa yêei, a gɛ́ɛ dɔɔ̂i é kɛ́ a gɛ́tɛ mɛni kélee su. 19Kpɛ́ni fêi, Ɣâla è ŋ̀wɛli a gɛ́ɛ Ŋɔɣâla-laai kélee é kɛ́ gbonôi. 20Ɣâla a pá pôlu a sɛŋ kélee gbîŋ pɔ Kôrai kponôi, à nɛ̃ɛ ma kpîŋ é kɛ́ ǹɔii ma ƃɛ kpaa máŋ ɣelei-pere. È lii-sêe kɛ̀ a ŋɔŋãai puɔɔ ŋɔsaa-wurui ma.

21Káai ká kɛ̀ a ŋɔ̃yâ-ŋa a tãi tɔnɔ, kálii su nyɔ́mɔɔ Ɣâla ma, ká kɛ́ mɛni nyɔ́mɔɔ-ŋa kɛ̀i, 22a nâa pá a káa pôlu gbono ŋɔsaai sarâi, a gɛ́ɛ é kálɛ a maa-waa ƃela da sɔŋ-kpɛɛ-maa-ƃela da ǹûai dímaa-kulâi fé diai. 23Nyíŋi a pɔ̂ri kɛ̂i à kɛ̀ kà lɛ̀ɛ nɔ́ naa-lai su, kálii kɛ́ ƃo tɔnɔ ká fɔlɔ-fɔlɔ, káfa kákili kùla Duŋ Lɛ́lɛɛi ŋɔkili-kɛ-zui su nyíi ká mɛ̀nii. Duŋ Lɛ́lɛɛi ŋí è ƃo ŋeniɛi su gwaa kélee, nyíi ńyãa Pɔ̂ɔ ŋá kɛ̀ a maa-tii-kɛ-nuui.

Pɔ̂ɔ è Ɣâla-woo ƃò Zɛ̃tai-ŋai dîa

24Ŋa nâa lii-nɛ̃ɛ kulâi ŋámɛni-soli-kaai su kámɛni ma. Ŋ́gaa m̀ɛni-solii ŋí ŋ̀aa-see kɛ̂i a ŋ́gbono. Kôrai è m̀ɛni-solii ŋí lɛ̀ɛ naa mî ŋɔkponoi mɛni ma, ǹyaa ƃa Kôrai-toli-kpɔŋ. 25Ŋá kɛ̀ a Kôrai-toli-kpɔŋ ŋɔtii-kɛ-nuu, yɛ̂ɛ berei Ɣâla è ńɛ̀ la kámɛni ma a gɛ́ɛ ŋá Ɣâla ŋɔwóoi lɛ́ kâa a ǹɛ́lɛɛ, 26nyíi kɛ̀ a loo-mɛni ŋ̀éniɛi-su-ƃelai dia a tãi su kôyaa, kɛ́lɛ, a nâa lɛ́ Ŋ̀âla-ƃelai diai. 27Ɣâla è gbɛ̀tɛ gíli ŋá a gɛ́ɛ é ǹɛ́ berei noo-mɛnii ŋí ŋɔtɔɔ-laai da ŋɔfólo-laai kɛ́tɛ̂i la Zɛ̃tai-ŋai sama, nyíi gáa a Kôrai kákponôi. Ǹyaa ƃa volo-laai maa-kili-kɛ-zui. 28Kwa maa-mɛni ƃò, kúkɛ núu kélee lia-woo ƃo, kúkɛ sɛŋ lɛ̂ núu kélee ma táre kélee su, a gɛ́ɛ kú núu kélee lɛ́ a ǹáa fɛ́ɛ Kôrai kponôi. 29Nyíŋi mɛni ma ŋa tíi kɛ̂i, ŋ́gɛ kɔ kpɔ́ a ŋwála-walai kélee è bu ŋ́gbonôi kpɔ́ a gbanaŋɔɔi.

Currently Selected:

Kolasiɛŋ 1: KWB

Highlight

Copy