Pitɛ Maa-ŋuŋ 2
2
Gɔnii nyii gáa a vúlui da ǹɔii-ŋuŋ maa-waai
1Mɛni ma ka tée lii-ŋwana kélee ma da wôya-mɛni kélee. Ka kɛ́ a tɔ̃yâ-ƃela. Ka tée tólo ma da laa kara mɛni kélee. 2Ka Ɣâla niŋa ŋíni-ya maa waa wɛli kpɔ́ a ŋ̀ánaa yɛ̂ɛ nîa-pɛlɛɛi nyíi-ŋai dí dímaa sɔlɔ ƃô a ninai, a gɛɛ é káƃɔlɔ é séri a káa ƃálo-laa ma. 3Kpɛ́ni fêi, ká Kúnuu-namui ŋɔsɔŋ-lɛlɛ-laai kɔɔ̂ŋ.
4Ka pá ǹúui pɔ gáa a vúlu-laa kɔnii nyíi núu-kpune è ǹyée kùla mu, kɛ́lɛ, ǹɛ́lɛɛi Ɣâla ŋɛ́i, maa-mɛni kpanaŋɔɔi. 5Ka kákpîŋ tɔ̀ɔ a Mɔlêŋ ŋɔpɛ́rɛ yɛ̂ɛ fúlu-laa kɔni-ŋa. Ka kɛ́ a sâla láa soŋ-ƃela. Ka Mɔlêŋ ŋɔsâlai kúla Zîsɛ Kôrai sarâi nyíi a Ɣâla líi làai. 6Kpɛ́ni fêi, gáa Ŋ̀âla-kɔlɔi su,
“Ka gáa, ŋ́gaa kɔni lâai Zãiyɔŋ su, nyíi gáa a zonoŋ su-kɔni nyíi ŋá nɛ̀ maa-mɛni kpanaŋɔɔ mâi.
Ǹúui a lâa lai vé pâi ŋumɛ̂i.”
7Mɛni ma káai ka lâa lai, maa mɛni kpanaŋɔɔ̂i káŋɛi. Kɛ́lɛ, diai dífe laa ni lai,
“Gɔnii nyíi bɛ́rɛ tɔɔ-ƃelai dí díŋɛi nàɣiŋ mɛi,
a nâa kɛ́ a bɛ́rɛi sonôŋ su-kɔnii gbîŋ-kpiŋ da.”
8Ǹyaŋ,
“Gɔnii nyíi pâi nûa kɛ̂i dí karêŋ,
gɔnii nyíi pâi díkɛ̂i dí tooi.”
Ǹyaŋ dí kàreŋ, kpɛ́ni fêi, dífe díwoli tɔɔ ni ŋ̀óoi ma nyíi dí dílɛ̀ a gɛɛ dí gɛ́i.
Ɣâla kpîŋ nuai
9Kɛ́lɛ, kákaa a lɛ́-nuu suu, ka ƃo a sâla láa soŋ-nuu suu kɛ́tɛ, ka ƃo a lɔii-ŋuŋ maa waa, ka ƃo a Ɣâla kpîŋ-nua, a gɛɛ ǹúui kákùla kpíni sú é pá a káa ŋɔkwaa-ponoɔ kɛ́tɛ lɛ́lɛɛi sui, ka ŋɔtûa-pere kɛ́tɛ lɛ́lɛɛ-ŋai maa-mɛni ƃó. 10Tãi da káfe kɛ́ ní a nûa, kɛ́lɛ, ká nâa kɛ́ a Ɣâla ŋɔnûa. Tãi da káfe niî kɛ̀ maloŋ-kaa sɔlɔ ƃo ni. Kɛ́lɛ, ká nâa maloŋ-kaa sɔlɔ ƃó.
Ka káfulu-laai kɛ́ yɛ̂ɛ Ɣâla ŋɔtíi-kɛ-ƃela
11Ŋáwɛli-kɛ-maa ƃelai, káai a ŋɔ̃yâ-ŋai da ǹɔii da kpɛni su-ƃelai, ŋa kákpera fêi a gɛɛ ká síɣe núu-kpune ŋɔkɛ-pere nyɔŋ maa-sɛŋ wɛliɛi kɔlɛ nyíi gáa kɔ̂i kámɔlêŋ pɔi. 12Ka kátûa-pere lɛ́lɛ Zɛ̃tai-ŋai sáma a gɛɛ tãi ta da lòno é pîlaŋ kâa a gɛɛ kákaa a sɔnyɔ̂ŋ-kɛ-ƃela, dí kátii lɛ́lɛɛi káa dí Ɣâla ŋɔfólo-laai maa-tɛ́ a tãi Ɣâla a pâi pâi lai.
13Ka gɔmɛnɛ-ƃelai kélee wóo mɛni da núu kpeli-ŋai díkaa kámɛi. Ka gâloŋ kɛ́tɛi woo mɛni. Kpɛ́ni fêi, ǹyaa ƃe ǹɔii mɛi, 14da gɔmɛnɛ-ƃelai gâloŋ a dítɛ̂ɛ a gɛɛ dí tɔ̂ŋ kpɛ́ sɔnyɔ̂ŋ-ƃela dîa dí mɛni lɛ́lɛɛ-kɛ-ƃela láa maa tɛ́i. 15Ɣâla nîa-mɛni ƃá, a gɛɛ núu é mɛni lɛ́lɛɛ kɛ́, ŋɔmɛni lɛ́lɛɛ kɛɛ̂i é m̀oo-ƃelai díƃoo-lono-ŋai kélee kpera. 16Ka káfulu-laai kɛ́ yɛ̂ɛ ŋuŋ ma-ƃo-ƃela. Kɛ́lɛ, káfe káŋuŋ-ma-ƃoi kɛ̀ a káfâlo mɛni nyɔ́mɔɔ kɛ́ mɛni ma. Kɛ́lɛ, ka káfulu-laai kɛ̂ yɛ̂ɛ Ɣâla yée-mu-ƃela. 17Ka ƃâa kɛ́ núu kélee ma. Ka diai wɛ́li ka dîa-ni kákaa zu tɔnɔɔi. Ka yao Ɣâla ma. Ka ƃâa kɛ́ gâloŋ kɛ́tɛi ma.
Kôrai ŋɔmɔ̃́lɛi-laai maa kɔ̂ɔŋ-maai
18Yée-mu-ƃela, ka kámɛi-ƃelai wóo mɛni yao mâa pere sii kélee su. Káfe díwoo mɛni nɔ́, à kɛ̀ da kásòŋ a ǹɛ́lɛɛ. Kɛ́lɛ, ka díwoo mɛni à kɛ̀ da kásòŋ a nyɔ́mɔɔ. 19Kpɛ́ni fêi, nyíŋi káa a Ɣâla nîa-mɛni a gɛɛ ǹúui gíli káa Ɣâla mai, é mɛni-soli káa, à nɛ̀ɛ ma kpîŋ é gáa wôya-pere su. 20Lé mɛni lɛ́lɛɛ ƃe naa, à kɛ̀ kà mɛni nyɔ́mɔɔ kɛ́, ka mɛni-soli káa mɛni ma a lii-kpele? Kɛ́lɛ, à kɛ̀ kà mɛni lɛ́lɛɛ kɛ̀, ka mɛni-soli káa mɛni ma a lii-kpele, gáa a Ɣâla nîa-mɛni. 21Da kátoli nyíŋi ma, kpɛ́ni fêi, Kôrai ǹyaa máŋ è mɛni-soli kàa kámɛni mà, é ŋɔmɛni kɔɔ̂ŋ maai lɛ́ɛ káyêei, a gɛɛ ká lɛ́ɛ ŋɔtûa-perei su. 22Vé sɔnyɔ̂ŋ kɛ́ ní. Núu-pɛlɛ-woo da kélee máŋ fé kúla ní ǹá. 23Tãi dí ǹaraŋ lai, vé larâŋ pìli ní pôlu. Tãi è mɛni-soli kàa lai, vé dímaa yao ní. Kɛ́lɛ, è ŋ̀ɔi tɛ̀ɛ nɔ́ mɛni-saa ŋa-tee nuu sãa tɔnɔi pɔ. 24Ǹyaa kpîŋ è kúsɔnyɔ̂ŋ-ŋai síɣe gbonôi zaa-wurui mâ, a gɛɛ kú kpera kúɣeniɛi kɛ́ɛ ma sɔnyɔ̂ŋ mɛni ma, kú kúɣeniɛi kɛ́ tɔ̃yâ-laa mɛni ma. Ǹókwa-pala-ŋai dí káƃàlo. 25Kpɛ́ni fêi, ká kɛ̀ yɛ̂ɛ ƃála-ŋa nyíi-ŋai kɛ̀ pâi lánîi, kɛ́lɛ, ka nâa pá pôlu M̀ála mɛi-kaa-nuui pɔ, ǹúui a kámɔlêŋ mɛi kâai.
Currently Selected:
Pitɛ Maa-ŋuŋ 2: KWB
Highlight
Share
Copy
Want to have your highlights saved across all your devices? Sign up or sign in
