Popular Bible Verses from Pitɛ Maa-ŋuŋ 2

Share

Kɛ́lɛ, kákaa a lɛ́-nuu suu, ka ƃo a sâla láa soŋ-nuu suu kɛ́tɛ, ka ƃo a lɔii-ŋuŋ maa waa, ka ƃo a Ɣâla kpîŋ-nua, a gɛɛ ǹúui kákùla kpíni sú é pá a káa ŋɔkwaa-ponoɔ kɛ́tɛ lɛ́lɛɛi sui, ka ŋɔtûa-pere kɛ́tɛ lɛ́lɛɛ-ŋai maa-mɛni ƃó.

Ǹyaa kpîŋ è kúsɔnyɔ̂ŋ-ŋai síɣe gbonôi zaa-wurui mâ, a gɛɛ kú kpera kúɣeniɛi kɛ́ɛ ma sɔnyɔ̂ŋ mɛni ma, kú kúɣeniɛi kɛ́ tɔ̃yâ-laa mɛni ma. Ǹókwa-pala-ŋai dí káƃàlo. Kpɛ́ni fêi, ká kɛ̀ yɛ̂ɛ ƃála-ŋa nyíi-ŋai kɛ̀ pâi lánîi, kɛ́lɛ, ka nâa pá pôlu M̀ála mɛi-kaa-nuui pɔ, ǹúui a kámɔlêŋ mɛi kâai.

Tãi da káfe kɛ́ ní a nûa, kɛ́lɛ, ká nâa kɛ́ a Ɣâla ŋɔnûa. Tãi da káfe niî kɛ̀ maloŋ-kaa sɔlɔ ƃo ni. Kɛ́lɛ, ká nâa maloŋ-kaa sɔlɔ ƃó.

Ka Ɣâla niŋa ŋíni-ya maa waa wɛli kpɔ́ a ŋ̀ánaa yɛ̂ɛ nîa-pɛlɛɛi nyíi-ŋai dí dímaa sɔlɔ ƃô a ninai, a gɛɛ é káƃɔlɔ é séri a káa ƃálo-laa ma.

Ŋáwɛli-kɛ-maa ƃelai, káai a ŋɔ̃yâ-ŋai da ǹɔii da kpɛni su-ƃelai, ŋa kákpera fêi a gɛɛ ká síɣe núu-kpune ŋɔkɛ-pere nyɔŋ maa-sɛŋ wɛliɛi kɔlɛ nyíi gáa kɔ̂i kámɔlêŋ pɔi. Ka kátûa-pere lɛ́lɛ Zɛ̃tai-ŋai sáma a gɛɛ tãi ta da lòno é pîlaŋ kâa a gɛɛ kákaa a sɔnyɔ̂ŋ-kɛ-ƃela, dí kátii lɛ́lɛɛi káa dí Ɣâla ŋɔfólo-laai maa-tɛ́ a tãi Ɣâla a pâi pâi lai.

Ka kákpîŋ tɔ̀ɔ a Mɔlêŋ ŋɔpɛ́rɛ yɛ̂ɛ fúlu-laa kɔni-ŋa. Ka kɛ́ a sâla láa soŋ-ƃela. Ka Mɔlêŋ ŋɔsâlai kúla Zîsɛ Kôrai sarâi nyíi a Ɣâla líi làai.

Mɛni ma ka tée lii-ŋwana kélee ma da wôya-mɛni kélee. Ka kɛ́ a tɔ̃yâ-ƃela. Ka tée tólo ma da laa kara mɛni kélee.

Ka pá ǹúui pɔ gáa a vúlu-laa kɔnii nyíi núu-kpune è ǹyée kùla mu, kɛ́lɛ, ǹɛ́lɛɛi Ɣâla ŋɛ́i, maa-mɛni kpanaŋɔɔi.

Ka káfulu-laai kɛ́ yɛ̂ɛ ŋuŋ ma-ƃo-ƃela. Kɛ́lɛ, káfe káŋuŋ-ma-ƃoi kɛ̀ a káfâlo mɛni nyɔ́mɔɔ kɛ́ mɛni ma. Kɛ́lɛ, ka káfulu-laai kɛ̂ yɛ̂ɛ Ɣâla yée-mu-ƃela.

Ɣâla nîa-mɛni ƃá, a gɛɛ núu é mɛni lɛ́lɛɛ kɛ́, ŋɔmɛni lɛ́lɛɛ kɛɛ̂i é m̀oo-ƃelai díƃoo-lono-ŋai kélee kpera.