Popular Bible Verses from Pitɛ Maa-ŋuŋ 1

Share

Lûwa é kɛ́ Zîsɛ Kôrai Ŋɔɣâlai da Ǹâŋ ma! Ŋɔmaloŋ-kaa kɛ́tɛi su, da ŋɔ́nɔ kúmaa sɔlɔ ƃó a nina kwa kɛ́ fulu-laa kili-kɛ-zu su, Zîsɛ Kôrai ŋɔmu-siɣe saa-yeei sarâi, kwa kɛ́ a pɔɔ-sɛŋ sɔlɔ ƃo-ƃela nyíi va wɔ́lɔ tɛ̀ɛ, m̀aa fé kara ni, vé tela pâi karâi, ǹáâi kɛɛ̂i Ɣâla-taa kámɛni ma

Ka lii-nɛ̃ɛ kula nyíŋi sú. Berei máŋ nàa kuro à kɛ̀ tí, ka pâi mɛni-soli kâai su-kɔɔ̂ŋ sii támaa sui, a gɛɛ kálaa-lai ŋɔsu-kɔɔ̂ŋ é kɛ́ laa-maa-tɛ su, da ƃaa-kɛ-maa, é pɛ́lɛ folo-laa ma a Zîsɛ Kôrai pá tãi. Ǹaa-lai nyíi mɛni kpanaŋɔɔ̂i é tɛ́ɛ gôo ma nyíi a karai, berei máŋ da gɔ̀ɔŋ la a ŋɔŋ.

Kɛ́lɛ, yɛ̂ɛ berei ǹúui kátòlii maa waâi lai, ka kɛ́ a kámaa waa tûa-pere kélee su. Kpɛ́ni fêi, bɔ̃yɛɛ̂i, “Fɛ̂ɛ ka kɛ́ a maa-waa-ƃela, kpɛ́ni fêi, ḿaa waâi.”

Kákaa a woo-mɛni ƃela. Káfe kɛ̀ a tua-pere-nyɔŋ maa-sɛŋ wɛli-ƃela yɛ̂ɛ berei ká wɔ́lɔ kɛ̀ la tãi káfe kɛ́ ni a bere sã́ai kɔlɔŋɔɔ lai.

Mɛni ma ka kákili-ŋa-siai kpɛtɛ ká kɛ́ a káŋuŋ sú séɣeŋɔɔ, ká kákili-kɛ-zui kélee pú m̀ɛlɛ-seei ma nyíi pâi kápɔ a Zîsɛ Kôrai lɛ́ ɣelei.

Kpɛ́ni fêi, “Núu-kpune kélee káa nɔ́ yɛ̂ɛ kala, núu-kpune kélee ŋɔfólo-laai kɛ́ ƃò yɛ̂ɛ wúru-pôa. Galai a kpâla, boa kɛ́ pù. Kɛ́lɛ, Kúnuu-namui wóo káa nɔ́ naa wɔ́lɔ-wɔlɔ.” Ǹyaŋ maa-wooi ƃa Duŋ Lɛ́lɛɛi nyíi dí mò kâai.