ROMANOS 4
4
Singillhicmoscama aptemaclha ilhnic nat Abraham
1Pac oyitsic aptemaclha ilhnic nat ningilyeyjamcaa nano. ¿Jalhco ilhnic nat aptemaclha ningilyeyjamcaa Abraham? 2Aplhenacpec Abraham aptomja ilhnic nat appeyvomo napato Dios ayinyema apyiplovquiscama actemaclha actamila. Apvanquic nic nat inyicje eyimtalhnesacpoc apanco Abraham. Am nic nat copvanac eyimtalhnesacpoc apanco napato Dios. 3Intomjac nic nat Dios appayvam actalhesomalhca: “Am nic nat eyascacmoc Abraham actemaclha aplhanma Dios. Eycaso ayinyema aptimesomap appeyvomo napato Dios” —nic nat intomjac.#Gn 15.6; Gá 3.6. 4Ningyasamcoc nincoo: Ningiltamjam sat ancoc nincoo, ongillhovac sat acyanmongam. Jave singmescama nasa. Actomja eyca acyanmongam nintamjaycam. 5Am sat ancoc coyitnac nintamjaycam actamila yoyam colhenalhcac. Am sat ancoc ongilyascacmoc Dios aptomja aptimesquiscama apquilpeyvomo enlhit melyascalhma, colhic sat sintimesa ningilpeyvomo ayinyema mongyasquiyam. 6Acno ilhnic nat aplhanma apvisqui David. Ningillhenalhquic nincoo ningiltomja ningilinyejemo. Ayinyemaclha Dios aptomja singiltimesquiscama ningilpeyvomo mepqui aclhenomalhca nintamjaycam actamila. 7Aptomjac nic nat apvisqui David:
Apquilinyejemoc anco enlhit, ayinyemaclha Dios aptomja apmascoscama aptemaclha acmasom. Najan aptomja apmascoscama mongilyascalhma.
8Apquilinyejemoc anco enlhit, ayinyemaclha Visqui ingac aptomja melyipsatem melyascalhma as enlhit#Sal 32.1-2.
—nic nat aptomjac.
9Altamjoc oltimnacsic mocjam quellhip: ¿Apquilvamlha ya judíos acma asoc monquinatquiscama apyimpeoc eltimjic apquilinyejemo? ¿Metnaja judíos ya najan yoyam eltimjic apquilinyejemo? Eje, najan maa. Aplhenacpec nic nat Abraham aptimesomap appeyvomo napato Dios ayinyema meyasquiyam. 10Amamyi ilhnic nat aptimesomacpo appeyvomo Abraham napato Dios. Alhayi ilhnic nat mactimesquiscama asoc monquinatquiscama apyimpejic Abraham. 11Apvitac nic nat Abraham asoc monquinatquiscama apyimpejic,#Gn 17.10. yoyam colhejec acyascacmo aptomja aptimesomap amamyi appeyvomo napato Dios ayinyema meyasquiyam. Apquiltamjoc nic nat Dios yoyam etnejic Abraham apvisay “mongyasquiyam inyap”. Yoyam etnejic malha apquilyap aplhamoclhojo enlhitaoc lhalhma anco apquiltomja melyasquiyam. Ayinyemaclha Dios aptimesquiscama apquilpeyvomo enlhitaoc lhalhma anco mepqui asoc monquinatquiscama apyimpeoc. 12Aptomjac najan Abraham aptovana niptamin aplhamoclhojo judíos apquiltomja apquilyiplovquiscama actemaclha meyasquiyam Abraham. Ayinyemaclha amamyi ilhnic nat aptimem meyasquiyam ingilyap Abraham. Alhayi ilhnic nat mactimesquiscama asoc monquinatquiscama apyimpejic.
Invocmec nic nat nelha aplhanmaclha Dios actomja nasoc anco ayinyema mongyasquiyam
13Aplhenquic nic nat Dios actomja nasoc anco yoyam emquesic sat Abraham aclhamoclhojo asoc nalhpop. Yoyam najan elmesic aplhamoclhojo aptovana niptamin, malha ningillhoy ingilyap apquilnatam.#Gn 17.4-6; 22.17-18; Gá 3.29. Eycaso aplhanma ilhnic nat Dios ayinyema actemaclha meyasquiyam Abraham mepqui apyiplovquiscama singanamaclha. Aptimesacpec nic nat appeyvomo Abraham napato Dios. 14Apquillhenacpec sat ancoc enlhit apquilyiplovquiscama singanamaclha yoyam ellhovac apquilvamlha asoc ayinyema Dios. Alhtoc sat cotnejic actemaclha mongyasquiyam, alhtoc sat najan cotnejic aplhanmaclha Dios aptomja nasoc anco.#Gá 3.18. 15Yitnec mataa acyanmongsayclha ayinyema singanamaclha acyanmongam mongyiplovquiscama. Am sat ancoc coyitnac singanamaclha, colhejec sat ningilsilhnanomalhca.
16Nasoc anco as amyaa: Inlhenalhquic actemaclha mongyasquiyam najan actemaclha singamliyam ayinyema Dios. Eycaso aplhanma ilhnic nat Dios actomja nasoc anco yoyam elmesic aplhamoclhojo aptovana niptamin Abraham. Jave apquilvamlha yoyam ellhovac apquiltomja apquilyiplovquiscama singanamaclha. Eyca yoyam ellhovac aplhamoclhojo apquiltomja melyasquiyam, acno ilhnic nat actemaclha meyasquiyam Abraham. Eycaso ayinyema ningiltimem ingilyap Abraham.#Gá 3.7. 17Intomjac nic nat Dios appayvam actalhesomalhca: “Actimescasquic lhip yoyam etnejic apquilyap aplhamoclhojo enlhitaoc” —nic nat intomjac.#Gn 17.5. Ayinyemaclha am nic nat eyascacmoc Abraham aplhanmaclha Dios aptomja aplhaticjasquiyam apquilmasquingvaycmo najan aptomja apquilantipquiscama asoc colvitamalhca mocjam.
18Yitnec nic nat aljalhneycam apvalhoc Abraham naysicsa meyascaoc asoc yoyam covac sat. Am nic nat eyascacmoc Abraham. Eycaso ayinyema aptimesquiscama Dios yoyam etnejic Abraham “aptovana niptamin aplhamoclhojo enlhitaoc”. Ayinyemaclha aptomjac nic nat Dios apcanya Abraham: “Quip ilanojo apyova netin mongmovan ongilyipsitic. Sat ellhojoc aptovana niptamin” —nic nat aptomjac.#Gn 15.5. 19Apvanyam nic nat aptomjac Abraham. Apvocmec nic nat cien años.#Gn 17.17. Acvanyam nic nat aptava acvisay Sara. Apyasamcoc nic nat Abraham, inmasquec acvitay ayitca aptava. Am nic nat eyca comasquingvocmoc aptimem meyasquiyam. 20Am nic nat eyascacmoc Abraham aplhanmaclha Dios actomja nasoc anco. Inyangvocmec nic nat aptimem meyasquiyam. Apcayo ilhnic nat aptomjac Abraham Dios Ingyapam. 21Apyasamcoc nic nat Abraham actemaclha apmopvan Dios yoyam esavojo aplhanmaclha actomja nasoc anco. 22Eycaso ayinyema aptimesquiscama appeyvomo Dios ayinyema meyasquiyam Abraham.
23Intalhesalhquic nic nat as amyaa, jave apvamlha aplhenamap Abraham. 24Ningillhenalhquic nincoo. Ayinyemaclha nincoo lha colhic sat sintimesa ningilpeyvomo napato Dios ayinyema mongyasquiyam. Am ongilyascacmoc nincoo Dios aptomja aplhaticjasquiyam Visqui ingac Jesús nipyesicsa apquilmasquingvaycmo. 25Apyinyovacpec alhta Jesús yoyam ematong acyanmongam mongilyascalhma.#Is 53.4-5. Aplhaticjascacmec alhta Dios yoyam colhic sintimesa ningilpeyvomo napato Dios.
Currently Selected:
ROMANOS 4: ENHL
Highlight
Share
Copy
Want to have your highlights saved across all your devices? Sign up or sign in
