ROMANOS 5

Aclhenomalhca actemaclha mepqui ningilsilhnanomalhca

1Ningiltimesalhquic nincoo ningilpeyvomo napato Dios ayinyema mongyasquiyam. Yiplovcoc najan actamilaycam ingvalhoc napato Dios ayinyema Jesucristo Visqui ingac. 2Ingvanquic ongilyoclhojo Dios yoyam ongillhovac singaycaoc. Eycaso ayinyema mongyasquiyam Jesucristo. Yitnec nincoo quilhvo Dios singaycaoc. Inpayjeclhec nincoo ingvalhoc, ayinyemaclha acyitna aljalhneycam ingvalhoc yoyam ongilpasmoc sat gloria aptemaclha apyimtalhnamo Dios. 3Moc asoc najan: Inpayjeclhec najan ingvalhoc naysicsa ninlingaycamco acmasca. Ningyasamcoc nincoo: Naysicsa ninlingaycamco acmasca ongilyasingvomoc actemaclha ningilinlhanyam. 4Naysicsa ningilinlhanyam actemaclha ningyiplovquiscama ongilyasingvomoc actemaclha ningiltamilcasomalhco inganco. Coyangvomoc sat aljalhneycam ingvalhoc. 5Cotnaja alhto aljalhneycam ingvalhoc nincoo. Ingilmasquic nincoo Dios ningasicjayo ayinyema Espíritu Santo. Apnec ingilvalhoc Espíritu Santo aptomja singmescama Dios.

6Invocmec alhta acnim yoyam jingilvomsic tap nincoo Dios. Apquitsepquic alhta Cristo singyanmongam ningiltomja mongilyascalhma. Ayinyemaclha mongvanquejec alhta ongilmiyovalhcojo inganco. 7Paj lhama enlhit apquiltemo ematong acyanmongam poc yoyam emyovacpoc aptomja appeyvomo. Apquiltamjoc lhaja enlhit ematong acyanmongam aptimem poc apanco aptomja aptamila. 8Ingillhicmosquic alhta Dios actemaclha singasicjayo. Apyinyovquic alhta Apquitca apvisay Cristo yoyam ematong singyanmongam naysicsa ningyiplovquiscama alhta mongilyascalhma. 9Quilhvo eyca innec sintimesa ningilpeyvomo napato Dios ayinyema apquitsepma Cristo singyanmongam nincoo. Ningyasamcoc nincoo yoyam ongilmiyovalhcac sat ayinyema Cristo, acvaa sat acnim apyanmongsayclha Dios apquiltemaclha enlhitaoc. 10Nincoo ningiltomja siclhoc anco ningilinmelhaycam Dios, malha metnaja apnaymacoc napato Dios. Ingilasicjaclhec alhta Dios naysicsa nintemaclha inganco ayinyema apmatnam Apquitca singyanmongam. Quilhvo eyca acyitna actamilaycam ingilvalhoc napato Dios aptomja singasicjayclho mocjam. Nasoc anco jingilmeyvoc sat yoyam ongileyoc sat lhama Cristo. 11Moc asoc mocjam: Inpayjeclhec nincoo ingvalhoc ningiltomja ninpasmeyquiclha Dios Ingyapam ayinyema Jesucristo Visqui ingac. Ayinyemaclha Cristo aptomja singasicjascaseyquiclho Dios.

Adán najan Cristo

12Eycaso actemaclha siclhoc anco: Lhama enlhit nic nat ayinyemayaclha siclhoc anco mongilyascalhma acpayjeyquiclho nipyesicsa enlhitaoc lhalhma anco. Yiplovcoc nic nat ningitsepma ayinyema mongilyascalhma.#Gn 3.6-19. Inpayjeclhec najan ningitsepma nipyesicsa enlhitaoc lhalhma anco. Ayinyemaclha acyitna aplhamoclhojo enlhitaoc melyascalhma. 13Acvoy amamyi ilhnic nat mongilyascalhma. Alhayi acvoy ilhnic nat singanamaclha Dios. Am nic nat colhenalhcac acvisay mongilyascalhma, ayinyemaclha am nic nat coyitnac mocjam singanamaclha najan singascamaclha. 14Inpayjeclhec nic nat actemaclha ningitsepma nipyesicsa enlhitaoc apquilictingaycamco lhama Adán acvocmo apquilictingaycamco lhama Moisés. Apquitsepmec nic nat Adán ayinyema melyajayquiclho apcascama Dios.#Gn 2.16-17; 3.11-12. Apquilitsepmec nic nat najan aplhamoclhojo enlhitaoc mepqui lha apcascamaclha Dios. Adán aptomja apyitsomacpo enlhit yoyam evac sat apvisay Cristo.

15Eycaso sicyitquiscama: Avanjec anco amyaa aplhenamap Cristo, am colhno amyaa aplhenamap Adán. Avanjec nic nat apsilhnanomap Adán aptomja appayesayclha mongilyascalhma nipyesicsa enlhitaoc lhalhma anco. Apquilitsepmec nic nat aplhamoclhojo enlhitaoc. Avanjec anco singmescama nasa Dios ayinyema Jesucristo yoyam ellhovac sat aplhamoclhojo enlhitaoc apquiltomja melyasquiyam. 16Moc actemaclha Dios singaycaoc, moc actemaclha ilhnic nat apsilhnanomap enlhit. Lhama enlhit nic nat apsilhnanomap ayinyema apnatovasomap aplhamoclhojo enlhitaoc. Singmescama nincoo Dios Cristo yoyam emascocsic aclhamoclhojo actemaclha mongilyascalhma. Colhic sat sintimesa ningilpeyvomo napato Dios. 17Lhama enlhit nic nat ayinyemayaclha siclho ningitsepma actomja acmovan. Colhic sat ningmovan nincoo ayinyema lhama enlhit apvisay Jesucristo. Ayinyemaclha ningillhocac nincoo Dios singaycaoc aptomja singiltimesquiscama ningilpeyvomo actemaclha singmescama nasa.

18Elnatovasacpoc sat aplhamoclhojo enlhitaoc ayinyema lhama enlhit apsilhnanomap. Colhic sat altimesa apquilpeyvomo napato Dios aplhamoclhojo enlhitaoc, ellhovac sat acyimnatem apnenyaoc. Ayinyemaclha lhama enlhit Jesucristo aptomja apsovjomo apyiplovquiscama actemaclha acpeyvomo. 19Lhama enlhit nic nat melyajayquiclho ayinyemayaclha apquilsilhnanomap actemaclha melyascalhma aplhamoclhojo enlhitaoc. Colhic sat altimesa apquilpeyvomo napato Dios aplhamoclhojo enlhitaoc ayinyema apquilyajayquiclho alhta lhama enlhit apvisay Jesucristo.

20Invaac nic nat singanamaclha yoyam coyangvomoc acvitomalhca actemaclha mongilyascalhma. Avanjec anco actemaclha singmescama nasa Dios, am colhno aclhamocma actemaclha mongilyascalhma. 21Acmovan innac mongilyascalhma. Avanquic mataa colnapoc aplhamoclhojo enlhitaoc apquilyiplovquiscama actemaclha mongilyascalhma. Acmovan najan innac Dios singasicjayo. Actomja singiltimesquiscama ningilpeyvomo napato Dios. Actomja singmescama acyimnatem ingnenyaoc cotmongvoycamlha nelha ayinyema Jesucristo Visqui ingac.

Currently Selected:

ROMANOS 5: ENHL

Highlight

Copy