ROMANOS 3
3
1Apquililtamjoc elyasamcojo quellhip: ¿Actamila anco ya apquilvisay judíos, am colhno apquilvisay metnaja judíos? ¿Actamila ya coytic asoc monquinatquiscama apyimpeoc? 2Naso, actamila anco apquiltemaclha judíos, am colhno apquiltemaclha enlhitaoc lhalhma anco. Ayinyemaclha apquillhoy apmamyi ilhnic nat judíos aplhanmaclha Dios actomja nasoc anco.#Sal 147.19-20. 3Naso, napocja judíos apquiltomja apquilyeycajascaoc apquillhenaclha. ¿Pa ya eyeycajacsic najan lha Dios aplhenaclha ayinyema enlhitaoc apquilyeycajascaoc apquillhenaclha? 4Paj. Am eyeycajasac mataa Dios aplhenaclha. Enlhitaoc eyca apquiltomja apquilmopvancaa amyaa. Ayinyemaclha intomjac nic nat aclhanma Dios appayvam:
Etnejic sat lhip appeyvomo ayinyema meyeycajascama aplhanma.
Colhic sat acyimyeclho lhip naysicsa ningyicpilcomalhquilha#Sal 51.4.
—nic nat intomjac.
5Apquililtamjoc elyasamcojo mocjam quellhip: ¿Naso ya cotalhcac aptemaclha Dios appeyvomo ayinyema nintemaclha acmasom? (Acnasoc coo actemaclha apquilpayvam enlhitaoc). Apyanmongsaclhec sat ancoc Dios nintemaclha acmasom, ¿apyeycajasqui ya Dios aplhanma? 6Paj. Am eyeycajasac mataa Dios aplhenaclha. Ayinyemaclha Dios enatovacsic sat enlhitaoc lhalhma anco.
7Apquililtamjoc elyasamcojo mocjam quellhip: Invitalhquic sat ancoc aptemaclha Dios appeyvomo ayinyema sicmovan amyaa. ¿Pa ya colhic ayaco Dios ayinyema sicmovan amyaa? ¿Soctomja yoyam eyanmongsiclhac Dios sictemaclha moyascalhma? 8Apquilanayquic mataa enlhitaoc conyemac nincoo aclhanmaclha nano: Ingvanquic ongillana asoc acmasom yoyam cotalhcac asoc actamila. Jave ayinyema nincoo. Dios sat eyanmongsiclha actemaclha apquillhanma as enlhitaoc.
Ninlhamoclhojo ningiltomja ningilsilhnanomalhca
9¿Jalhco sat cotnejic? ¿Ningiltamila ya nincoo ningilvisay judíos, am elhno metnaja judíos? Paj. Ningilanalhco ningiltomja ningilsilhnanomalhca ayinyema mongilyascalhma, najan judíos najan metnaja judíos. 10Intomjac nic nat Dios appayvam actalhesomalhca:
Paj lhama enlhit aptomja appeyvomo napato Dios.
11Paj lhama enlhit aptomja apyascamco.
Paj lhama enlhit aclhanma apvalhoc Dios.
12Apquilyinyovquic Dios aplhamoclhojo.
Apquillhinganacmec aplhamoclhojo.
Paj lhama enlhit aptomja apyiplovquiscama asoc actamila.#Sal 14.1-3; 53.1-3.
13Malha enlhit aptajapma mengyatongnomap intomjac sinticjansa ayinyema apquilpayvam as enlhitaoc.
Apquilmopvan amyaa mataa apquiltomjac.#Sal 5.9.
Asquejec mataa apquilpayvam as enlhitaoc, malha acyeyva sintaclhama intomjac.#Sal 140.3.
14Apquiltemaclha apquilyamneycam as enlhitaoc, asquejec apquilpayvam.#Sal 10.7.
15Inquilpecjasquic mataa yoyam elajic poc.
16Apnatovasquic mataa aclhamoclhojo asoc apquilyasaclha.
Invitalhquic mataa niptamin actemaclha apnatovascama najan apquilyimtalhnescama apquilvalhoc enlhitaoc.
17Am elyasamcoc as enlhitaoc actemaclha actamilaycam ingvalhoc.#Is 59.7-8.
18Am collhenac apquilvalhoc yoyam elavojoc Dios Ingyapam#Sal 36.1.
—nic nat intomjac Dios appayvam.
19Ningyasamcoc nincoo, inpeyvoc aclhanma singanamaclha actalhesomalhca. Apquillhenacpec enlhitaoc acyitna singanamaclha. Copvanquejec lhama etnejic appayvam: “Mepqui sicsilhnanomalhca coo”. Ayinyemaclha aplhamoclhojo enlhitaoc lhalhma anco apquiltomja apquilsilhnanomap napato Dios. 20Copvanquejec lhama enlhit etnesacpoc appeyvomo napato Dios ayinyema apquilyiplovquiscama singanamaclha.#Sal 143.2; Gá 2.16. Acvamlha actomja singyascasingvoyam actemaclha mongilyascalhma.
Ningilvomsomalhquilha tap ayinyema mongyasquiyam
21Ingillhicmosquic nincoo Dios moc actemaclha yoyam jingiltimesquisic ningilpeyvomo napato, cotnaja ayinyema singanamaclha. Inlhenalhquic nic nat as actemaclha acpeyvomo vaycajac singanamaclha Moisés najan apnatalhescama profetas Dios apquillingascama. 22Eyca as actemaclha yoyam jingiltimesquisic ningilpeyvomo Dios ayinyema mongyasquiyam Jesucristo.#Gá 2.16. Collhenalhquejec apquilvisay judíos najan apquilvisay metnaja judíos, apquilanomacpo apno poc. 23Apquilanomacpo apquiltomja apquilsilhnanomap ayinyema melyascalhma. Colapvanquejec apanco eltimjic apquilpeyvomo napato Dios. 24Eyca Dios aptomja singiltimesquiscama ningilpeyvomo, actomja singaycaoc actemaclha singmescama nasa. Ayinyemaclha ingilvomcasquic tap ayinyema Cristo Jesús. 25Apyinyovquic alhta Dios Apquitca apvisay Cristo, malha macmescama asoc acyanmongam mongilyascalhma. Am sat ancoc ongilyascacmoc nincoo aptomja apquitsepma singyanmongam, colmascosalhcac sat mongilyascalhma. Apquiltamjoc alhta Dios jingillhicmocsic aptemaclha appeyvomo. Am nat epecjasac Dios eyanmongsiclha mongilyascalhma nano. 26Ingillhicmosquic nincoo quilhvoc Dios aptemaclha appeyvomo as ningvamlha nac jay. Ingiltimescasquic nincoo ningilpeyvomo ayinyema mongyasquiyam Jesús.
27¿Ingvanqui ya ongilyimtalhnesalhcojo inganco? Paj, mongvanquejec nincoo. ¿Soctomja mongvanco nincoo? Ayinyemaclha actemaclha ningilpeyvomo napato Dios ayinyema mongyasquiyam, mepqui ningyiplovquiscama singanamaclha. 28Ningyasamcoc nincoo: Colhic sat sintimesa ningilpeyvomo napato Dios ayinyema mongyasquiyam mepqui ningyiplovquiscama singanamaclha.
29¿Apvamlha ya judíos Apvisqui apancaoc Dios? ¿Jave ya najan metnaja judíos Apvisqui apancaoc Dios? Naso, Dios aptomja najan Apvisqui apancaoc metnaja judíos. 30Ayinyemaclha apnec apvamlha lhama Dios aptomja aptimesquiscama apquilpeyvomo judíos najan metnaja judíos ayinyema melyasquiyam.#Dt 6.4; Gá 3.20. 31¿Ningiltovasqui ya nincoo singanamaclha Moisés naysicsa mongyasquiyam Jesucristo? Paj, mongiltovacseje. Ningiltimescasquic nincoo mataa nasoc anco actemaclha aclhanma singanamaclha.
Currently Selected:
ROMANOS 3: ENHL
Highlight
Share
Copy
Want to have your highlights saved across all your devices? Sign up or sign in
