ROMANOS 2

Apyicpilcoc Dios actemaclha actomja nasoc anco

1Iyasamcojo sat lhip. Appejescacmec lhip poc apcanem eyicpilco aptemaclha. Ayinyemaclha lhip najan aptomja apsilhnanomap. Aplhenquic sat ancoc lhip aptemaclha poc, cotnejic sat aplhanma apanco aptemaclha lhip.#Mt 7.1; Lc 6.37. Ayinyemaclha apyiplovcasquic lhip lha aptemaclha apanco naysicsa aplhanma aptemaclha poc. 2Ningyasamcoc nincoo, apyicpilcoc Dios actemaclha aptomja nasoc anco, yoyam enatovacsic apquiltomja apquilyiplovquiscama actemaclha acmasom. 3¿Apcanayqui ya lhquip ingyinquitacpoc acvaa sat apyanmongsayclha Dios? Copvanquejec sat. Lhip aptomja apcanem eyicpilco aptemaclha poc naysicsa apyiplovquiscama lhip aptemaclha. 4¿Aptomja ya lhquip apvinéycam Dios aptomja singasicjayo najan aptomja singiljalhanma? ¿Apyasamco ya lhquip aptemaclha Dios? Apquiltamjoc Dios yoyam eyanmongsic apvalhoc lhip ayinyema singasicjayo. 5Acyimnatem apvalhoc lhip. Copvanquejec eyanmongsic apvalhoc. Etac sat apyanmongsayclha Dios acvocmo sat acnim ningyicpilcomalhcoclha. Etacpoc sat Dios aptomja appeyvomo. 6Colhojoc sat acyanmongam apquiltemaclha moclhama enlhit.#Sal 62.11-12; Pr 24.12; Jer 17.10; Ez 18.30; 33.20; Mt 16.27. 7Apquilyiplovcasquic sat ancoc actemaclha actamila naysicsa apquiltingyey acyimnatem apnenyaoc, coyanmongentac sat. Eltimjic sat apquilyimtalhnamo ayinyema Dios najan colhic sat alaco najan ellhovac sat acyimnatem apnenyaoc cotmongvoycamlha nelha. 8Apquilyiplovcasquic sat ancoc actemaclha apquilatingmoctamo najan actemaclha acmasom. Am sat ancoc elilyajaclhoc amyaa actomja nasoc anco, covac sat apyanmongsayclha Dios. 9Colyimtilhojoc sat apquilvalhoc najan apquilminay moclhama enlhit apquiltomja apquilyiplovquiscama actemaclha acmasom. Apmamyi apquilvitay sat cotnejic judíos, natamin elvitac sat najan metnaja judíos. 10Colhic sat alaco najan colhic sat actamilaycam apquilvalhoc moclhama enlhit apquiltomja apquilyiplovquiscama actemaclha actamila. Apmamyi apquilvitay sat cotnejic judíos, natamin elvitac sat najan metnaja judíos.

11Am colhenac apvalhoc Dios apquilvisay enlhitaoc. Apnoc mataa poc judíos najan metnaja judíos.#Dt 10.17. 12Am sat ancoc elyasamcoc enlhitaoc singanamaclha Moisés, elnatovasacpoc sat acnim ningyicpilcomalhcoclha ayinyema melyascalhma. Apquilyasamcoc sat ancoc enlhitaoc singanamaclha Moisés, elnatovasacpoc sat ayinyema singanamaclha Moisés. 13Jave ayinyema aplingay enlhit singanamaclha yoyam etnejic appeyvomo napato Dios. Apvamlha apquiltomja apquilyiplovquiscama singanamaclha eltimjic sat apquilpeyvomo napato Dios. 14Am elyasamcoc enlhitaoc lhalhma anco actemaclha singanamaclha. Apquiltimem apanco altamila, malha apquilyiplovquiscama singanamaclha. 15Yitnec apquilvalhoc as enlhitaoc singanamaclha, malha actalhesomalhca apquilvalhoc. Apquilyiplovcasquic as enlhitaoc naysicsa apquileyvam. Anit actemaclha aclhanma apquilvalhoc asoc enlhitaoc. Yitnec aclhanma apquilvalhoc yoyam colsilhnanac mataa, najan moc yoyam melsilhnanacpeje. Inyasingvoclhoc mataa moc aclhanma apquilvalhoc actemaclha apquileyvam. 16Covac sat acnim yoyam elyicpilcojo Dios apquiltemaclha enlhitaoc. Epquiniclhac sat ayalhnaclhojo alquitamsama apquilvalhoc enlhitaoc ayinyema Jesucristo. Acno mataa sillhicmoscama quellhip tasic amyaa.

Enlhitaoc judíos najan singanamaclha Moisés

17Actomjac coo siyanya lhip apvisay judío: Apcajamacpo apanco lhip apvisay judío. Apyiplovcasquic lhip mataa singanamaclha Moisés. Apyimtalhnesacpec apanco lhip aplhanma apvisay Dios. 18Apyasamcoc lhip apmayjayoclha Dios. Apyasingvocmec lhip acvisay actemaclha actamila najan acvisay actemaclha acmasom. 19Apcanayquic lhip nasoc anco apmopvan eyantimiclha mepqui apataoc. Najan ingyipvanic ingyitsasquisic olhma enlhitaoc apnaycam yatescamalhma. 20Apquiltamjoc lhip etnejic apquillhicmoscama nipyesicsa apquitcaoc. Apquiltamjoc lhip etnejic apcanem elilyejiclhojo enlhitaoc melyascamco. Ayinyemaclha apyasingvocmec lhip actemaclha ningyascamco najan actomja nasoc anco naysicsa apquilyipsatem singanamaclha. 21Actomjac coo siyanya lhip: Apquiltamjoc lhip eyascasingvomoc poc. ¿Soctomja meyasingvocmo nac lhip apanco? Aptomjac mataa lhip apcanya poc: “Nominyilh nasa”. ¿Soctomja apminyilha nac lhip? 22Aptomjac mataa lhip apcanya poc: “Notvas nasa actemaclha singilyimjapma”. ¿Soctomja aptovasa nac lhip singilyimjapma? Aptanovqui inyicje lhip quilaycmasquiscama acyitsomalhca Dios. ¿Soctomja apminyilha nac lhip asoc acnaycaoc acyitnaclha quilaycmasquiscama? 23Apcajamacpo apyascamco lhip singanamaclha. ¿Soctomja aptomja nac lhip apvinéycam Dios naysicsa meyiplovquiscama singanamaclha?

24Intomjac nic nat Dios appayvam actalhesomalhca: “Apquilvinéycam apquiltomja metnaja judíos apvisay Dios, quellhip ayinyemaclha melyiplovquiscama apcanamaclha” —nic nat intomjac.#Is 52.5.

25Naso, apyiplovcasquic sat ancoc lhip apvisay judío singanamaclha Moisés, actamila sat cotnejic asoc monquinatquiscama apyimpejic. Am sat ancoc eyiplovcasac lhip apvisay judío singanamaclha Moisés, alhtoc sat cotnejic asoc monquinatquiscama apyimpejic. 26Apyiplovcasquic sat ancoc singanamaclha Moisés metnaja judío mepqui asoc monquinatquiscama apyimpejic, ¿pa ya elhojoc sat enlhit acma asoc monquinatquiscama apyimpejic napato Dios? 27Apyiplovcasquic sat ancoc actemaclha singanamaclha metnaja judío mepqui asoc monquinatquiscama apyimpejic. Eycaso etnejic sat apyicpilquemo lhip aptemaclha. Ayinyemaclha am eyiplovcasac lhip singanamaclha apvisay judío acma asoc monquinatquiscama apyimpejic. 28Jave apvisay judío apanco lhip napato Dios ayinyema acma asoc monquinatquiscama apyimpejic najan ayinyema apyeyjamcaa. 29Judío apanco napato Dios apvisay enlhit acyitna apvalhoc asoc monquinatquiscama.#Dt 10.16; 30.6; Jer 4.4. Eycaso ayinyema Espíritu apanco Dios, cotnaja ayinyema singanamaclha actalhesomalhca. Eyca as enlhit etnejic appeyvomo napato Dios, colhic sat ayaco ayinyema Dios, cotnaja ayinyema enlhit.

Currently Selected:

ROMANOS 2: ENHL

Highlight

Copy