ROMANOS 1

Aptalhesquiscama Pablo yoyam elyipsitic Jesucristo

apmolhama tingma Roma

1Coo nac Pablo, sictimem silancam Jesucristo najan sictimem apóstol siyapajasomalhca ayinyema Dios. Eponquincasquic alhta Dios yoyam otnejic siclingascama tasic amyaa. 2-7Actalhescasquic as vaycajac actemaclha aclhanma evalhoc aplhamoclhojo quellhip apnaycam tingma Roma. Apquiltomja Dios apquilyacyescama apquilasicjayo. Apquilponquincasquic alhta Dios, malha apquevoycam quellhip. Altamjoc coo yoyam ellhovac quellhip apcaycaoc najan altamilaycam apquilvalhoc ayinyema Dios Ingyapam najan Jesucristo Visqui ingac.

Aplhenquic nic nat Dios actomja nasoc anco yoyam jinglingacsic as tasic amyaa. Apnatalhesamquic nic nat profetas Dios apquillingascama as amyaa vaycajac acponquinomalhca. Aplhenacpec nic nat Dios Apquitca. Apvisqui David aptavin niptamin alhta Jesucristo.#Mt 1.1; 12.23. Espíritu apanco Dios alhta aplingascama aptomja Dios Apquitca apyimtalhnamo, ayinyema aplhaticjangviyam alhta nipyesicsa apquilmasquingvaycmo. Ningillhocac nincoo Dios apcaycaoc ayinyema Jesucristo. Ingilasinaquic alhta nincoo yoyam ongiltimjic apóstoles ningilapajasomalhca. Apquiltamjoc yoyam onlingacsic apvisay nipyesicsa enlhitaoc lhalhma anco, yoyam melyascamejec apvisay Jesucristo najan elilyejiclhojo appayvam. Quellhip najan apquillhenacpoc apquiltomja apquilanyomap ayinyema Jesucristo, malha apquevoycam.

Apquiltamjoc Pablo etnejic soycam amyaa tingma Roma

8Gracias actomjac coo siclhoc anco Dios ayinyema Jesucristo Visqui ingac. Inlhenquic evalhoc apquiltemaclha quellhip aplhamoclhojo. Ayinyemaclha inlingalhquic lhalhma anco actemaclha melyasquiyam quellhip. 9Alinlhanacmec coo silmalhnesquiscama quellhip. Dios aptomja setayo naysicsa silmalhnancama. Acyiplovcasquic evalhoc naysicsa silancam Dios. Aclingasquic coo mataa tasic amyaa actemaclha aplhenamap Apquitca. 10Almalhnaquic coo mataa Dios. Apvanquic Dios ingyanic otnejic maycaa nipyesicsa quellhip yoyam copayjiclhac evalhoc coo. 11Avanjec siltemo olvitac quellhip. Altamjoc olyimnatesquisic apquilvalhoc quellhip ayinyema Dios apcaycaoc. 12Ongilitsovasalhcojoc sat lhama, ayinyemaclha acno moc mongilyasquiyam coo najan quellhip.

13Quellhip elyalhinga. Pac oltimnacsic mocjam lhama: Altamjoc alhta mataa otnejic maycaa nipyesicsa quellhip.#Hch 19.21. Am alhta ovanac oyacsic, moc asoc mataa selyascamalhma. Altamjoc oltimnacsic tasic amyaa nipyesicsa quellhip, malha siyinayclha actic yoyam ongvita acyilhna. Acno alhta mataa siltimnascama nipyesicsa enlhitaoc moc yoclhilhma. 14Ayanyalhquic coo yoyam oltimnacsic tasic amyaa nipyesicsa metnaja nintemolhama najan nipyesicsa enlhitaoc nipvajac, nipyesicsa apquilyascamco najan nipyesicsa melyascamco. 15Altamjo inyicje mataa ovoclhac nipyesicsa quellhip tingma Roma yoyam oltimnacsic tasic amyaa.

Acmovan innac tasic amyaa

16Momancayc coo oltimnacsic tasic amyaa.#Mr 8.38. Ayinyemaclha acmovan innac ayinyema Dios,#1 Co 1.18. yoyam colvomsic tap aplhamoclhojo apquiltomja melyasquiyam. Apquillhenacpec siclhoc anco judíos yoyam eltimnasacpoc. Najan maa aplhamoclhojo enlhitaoc lhalhma anco. 17Ingillhicmosquic nincoo tasic amyaa actemaclha yoyam jingiltimesquisic ningilpeyvomo Dios ayinyema mongyasquiyam. Am colhenalhcac moc asoc, acvamlha lhama mongyasquiyam. Intomjac nic nat Dios appayvam actalhesomalhca: “Enlhit aptomja appeyvomo napato Dios colhic sat acyimnatem apnenyic ayinyema meyasquiyam” —nic nat intomjac.#Hab 2.4.

Apquiltemaclha acmasom enlhitaoc lhalhma anco

18Pac otalhosquisic siclho actemaclha apyanmongsayclha Dios ayinyema netin. Eyanmongsiclhac sat Dios apquiltemaclha apancaoc aplhamoclhojo apquilmapsomcaa najan enlhit melyascalhma. Ayinyemaclha apquilinmelham mataa amyaa actomja nasoc anco ayinyema apquiltemaclha almasomcaa. 19Apquilyasamcoc as enlhitaoc actemaclha ayinyema Dios. Ayinyemaclha Dios aptomja aplhicmoscama. 20Mongvanquejec ongvita Dios. Ingvanquic eyca ongvita asoc apquilantipquiscama Dios. Apquilyasamcoc as enlhitaoc apna netin Dios najan actemaclha apmopvan cotmongvoycamlha nelha. Ayinyemaclha apquilvitac aclhamoclhojo actemaclha aptamjaycam Dios. Colapvanquejec as enlhitaoc eltimjic: “Moyasamcoc coo aptemaclha Dios”. 21Apquilyasamco inyicje as enlhitaoc apna netin Dios. Am eyca eltomjac apquilayo, am najan eltomjac gracias Dios ayinyema apcaycaoc. Inquilquitamquic mataa apquilvalhoc asoc almasomcaa. Am colmac apquilvalhoc actamila ayinyema Dios, malha yatescamalhma intomjac apquilvalhoc.#Ef 4.17-18. 22Apquillhenacpo apanco apquilyascamco as enlhitaoc. Jave apquilyascamco, acyeyjamelhma apquiltomjac. 23Apquilyinyovquic alhta Dios aptomja apyimtalhnamo najan mengyitsepma. Apquilyanmoncaseclhec alhta quilaycmasquiscama acyitsomalhca enlhit actomja yoyam emasquingvomoc.#Sal 106.20; Jer 2.11. Apquillanac alhta mocjam quilaycmasquiscama acyitsomalhca nata najan moc acyitsomalhca asoc navjac najan moc acyitsomalhca nimisma.#Dt 4.16-18. Eycaso apquiltomja apquilayo.

24Am alhta elyasalhma Dios apquiltemaclha as enlhitaoc. Apquilyiplovcasquic alhta actemaclha alitsepma apnenyaoc najan actemaclha apquilanatama. Apquiltovasquic alhta apquilyovoclhojo apancaoc. 25Apquilyascacmec alhta amyaa actomja nasoc anco. Am alhta elyascacmoc acmovan amyaa. Apquiltimec alhta mataa apquilayo asoc apquilantipquiscama nic nat Dios. Am alhta elacoc mataa aptomja Dios apanco. Incaymalhquic ontimjic ningilayo Dios cotmongvoycamlha nelha. Amén. 26Am alhta elyasalhma Dios apquiltemaclha as enlhitaoc. Apquilyiplovcasquic alhta actemaclha apquilanatama. Inquilyinyovquic alhta quilvanaa alpatjetaycaoc anatamcaa. Inquilvajanamquic alhta moc actemaclha alpatjetaycaoc naysicsa quilvanaa lhama. 27Apnoc alhta najan apquilinava. Apquilyinyovquic alhta apquilpatjetaycaoc apnatamcaa. Apquilvajanamquic alhta moc actemaclha apquilpatjetaycaoc nipyesicsa apquilinava lhama. Inyiplovcoc alhta acyanmongayclha apquiltemaclha apancaoc. Apquillingamcoc alhta acmasca apquilyovoclhojo.

28Am colyacmoc as enlhitaoc elyasamcojo aptemaclha Dios. Am alhta elyasalhma Dios apquiltemaclha apancaoc. Apquilyiplovcasquic alhta alquitamsama apquilvalhoc almasomcaa, yoyam elvajanamcoc apquiltemaclha apancaoc. 29Eyca as enlhitaoc apquiltomja melpeyvomo, apquiltomja apquiltamongvaycmolhma, apquiltomja apquilmasma asoc, apquiltomja apquilmapsomcaa, apquiltomja apquilyasipquiscama, apquiltomja apquilajem poc, apquiltomja apquilatingmomap, apquiltomja apquilyinimquiscama najan apquilmopvancaa amyaa. 30Apquiltomja apquillhamasomap, apquiltomja apquilvinéycam poc, apquiltomja apquilantipquiscama apvisay poc, apquiltomja apquiltanoncama Dios, apquiltomja apquilminascama poc, apquiltemaclha ayajamalhco apquilvalhoc, apquilyimtalhnesomacpo apanco, apquilinlhanyam apquiltingyey asoc almasomcaa, apquiltomja melyajayquiclho apquilyap najan inquin. 31Apquiltomja melyascamco, apquiltomja apquilyeycajascaoc apquillhenaclha, apquiltomja mepqui apquilasicjayclho, apquiltomja mepqui apquilimlaycmo. 32Apquilyasamco inyicje as enlhitaoc actemaclha apcanama Dios: Elnatovasacpoc sat acyanmongayclha apquiltemaclha apquilyiplovquiscama acmasom. Am elacac mataa as enlhitaoc. Apquilyispaquic mataa apquilvita apquilvajanayclho poc apquiltemaclha almasomcaa.

Currently Selected:

ROMANOS 1: ENHL

Highlight

Copy