ROMANOS 16
16
Actomjaclha nelha appayvam Pablo
1Altamjoc coo yoyam elpasmoc quellhip ingyalhing acvisay Febe. Apquilyasamcoc quellhip actomja alancam as quilvana Jesucristo apmolhama tingma Cencrea. 2Elma sat tacja as ingyalhing actemaclha ninpasmeyquiclha Jesucristo. Eycaso nintemaclha mataa nipyesicsa Jesucristo apmolhama. Elpasim sat as ingyalhing ayaymalhco inlhojo asoc. Ayinyemaclha avanjec alhta mataa acpasmom ingilyalhinga. Epasmec alhta coo lha.
3Inlhenquic evalhoc ingyalhing Priscila najan atava Aquila aptomja sictamjaycamo lhama.#Hch 18.2. Ningiltomja ninpasmeyquiclha Cristo Jesús. 4Am alhta emyovsacpo apanco sevomsa tap ingyalhing Aquila najan aptava. Gracias actomjac coo, gracias najan apquiltomja aplhamoclhojo Jesucristo apmolhama metnaja judíos. 5Inlhenquic najan evalhoc ingilyalhinga apcanayclha mata Aquila tingma pac. Inlhenquic najan evalhoc sictimem emoc Epeneto, aptomja apmamyi apyanmonquiscama apvalhoc yoclhilhma Asia. 6Inlhenquic najan evalhoc ingyalhing María. Avanjec alhta actamjaycam nipyesicsa quellhip. 7Inlhenquic najan evalhoc enaymacoc judíos apvisay Andrónico najan Junias. Apquiltomja alhta sicnaycamo lhama singilpilhtetomaclha. Apquiltomja alhta apmamyi apquilyanmonquiscama apquilvalhoc. Apquiltomja apquilayo nipyesicsa apóstoles apquilapajasomap.
8Inlhenquic najan evalhoc inyalhing Amplias, sictomja siyasicjayo ayinyema Visqui ingac. 9Inlhenquic najan evalhoc ingyalhing Urbano, aptomja sictamjaycamo lhama ayinyema Cristo Jesús. Inlhenquic najan evalhoc ingyalhing siyasicjayo Estaquis. 10Inlhenquic najan evalhoc ingyalhing Apeles, aptomja apquilinlhanyacmo meyasquiyam Cristo. Inlhenquic najan evalhoc Aristóbulo apmolhama. 11Inlhenquic najan evalhoc ingyalhing judío Herodión. Inlhenquic najan evalhoc Narciso apmolhama, apquiltomja melyasquiyam Visqui ingac. 12Inlhenquic najan evalhoc quilvana ingyalhing Trifena najan moc Trifosa, altomja altamjaycam ayinyema Visqui ingac. Najan moc quilvana ingyalhing Persida, actomja actamjaycam ayinyema Visqui ingac. 13Inlhenquic najan evalhoc ingyalhing Rufo aptomja apyacyesomap ayinyema Visqui ingac.#Mr 15.21. Najan inquin actomja coo lha malha meme. 14Inlhenquic najan evalhoc ingilyalhinga Asíncrito najan Flegante najan Hermas najan Patrobas najan Hermes najan apnaymacoc ingilyalhinga. 15Inlhenquic najan evalhoc ingilyalhinga Filólogo najan Julia najan Nereo najan apyalhing quilvana najan Olimpas najan aplhamoclhojo ingilyalhinga apnaycamo lhama.
16Elpayvesap sat acyiplomo acpayjayclha apquilvalhoc. Inquillhenquic apquilvalhoc aplhamoclhojo Jesucristo apmolhama apnaycam moclhama yoclhilhma.
17Quellhip elyalhinga. Actomjac coo silanya quellhip: Elavojo quellhip ingilyalhinga apquiltomja apquilatingmoctamo najan apquiltomja apquilsilhnanoncama poc. Eycaso apquiltomja apquilinmelhaycam singillhicmoscama apquilyasingvoyam alhta quellhip. Noeltime nasa apquilpasmeyquiclha as enlhitaoc. 18Am colhenac mataa apquilvalhoc as enlhitaoc yoyam elanam Jesucristo Visqui ingac. Inlhenquic mataa acvamlha apquilvalhoc nintom yoyam elyipcanmojo. Apquiltamilsam mataa apquilpayvam as enlhitaoc yoyam elvajansic ingilyalhinga apquiltomja apquiltamilcasomacpo apanco. 19Inlingalhquic amyaa lhalhma anco apquiltomja quellhip apquililyajayquiclho. Inpayjeclhec evalhoc siclinga apquiltemaclha quellhip. Altamjoc yoyam eliltimjic quellhip apquilyascamco elyiplovsic actemaclha actamila. Altamjoc yoyam colvoncomoc quellhip elyiplovsic actemaclha acmasom. 20Dios aptomja singmescama actamilaycam ingvalhoc. Quilhvoc sat eltamam Dios yavey Satanás acna nipyesicsa quellhip. Altamjoc coo yoyam epasmoc quellhip Jesucristo Visqui ingac.
21Inlhenquic apvalhoc quellhip ingilyalhing Timoteo,#Hch 16.1. aptomja sictamjaycamo lhama. Inlhenquic najan apquilvalhoc ingilyalhinga Lucio najan Jasón najan Sosípater apquiltomja enaymacoc judíos.
22Coo sicvisay Tercio sictomja sictalhesquiscama as vaycajac. Inlhenquic evalhoc quellhip ayinyema Visqui ingac.
23Inlhenquic najan apvalhoc ingyalhing Gayo,#Hch 19.29; 1 Co 1.14. sicma coo tingma pac. Apcaneyclhec mataa aplhamoclhojo Jesucristo apmolhama Gayo tingma pac. Inlhenquic najan apvalhoc ingyalhing Erasto aptomja aptamilquiscama solyayem tingma (Corinto),#2 Ti 4.20. najan ingyalhing Cuarto.
24Altamjoc coo yoyam epasmoc quellhip aplhamoclhojo Jesucristo Visqui ingac.
Actomjaclha nelha aptimem apcayo Pablo
25Pac ontimjic ningayo Dios. Apvanquic eyimnaticsojoc apquilvalhoc quellhip ayinyema tasic amyaa aplhenamap Jesucristo. Eycaso apquillinga alhta quellhip siclingascama coo nipyesicsa. Asoc actomja acyilhomalhca ayenmoclha siclhoc anco aptomja singillhicmoscama Cristo. 26Quilhvo eyca inlingalhquic as amyaa nipyesicsa enlhitaoc lhalhma anco ayinyema apnatalhescama profetas Dios apquillingascama. Dios aptomja apquilasinaycam. Apquiltomjac yoyam melyascomoc najan elilyejiclhojoc aplhamoclhojo enlhitaoc lhalhma anco.
27Dios aptomja apvamlha pac lhama apyascamco. Altamjoc yoyam colhic ayaco mataa Dios ayinyema Jesucristo cotmongvoycamlha nelha. Amén.
Currently Selected:
ROMANOS 16: ENHL
Highlight
Share
Copy
Want to have your highlights saved across all your devices? Sign up or sign in
