1 CORINTIOS 1
1
Aptalhesquiscama Pablo yoyam elyipsitic Jesucristo apmolhama tingma Corinto
1Coo nac Pablo, sictimem apóstol siyapajasomalhca ayinyema Jesucristo. Eycaso actomja apmayjayoclha Dios. Najan siclhalhma ingyalhing Sóstenes. 2Actalhescasquic as vaycajac actemaclha aclhanma evalhoc apquiltomja Dios apmolhama apnaycam tingma Corinto.#Hch 18.1. Apquiltomja Dios apquilyacyescama apquilpasmeyquiclha Jesucristo. Dios aptomja apquilponquinquiscama quellhip, malha apquevoycam. Inlhenquic najan ingilvalhoc aplhamoclhojo lhalhma anco apquiltomja apquillhanma apvisay Jesucristo Visqui ingac. Ayinyemaclha Jesucristo aptomja Apvisqui apancaoc najan nincoo lha Visqui ingac.
3Altamjoc coo yoyam ellhovac quellhip apcaycaoc najan altamilaycam apquilvalhoc ayinyema Dios Ingyapam najan Jesucristo Visqui ingac.
Singaycaoc ayinyema Cristo
4Naysicsa silmalhnesquiscama quellhip actimec coo mataa gracias Dios Ingyapam. Inlhenquic mataa evalhoc Dios apcaycaoc apquillhoy quellhip ayinyema Jesucristo. 5Quellhip apquiltomja apquilpasmeyquiclha Jesucristo. Yitnec apquilvalhoc quellhip aclhamoclhojo actemaclha Dios apcaycaoc, actemaclha apquilyascamco najan actemaclha apquilpayvam. 6Apquillingasquic quellhip apvisay Cristo nipyesicsa quellhip, apquiltomja malha apquilvitaycamco. 7Coymalhquejec lhama asoc apquilmescama Dios. Acvamlha apquililjalhnec quellhip acnim yoyam evotac Jesucristo Visqui ingac. 8Elmeyvoc sat quellhip Jesucristo acvaycmo actamongvomlha nelha acnim. Yoyam eltimjic quellhip mepqui apquilsilhnanomap apvoctamo sat Jesucristo Visqui ingac. 9Am eyeycajasac mataa Dios aplhanmaclha. Apquiltamjoc eltimjic quellhip apquilpasmeyquiclha Apquitca apvisay Jesucristo Visqui ingac.
Apquilatingmomap nipyesicsa Jesucristo apmolhama
10Quellhip elyalhinga. Naysicsa siclhanma apvisay Jesucristo Visqui ingac, pac otnejic ongvanic quellhip: Eltime sat mataa apquilpasmeyquiclha. Noelatingmap nasa nipyesicsa quellhip. Noelyeycajas nasa moc apquilvalhoc. 11Quellhip elyalhinga. Aclingac coo amyaa ayinyema quilvana Cloé acmolhama. Inlhenalhquic actemaclha apquilatingmomap nipyesicsa quellhip. 12Altamjoc olhenic actemaclha apquilatingmomap quellhip. Poc apquiltomjac mataa: “Pac oyiplovcasojo aptemaclha Pablo”. Poc eyca apquiltomjac mataa: “Pac oyiplovcasojo aptemaclha Apolos”.#Hch 18.24. Poc eyca apquiltomjac mataa: “Pac oyiplovcasojo aptemaclha Pedro”. Poc apquiltomja mataa: “Pac oyiplovcasojo aptemaclha Cristo” —alhta apquiltomjac mataa. 13¿Naso ya Cristo aptomja malyatemenayclha? Paj inyicje. ¿Acmatne ya co sicvisay Pablo asoc timyescama acyanmongam quellhip? Paj inyicje. ¿Coo ya sicvisay ayinyema macyapascaseycaoc yingmin quellhip? Paj inyicje. 14Am oyapascasac mocjam yingmin lhama enlhit nipyesicsa quellhip. Inpayjeclhec evalhoc co. Apvamlha alhta sicyapasquiscama yingmin ingyalhing Crispo,#Hch 18.8. najan ingyalhing Gayo.#Hch 19.29; Ro 16.23. 15Paj lhama enlhit apmopvan elhenic ayinyema sicvisay macyapascaseycaoc yingmin. 16Acyasingvoclhoc mocjam. Acyapascasquic alhta najan yingmin apmolhama Estéfanas.#1 Co 16.15. Am oyasamcoc mocjam poc sicyapascaseycaoc yingmin. 17Am jeyapajasac Cristo yoyam olyapasquisamcoc yingmin enlhitaoc. Eyapajasquic acvamlha yoyam olngacsic tasic amyaa. Am inyicje oyimtalhnesalhcac ajanco, am najan cotnajac sicpayvam mongyascaoc. Movanquejec coo otnejic sicvinéycam actemaclha apquitsepma Cristo netin asoc timyescama.
Dios apmopvan najan apyascamcolhma apvisay Cristo
18Apquilanayquic mataa napocja enlhitaoc cotnajac actamongvayclholhma amyaa apquitsepma Cristo netin asoc timyescama. Elnatovasacpoc sat as enlhitaoc. Am eyca ongilyascacmoc nincoo as amyaa, actomja Dios apmopvan yoyam jingilvomsic tap nincoo.#Ro 1.16. 19Inlhenquic nic nat Dios appayvam actalhesomalhca:
Otvacsic sat actemaclha apquilyascamcolhma nipyesicsa enlhitaoc apquilyascamco.
Omascosquisic sat actemaclha apquilyasingvoyam nipyesicsa enlhitaoc apquilyascamco#Is 29.14.
—nic nat intomjac Dios appayvam.
20Invocmec quilhvo nac jay aclhanmaclha. ¿Apne ya nipyesicsa quellhip aptomja apyascamco? ¿Apne ya apyascamco apquiltemaclha?#Job 12.17; Is 19.12; 33.18. ¿Apne ya apyascamco ellhenic asoc lhalhma anco? ¿Am ya etvasac Dios actemaclha apquilyascamcolhma enlhitaoc lhalhma anco? Aptovasquic alhta.#Is 44.25. 21Am elyasingvocmoc mocjam enlhitaoc apquilyascamco lhalhma anco aptemaclha apyascamco Dios. Apquiltamjoc Dios elvomsic tap enlhitaoc apquiltomja melyasquiyam. Eycaso ayinyema tasic amyaa actomja apquiltanoncama enlhitaoc lhalhma anco.
22Apquililtamjoc mataa judíos elvitac tamjaycam sinpilapquiscama. Apquililtamjoc mataa griegos metnaja judíos elvitac actemaclha apquilyascamco lhalhma anco. 23Ninlingasquic nincoo amyaa Cristo aptomja apquitsepma netin asoc timyescama. Apquiltanovquic mataa judíos as amyaa. Apquilanayquic mataa metnaja judíos cotnajac actamongvayclholhma as amyaa. 24Apnam najan judíos najan metnaja judíos apquiltomja Dios apquilyacyescama. Aplhenacpec Cristo nipyesicsa maa, aptomja apmopvan ayinyema Dios najan apyascamcolhma. 25Actamila anco asoc ayinyema Dios actomja acvinomalhca nipyesicsa enlhitaoc, am colhno actemaclha apquilyascamco apanco enlhitaoc lhalhma anco. Apquilanayquic mataa enlhitaoc comopvan ellanac aclhamoclhojo asoc Dios. Eyca apyimnatem apanco Dios, am elhnoc aplhamoclhojo enlhitaoc lhalhma anco. 26Quellhip elyalhinga. Dios aptomja apquilyacyescama malha apquevoycam quellhip. Apcanitoc enlhit apquilyascamco nipyesicsa quellhip. Apcanitoc najan enlhit apquilyimtalhnamo nipyesicsa quellhip. Apcanitoc najan enlhit malayo nipyesicsa quellhip. 27Dios aptomja apquilyacyescama enlhit apquillhenamap melyascamco nipyesicsa enlhitaoc lhalhma anco. Apquiltamjoc yoyam elmancangvomoc apquiltomja apquilyascamco apanco lhalhma anco. Dios aptomja apquilyacyescama enlhit apquillhenamap melyimnatem nipyesicsa enlhitaoc lhalhma anco. Apquiltamjoc yoyam elmancangvomoc apquiltomja apquilyimnatem apanco enlhitaoc lhalhma anco. 28Dios aptomja apquilyacyescama enlhit mepqui malayo najan apquiltomja apquilvinamap nipyesicsa enlhitaoc lhalhma anco. Apquiltamjoc yoyam comascoc mayayo apquillhenamap apquilyimtalhnamo. 29Paj lhama enlhit apmopvan eyimtalhnesacpoc apanco napato Dios. 30Quellhip apquiltomja apquilpasmeyquiclha Cristo ayinyema Dios. Cristo ayinyema actemaclha ningyascamcolhma najan actemaclha ningilpeyvomo najan actemaclha ningiltamilcasomalhco inganco najan actemaclha ningilvomsomalhca tap. Eycaso ayinyema apmayjayoclha Dios. 31Intomjac nic nat Dios appayvam actalhesomalhca: “Mongvanquejec ongajalhcojo inganco, acvamlha ongiltimjic ningilayo sintimesquiscama Visqui ingac” —nic nat intomjac.#Jer 9.23-24.
Currently Selected:
1 CORINTIOS 1: ENHL
Highlight
Share
Copy
Want to have your highlights saved across all your devices? Sign up or sign in
