ROMANOS 12
12
Ningiltamilcasomalhco inganco napato Dios
1Quellhip elyalhinga. Pac oltimnacsic quellhip. Inlhenquic evalhoc actemaclha singamliyam Dios. Elmesacpojo apanco Dios, malha asoc macmescama Dios. Eltime sat macmescama Dios cotnejic alhnancoc. Eltime sat apquilancam actemaclha apyisponcama Dios. Eycaso actemaclha actamila yoyam elanam quellhip Dios. 2Noelvajanaoc nasa apquiltemaclha enlhitaoc lhalhma anco. Elyanmonquis apquilvalhoc quellhip yoyam cotnejic alhnancoc actemaclha apquilvalhoc. Elyasingvomoc sat quellhip actemaclha apmayjayoclha Dios. Elyasingvomoc sat actemaclha actamila napato Dios najan actemaclha apyisponcama najan actemaclha acpeyvomo.
3Eyasinaquic alhta Dios ayinyema seyasicjayo yoyam oltimnacsic quellhip: Noelyeycajangvomjo nasa actemaclha apquilyimtalhnamo quellhip. Elyipcon sat apquilvalhoc quellhip. Noelyeycajangvomjo nasa melyasquiyam acyitna quellhip ayinyema Dios. 4Apquilyasamcoc quellhip: Yitnec aclhamoclhojo alyiptetaclha ningyovoclhojo. Am colhnoc mataa moc actemaclha alactamalhca alyiptetaclha. 5Innoc najan nincoo lha ningiltomja ningilpasmeyquiclha Cristo ningiltomja lhama ningyovoclhojo. Ningiltomja malha singilyipitsayclha ingmoc, acno alyiptetaclha alyipitcayo moc.#1 Co 12.12.
6Ingilmasquic Dios moclhama nincoo ningmovan ningiltamjaycam ayinyema singaycaoc. Incaymalhquic ongilyiplovsic actemaclha ningillhoy ningmovan. Ningillhocac sat ancoc ningmovan yoyam onlingacsic amyaa ayinyema Dios, incaymalhquic ongilyiplovsic ninlingascama amyaa actemaclha mongyasquiyam. 7Ningillhocac sat ancoc ningmovan yoyam ongiltimjic ningilancam, incaymalhquic ongilyiplovsic actemaclha nintamjaycam actamila. Ningillhocac sat ancoc ningmovan yoyam ongillhicmocsic ingnaymacoc, incaymalhquic ongilyiplovsic actemaclha ningillhicmoscama. 8Ningillhocac sat ancoc ningmovan yoyam ongillanesiclhac apquilvalhoc ingilyalhinga, incaymalhquic ongilyiplovsic actemaclha ningillanayclha apquilvalhoc. Ingvanquic sat ancoc ongimlascoc asoc nipyesicsa ingilyalhinga, incaymalhquic mongmiyovejec naysicsa ningmilasictem. Ningiltomjac sat ancoc ningimja ingmamyi, incaymalhquic ongilinlhanmojo actemaclha ningimja ingmamyi. Ningilpasmec sat ancoc ingnaymacoc actomja ayaymomalhca asoc, incaymalhquic coyiplovjoc mataa acpayjayclha ingvalhoc.#1 Co 12.4-11.
Nintemaclha Jesucristo apmolhama
9Elasicjojo sat mataa poc mepqui apquilyinimquiscama. Eltanova sat actemaclha acmasom. Elyiplovquis sat actemaclha actamila. 10Elasicjacpojo mataa nipyesicsa quellhip, ayinyemaclha apquiltomja apquilyalhinga. Eltimesquis mataa apquilayo poc.
11Nocostejengvom nasa apquiltamjaycam quellhip. Elpenacsojo sat quellhip yoyam elanam Visqui ingac. Espíritu apanco Dios sat epecjesam apquilvalhoc.
12Colpayjiclha mataa apquilvalhoc quellhip, ayinyemaclha acyitna aljalhneycam apquilvalhoc asoc yoyam colvac sat. Elinlhanmojo sat naysicsa apquillingaycamco acmasca. Elinlhanmojo sat najan apquililmalhnancama.
13Elpasim sat mataa ingilyalhinga apquiltomja alaymomalhca asoc. Elma sat mataa tacja maycaa.#He 13.2; 1 P 4.9.
14Elmalhnesquis sat Dios yoyam epasmoc cotnaja ingmoc naysicsa macminlhinaycam quellhip.#Mt 5.44; Lc 6.28. Elmalhnesquis sat Dios yoyam epasmoc apquiltomja apquilminlhinaycam. Noelmalhnesquis nasa yoyam eyanmongsiclha Dios apquiltemaclha apancaoc.
15Inpayjeclhec sat ancoc apquilvalhoc poc, elvajaniclhojo sat quellhip. Apyipcalhquic sat ancoc poc, elvajaniclhojo sat quellhip lha.
16Noelyeycajas nasa moc apquilvalhoc. Noelyimtalhnesacpojo nasa apanco. Ellhnasojo sat mataa poc aptomja mepqui ayajamalhco apvalhoc. Noellhenacpojo nasa apanco apquiltomja apquilyascamco.#Pr 3.7.
17Noelyanmongsiclha nasa poc apquiltemaclha apquilmapsomcaa. Elinlhanmojo sat apquilyiplovquiscama actemaclha actamila napatavo aplhamoclhojo enlhitaoc. 18Apquillhenacpec sat ancoc quellhip, eltamilsojo sat mataa apquilvalhoc nipyesicsa aplhamoclhojo enlhitaoc. 19Quellhip elyalhinga. Noelyanmongsiclha nasa apquiltemaclha poc. Dios sat eyca eyanmongsiclha apquiltemaclha poc. Intomjac nic nat Dios appayvam actalhesomalhca: “Coo sat oyanmongsiclha apquiltemaclha apancaoc enlhitaoc. Eycaso appayvam Dios Visqui ingac” —nic nat intomjac Dios appayvam.#Dt 32.35. 20Intomjac nic nat mocjam: “Mayc sat ancoc incajac cotnaja ingmoc, imques sat aptom. Incajac sat ancoc acnim, imques sat apyam. Comancangvomoc sat apvalhoc cotnaja ingmoc apvita sat lhip aptemaclha apcasicjayo” —nic nat intomjac.#Pr 25.21-22. 21Noelane nasa cotnejic acyimnatem actemaclha acmasom yoyam mellhoyc quellhip. Eltime sat quellhip apquilyimnatem ayinyema apquilyiplovquiscama actemaclha actamila. Mepqui acyimnatem sat cotnejic actemaclha acmasom.
Currently Selected:
ROMANOS 12: ENHL
Highlight
Share
Copy
Want to have your highlights saved across all your devices? Sign up or sign in
