ROMANOS 11

Apquilvomsomap tap napocja enlhitaoc Israel

1Altamjoc oyasamcojo: ¿Apyinyovqui ya Dios enlhitaoc Israel apquiltomja apmolhama? Paj, am eyinyavac mocjam. Coo najan sicvisay Israel apmolhama, sictomja Abraham aptavin niptamin. Siyinyemayaclha actomja sictemolhama Benjamín.#Fil 3.5. 2Apquilyacyesquic nic nat Dios enlhitaoc Israel yoyam eltimjic apmolhama. Am eyinyavac apmolhama Dios. ¿Am ya elyasamcoc quellhip amyaa actalhesomalhca aplhenamap nic nat Elías profeta Dios aplingascama? Apquilmalhnaquic nic nat Elías aplhanma enlhitaoc Israel: 3“Visqui, quip inyeylhojo. Apticyovquic profetas lhip apquillingascama, enlhitaoc Israel alhta apquilnapma. Apquiltovasquic alhta apquilvatnamaclha asoc macmescama Dios. Elhapco coo siyaymomalhca. Apquililtamjo inyicje jelajic coo lha” —nic nat aptomjac.#1 R 19.10,14. 4Apcatingmavoc nic nat Dios: “Apnam mocjam siete mil enlhitaoc sictamilquiscama coo. Am elpayasoc mataa quilaycmasquiscama selyitquiscama coo acvisay Baal” —nic nat aptomjac.#1 R 19.18. 5Acno najan quilhvo nac jay: Apnam napocja enlhitaoc Israel apquiltomja melyasquiyam. Apquilyacyesquic alhta Dios ayinyema apcamliyam apanco. 6Jave ayinyema nintemaclha inganco yoyam jingilyacyecsic Dios eyca ayinyema aptemaclha singamliyam. Nasoc sat ancoc singilyacyescama Dios ayinyema nintemaclha inganco, alhtoc sat cotmongvomoc singamliyam.

7¿Jalhco actomja quilhvo nac jay? Am nic nat elvitac asoc aptingyeycaoc enlhitaoc Israel. Apquilvamlha napocja apquiltomja Dios apquilyacyescama apquilvitac alhta asoc aptingyeycaoc. Invocmec alhta actimem alyimnatem apquilvalhoc poc aplhamoclhojo. 8Intomjac nic nat Dios appayvam actalhesomalhca: “Aptimescasquic Dios as enlhitaoc malha acnatiyanma apquilvalhoc. Apquilmasquic apataoc yoyam melvityejec olhma. Apquilmasquic apjaycaoc yoyam mellingejec olhma. Eycaso acvocmo quilhvo nac jay” —nic nat intomjac.#Dt 29.4; Is 29.10. 9Aptomjac nic nat apvisqui David:

Apcaneclhec mataa as enlhitaoc yoyam eltovamcoc.

Altamjoc yoyam elmacpoc sat, malha quiljanma acmam asoc navjac.

Altamjoc yoyam colpilapongsic as enlhitaoc, elsilhnanacpoc sat.

Yoyam oyanmongsiclha apquiltemaclha apancaoc.

10Altamjoc yoyam eltimjic mepqui apataoc, yoyam mevityejec olhma.

Yoyam eltimjic mataa apquiljalhem as enlhitaoc#Sal 69.22-23.

—nic nat aptomjac.

Apquilvomsomap tap metnaja judíos

11Altamjoc oyasamcojo mocjam: ¿Apquillhinganacme ya judíos yoyam elnatovasacpoc sat aplhamoclhojo? Paj, melnatovasacpejec sat. Am alhta elilyajaclhoc judíos. Apquilvomsacpec tap metnaja judíos ayinyema siclho melilyajayquiclho judíos. Apquiltamjoc Dios yoyam elyasipsic mocjam judíos yoyam ellhnasojoc apquiltemaclha apquilvomsomap tap. 12Apquillhocac asoc altamila enlhitaoc lhalhma anco, malha cotlaycaoc asoc apquillhoy, ayinyema siclho melilyajayquiclho judíos. Coyangvomoc sat apquillhoy asoc altamila enlhitaoc lhalhma anco acvocmo sat acnim apquilyanmonquiscama apquilvalhoc aplhamoclhojo judíos.

13Yitnec coo yoyam oltimnacsic quellhip enlhitaoc lhalhma anco. Dios aptomja seyapajascama nipyesicsa enlhitaoc lhalhma anco otnejic sicsoycam amyaa. Inpayjeclhec mataa evalhoc naysicsa sictamjaycam siclingascama amyaa. 14Altamjoc coo yoyam elyasipsic enaymacoc judíos. Altamjoc yoyam ellhnasojoc apquiltemaclha quellhip yoyam elvomsacpoc tap napocja. 15Apyinyovquic siclho Dios judíos. Eycaso ayinyema apquilasicjayclho mocjam Dios enlhitaoc lhalhma anco. ¿Jalhco sat cotnejic elmoc tacja Dios aplhamoclhojo judíos? Cotnejic sat malha apnalhaticjangviyam nipyesicsa apquilmasquingvaycmo. 16Pac oltimnacsic actemaclha sicyitquiscama. Apponquinacpec mataa quilpasmongam macyelaquiscama yoyam colhic acmesa Dios. Apponquinacpec sat ancoc napocja macyelaquiscama, esovjacpojoc sat apponquinomap apyovoclhojo. Inquilponquinalhquic sat ancoc yamit inquipmenaoc, cosovjalhcojoc sat ancoc yamit inquipmenaoc, cosovjalhcojoc sat alponquinomalhca acyovoclhojo actingaoc.

17Apquilyitsacpec judíos malha yamit ayenomalhca. Apquilyitsacpec enlhitaoc lhalhma anco malha yamit actiyapma anco nalhma. Apquilhacpec alhta napocja judíos, malha yamit actingaoc alyatemenomalhca. Innec alhta acpalhaquiscacmo lhip nipyesicsa judíos, malha actong ayitcoc yamit actiyapma anco macyipitquisquiyam moc yamit mayinayclha. Aptomjac lhip appasmeyquiclha judíos, malha lhama yamit inquipmenaoc acpasmeyquiclha actingaoc. 18Copvanquejec lhip evinam judíos apquiltomja malha yamit ayenomalhca. Aptomjac sat ancoc lhip apvinéycam judíos, iyasamcojo anco: Jave lhip aptomja apyimnatescama inquipmenaoc. Eyca inquipmenaoc actomja acyimnatescama lhip, aptomja lhip malha actong.

19Etnejic sat lhip jeyatingmojo: “Inquilyatemenalhquic alhta actingaoc yoyam colhic seyipitsa yamit ayenomalhca, malha sictomja actong” —sat etnejic lhip. 20Naso, apquilhacpec alhta judíos malha yamit alyatemenomalhca ayinyema apquilyasquiyam. Innec alhta acpalhaquiscacmo lhip ayinyema meyasquiyam lhip. Noyimtalhnesacpojo nasa apanco, itamilsacpojo apanco lhip. 21Am alhta elmiyavac Dios apquiltomja apquilyasquiyam, malha apquilhacjam yamit actingaoc. Am sat ancoc elyajaclhoc lhip lha, eyinyovacpoc sat lhip lha. 22Quip ilanojo lhip. Dios aptomja apcasicjayo najan aptomja apnescamo apyanmongsayclha. Apyanmongsaclhec mataa apquiltemaclha melilyajayquiclho. Apcasicjavoc mataa Dios lhip aptomja meyasquiyam. Iyiplovcasojo sat lhip mataa. Am sat ancoc eyiplovcasac lhip, eyinyovacpoc sat lhip lha, malha yamit actingaoc alyatemenomalhca. 23Pac oltimnacsic mocjam quellhip: Apquilvatsamquic sat ancoc judíos apquiltemaclha apquilyasquiyam, colhic sat acpalhaquiscaclho mocjam, malha actong ayitcoc macyipitcasquiclha yamit. Apmopvan innac Dios. Apvanquic elpalhaquiscaclha mocjam judíos, malha apyipitsayclha mocjam yamit actong ayitcoc. 24Lhip aptomja metnaja judío. Innec alhta acpalhaquiscacmo lhip nipyesicsa judíos, malha actong ayitcoc ayinyema yamit actiyapma anco macyipitquisquiyam moc yamit ayenomalhca. Eycaso ayinyema cotnaja nintemaclha inganco. Apvanquic Dios elpalhaquiscaclha mocjam judíos, malha apyipitsayclha mocjam actong ayitcoc ayinyema yamit ayenomalhca. Eycaso actomja ayilhyevay anco, am colhno moc.

Apquilvomsomap tap judíos actamongvomlha nelha acnim

25Quellhip elyalhinga. Altamjoc coo yoyam melyimtalhnesacpejec apanco quellhip. Elyasamcojo sat quellhip asoc acyilhomalhca: Nasoc anco alyimnatem apquilvalhoc napocja enlhitaoc Israel. Comascoc sat alyimnatem apquilvalhoc acvocmo sat acnim apsovjomap apquilyanmonquiscama apquilvalhoc metnaja judíos. 26Natamin elvomsacpoc sat tap aplhamoclhojo enlhitaoc Israel. Intomjac nic nat Dios appayvam actalhesomalhca:

Tingma Sión sat ingyinyema Singvomquiscama tap.

Elyanmonquisquisic sat apquilvalhoc Jacob aptovana niptamin.#Is 59.20.

27Acmascosquic sat ancoc melyascalhma enlhitaoc,

ollanac sat asoc monquinatquiscama sicmayjayoclha ajanco#Jer 31.33-34.

—nic nat intomjac Dios appayvam.

28Apquiltanovquic mocjam tasic amyaa judíos. Apquiltomja malha metnaja apnaymacoc Dios. Eycaso ayinyema apquilasicjamap quellhip. Eyca apquilasicjavoc mocjam Dios aplhamoclhojo judíos aptomja apquilyacyescama. Ayinyemaclha apquilasicjavoc nic nat Dios judío apquilictingam apmamyi. 29Memyongvoclhejec mataa Dios singaycaoc ningillhoy nincoo. Melvatescamejec najan singilanem, malha singilevoycam. 30Quellhip apquiltemaclha nano melilyajayquiclho Dios. Quilhvo eyca apquilvita aptemaclha Dios apcamliyam, ayinyemaclha am elilyajaclhoc mataa judíos. 31Quilhvoc apquiltomja melilyajayquiclho judíos naysicsa apquilvitay quellhip Dios apcamliyam. Elviticlhac sat mocjam judíos Dios apcamliyam. 32Apquiltamjoc Dios elimlimojo apquilanomacpo, ayinyemaclha apquilanomacpo alhta apquiltomja melilyajayquiclho.

33Cotlaycaoc asoc acyitna Dios, malha cascama apquilnatam. Avanjec anco apyascamcolhma Dios. Mongvanquejec ongilyasamcojo acvamlha actemaclha aclhanma apvalhoc Dios. Mongvanquejec najan ongilyasamcojo acvamlha aptemaclha apanco Dios.#Is 55.8-9. 34Intomjac nic nat Dios appayvam actalhesomalhca: “¿Soc enlhit apyasamcoc actemaclha apvalhoc Dios Visqui ingac? ¿Soc enlhit aptomja appamejitsaycam Dios?” —nic nat intomjac.#Job 15.8; Is 40.13; Jer 23.18; 1 Co 2.16. 35¿Soc enlhit apmescama asoc apanco Dios yoyam elhcac acyanmongayclha? 36Aclhamoclhojo asoc alinyema Dios. Aclhamoclhojo asoc apquillanay nic nat Dios. Aclhamoclhojo asoc altomja apancaoc Dios yoyam emiclhac mocjam.#1 Co 8.6; Ef 4.6; Col 1.16. Innec mataa ayaco Dios cotmongvoycamlha nelha. Amén.

Currently Selected:

ROMANOS 11: ENHL

Highlight

Copy