ROMANOS 10

1Quellhip elyalhinga. Inlhenquic mataa evalhoc enaymacoc Israel apmolhama. Almalhnescasquic mataa Dios yoyam elvomsacpoc tap. 2Pac oltimnacsic quellhip actemaclha sicyascamco: Avanjec apquilmayjayo enaymacoc yoyam elyiplovcasojo Dios. Am eyca coyitnac apquilyascamcolhma. 3Am elyasamcoc actemaclha yoyam eltimjic apquilpeyvomo napato Dios. Apquililtamjoc eltimjic apquilpeyvomo ayinyema apquiltemaclha apancaoc. Am colyacmoc eltimjic apquilpeyvomo ayinyema Dios. 4Intamongvocmec nelha singanamaclha Moisés. Cristo aptimesquiscacmec nelha. Am sat ancoc ongilyascacmoc Cristo, ongiltimjic sat ningilpeyvomo napato Dios.

5Intomjac nic nat aptalhescama Moisés aplhanma actemaclha acpeyvomo napato Dios: “Apsovjoc sat ancoc enlhit apquilyiplovquiscama singanamaclha colhic sat acyimnatem apnenyic ayinyema singanamaclha” —nic nat intomjac.#Lv 18.5. 6Aplhenacpec nic nat aptimesomap appeyvomo napato Dios ayinyema mongyasquiyam: “Nocotne nasa apvalhoc lhip: ¿Soc sat coyacsic netin? yoyam eyantamenta Cristo. 7Najan maa: ¿Soc sat coyacsic alyascamaclha ingjangaoc? yoyam eyantavoclha Cristo naysicsa apquiljangaoc” —nic nat intomjac. 8Eycaso aclhanma actemaclha acpeyvomo ayinyema mongyasquiyam: “Ningatoc acyitna Dios appayvam. Acyitna ingvalhoc ingac yoyam ontamilsic yoyam najan onlingacsic” —nic nat intomjac.#Dt 30.12-14. Eycaso actemaclha ninlingascama amyaa aclhenomalhca mongyasquiyam. 9Aplingasquic sat ancoc lhip apvisay Jesús aptomja Visqui ingac. Am sat ancoc coyascacmoc lhip apvalhoc Dios aptomja aplhaticjasquiyam Jesús nipyesicsa apquilmasquingvaycmo, evomsacpoc sat tap lhip. 10Yitnec sat ancoc coyasquiyam ingvalhoc, ongiltimjic sat ningilpeyvomo napato Dios. Yitnec sat ancoc ninlingascama apvisay Jesús, ongilvomsalhcac sat tap.

11Intomjac nic nat Dios appayvam actalhesomalhca: “Am sat ancoc ongilyascacmoc Visqui ingac, ongmiyovalhcac sat” —nic nat intomjac.#Is 28.16. 12Collhenalhqueje apquilvisay judíos najan apquilvisay enlhit lhalhma anco, apquilanomacpo apno poc. Ningilanalhco ningiltomja lhama Visqui ingac. Cotlaycaoc asoc acyitna Visqui ingac yoyam jingilmesic ningiltomja ningilmalhnaycam. 13Intomjac nic nat Dios appayvam: “Elvomsacpoc sat tap moclhama apquiltomja apquilmalhnaycaoc Visqui ingac yoyam epasmoc” —nic nat intomjac.#Jl 2.32. 14Apquilyascacmec sat ancoc enlhitaoc, ¿apvancaa ya elilmalhnac Visqui ingac yoyam epasmoc? Am sat ancoc ellingac mocjam enlhitaoc apvisay Visqui ingac, ¿apvancaa ya melyascomoc Visqui ingac? Am sat ancoc copayesalhcac tasic amyaa, ¿apvancaa ya ellinga tasic amyaa? 15Am sat ancoc elapajasacpoc soycam amyaa, ¿apvancaa ya elpayecsic amyaa? Intomjac nic nat Dios appayvam actalhesomalhca: “Inpayjeclhec ingvalhoc ningvita soycam amyaa apquiltomja apquillingascama tasic amyaa” —nic nat intomjac.#Is 52.7.

16Jave aplhamoclhojo enlhitaoc apquiltomja apquililyajayquiclho tasic amyaa. Aptomjac nic nat Isaías profeta Dios aplingascama: “Visqui, ¿soc enlhit aptomja meyasquiyam tasic amyaa ninlingascama nincoo?” —nic nat aptomjac.#Is 53.1. 17Incaymalhquic ongilaylhojo tasic amyaa yoyam coyiplovjoc mongyasquiyam. Incaymalhquic copayesalhcac tasic amyaa ayinyema Cristo yoyam ongilaylhojo. 18Altamjoc oyasamcojo: ¿Am ya ellingac tasic amyaa? Apquillinga inyicje mataa. Intomjac nic nat Dios appayvam actalhesomalhca:

Inlingalhquic tasic amyaa nipyesicsa enlhitaoc lhalhma anco.

Inlingalhquic apquilpayvam aclhamoclhojo yoclhilhma lhalhma anco#Sal 19.4.

—nic nat intomjac.

19Altamjoc oyasamcojo mocjam: ¿Am ya elyasingvocmoc enlhitaoc Israel tasic amyaa? Paj, apquilyasingvocmec nic nat. Intomjac nic nat Dios appayvam aplhanma ilhnic nat Moisés:

Pac oyinyoc quellhip, oyoclhac sat enlhitaoc cotnaja sicmolhama yoyam elyasipsic quellhip.

Ellovc sat quellhip apquilvita cotnaja sicmolhama apquiltomja melyascamco#Dt 32.21.

—nic nat intomjac Dios appayvam.

20Intomjac nic nat Dios appayvam aplhanma Isaías:

Am alhta jelquitamac enlhitaoc. Pilapcasquic alhta selvita.

Am alhta colhenac apquilvalhoc coo. Aclhicmosalhcoc alhta ajanco nipyesicsa#Is 65.1.

—nic nat intomjac aplhanma.

21Apquillhenacpec nic nat enlhitaoc Israel: “Aljalhnec coo acyovoclhojo acnim yoyam opasmoc as enlhitaoc apquiltomja mejelyajayquiclho najan apquiltomja selinmelhaycam” —nic nat intomjac Dios appayvam.#Is 65.2.

Currently Selected:

ROMANOS 10: ENHL

Highlight

Copy