LOS HECHOS 1
1
Aplhanma Jesús yoyam evac Espíritu Santo
1Lhip Teófilo siyasicjayo. Actalhescasquic alhta lhip moc vaycajac.#Lc 1.1-4. Actalhescasquic alhta siclho actemaclha aptamjaycam najan apquillhicmoscama Jesús, 2acvaycmo apmiyayclhilha netin. Amamyi apmiyayclha netin alhta apquilyacyesa apóstoles apquilapajasomap. Apcasinaquic alhta Espíritu Santo actemaclha, yoyam elvajanamcoc apóstoles apquilapajasomap. 3Apvitacpec alhta Jesús natamin apquitsepma. Aplhicmosacpec alhta nipyesicsa aptemaclha apjalhnancoc. Apvitacpec alhta cuarenta acnim. Am alhta elquinatcasac apquillhalhmaa. Apquiltimnasam alhta mataa amyaa Dios apquilnancascama. 4Naysicsa apnaycamo lhama alhta apóstoles apquilapajasomap aptomjac apquilanya:
—Noelyamyiclha nasa tingma Jerusalén. Ellalh sat actomja aplhanma Tata apna netin.#Lc 24.49. Innoc siltimnascama alhta quellhip —nic alhta Jesús. 5Yingmin alhta apyapascasamcoc Juan. Quilhvoc sat colhic acyapascasamco quellhip Espíritu Santo —alhta aptomjac.#Mt 3.11; Mr 1.8; Lc 3.16; Jn 1.33.
Apmiyayclha netin Jesús
6Lhama alhta apcaneclho apquiltamsoycaoc. Apquiltomjac alhta apquilanya:
—Visqui, ¿quilhvo ya pa etnescasiclha apquilanomacpo apanco enlhitaoc Israel? —alhta apquiltomjac.
7Apcatingmavoc alhta Jesús:
—Noeltamjo nasa quellhip elyasamcojo yoycamlha cotnejic asoc. Tata apna netin eyca apyasamco yoyam etnejic actemaclha aclhanma apvalhoc nano. 8Apvayventac sat ancoc Espíritu Santo tacjaplhit quellhip, ellhovamcoc sat apquilmopvan. Eltimjic sat quellhip apquillingascama sicvisay tingma Jerusalén najan yoclhilhma Judea najan yoclhilhma Samaria acvocmo nelha lhalhma anco.#Mt 28.19; Mr 16.15; Lc 24.47-48.
9Natamin apquiltimnascama Jesús macyaseclho netin. Apquilanaoclho alhta apquiltamsoycaoc. Yejemoc alhta ayajapva lhama yipjopay. Inmasquec alhta apquilvita.#Mr 16.19; Lc 24.50-51. 10Apquilinmelhavoc alhta apmiyaclhilha netin Jesús. Pilapcasquic alhta apcanvaa apcanit enlhit. Apquilmopoy apquilantalhnama alhta. 11Apquiltomjac alhta apquilanya:
—Quellhip co Galilea. ¿Soctomja apcanamcaa nac apquilinmelhavo netin? Evotac sat mocjam Jesús. Colhojoc sat apquilhyam acno actomjaclha lhac apquilvitay apmiyayclha netin —alhta apquiltomjac.
Matías apyanmongsayclha Judas
12Apquiltajaclhec alhta tingma Jerusalén. Inquilhe acvisay Olivos alhta apquilquimpac. Ningato inyicje tingma Jerusalén, malha un kilómetro. Innoc acvamlha ninlhingam singanamaclha Dios acnim ningnayclha. 13Apquilvoclhec alhta tingma. Apquilquinatveclho alhta tingma netin apnaycamcaclha. Apnam maa Pedro najan Jacobo najan Juan najan Andrés najan Felipe najan Tomás najan Bartolomé najan Mateo najan Jacobo Alfeo apquitca najan Simón Zelote najan Judas Jacobo apquitca.#Mt 10.2-4; Mr 3.16-19; Lc 6.14-16. 14Apquilaneyclhoc alhta mataa, yoyam elilmalhna. Apquilpasmec alhta aplhamoclhojo, najan Jesús apquilyalhinga najan inquin María najan moc quilvanaa.
15Apquilaneyclhec alhta as acnim ciento veinte enlhitaoc. Yejemoc alhta apquinmaclho netin Pedro nipyesicsa apquilyalhing. Apquiltimnasamcaa alhta:
16—Quellhip elyalhinga. Incaymalhquic alhta cotmongvomoc nelha aclhanmaclha ilhnic nat vaycajac Dios appayvam. Aplhanma ilhnic nat David ayinyema Espíritu Santo aplhenacpo Judas. Apnalayclha alhta Judas enlhitaoc, yoyam elmoc Jesús. 17Sinpalhalhem alhta nincoo Judas. Ingilpasmec alhta mataa ningiltamjaycam. 18Amyip alhta apmac acyanmongam solyayem aplhoy alhta acyanmongam aptamjaycam acmasom. Apmiyasantamo alhta coning apcatic aptiyacmo. Inyitapavo alhta niplhit. Intiyacmec alhta apvocmo. 19Aplingangvocmec alhta amyaa aplhamoclhojo co Jerusalén. Apquiltimec alhta acvisay amyip Acéldama, ningiltimem nincoo Ema Amyip.#Mt 27.3-8. 20Yitnec aclhanma vaycajac Salmos actema nac jay:
Mepqui tingma sat cotnejic tingma pac.
Melhejec sat mataa enlhit.#Sal 69.25.
Najan moc aclhanma:
Poc enlhit sat emiclhac aptamjaycam#Sal 109.8.
—nic nat intomjac vaycajac.
21Incaymalhquic ongilyacyecsic enlhit aptomja alhta mataa aplhalhma Jesús naysicsa singilpalhqueycam alhta Jesús. 22Incaymalhquic ongilyacyecsic aptomja apvitaycamco mataa, siclho apyapasquiscama yingmin Juan,#Mt 3.16; Mr 1.9; Lc 3.21. acvaycmo apmiyayclhilha netin Jesús.#Mr 16.19; Lc 24.51. Etnejic sat ninpasmeyquiclha aptomja apvitaycamco aplhaticjangviyam Jesús —alhta aptomjac Pedro.
23Apquilanyacpec alhta apcanit enlhit. José apquiltamjamap Barsabás, moc apvisay Justo. Najan poc enlhit apvisay Matías. 24Yejemoc alhta aptomja apquililmalhnancama:
—Visqui, lhip apyasamcoc apquilvalhoc aplhamoclhojo enlhitaoc. Apcanit enlhit nac aso. Jinlhicmos sat nincoo actomja lhip apquilyacyescama. 25Yoyam etnejic aptamjaycamo lhama apóstoles apyanmongsayclha Judas. Apyamasmec alhta Judas. Apmiyaclhec alhta lhama yoclhilhma acno aptemaclha apanco —alhta apquiltomjac.
26Apquiltovasquic alhta sicas. Apcajoc alhta apmetsovja Matías. Appalhacsacpec alhta once apóstoles apquilapajasomap.
Currently Selected:
LOS HECHOS 1: ENHL
Highlight
Share
Copy
Want to have your highlights saved across all your devices? Sign up or sign in
