1 CORINTIOS 2

Amyaa apquitsepma Cristo netin asoc timyescama

1Quellhip elyalhinga. Acvoclhec alhta nipyesicsa quellhip. Aclingasquic alhta Dios appayvam actomja nasoc anco. Mepqui lhama sicpayvam actemaclha mongyascaoc najan mepqui actemaclha ningyascamco inganco ayinyema enlhit. 2Am alhta oltamjoc otnejic sicyascamco ajanco nipyesicsa quellhip. Acvamlha aclhanma mataa evalhoc Jesucristo aptomja apquitsepma alhta netin asoc timyescama. 3Elvitac alhta quellhip sictemaclha moyimnatem najan actemaclha sicpilhyinamam ayinyema siyay.#Hch 18.9. 4Altimnasquic alhta Dios appayvam nipyesicsa quellhip. Am alhta oltamjoc colmoc apquilvalhoc quellhip ayinyema actemaclha ningyascamco inganco ayinyema enlhit. Am alhta cotnatsalhcac amyaa ayinyema Espíritu Santo najan Dios apmopvan. 5Incaymalhquic coytic apquilvalhoc quellhip melyasquiyam ayinyema Dios apmopvan, cotnaja ayinyema ningyascamco inganco ayinyema enlhit.

Ningilyasingvoyam aptemaclha Dios ayinyema Espíritu apanco

6Naso, ningiltimnasquic nincoo actemaclha ningyascamco nipyesicsa ingilyalhinga apquilyiplovquiscama actemaclha Espíritu Santo. Cotnaja eyca ningyascamco inganco ayinyema enlhit lhalhma anco. Cotnaja ningyascamco inganco ayinyema apquilviscaa. 7Ningiltimnasquic nincoo mataa actemaclha ningyascamco ayinyema Dios aptomja acyilhomalhca. Eycaso actomja apmayjayoclha Dios amamyi apquilantipquiscama aclhamoclhojo asoc, yoyam ongilvomsalhcac tap ayinyema as amyaa acyilhomalhca. 8Am elhnam lhama apvisqui apyimtalhnamo apyasingvoyam actemaclha ningyascamco ayinyema Dios. Apquilyasingvocmec alhta anco, colapvanquejec alhta elyipitsic asoc timyescama Visqui ingac apyimtalhnamo. 9Inlhenquic nic nat Dios appayvam actalhesomalhca:

Appenasoc nic nat Dios asoc yoyam elmesic apquiltomja apquilasicjayo.

Am elvitayac mocjam enlhit, am najan ellingayac.

Am najan colhenac mocjam apquilvalhoc enlhitaoc as asoc#Is 64.4.

—nic nat intomjac.

10Eyca as asoc aptomja singyascasingvoyam Dios ayinyema Espíritu apanco. Espíritu apanco Dios aptomja apyicpilquemo aclhamoclhojo asoc. Apyicpilcoc najan Espíritu actemaclha apvalhoc Dios.

11Paj lhama enlhit apyascamco actemaclha ingilvalhoc ingac. Acvamlha ningilvanmoncama inyasamcoc actemaclha anco ingilvalhoc. Paj lhama enlhit apyascamco actemaclha apvalhoc Dios. Acvamlha Dios apvanmoncama apanco inyasamcoc actemaclha apvalhoc Dios. 12Am ongillhocac nincoo nintemaclha ayinyema lhalhma anco. Ningillhocac nincoo Espíritu apquinyema Dios yoyam ongilyicpilcangvomoc asoc singaycaoc ayinyema Dios. 13Eycaso ayinyema ninlhanma as asoc actemaclha singillhicmoscama Espíritu apanco Dios. Cotnaja ningillhanma actemaclha ningyascamco inganco ayinyema enlhit. Ningillhicmosquic nincoo asoc ayinyema Espíritu apanco Dios nipyesicsa enlhitaoc apna apquilvalhoc Espíritu Santo.

14Am sat ancoc elhnac Espíritu Santo ingvalhoc ingac, covanquejec comoc ingvalhoc asoc alinyema Espíritu apanco Dios. Ongiltanovac sat mataa. Mongvanquejec ongilyasingvomoc as asoc mepqui singillhicmoscama Espíritu apanco Dios. 15Apnec sat ancoc Espíritu Santo ingvalhoc ingac, ingvanquic ongilyasingvomoc aclhamoclhojo nintemaclha. Copvanquejec poc enlhit elyasamcojo nintemaclha nincoo, ayinyemaclha Espíritu Santo apna ingvalhoc ingac. 16Intomjac nic nat Dios appayvam actalhesomalhca: “¿Soc enlhit apyasamcoc actemaclha aclhanma apvalhoc Dios Visqui ingac? ¿Soc enlhit apmopvan elhicmocsic Dios Visqui ingac?” —nic nat intomjac.#Is 40.13; Ro 11.34. Innoc nincoo actemaclha apvalhoc Cristo.

Currently Selected:

1 CORINTIOS 2: ENHL

Highlight

Copy