Yaasawey 25
25
Sulaymaana yaasay tanayaŋ
1Yaasawey wey mo, Sulaymaana kʼi har, Žuda kokoyoo Ezekiyas borey nʼi hantum.
2Irkoy se, ka hayey tugu darža no
kokoyey se, ka hayey feeri-feeri, darža no.
3Beenaa kuuroo, nda laboo guusuyanoo,
nda kokoy bine, boro si hin kʼi sii.
4Nzorfu kaaraa žiibey kaa a ra,
nzorfu karkaw gʼa tee jinay henna.
5Boro futu gaaray kʼa kaa kokoyoo jine,
šerretaray ga nga kokoytaraa tabatandi.
6Masi ni boŋ jer kokoyoo jine,
masi ni boŋ daŋ boro beerey dogoo ra.
7I ma nee ma ne kaŋ ma žigi ne ka goro
baa i ma ni kaynandi boŋkoyni kaŋ nʼgʼa bay jine.
8Masi cahã ka boro torce.
Macin no nʼgʼa tee,
nda boraa kaŋ nʼnʼa torce na ni haawandi.
9Nda ni nda ni cinaa too cere, ceeci kʼa hanse,
amma masi boro tana sirroo kaataray,
10boraa masi koy maarʼa ka ni wow,
nʼsi hin ka hayaa hanse kaŋ nʼnʼa hasara.
11Šenni henna kaŋ harandi nga waatoo ra
ga hima nda jinay kaŋ teendi wura ra
ka nzorfu kaaray kʼa caaray.
12Wura haŋakorbay nda wura taalam henna
ga hima nda haŋa kaŋ maa lakkalkoyni hoyraa se.
13Dontokaw laadirante kaŋ na nga jineboraa
kaŋ nʼa sanba binoo yaynandi
ga hima nda yayni kaŋ ga zunbu hegay waati.
14Boro kaŋ ga nee kaŋ kabedoona ti nga,
ka gar a sʼa tee,
a ga hima nda duula nda hew bila ncirɲi.
15Suuri ga ni noo fondo boŋkoyni ga,
šenni henna ga biri kayri.
16Nda ni duu yuu, woo kaŋ ga wasa ma ne de ŋaa,
masi koy kungu a ra kʼa yeeri.
17Ni cewoo kaccandi ni cinaa hugoo ga,
a masi koy kungu nda ni ka ni konnay.
18Boro kaŋ ga taari seedetaray tee nga cinaa ga,
boraa manʼti kala gobu boŋ warga, nda takuba, nda yaaji mee cuuta.
19Ka ni naataa daŋ zanbante ra ni binemaraa hane,
a ga hima nda hiɲe kayra nda cee kaŋ tatanji.
20Ka don boro se kaŋ binoo ga maray
ga hima nda boro ma ni kaayoo kaa hargu waati,
wala ka binegar doori soso ga.
21Nda ni iberoo ga heray, a noo a ma ŋaa,
nda a ga jaw, a noo a ma haŋ.
22Nda nʼna woo tee, denji cirayyaŋ no nʼnʼi fur boŋoo boŋ,
Abadantaa ga ni bana.
23Takaa kaŋ nda hawsa here hewoo ga ncirɲi hay,
deene kaŋ ga ciinay ga boro futandi.
24Boro ma bara sooro batuma kanje ra
baa ma bara hugu ra woy yenjekaari bande.
25Alhabar henna kaŋ hun nongu mooro ra,
ga hima nda boro kaŋ fara, de i nʼa noo hari yayna.
26Boro šerrante kaŋ ga naŋ boro futu ma nga bere
ga hima nda hari hundoo kaŋ si henan wala day žiibi.
27A si boori boro ma yuu boobo ŋaa,
ka darža ceeci mo si boori.
28Boro kaŋ si hin nga boŋ
ga hima nda koyra kaŋ sii nda cete.
Currently Selected:
Yaasawey 25: ses
Highlight
Share
Copy
Want to have your highlights saved across all your devices? Sign up or sign in
© BFP Velberter Mission and Wycliffe Bible Translators, Inc.
