Yaasawey 24
24
Boro lakkalkoyni nda boro laala
1Masi canse boro laaley ga,
masi boonay ma bara i bande,
2zama biney si haya miile kala hasaraw,
miɲey ga ifutu har.
3Lakkal no ma hugu cin,
fahamay no mʼa tabatandi.
4Bayray no ma kate hugoo kuneheroo hugu-izey ma too
nda jinay hay šenda henna dumi kul.
5Boro lakkalkoyni goo nda gaabi,
boro kaŋ goo nda bayray ga nga gaaboo tonton.
6Zama boro kaŋ goo nda laasaabay henna ga hin ka wongu,
hallasiyan sii kala hoyraykaw boobo ra.
7Lakkal ga hanse ka mooru lakkal jaŋante se,
a si šelaŋ jamaa margadogoo ra.
8Boro kaŋ ga ifutu miile,
i mma nee a se hasarawkaw.
9Lakkal jaŋante miilewey manʼti kala zunubu,
ɲooɲokaw manʼti kala almuhal borey se.
10Nda ni yee banda binemarayyan zaari hane
ni gaaboo ga kacca.
11Borey feeri kaŋ i gʼi gongu ka koy i wii,
borey kaŋ ga tatanji ka koy jinde kaadogoo ra hallasi.
12Nda ni nee: «Ir si bay.»
Boraa kaŋ ga bine fesufesu nka si bay wala?
Boraa kaŋ ga hundi hawgay nka si bay wala?
A ga boro bana ka sawa nda nga teegoyoo.
13Ay izʼaroo, yuu ŋaa, a ga boori,
zama nga tenbaa ga kan ma ne.
14Takaa din da, ma lakkal bay ni hundoo gomnoo se,
nda ni duu a, a goo nda kokoray,
ni naataa si hun.
15Masi zanbaguusu fanši sanda boro futu boro šerrante se,
masi nga hunanzamdogoo hasara,
16zama boro šerrante ga kaŋ cee iyye, a ga tun,
amma boro futu ga tatanji ka kaŋ bone ra.
17Nda ni iberoo kaŋ, masi ɲaali,
nda a ga tatanji, ni binoo masi yafarhã.
18Abadantaa masi koy dii a de a ma dor
ka nga futaa bere kʼa kaa a ga.
19Masi futu boro laaley maaganda,
masi canse boro futawey ga,
20zama kokoray sii boro laala se,
boro futawey fitillaa ga buu.
21Ay izʼaroo, hunbur Abadantaa nda kokoyoo,
masi huru borey ra kaŋ ga baa ngi ma hayey bere,
22zama ne nda kayna almasiiba ga kaŋ i boŋ,
may no ma zukandoo bay
kaŋ Abadantaa nda kokoyoo gʼa zumandi i ga?
Lakkalkoyney yaasay tanayaŋ
23Šenney wey mana hun kala lakkalkoyney do:
A si boori boro ma borey daŋ cere jine ciiti ra.
24Boro kaŋ nee boro futu se: «Nʼga šerre»,
jamawey gʼa danga, dumey ga konna a.
25Amma borey kaŋ gʼa zukandi na goy henna tee,
i ga duu albarka beeri.
26Ka boro zaabi henna
ga hima nda ka boro summu miɲoo ga.
27Ni goyey tee ka boori taraa ra,
ma ni faaroo hanse,
nga banda ga, ma ni hugoo cin.
28Masi seedetaray tee ni cinaa ga bila addalil,
ni mma baa ma ni miɲoo ka darga wala?
29Masi nee: «Ay ga hayaa tee a se kaŋ a nʼa tee ya ne,
ay ga boro bana ka sawa nda nga teegoyoo.»
30Ay bisa fuyyante foo faaroo here,
binehuna foo alaneb faaroo here.
31Karjey zay nongoo kul ra,
subu laaley na farroo daabu,
nga tondi cetaa kaŋ.
32Ay nʼa guna, ay miile a ga,
ay dii a, ay duu a ra bayray.
33Ka jirbi kayna, ka dusungu kayna,
ka kabe koli ka kani kayna,
34talkataraa kaŋ ga yaara-yaara ga kaŋ ni boŋ,
jaŋay ga kaa ni ga sanda komakaw.#24.33–34 Zamnaa 6.10–11.
Currently Selected:
Yaasawey 24: ses
Highlight
Share
Copy
Want to have your highlights saved across all your devices? Sign up or sign in
© BFP Velberter Mission and Wycliffe Bible Translators, Inc.
