Waazukaa 9
9
Haya follokaa no ma adamizey kul batu
1Ay na hayey wey kul dii ay binoo ra. Hayaa kaŋ ay nʼa laasaabu ti,
šerrantey, nda lakkalkoyney, nda ngi teegoyey sii kala Irkoy kaboo ra.
Baji nda konnaray, adamize sʼi bay, i kul goo a jine.
2Haya kul ga tee boro kul ga,
koddoroo kaŋ ga duu boro šerrantaa,
nga no ma duu boro futaa, nda boro hennaa,
nda boro henanantaa, nda boraa kaŋ si henan,
nda boraa kaŋ ga sargari kaa, nda woo kaŋ si sargari kaa,
ihennaa nda zunubantaa,
boraa kaŋ ga žee, nda woo kaŋ ga hunbur žeeyan.
3Woo ti haya futu, hayey kul ra kaŋ ga tee waynaa cire: koddor follokaa bara borey kul se, koyne mo adamizey biney ga too ifutu, hollay goo biney ra ngi hunaroo ra, woo banda ga, i ga koy bukawey do.
4Borey kaŋ ga kabandi baahunantey ra ga hin ka naata,
hanši hunante baa ganjihayla bukaw.
5Borey kaŋ ga huna ga bay kaŋ ngi ga kaa ka buu,
amma bukawey si haya kul bay,
ngi, banaw sii i se koyne, zama i dirɲa ey.
6Ngi bajoo, nda ngi konnaroo, nda ngi canseyanoo dere ka ben,
i sii nda baa koyne hala abada hayey ra kaŋ ga tee waynaa cire.
Ma huna henna aduɲɲa ra
7Koy, ni ŋaahayaa ŋaa nda ɲaali, ni alaneb hari mooraa haŋ nda binekaanay, zama Irkoy yadda ni teegoyey ga ka ben.
8Waati kul ma bankaaray hennayaŋ daŋ,
jii kaŋ ga ni boŋoo yon masi kuma.
9Daame nda woyoo kaŋ nʼga bagʼa ni hunari yaadaa kul ra
kaŋ Irkoy nʼa noo ma ne waynaa cire,
ni zaari yaadawey kul ra, zama ni bagaa no
hunaroo nda taabiyanoo ra kaŋ nʼgʼa tee waynaa cire.
10Haya kul kaŋ ni kaboo ga hin kʼa tee, a tee,
zama alaahara kaŋ ra nʼga koy, teegoy sii no,
laasaabu sii no, bayray sii no, lakkal sii no.
Bone mma jirsi ka kaa
11Ay yee ka laasaabu ka dii waynaa cire
kaŋ manʼti cahãntey no ma hin gaarandiyan ra,
manʼti wongaarey no ma hin wongu ra,
manʼti lakkalkoyney no ma duu ŋaayan,
manʼti carmantey no ma duu alman,
manʼti bayraykoyney no ma duu alhormo,
zama gomni wala bone ga kaa boro kul ga nga waatoo ra.
12De mo adamize si nga waatoo bay,
sanda hamiisawey kaŋ diyandi sankay ra ngi bonaa se,
wala cirawey kaŋ ga kaŋ kumsay ra, sanda ngi,
adamizey ga jirsi ka kaŋ bone ra.
Lakkalkoynitaray baa wongaaritaray
13Ay yee koyne ka dii lakkal foo waynaa cire,
a hima ya ne haya beeri.
14Koyra kaccu foo goo no kaŋ ra boro boobo sii, kokoy beeri foo koy a dii kʼa kuubi kʼa bere. A na haya beeriyaŋ cin kaŋ nda a ga koyraa taa. 15Aru talka foo kaŋ goo nda lakkal goo koyraa din ra, a na koyraa kaa kabe nda nga lakkaloo. Amma boro kul manʼa bay talkaa woo se.
16Agay, ay nee:
«Lakkal baa gaabi, amma borey mma talka lakkaloo kaynandi,
i si haŋajer nga šenney se.»
17Ka haŋajer boro lakkalkoyni šenney se kaŋ ga mossoyaada ka šelaŋ
baa boro ma haŋajer boŋkoyni kaŋ ga hoolo ka šelaŋ lakkal jaŋantey game.
18Lakkal baa wongu jinay,
zunubante folloku ga haya henna boobo hasara.
Currently Selected:
Waazukaa 9: ses
Highlight
Share
Copy
Want to have your highlights saved across all your devices? Sign up or sign in
© BFP Velberter Mission and Wycliffe Bible Translators, Inc.
