Waazukaa 8

May no ma hin ka tee lakkalkoyni?

1May ma hima nda lakkalkoyni?

May ma hin ka hayey feeri?

Adamize lakkaloo mma nga ndumoo ɲaalandi,

a ga nga anniyaa feeri.

2Ay nee kaŋ ma kokoyoo yaamaroo dii

žeeyanoo kaŋ nʼnʼa tee Irkoy jine maaganda.

3Masi cahã ka mooru a ga,

masi cindi goy futu ra,

zama haya kaŋ kan a se no a gʼa tee.

4Kokoy šenni goo nda hinay,

may no ma nee a se: «Macin no nʼgoo mʼa tee?»

5Boro kaŋ ga yaamarey dii si ifutu bay,

lakkalkoyni ga bay nga binoo ra

kaŋ haya kul si ciitandi kala nga waatoo.

6Haya foo kul nda nga waatoo nda nga ciitoo,

ifutu ga adamize tiŋandi.

7Adamize si haya bay kaŋ ga kaa kʼa tee,

may no ma hin ka takaa har a se kaŋ nda a ga tee?

8Boro kul si nga hundoo may kʼa ganji a ma hun,

boro kul sii nda hini nga buuyanoo zaaroo se.

Wongu no kaŋ boro si hun a ra.

Goyfutu teekaw goyfutaa si hin kʼa kaa.

Adamize si faham Irkoy teegoyey kul se

9Ay dii woo kul ka miile goyey kul ga kaŋ ga tee waynaa cire. Waati ga tee kaŋ adamize ga nga hinoo zurandi adamizey ga kʼi bonandi. 10Ay dii boro futuyaŋ kaŋ fijandi, boroyaŋ no kaŋ cindi i ga koy i ga kaa nongu henanantaa ra. Koyraa ra, borey dirɲa takaa kaŋ i cindi kʼa tee. Woo mo sii nda addalil. 11Ciiti kaŋ dunbandi goy futu ga, de nga zukandoo mana kaŋ tanba, ga kate adamize binoo ga too met nda goy futu teeyan alhawaa. 12Zunubante ga hin ka ifutu tee cee zangu (100), amma a ga duu aloomur kuku, amma ay ga bay kaŋ gomni goo borey se kaŋ ga hunbur Irkoy, zama nga hunburaa goo biney ra. 13Gomni sii boro futu se, nga hunaroo ga bisa sanda bii, a si duu aloomur kuku, zama Irkoy hunburaa sii binoo ra.

14Haya yaada foo ne kaŋ ga tee laboo ga, boro šerranteyaŋ goo no kaŋ ngi kokoroo ga hima nda boro futawey goyoo, boro futuyaŋ goo no kaŋ ngi kokoroo ga hima nda boro šerrantey goyoo. Ay nee kaŋ woo mo sii nda addalil. 15Woo se ay ɲaali ka zanzaŋ, zama haya henna kul sii adamize se waynaa cire, nda manʼti a ma ŋaa, a ma haŋ ka ɲaali, woo ti haya kaŋ ga hima ka hanga a nga taabiyanoo, zaarey waatoo ra kaŋ Irkoy nʼa noo a se waynaa cire. 16Waatoo kaŋ ay kayandi ka lakkal bay nda ka dii hayaa kaŋ ga tee laboo ga, zama adamize moɲey si dii jirbi cijin nda zaari, 17ay dii Irkoy teegoyey kul. Adamize si hin ka faham teegoyey kaŋ ga teendi waynaa cire. Haya kaŋ adamize gʼa ceeci nda taabi, a si faham a se. Ba nda lakkalkoyni ga hongu kaŋ nga faham a se, a si hin ka faham a se.

Currently Selected:

Waazukaa 8: ses

Highlight

Copy