Lug 11

Yisa kaah wɔɔn baah li miɛ Uwonbɔr man

(Matiu 6:9-13; 7:7-11)

1Nweehn nba daal le Yisa nan be niba yaan ki miɛ Uwonbɔr. Waah nan miɛ diɛ n-yonn man, le u bɔɔnɔɔb n-yaa ni uba bei u ke, “Uyudaau, wɔɔn ti ta li miɛ Uwonbɔr man ni, ke Jɔnn kaah nan wɔɔn u bɔɔnɔɔb man nin.”

2Le U bei bi ke, “Ni yin miɛ Uwonbɔr ke, ni len ke:

‘Ti Baa,

che a yinl le be kasi,

che a naam n foon.

3Sei ti lidaal biɛn a jiir.

4Jiɛn tibir ki per ta

ke ti mu kaah jiɛn ban bii ti a bir ki per bi man nin

ki laa liin ti ki kɔɔn libiginlin ni.’ ”

5Le U bei bi ke, “Ni ye ni ni uba jɔɔ u jɔ, wee ki jon u jɔ nmɔn ban kunyiɛgtasiig, ki tan bei u ke, ‘N jɔ ni ye a jɔɔ kisaabaag ke, a seim ni, 6nan bu-n n jɔ uba le nyan lisanchonl ki foon n niin le n mu kaa jɔɔ tijiir tiba n sei wi.’

7“Le a jɔ wan be ndiin ni beiŋ ke ‘Laa mugirimi. N kpal linaanganla. Min nin n buwaab dɔ jiɛn le, maa ji li fir fii ki seiŋ niba.’ 8N bei ni ibamɔn le, waa yin fii ki sei u tijiir nmɔn waah ye u jɔ-n bu, amaa waah kaa san ifa wee ki miɛ win, see ke u le nan fii ki sei u waah ban man.

9“Mambu n bei ni le: Ni li miɛu ke u li sei ni; Ni li ban na ke ni li kan naah ban nan, ni li kpaar linaanganla ke li li loor ki sei ni. 10Nan bu-n wan biɛn miɛ ke u li gaa, le wan biɛn ban mu li kan, wan mu kpaar ke, linaanganl li loor ki sei u.

11“Nim bibaam, ni ye ke ni bija miɛ ni ujan ke ni ŋma li ta liwaalabil ki sei waa? 12Bee ŋma wee u li miɛ lijenl wee un ta unɔɔn ki sei waa? 13Ke ni ye nim tibirdam nyi naah li sei ni buwaab liwanŋanl man ke, ni Baa Uwonbɔr wan be papaab nan man kaa ni li ta Kasi a Naaŋ nan ki sei bininfob ban miɛ win naa?”

Yisa nin Beelizebul#11:13 Beelizebul ye nnaanbiim a bɔru le a bɔr

(Matiu 12:22-30; Mag 3:20-27)

14Yisa nan ŋɔɔr kinaanbiig kan ye kuburug le nyann. Kinaanbiigin kaah nan nan nyan ni, le uja wan nan jɔɔ kinaanbiig wee ki birin nan pag, le ni nan gar kuninfogbaluŋin. 15Amaa le biba bei ke, “Nnaanbiim a bɔru Beelizebul a npɔɔn le U nyan nnaanbiim bininfobin.” 16Le biba mu nan mag Yisa, ki ban siɛra kan nyan paab.

17Le Yisa mu biɛ baa tiɛr man, le ki bei bi ke, “Nnaam a ninfob kɔn nin tab ke, nnaam nmɔn yin gab yɔli le; le iniin iba yaab mu kɔn nin tab ke, iniin nmɔn kaa yin siri. 18Ni ye Sintani mu bɔgir ki kɔn nin uba ke, u naam yin ŋa nii ki sir aa? Nan bu n len man ni ye naah ke n jɔɔ Beelizebul a pɔɔm le ki ŋɔɔ nnaanbiim 19Ni ke Beelizebul a pɔɔm le n nyan nnaanbiim bininfobin ke, ke ni mu, ŋma a pɔɔm wee ni ninfob jɔɔ nyann baa? Man ke bi ma li na li ye ni bɔjib. 20Amaa ni ye n ta Uwonbɔr a pɔɔm le n nyan nnaanbiim bininfobin ke, man ke Uwonbɔr a naamin pii foon ni ban na.

21Lijawagidil ŋa u sili nin u jawann ki guu u niin ke, uba kaa li fir bii u wan yɔɔri, 22amaa wan pɔɔ jon u nan kɔn ki nyaŋ u ke, u yin gaa u jawann tan wee u bi jɔɔ ter uba-n le, ki ji ta u wan yɔɔr ki tol bininfob.

23Uninfo wan kaa nɔɔ n bɔɔn ke, u ye n dundaau le; wan mu kaa lagin bininfob ki tenn nim ke, u ŋɔɔ bi le.

Kinaanbiig kaah jir kɔɔ uninfo ni man

(Matiu 12:38-42)

24“Ni ye kinaanbiig nyan uninfo ni ke, u choon yelin kukunkɔɔg a paab le, ki ban lifooril a bol, wee kaa kan ke, u ti nan bei u ba le ke, “N li jir iniin yan yaan wee n nan nyan nin.” 25Ni ye u jir tan foo ki miin bi tigin iniin ni ki mann ni ke, 26u jir le weem ki tan yin nnaanbiim milile ban bir ki jon u ma-n le ki nan kpiɛ u bu, le bi ni lagin be; le uninfo nmɔn a binbem li bii ki jo waah nan be man chinchinn nin.”

Npopeen man ye ibamɔn

27Yisa kaah pag man nmɔn, upii uba nan be kuninfogbaluŋin yaan le ki pag nmɔpɔɔn ke, “Tikaar be upii wan maŋ ki mɔɔŋ libiil nan.”

28Le U jiin ke, “Tikaar be bininfob ban gbir Uwonbɔr a bɔr ki chee ti nan bu,”

Ban nan ban bin kan ligaril a toonl

(Matiu 12:38-42)

29Kuninfogbaluŋ nmɔn kaah nan kpiɛgin le Yisa len ke, “Daandaan nan a ninfob ban ye tibir dam kaa nɔɔ Uwonbɔr nan ban bin kan ligaril a toonl le ki ni ŋaam yada; amaa maa yin tun ligaril a toonl liba ki sei bi; see Uwonbɔr a linlenu Jona a garil a toonlin a binba. 30Jona kaah nan ye limagil ki sei Ninefa a tiŋ yaab man nin, man le min Uninfosaal a Big mu yin ye limagil ki tenn daandaan nan a ninfob. 31Tibɔr a ji daal upiibɔr wan nan nyan nnɔɔjiin paam nan na li fii sir paab ki galin daandaan nan a ninfob ki bii bi, nan bu-n waah nyan nan yaan kutingbɔŋ nan ki dan u nan gbir ubɔr Solomɔnn a lam gɔr kaam a wɔɔm; amaa uba be do ki yab jon Solomɔnn na. 32Tibɔr a ji daal, Ninefa a tiŋ a ninfob na li fii ki pag ki bii daandaan nan a ninfob; Jona kaah mɔɔn Uwonbɔr a bɔr ki sei bin bu, bi nan nyan bi toonbirin na; ke liga, daandaan nan wan jon Jona be do.

Tigbanann a wonweem

(Matiu 5:13; 6:22-23)

33“U ba kaa yin nyɔɔ fila ki ta ki ŋa nan yaan wo, bee ki ta kiyiig chigin ki bu. See ke u ta ki siin le ki ween le bininfob ban kɔɔn nin kan ki wonweem. 34A numbil li ye a gbanann a fila. A numbili ŋan ke, a gbanann biɛn yin gbee ni nween le, amaa a numbili kaa ŋan ke, a gbanann biɛn yin be libunbɔnlin le. 35Ni li nyi man wee ki laa che nwonween man be ni gbanann nin nan n kpann libunbɔnli. 36Ni ma bu ni ye a gbanann biɛn ween, wee niba yan kaa bɔɔn ke, ni yin wonn le nbamɔm ke fila kaah ti ween ki too binum man ni.”

Yisa kaah galin Farasii yaab nin ban wɔɔnn Uwonbɔr a siimin man

(Matiu 23:1-36; Mag 12:36-40)

37Yisa kaah nan pag diɛn, le Farasii yaab uba nan bei u ke un nɔɔ u wee bin tan ji tijiir. Le u nan nɔɔ u jon ki tan kɔɔ kal ke un ji. 38Amaa le li ŋa Farasii yaab a ninfo nmɔn ligaril nin Yisa kaah kaa nir wee ki sin yin ji tijiir.

39Le Uyudaau nmɔn bei u ke, “Nim Farasii yaab nir tiyir nin nsam a bɔɔn a binba le, amaa le ni sufu ni gbee nin kujaŋuuŋ nin npooton. 40Nim tininfojɔr nan! Naa ye wan nan naan ni bɔɔn nin, u ma naan ni poolin mu. 41Amaa ni ta nan be ni yirin nin ni samin ni ki sei faladam ma wee ni bɔɔn nin ni poolin biɛn le ŋan.

42“Woo nim Farasii yaab, ni yagir tikpinfar tan kaa yabin gbaa, nfim piig a poolin nba le ki tenn Uwonbɔr, kaa sin ŋaan nan ŋan ni, kaa ban Uwonbɔr i. Ni ŋan ke ni li ŋaan nan ŋan, ki li nyann ni wan piig a poolin n nba ki tenn Uwonbɔr a.

43“Woo nim Farasii yaab, Ni ban ni li ka ininfogbingbem a kikaabol le kuwonjiɛndiigin ki ban bininfob li poor ni nin jilima kinyaŋin.

44“Woo ni nann tikar tan kaa daag wee bininfob choon ti bu kaa sin nyi nan le.”

45Le ban nyi Uwonbɔr a siim nbamɔmin a ni uba jiin ke, “Wan wɔɔn, ni ye a len man ke a sug ti muu.”

46Le Yisa jiin ke, “Nim ban nyi Uwonbɔr a siim nbamɔm nan, woo, nan bu-n ni ta nsiim man pɔɔ takpem nan le, ki ta kpiɛ Uwonbɔr a siimin bu ki ta wɔɔn bininfob ke bi li ŋmag nsiim nmɔn nbamɔma. Ki mu kaa sin yin kpiɛ bi bu wee bi ŋmagi.

47“Woo, nan bu-n ni maa Uwonbɔr a linlem a kar nbamɔm le ki tenn bi; bi ma ye bilinlem ban wee ni yaajam nan ku-n. 48Naah tun man nan, ni ye siɛra le ki wɔɔn ke ni chee ni yaajam kaah nan tun man na. Bi ma nan ku bilinlem nmɔn, le ni mu maa bi kar. 49Mambu le Uwonbɔr nin U lamgɔrikaam bei ke, “N li tun n linlem nin n tooi bi ban, bi li ku bi bam le ki mugir bitab.’ 50Ni ma bu bi li galin n-yonn nan a ninfob bilinlem ban biɛn wee bi nan ku hali dulinya nan a piinim, 51baah nan ku Ebiɛl n-yonn man ki nan kpaa Zakariya, wan wee bi nan ku-n Uwonbɔr a manug a binbinl nin iwonjiɛn niin n-yaa sisiigin nin. N bei ni le, bi li galin n-yonn nan a ninfob bilinlem nan biɛn a kum bu.

52“Woo, nim ban nyi Uwonbɔr a siim nbamɔm nan, naah nyan nyinyim a samin bu. Ni baantɔɔl kaa nɔɔ mi, le ki bii ban ban bin kɔɔ nan a sam.”

53Yisa kaah fɔɔr niin nan, le ban wɔɔnn Uwonbɔr a siimin nin Farasii yaab a ŋuul nan fii takpem, le bi piin ki baan ibinbaan ki jiin u bɔr tan wee u pag takpem nmɔn paam, 54bi nan pen u lam le ki ban u pag ni ba.

Currently Selected:

Lug 11: KUGL

Highlight

Copy