Lug 10
10
Yisa kaah nan tun u bɔɔnɔɔb pilile nin bilee man
1Ni bɔɔn bu le Ti yudaau nan gann bijab pilile nin bilee, ki tun bi bilee bilee wee bin chinn choon ntimin man yaan biɛn wee u li jo, 2Ke bei bi ke, “Idi beer ki yaba amaa le bidichiɛb kaa yabi. Mambu, ni li miɛ Uyudaan wee Un kpiɛn bidichiɛb, wee bin chiɛ idi nmɔn. 3Ni li chaau man! N tun ni le, ke npeebumin igbingbel a sisiigin. 4Ni laa ŋmag ilig a pɔgi, bee lipɔgil, bee inaatagi, le ki laa poor uba nsan bu.
5“Ni yin kɔɔ iniin yan yaan ke ni chinn ki len ke, ‘Nposɔɔn li be iniin nan bu.’ 6Ni ye nposɔɔn daan be iniin nmɔn ke, ni posɔɔm nmɔn li paar u bu, naa ye man ke ni nposɔɔn nmɔn ji li jirin ni ban. 7Ni kɔɔ iniin nmɔn ke, ni li ji ki nyu nan biɛn wee bi li sei na. U toontunn ŋan nin un gaa u yɔr. Ni laa lɔɔl iniin ki dɔɔ.
8“Ni foo kitiŋ kan wee bi gaa ni ki sei ni tijiir tan ke, ni li ji timau; 9ki che bibaarib npɔɔg kitiŋ nmɔn yaan, ki bei bi ke, ‘Uwonbɔr a naamin mal na.’ 10Amaa ni ye ni foo kitiŋ kan yaan wee baa gaa ni ke, ni nya kitiŋ nmɔn a sanjal bu ki len ke, 11‘Hali ti taai kaah tabin ni tiŋ nan a tann tan ni, le ti pir gabir ki chabir ni nan. Amaa ni li nyi ni nan: Uwonbɔr a naamin mala.’ 12N bei ni le, lidaal nmɔn Sodom yaab yaal na li sɔ kitiŋ nmɔn a ninfob yaal.
Ntim man a ninfob kaa ŋa yada nan a bɔr
(Matiu 11:20-24)
13“Woo, Korazin yaab! Woo, Befisada yaab! Nan bu-n ni ye ligaril a toon biɛn nan nan bi tun Taya nin Sidonn yaab a sisiigin ke naah tun ni sisiigin man nan ke, bi bi li jiɛn bi toonbir weem, ki yee npoobiin a wan yɔɔr, ki pug bi gbanann nfatam, wee ni wɔɔn ke bi jiɛn bi toonbira. 14Amaa tibɔr a ji daal ke ni tudaril na li jo Taya nin Sodom a ninfob yaal. 15Nim Kapeniɛm yaab, Uwonbɔr li don ni papaab baa? Aai, u na yin jiin ni Kitakpiin tiŋ le.”
16“Wan gbir ni bɔr ke u gbir n bɔra; wan yii kaa gbir ni bɔr ke, u yii n mu a bɔra; amaa wan mu yii n bɔr ke, u yii Uwonbɔr wan tunim a bɔra.”
Pilile nin bilee-n kaah nan jirin man
17Pilile nin bilee nan nan jirin nin npopeen le ki bei u ke, “Uyudaan; hali nnaanbiim chee sei ti le a yinl bu.”
18Le u jiin ke, “N kan Sintani kaah nyan papaab ki lunn ke utaal li nyagin ni. 19N sei ni tininkper a pɔɔm man wee ni li taa iwaa nin inɔɔn bu, ki nyaŋ kidataag Sintani a pɔɔm biɛn; niba kaa li ŋaa ni. 20Amaa ni laa che ni mɔ ni nnaanbiim kaah chee ni mɔbin a binba bu, ni che ni li mɔ na ni yin kaah sɔb dɔ Uwonbɔr a niin nin bu.”
Naah nan mɔŋ Yisa man
(Matiu 11:25-27; 13:16-17)
21Iyaayoo nmɔn, Kasi a Naaŋ kaah nan gbeen Yisa ni nmɔn ni, le u ke, “N Baa, paab nin tum a yudaau, n pagiŋ, nan bu-n ŋaah ta tibɔr nan ki woon bilandam nin bibiɛndam, amaa le ki sin kpiir wɔɔn nbuwaab finfim. Nn, n Baa, ŋaah ban nin tun man le yen. 22N Baa le ta ni nan biɛn ki seim; uba kaa nyi Bija-n kaah ye wan ni see Baa nmɔn a binba, le uba mu kaa nyi Baa nmɔn kaah ye wan ni see Bija-n nin ban mu wee Bija-n gann ki kpiir ki wɔɔn ni.”
23Le Yisa nan gbiɛ lig u bɔɔnɔɔb le ki woon bei bi ke, “Tikaar be inunbil yan kan nan wee ni ga nan bu. 24Nan bu-n N bei ni le ke, bilinlem nin bibɔrtiib takpem nan ban bin kan tiwann tan wee ni kan nan le, amaa kaa kan ni. Bi nan ban bin gbir tibɔr tan wee ni gbir nan le, amaa le kaa gbiri.”
Samariya a ninfo ŋan win a bɔŋal
25Kulaguŋ kiba ni le ban nyi nsiim chobchob nan a ni uba nan fii sir ki ban un mag Yisa, le ki baan u ke, “Wan wɔɔn, n yin ŋa niin wee ki kan limiɛl lan kaa jɔɔ ndiɛm maa?”
26Le U jiin ke, “Ni sɔ siim a gbɔŋin ke nii? A karin ki nii?”
27Le uja nmɔn jiin ke: “ ‘Li jiɛ Uyudaan Uwonbɔr, ki li jiɛ U nin a sufu biɛn, nin a pɔɔm biɛn nin a potiɛm biɛn’; ki ‘li jiɛ a kunkɔɔn tau ke ŋaah jiɛ a ba man nin.’ ”
28Le Yisa bei u ke, “A jiim ŋan, li tun man na, wee ki nan kan limiɛfol nmɔn.”
29Amaa uja nan nan ban un wɔɔn ke waa jɔɔ tibiri; le ki baan Yisa ke, “Tɔ ŋma lee nin ye n kunkɔɔn tau waa?”
30Le Yisa jiin u ke, “Uja uba li nan nyan Jerusalam ki chaa Jeriko; le ban feen nan kenn u, le ki pir u wan yɔɔr ki fee u, ki boo u takpem, ki nan gur wama nin bin ku. Le ki jiɛn u. 31Ni bɔɔn bu le uminmann uba mu nan nɔɔ nsan nmɔn ki chaan ki nan kan uja nmɔn kaah dɔ, le u lɔg ki jon ki sin jiɛn u. 32Man nmɔn jigin le Liifai a jau#10:32 Liifai ye biminmanib a bol yaab le. uba mu nan kan u, ki mu lɔg ki jon ki jiɛn u bil. 33Amaa le Samariya a jau uba mu nɔɔ nsan nmɔn ki chaan, ki nan kan uja nmɔn. Waah nan kan u n-yonn man ni, le kunyunyunbaag choo u takpem, 34le u dan u ban ki nan ta nkpam nin nnyɔg ki ŋa u biɛi ki ta itan ki lol, le ki ta u paan u boŋ bu ki jon i chaan niin ki tan ŋmag u nbamɔm. 35Le ni wonn kutaag le u ta ilig ki sei wan guu ichanniin nin ki ke, ‘Li lig uja nan wee n nan jiirin ke n ji li yɔ ŋaah jin nan ki kpiɛ u bu.’ ”
36Yisa kaah pag man ki diɛ-n, le u baan wan wɔɔnn Uwonbɔr a siim nan ke, “Bininfob bi taa nan, u laba ye baah fee wan nan a kunkɔɔn tau waa?”
37Le wan ŋma nsiim nbamɔmin jiin ke, “Wan san u kunyunyunbaagin li ye u kunkɔɔn tau.”
Le Yisa bei u ke, “Tɔ li chaa ki mu ta li tun man na.”
Yisa kaah gɔnn Maata nin Meri man
38Ni bɔɔn bu le Yisa nin u bɔɔnɔɔb nan chaa bi sam, ki nan tan foo kitinbig kiba ni, le upii wan bi nan yi u ke Maata nan, nan gaa Yisa tichann u niin. 39U nan jɔɔ u naal uba, bi yi u ke Meri, le Meri nmɔn nan kal tum ki mal Uyudaan a taai paam ki pelig u bɔr. 40Amaa le Maata ma be ki gbaar nin kuchɔŋ a ŋaam, le ki nan dan nan bei Yisa ke, “N yudaau, maah gbaar n ŋaaŋ kuchɔŋ n binba wee n naal nan kaa terim nan, a baga kaa be nii naa? Bei u wee u nan terim.”
41Le Uyudaan jiin ke, “Maata, Maata, n nyi ke a gbaar nin tiwann takpem n bu le, le ni mugiriŋ ki bii a sufu, 42amaa niwann niba li kpaa talar. Meri ma gann ni wan nan ŋan le, le uba kaa li fir nyan ni u ban ni.”
Currently Selected:
Lug 10: KUGL
Highlight
Share
Copy
Want to have your highlights saved across all your devices? Sign up or sign in
Komba New Testament © Bible Society of Ghana, 2014.
