Lug 1
1
Lug kaah poor Teofilu man
1Binib takpem nan pɔɔn bi ba ki sɔb kugbɔŋ nan a poolin tibɔr tan nan ŋa ti sisiigin. 2Binib ban kan tibɔr nan a piinim nin tidiɛmin nan mɔɔn ti le ki wɔɔn tim le ki ye ban tun tibɔr nmɔn a tooi. 3Mambu, Min Lug, n baantɔɔl kaah biɛ tibɔr nan a piinim a bamɔn, ki tan kpaa ti diɛmin ni. Ni ma le n tiɛr ke ni ŋan n mu n sɔb ti taah piin ki tan sir man, ki sei fin, n ninkpelu Teofilu, 4wee a mu n biɛ baah wɔɔniŋ tibɔr tan nan a dede.
Baah nan mɔɔn baah li maa Jɔnn Wan nan Fu Bininfob Uwonbɔr a Nyunful man
5N-yonn man wee Herɔd nan ye Judiya a tingbɔŋ a bɔrninkpelu nan, le Uwonbɔr a minmanu uba nan be le bi yi u ke Zakariya. U nan nyan Abija a paabim ni le. U poo a yinl nan ye Elizabef. U mu nan ye Uwonbɔr a minmanu Arɔnn a maalim ni uba le. 6Zakariya nin u poo biɛn nan ye bininfoŋam le Uwonbɔr ban, ki nɔɔ u kaal nin u siim biɛn. 7Amaa baa nan jɔɔ kibigi. Elizabef nan ye upiiŋɔɔb le, bi biɛn mu nan pora.
8Man le weemba daal Zakariya nin u paabim a toontun yonn nan nan foo le u nan ke un tun u toon ki sei Uwonbɔr, ke waah pii ti tun ki tenn u man nin. 9Le bi nan tɔn inaa#1:9 Iyaayoo Juu yaab nan jɔɔ biminmanib a paabim nkerim pilee nin mina le. Npaabim biɛn nan jɔɔ biminmanib kobilee le. Iyoo ti nan foo nin bin nyɔɔ nnyɔgkusim iwonjiɛn niin a kasi mu a kasi a binbinl n bu ke, bi chinn tɔg inaa le, ki gann npaabim man li ji. Le npaabim man jin ke, bi mu ji tɔ inaa le ki nyan uminmann uba le u nyɔɔr nnyɔgkusim nmɔn., ke bin gann wan li kɔɔ iwonjiɛn niin nin yaan ki li nyɔɔr nnyɔgkusim. Baah nan tɔn inaa-n nin, le Zakariya nan jin. Ni ma bu le u nan kɔɔ iniin ni yaan 10le bininfob n biɛn nan par ki si nkaafiin ki miɛ Nween, n-yonn man wee u nan nyɔɔr nnyɔgkusimin.
11Iyaayoo le Uyudaan a malaka nan degir Zakariya bu, ki sir baah nyɔɔr nnyɔgkusim libinbinl lan bu-n nnɔɔjiim paam. 12Zakariya kaah nan nan kan u n-yonn man ni, le u lam nan yug, le bijawaam choo u. 13Le Uwonbɔr a malaka nmɔn bei u ke, “Zakariya laa san bijawaami. Uwonbɔr pii gbir a miɛma, le a poo Elizabef li maa kibijag ki seiŋ, le a li yin u yinl ke Jɔnn. 14Le ni na li mɔŋiŋ le a pool n penn u bu, le bininfob takpem mu a pooi na li penn u maalim bu. 15U nan yin ye lininfo gbingbemil le Uwonbɔr a nintogil, kaa biɛ nan yin nyu ndaam a booli biɛn ni#1:15 Iziral yaab ban nan miɛn nin Uwonbɔrin nan jɔɔ bi yul bu a kɔɔl le ki kɔ ndaam a booli biɛn naah li ŋa man wee bin fir tun Uwonbɔr a toon.. U na yin gbee nin Kasi a Naaŋ le u maalimin na. 16Le u na li che Iziral yaab takpem n jir bi Yudaau Uwonbɔr ban. 17U li chinn Uyudaan, ki li jɔɔ Elaja a naaŋin a pɔɔm, U li kpenn baam a sufu ki jiin bi buwaabin#Malaki 4:5-6 nin binib ban kaa jɔɔ limɔcheel n kan bibuchim a lam, ki ŋa bininfob sili ki sei Uyudaan.”
18Le Zakariya baan malaka n ke, “N yin ŋa nii ki biɛ ke ŋaah len man nan sin li ŋaa? “N pora, le n poo mu pora.
19Le malaka nmɔn bei u ke, “N ye Gabiriɛl le, min le be Uwonbɔr a nintogil le u tum a ban, ke n nan pag tibɔŋann nan ki wɔɔniŋ. 20Le daandaan nan a li bir ki tan kpaa lidaal lan wee tibɔr nan na li ŋa ibamɔn. Ŋaah kaa ŋa n bɔr tan wee n pagin yada-n, tan na li ŋa ibamɔn n-yonn man kpaan.”
21Tɔ, bininfob ban nan paar si iniin ni, ni nan ŋa bi ligaril le, waah nan yuur iwonjiɛn niin a poolin nin. 22Waah nan nan nyan n-yonn man nin, waa nan fir pagi, u nan pag libir le ki tenn bi, le bi biɛ ke u kan lijinjeel a wan le kudiig nmɔn yaan.
23N-yonn man wee u toon nan nan diɛ iwonjiɛn niin nmɔn yaan nin, le u nan jir kun u niin. 24Ni bɔɔn bu le u poo Elizabef nan choo lipool, le ki woon uba ndiin ki tan kpaa iŋmal iŋmu, 25le ki nan nan bei ke, “Ni niɛ nan le Uwonbɔr tun seim, ki sam kunyunyunbaag ki nyam ifa-n.”
Baah nan mɔɔn baah li maa Yisa man
26Elizabef kaah nan choo lipool a ŋmal iloob, le Uwonbɔr nan tun u malaka Gabiriɛl ke un jo kitiŋ kan be Galilii a tingbɔŋin, wee bi yi kitiŋ nmɔn ke Nazarif nan, 27ki tan pag sei usapɔɔn wan kaa nyi uja#1:27 Juu yaab a siim man nan ŋmag bi bisiɛm man kaa la nyi bijabin, nan ye le ke, laa dɔ nin uja wee kaa la sin kun uja, ni ye a ŋa man ke bi le gabiriŋ itangbag ki ku a baa a numin. wee bi yi u ke Meri nan. Usapɔɔn nmɔn nan ye uja uba a jakpeŋ le, le u yinl ye Josef. Josef nan ye ubɔr Defid a yaabil le. 28Le malaka nan tan foo Meri ban ki bei u ke, “N pooriŋ. Fin wan wee Uwonbɔr a nyɔɔr be a bu takpem nan, Uyudaan be niŋ.”
29Waah len man nan, le ni gar Meri. Le u ni nan tiɛr tibɔr nmɔn bu. 30Amaa le malaka ji bei u ke, “Meri, laa san bijawaami. Uwonbɔr a nyɔɔr be a bu. 31A li choo lipool ki maa kibijabig, ki yin u ke Yisa. 32U na yin ye lininfo takpenl le, le bi li yin u ke Uwonbɔr wan be paab nan a Bija. Uyudaan Uwonbɔr li che un ji u yaaja Defid a naam.#2 Samɔɔl 7:14 33Le u na li ŋmag Jekɔb a niin hali nin n-yonn man kaa jɔɔ ndiɛmi; le u naam kaa li nyi diɛ.”
34Le Meri nan baan Malaka n ke, “N ye usapɔɔn wan kaa nyi uja le, ni yin ŋa nii wee n choo lipool laa?”
35Le malaka n bei u ke, “Kasi a Naaŋ li jiirin a bu, Uwonbɔr wan be paab nan a pɔɔm li biin a bu. Ni ma bu ŋaah li maa kibig kan nan yin ye kasi daan le, le bi li yin u Uwonbɔr a Bija.” 36Le ki bei u ke, “Lig a nabig Elizabef, u mu jɔɔ kibijabig a pool le. Baah nan yi u ke upiiŋɔɔb nan, u jɔɔ iŋmal iloob a pool le. 37Niba li kaa be ki pɔɔ Uwonbɔr ban ni.”
38Le Meri bei malaka nmɔn ke, “N ye Uyudaan a yomu le. Che nin ŋa ke ŋaah len man nan.” Le malaka-n nan fɔɔr ki jiɛn u.
Meri kaah nan gɔnn Elizabef man
39Iyaayoo le Meri nan ŋa sili ki fii weem ki jon Judiya a yagil lan jɔɔ ijɔɔ nan a tiŋ kiba ni, 40Nan yaan wee u nan kɔɔ Zakariya a niin ki poor Elizabef. 41N-yonn man wee Elizabef gbir Meri a poori, le u big dam dam u poolin. N-yonn nmɔn le Kasi a Naaŋ gbeen Elizabef. 42Le u pag nin nmɔpɔɔn ke: “Uwonbɔr a kaar be a bu ki jon bipiib biɛn na, ki be kibig kan be a poolin nan mu bu. 43Amaa ba ŋa wee Uwonbɔr ŋaam tinyɔɔr man naa, ki che n Yudaau a na dan ke un nan gɔnnimaa? 44Maah gbir a poori n-yonn man nin, le kibig kan be n poolin nin yug nin npopeen. 45Tikaar be wan ŋa yada ke Uyudaan kaah bei u man nin le gbeen nin bu!”
Meri kaah nan gaah ilan ki pag Uwonbɔr man
46Le Meri len ke:
“N pagir Uyudaan n sufu ni le.#1 Samɔɔl 2:1-10
47Le ni mɔ n naaŋ,
Uwonbɔr wan ye n feeru win ban.
48Nan bu-n u potiɛl be n ni
min U yomu wan jɔɔ kunyunyunbaag.
Lig! Naah nyan dinan ki chaa, n-yonn biɛn a ninfob li yim ke tikaar.
49Nan bu-n npɔɔndaan nan tun litoonl takpenl le ki seim.
U yinl ye kasi le.
50U san bininfob ban biɛn san u nan kunyunyunbaag,
naah nyan daandaan nan a ninfob ki jɔɔ chaa bi yaabili nin yaabisagira sagira.
51U ta u nɔɔ ki tun itoon gbingbem;
ki worin kalanbaanidam baah tiɛr man bi sufu ni!
52U nan jiin bibɔrtiib bi naangbann bu,
amaa le ki don ban jiin biba tumin paab!
53Binib ban wee nkom jɔɔ nan,
U sei bi tijiŋann, le bi jin ki gbee.
U che bijɔɔndam kun nin linɔɔpiɛŋmiɛl!
54U ter u toontum Iziral yaab,
ki tiɛr bi bu ki san bi kunyunyunbaag.
55Abiraham nin u yaabili nin n-yonn man kaa jɔɔ diɛmin
hali nin waah nan pag ki sei ti baamin.”
56Meri nan be Elizabef ban le iŋmal itaa paam le ki nan jir kun.
Baah nan ma Jɔnn Wan nan Fu Bininfob Uwonbɔr a Nyunful man
57Le isaŋ nan foo nin Elizabef nmaa, le u nan ma kibijag. 58Le u kunkɔɔn tab nin u ninfob nan gbir Uwonbɔr kaah san u kunyunyunbaag man takpem, le bi biɛn nan lagin ki por u mɔm nmɔn.
59Ni ween iniin daal le bi nan dan ke bin jii kibigin a punl, le ki nan ban bin ta u baa Zakariya a yinl ki yin u. 60Le u na kaa chee, ki bei bi ke, “Aai, u yinl yin ye Jɔnn le.”
61Le bi bei u ke, “Uninfo uba kaa jɔɔ liyinl nmɔn a bosu ni maalimin ni.” 62Le bi nan pag kibig nmɔn a baa libiril ki baan u ke u ban bi yin u bigin nii? 63Le u bei bi ke bin sei u kugbɔŋ ni. Le bi ta kugbɔŋ sei u, le u sɔb ke, “U yinl ye Jɔnn le.” Ni nan gar bi biɛn pam.
64Libol nmɔn yaan le Zakariya a mɔb yaar le u lanbil lɔgir. Le u piin ki pag, ki pagir Uwonbɔr. 65Le bijawaam choo u kunkɔɔn tab biɛn, Le Judiya a tim man biɛn be igungon ni nan a ninfob nan pag tibɔr nmɔn. 66Ni nan ŋa bininfob ban biɛn nan gbir nan ipotiɛ pam. Le bi baan ke, “Kibig nmɔn yin ye ninfo bolin baa?” Nan bu-n Uyudaan a nɔɔ paa u bu.
Zakariya a linlenleen
67Le Kasi a Naaŋ nan gbeen Jɔnn a baa Zakariya, le u pag ilinlen leen ke,
68“Ndom ye Uyudaan wan ye Iziral yaab a Wonbɔr u nan yaan le.#Ilan 106:48
Nan bu-n U dan ki nan sei u ninfob nkpenim a manuga,
69ki nan pee feeja a naatuŋ#1:69 feeja a naatuŋ feeja a naatuŋ wɔɔn Uwonbɔr a pɔɔm le. u toontunn Defid a niin a loob
70(ke Uwonbɔr kaah nan che u kasi a linlem nan pag man, n-yonn man nan jon nin.)
71Ke u li nyan tim ti dataam a nɔɔn,
nin ban biɛn nan ti nan a nɔɔn.
72Ke u li san ti yaajam kunyunyunbaag,
ki li tiɛr waah nan poo u kasi a poor tan nin bu.
73Man le u nan poo tipoor ki sei ti yaaja Abiraham,#Npiinim 22:16-17
74ke u li nyan tim ti dataam a nɔɔn, wee ti li nɔɔ u ki laa san bijawaami,
75ki li be kasi
ki li jɔɔ nbuchin binben u ban iyoo biɛn.
76“Fin, n big, bi li yiŋ ke Uwonbɔr wan be paab nan a linlenu.
A li liin Uwonbɔr a sam, ki mann u sam ki sei u,#Malaki 3:1
77ki bei u ninfob baah li ŋa man ki kan nŋmarim
waah jiɛn bi bir ki per bin bu.
78Nan bu-n tim a Wonbɔr u a nyunyunbasanl bu, u li dan ti ban
ke liwonpɔɔnl kaah nyann bɔɔn man nin.
79Ni na li wonn bininfob ban be libunbɔnlin
ki san nkum a jawaam nan bu,
Ni ma wɔɔn ti nsan man li sei tim nposɔɔn nan.”
80Le kibig nmɔn nan yabig ki gbee nin kinaaŋ, ki don kukunkɔɔg bu ki tan be hali ki nan kpaa iyoo kaah nan nan foo nin un kpiir u ba Iziral yaab bu.
Currently Selected:
Lug 1: KUGL
Highlight
Share
Copy
Want to have your highlights saved across all your devices? Sign up or sign in
Komba New Testament © Bible Society of Ghana, 2014.
