Jɔnn 18

Baah nan choo Yisa man

(Matiu 26:47-56; Mag 14:43-50; Lug 22:47-53)

1Yisa kaah nan nan miɛ Uwonbɔr ki diɛ-n, le uma nin u bɔɔnɔɔb nan lɔŋ Kidironn a fataŋ. Lidool limiɛnin olif a siigi nan be niin, le uma nin u bɔɔnɔɔb nan tan kɔɔ niin. 2Le Judasi, wan nan kɔɔr Yisa nmu nan nyi bukpaab nmɔn yaan, nan bu-n Yisa nan ti gbaa lagin nin u bɔɔnɔɔb niin le. 3Le Judasi nan dan isiig nmɔn yaan, ki taan bitɔtogib biba nin iwonjiɛn niin a guguub bibam, ban nan nyan biminmanib a yudam nin Farasiim ban nin. Bi nan ŋmag imumɔl le nin filaam nin tijawann.

4Yisa, kaah nan nyi niwann nan biɛn li ŋa win, le u nan nyan sir ki too bi le ki baan ke, “Ŋma wee ni ban naa?”

5Le bi jiin ke, “Yisa wan nyan Nazarif.”

Le Yisa ke, “Min le yen.” (Le Judasi wan nan kɔɔr Yisa nan si bi ban niin.) 6Yisa kaah nan ke, “Min le yen” nin, le bi nan sul jir bɔɔn ki lu lu tum.

7Le Yisa ji nan baan bi ke, “Ŋma wee ni ban naa?”

Le bi ke, “Yisa wan nyan Nazarif.”

8Le Yisa jiin ke, “N bei ni ke min le yen. Ni ye ni ban min le ke, ni che bijab nan li chaau.” 9Ni niɛ nan ŋa ke nin che imɔbon yan wee u nan pagin gbeen le: “Ban wee a nan ta seimin bi ni uba kaa bori.”

10Le Simɔnn Piita, wan nan ŋmag takoobi-n#18:10 Takoobi ye tijukpar fufɔgir tan wee bi ti jɔɔ tug itɔɔŋin., dar fɔɔ le ki gaa biminmanib a yudaau a toontunnu a nɔɔjiim a tul ki par. (Utoontunn nmɔn a yinl le nan ye Malichusi.)

11Le Yisa nan bei Piita ke, “Ta a takoobi-n jiin kutɔɔgin na! N laa nyu kiyiig kan wee n Baa ta seimin yaan naa?”

Baah nan ta Yisa jon Anasi ban man

12Le bitɔtogib ban wee Judasi nan taan nin, nin bi sanliiru nin Juu yaab a ninkpeeb choo Yisa. Ki lol u, 13le ki nan chinn ta u dan Anasi ban, wan a chɔɔl nan ye Kayafasi nan, wee u nan ye biminmanib a yudaau libinl nmɔn nin. 14Kayafasi nmɔn le pii nan kpaan Juu yaab ke, ni bi li ŋan ni ye uninfo uba bi kpo ki sei bininfob biɛn ke.

Piita kaah niɛ ke waa nyi Yisa man

(Matiu 26:69-70; Mag 14:66-68; Lug 22:55-57)

15Simɔnn Piita nin ubɔɔnɔɔr uba nan nɔɔ Yisa. Nan bu-n biminmanib a yudaau win nan nyi ubɔɔnɔɔrin, le u nan nɔɔ Yisa ki kɔɔ biminmanib a yudaau win a niin a loob, 16amaa Piita ma nan paar si nkaafiin le ki guu. Le ubɔɔnɔɔr wan wee biminmanib a yudaau nan nyi-n, nan jirin ki nan pag sei kibisiɛg kan nan be itoon nin lidaal nmɔn nin, ki che Piita kɔɔn. 17Le kibisiɛg kan nan be ntimansanmɔnn nin baan Piita ke, “Ŋaa ye u bɔɔnɔɔru lee?”

Le Piita jiin ke, “Maa ye.”

18Tiwar li nan be, le bitoontumin nin bininkpeebin nan si ki gɔɔn nŋmi man wee bi nan mann ki worin. Piita tɔɔl nan si ki kpiɛ bi bu le ki wor.

Biminmanib a ninkpelu kaah nan baan Yisa ibinbaan man

(Matiu 26:59-66; Mag 14:55-64; Lug 22:66-71)

19Iyaayoo nmɔn, le biminmanib a yudaau win nan baan Yisa ki jiin u bɔɔnɔɔbin nin u wɔɔnimin paam.

20Le Yisa nan jiin ke, “N pag npaan ni le ki sei dulinya, n gbaa wɔɔn tiwonjiɛn dirin bee iwonjiɛn niin le, nan yaan wee Juu yaab biɛn lagin tab. Maa la nyi pag niba ki woon ni. 21Ba ŋa wee a baanim ibinbaan naa? Baan bininfob ban gbir maah pag man nin. Ibamɔn buu bi nyi maah len man.”

22Yisa kaah len man nin, le bininkpeebin a ni uba wan mal win peb u kitapag ki ke, “Ŋaah yin pag man ki sei biminmanib a yudaau le yen naa?”

23Le Yisa jiin u ke, “Ni ye n pag nan bir ke, a bin jim ni siɛra. Amaa ni ye n pag ibamɔn ke, ba ŋa wee a peb maa?” 24Le Anasi ta Yisa ki chiɛn biminmanib a yudaau Kayafasi ban ke iŋmin la lol u.

Piita kaah ji nan niɛ ke waa nyi Yisa man

(Matiu 26:71-75; Mag 14:69-72; Lug 22:58-62)

25Simɔnn Piita kaah nan si wor nŋmi-n, le bi baan u ke, “Ŋaa ye uja nan a bɔɔnɔɔbin a ni u ba lee?”

Le u niɛ, ki ke, “Maa ye.”

26Le biminmanib a yudaau a toontunnu wan a maalim ye Piita kaah gaa wan a tul ki parin, kpeen u ki ke, “Maa bi kan fin nin uma olif a kpaabin yaan naa?” 27Le Piita ji niɛ, libol nmɔn le ukooja piin ki mɔr.

Baah nan ta Yisa jon Palati ban man

(Matiu 27:1-2,11-14; Mag 15:1-5; Lug 23:1-5)

28Le Juu yaab nyan Yisa Kayafasi ban ki ta u jon Rom yaab a bɔryudaau a naakoon. Ni nan ye njakpiin le, Juu yaab kaah nan yin ji yuglagir a chiigin nin; baa nan chee kɔɔ ubɔr a naakoon wee ki ŋa bi ba tijaginn ke bi kaal kaah wɔɔn man nni. 29Ni bu le Palati nan nyann bi ban ki nan baan bi ke, “Uja nan a galin ye ba wee ni jɔɔ galin waa?”

30Le bi jiin u ke, “Ni ye waa bi ye wan galin ke, taa bi yin ta u ki nan seiŋi.”

31Le Palati ke, “Ni ta u ni tɔɔl ki tan ji u tibɔr ni siim kaah wɔɔn man na.”

Le Juu yaabin jiin ke, “Nsan kaa jaa sei ti nin ti ku uninfo.” 32Ni niɛ nan tun ke nin gbeen Yisa kaah nan pag ke waah na yin kpo nkum man a bosu nle.

33Le Palati nan jir kɔɔ nnaakoon, ki tan yin Yisa ki baan u ke, “Fin le ye Juu yaab a bɔru win naa?”

34Le Yisa jiin ki baan u ke, “Ni ye a tɔɔl a potiɛl le bee biba le beiŋ n bɔraa?”

35Le Palati mu ji baan u ke, “N ye Juu a ninfou lee, a tɔɔl a ninfob nin biminmanib le taaŋ seim. A tun baa?”

36Le Yisa bei u ke, “N naam kaa ye dulinya nan a naami, ni bi ye man ke, n toontum nan bi li kɔn n bu ke Juu yaab kaa li fir choomi. Amaa daandaan nan n naamin yin nyann niba paam le.”

37Le Palati ke, “Tɔ a ye ubɔr le!”

Le Yisa jiin u ke, “A jɔɔ ibamɔn nin ŋaah pag ke n ye ubɔr nmɔn. Ibamɔn buu, ni ma bu le bi mam, ni ma bu le n dan dulinya nan yaan, n nan ji ibamɔn a siɛra. Le ban be ibamɔn paamin pelig n bɔr.”

38Le Palati baan u ke, “Ba ye ibamɔn naa?”

Baah siin bin ku Yisa man

(Matiu 27:15-31; Mag 15:6-20; Lug 23:13-25)

Imɔbon nan a bɔɔn bu le Palati ji jir nyan Juu yaabin ban ki tan bei bi ke, “Maa kan nan bu wee n li galin wi. 39Amaa ni ye ni kaal le ke n nyan uloondiikɔɔr uba ki sei ni Yuglagir a chiig a yonn. Ni ban n nyan ‘Juu yaab a bɔru’ nle ki sei naa?”

40Le bi tiɛn ki jiin ke, “Aai, naa ye uma! Nyan Barabasi ki sei ti!” Barabasi nan ye ban bii tininkper a pɔɔmin a ni uba le.

Currently Selected:

Jɔnn 18: KUGL

Highlight

Copy