Jɔnn 17

Yisa kaah miɛ Uwonbɔr ki sei U bɔɔnɔɔb man

1Yisa kaah nan len man nmɔn, ni bɔɔn bu le U yaar lig paab le ki miɛ Uwonbɔr ke:

“N baa, n-yonn nmɔn foo u. Che A bija n kan kupag wee A bija mu n pagiŋ. 2Nan bu-n fin le sei u tininkper a pɔɔm le u jon bininfob biɛn ke un sei ban biɛn wee A ta sei win limiɛfol lan kaa jɔɔ ndiɛm. 3Daandaan nan limiɛfol lan kaa jɔɔ ndiɛm nmɔn ye nan le: Ke bin biɛ fin wan ye ibamɔn a Wonbɔru win, nin Yisa Masiya, wan wee a tun nin. 4N ŋmagin kupag nan dulinya-n le n nan seiŋ maah diɛ litoonl lan wee A nan ta seim ke n tun nin. 5Le daandaan nan, n Baa, seim kupag A nintogil ni, kupag kan wee n nan kan A ban n-yonn man wee dulinya kaa la nan naan nin.

6“N kpiiriŋ ki wɔɔn bininfob ban wee A nan ta seim dulinya nan yaan nin na. Bi nan ye A yaab le; Fin le ta bi seim le bi chee A mɔleen. 7Daandaan nan bi nyi ke niwann nan biɛn wee A ta seimin nyann Fin ban le. 8Nan bu-n n ta imɔleen yan wee A ta seimin ki sei ba, le bi gaa i. Bi nyi ibamɔn ke n nyan Fin ban le, ki ŋa yada ke Fin le tunim. 9N miɛ le ki tenn bi. Maa miɛ tenn dulinya, amaa ban wee A ta bi seimin, nan bu-n bi ye A yaab le. 10Maah jɔɔ ban ye A yaab le, le Ŋaah jɔɔ ban nin biɛn ye n yaab. Le n kan kupag bi ban. 11Maa ji yin be dulinya nan yaan ni, amaa bi ma la be dulinya nan yaan, min chaan A ban le. Baa wan be kasi, guur bi A yinlin a pɔɔm bu, liyinl lan wee A ta sei min bu, naah li ŋa man wee bin ŋa nba ke taah ye nba man nin. 12Maah la nan be bi ban nin, n nan guu bi le ki ŋmag bi A yinl lan wee A nan ta seim nmɔn a pɔɔm bu. Bi ni uba kaa bori see gab yɔli a ninfo win naah li ŋa man wee nin gbeen naah sɔb man Uwonbɔr a gbɔŋin nin.

13“N chaan A ban le daandaan nan, amaa n pag ni niɛ nan n-yonn man wee n la be dulinya nan yaan ni le, naah li ŋa man wee bin gbee nin n mɔmin bi sufu ni. 14Min le ta A mɔleen yin ki sei bi le dulinya yaab nan bi, nan bu-n baa ji ye dulinya yaab jigin ke maah kaa ye dulinya a ninfou man nin. 15N wonmiɛl kaa ye A nyan bi dulinya nan yaan ni, amaa n miɛ le ke A guur bi ki nyan bi tibir daan a nɔɔn. 16Baa ye dulinya yaabi, hali a li ke maah kaa ye dulinya a ninfou man nin. 17Ŋa bi kasi ibamɔn nin buu; A mɔleen yin ye ibamɔn le. 18Ŋaah nan tum dulinya-n man nin, man le n tun bi dulinya-n. 19Bi ma bu le n ŋa nba kasi, ke ni che bi mu n ŋa kasi ibamɔn.

20“N wonmiɛl kaa tenn bi binba. N miɛ ki tenn ban mu la yin ŋaam yada bi mɔleen bu-n le, 21ke bi biɛn n ŋa nba; ke Ŋaah be nni wee n mu be A ni man nin. Che bi mu li be nin tima wee dulinya yaab n ŋa yada ke Fin le tunim ni. 22N ta kupag kan wee A nan ta seimin ki sei ba, ke nin che bin ŋa nba ke taah ye nba man nin: 23Le n li be nin bi wee A li be nim. Che bi li jɔɔ nmɔkpaa bamɔn na. Wee nin che dulinya yaab nbiɛ ke Fin le tunim le ki jiɛ bi hali ke ŋaah jiɛm man nin.

24“N Baa, n ban bininfob ban wee A ta seimin na li be n ban le maah na yin be nan yaan nin. Wee bin kan npagim, kupag kan wee A nan ta seimin, nan bu-n Ŋaah jiɛm n-yonn man wee dulinya kaa la nan naan nin.

25“N Baa Wan ye tibuchinn daan, hali dulinya yaab kaah kaa le nyiŋin, min nyiŋ, le bi nyi ke Fin le tunim. 26N che bi biɛŋa, le ki li che bin mann biɛŋ naah li ŋa man wee Ŋaah jiɛm man nin li be nin bi wee n mu tɔɔl li be nin bi.”

Currently Selected:

Jɔnn 17: KUGL

Highlight

Copy