Galantiya 4
4
1Maah len man nmɔn wɔɔn le ke ufaajir nmɔn kaah le la ye kibigin, nin waah le jɔɔ nan nmɔn biɛn yɔli, waa yin jɔɔ nbɔgirim nin uyomi. 2U yin be ban guu win nin u toon tun ninkpeebin a nɔɔn le, hali ki nan kpaa u baa kaah nan siin u n-yonn man nin. 3Man mu le ye ti, taah la nan ye nbuwaab Yisa a samin yaan nin, dulinya nan a maabiyiɛrug nan ŋmag ti le ke biyomin. 4N-yonn nmɔn kaah nan nan foon biɛn nin, le Uwonbɔr tun U tɔɔl a bija, wan wee upii ma u, wee nsiim ŋmag u, 5ke un ŋa nkpenim a manug ki nyan ban be nsiim nmɔn yaan nin, wee ti kpann Uwonbɔr a bibamɔm.
6Naah ye Uwonbɔr a buwaabin bu le Uwonbɔr tun U big nmɔn a Naaŋ le ki dan ki nan be ti sufu ni, le kinaaŋ nmɔn yi ke, “Ti dindaau, ti baa.” 7Mambu, ŋaa ji ye uyomi, amaa a nin ye Uwonbɔr a big le; ŋaah ye U big n bu, le U ŋaaŋ U faajiru mu.
Pɔɔl a baga kaah be Galantiya yaabin man
8N-yonn man nan jon wee naa la nan nyi Uwonbɔr nan, ni nan ye biyom le ki sei Uwonbɔr kaah naan tiwann tan kaa ye iween nin. 9Amaa daandaan nan ni nin nyi Uwonbɔr, bee Uwonbɔr nyi ni, ke ba ŋa wee ni ji ban ni jir ki nɔɔ dulinya nan a maabiyiɛrug kan ye idaburig nin kunyunyunbaag a binbem nan naa? Ni ban ni kpann tiwann nmɔn a yomi le jigin naa? 10Ni ji iweehn nin iŋmal nin iyoo nin ibin a chiig le! 11N san ni bijawaam le, maah tun nan ki jiin ni paamin nan gab yɔli bu.
12N nabum n balin ni le, ni li be ke min na, ke maah be ke nim man nin. Naa galimi. 13Ke naah nyi man nin, maah nan bu-n bu le n nan chinn ki mɔɔn tibɔŋann nan ki sei ni. 14Hali nin n wiɛn nmɔn kaah nan mugir ni nan biɛn na, amaa naa nan yim yɔli bee ki yii mi, ni gaam le ke Uwonbɔr a malaka-n, ki ji gaam ke Masiya#4:14 Lig 2:4 man dɔ tum. baantɔɔlin. 15Ni mɔmin biɛn be laa? N li fir ji siɛra ke, ni ye ni bi li fir ke, ni bi li chee ki logir ni numbili ki seim. 16Amaa daandaan nan n nin kpann ni dundaau le maah bei ni ibamɔn nin buu?
17Bininfob biba jɔɔ inunman ki ban ni ta ni baga ŋa bi ni, amaa naa ye ni ŋam bu le bi ŋaan nmɔn ni. Bi ban bin ta ni ŋa bicham ti ban, naah li ŋa man wee ni li jɔɔ inunman ki ta ni baga ŋa bi ni. 18Ni ŋan ni li jɔɔ inunman, ni ye ni tun nin ni ŋam bu, wee ni li ye man ki jɔɔ chaa ki laa ye n-yonn man wee n nan be ni ban a binba. 19N bijiɛkaam, ni wum le ke nmarwiɛn kaah choo upii ke ni wuu man nin, ki nan kpaa n-yonn man wee ni na li chegir Masiya a sam nan yaan. 20N bi ban n li be ni ban daandaan nan wee ki mann kpenn n kukɔl, nan bu-n n lam ŋmarin le ni bu.
Hega nin Sɛra a magil
21Ni beim ni, nim ban ban nsiim li ŋmag ni nan, naa nyi nsiim nmɔn kaah len man naa? 22Ni sɔb Uwonbɔr a gbɔŋin ke Abiraham nan jɔɔ nbijabum milee le, uba a na nan ye uyom le wan gurin mu a na nan ye upii wan ye uba. 23U bija wan wee upiiyomin nan maa-n, u nan ma u le ke bininfob kaah maa man nin; amaa u bija wan wee upii wan ye uba-n nan maa-n, u nan ma u le ke Uwonbɔr kaah nan siin u mɔsiinl man nin.
24Ni niɛ li fir ta, pag wonn a poolin ke, bipiib bilee nan si Uwonbɔr a poor a kerim milee a sisiimin le, uyom nmɔn a yinl li nan ye: Hega; le u si tipoor tan wee Uwonbɔr nan poo Sinai a jɔɔl a paabin a sisiim, le ki nan ma u big tiyomirin. 25Daandaan nan Hega si ki sei Sinai a jɔɔl lan be Arabiya a tiŋin nin le, ki nann dulinya nan a Jerusalam le, nan bu-n u ma nin u buwaab be tiyomirin le. 26Amaa Jerusalam kan be papaab nan ma ye u ba le, le ki ye ti na. 27#Azaya 54:1 Ni sɔb Uwonbɔr a gbɔŋin ke:
“Upiiŋɔɔbee, che ni li mɔŋa,
fin wan kaa la nyi ma nbuwaab nan;
li yigin ki le sɔɔlin na,
fin wan kaa la nyi nmarwiɛn a tom nan;
nan bu-n upii wan a chal yii u nan a buwaab yab ki jon
upii wan jɔɔ chal nan a buwaaba.”
28N nabum daandaan nan ni nann Azig le, ni ye Uwonbɔr a buwaab le, U mɔsiinlin bu. 29Iyaayoo nmɔn, baah nan ma wan ke bininfob kaah maa bi buwaab man nin, nan mugir wan wee bi ma u Kinaaŋ a pɔɔmin nin, ni ye man le daandaan nan. 30Amaa Uwonbɔr a gbɔŋin bei ke nii? “Ŋɔɔr upiiyomin nin u bigin ki jaau, upiiyom a big nin upii wan ye u ba nan a big kaa li fir lagin por lifaali.” 31Mambu n nabum, taa ye upiiyom nmɔn a buwaabi, amaa ti ye upii wan ye u ba nan a buwaab le.
Currently Selected:
Galantiya 4: KUGL
Highlight
Share
Copy
Want to have your highlights saved across all your devices? Sign up or sign in
Komba New Testament © Bible Society of Ghana, 2014.
