མད༌ཐཱ༌ 5
5
གཙོ༌བོ༌ ཡེ༌ཤུའི༌ རི༌ཀ༌ ཆོས༌ སལ༌ལ༌ ཛདས༌།
5:1-12
1མི༌ཚོགས༌ ཆེན༌མོ༌ ཛོམ༌ཨིན༌ ཟིགས༌ས༌ཅིག༌, གཙོ༌བོ༌ ཡེ༌ཤུ༌ རི༌ཀ༌ ཀེན༌ལ༌ སྐྱོད༌ཏེ༌ ཞུགས༌ས༌ ཛདས༌། ཏེ༌ནེ༌ ཁོང༌ངི༌ ལོབ༌ཕྲུགས༌གུན༌ ཁོང༌ ཡོད༌ས༌ ཡོངས༌། 2ཡེ༌ཤུའི༌ ཁོང༌གུན༌ལ༌ ལབ༌ཞ༌ སལ༌ཅེས༌ གོ༌ཟུག༌ ཛད༌ཏེ༌ མོལས༌,
3“དཀོན༌མཆོག༌ནེ༌ རོགས༌ ཙལ༌ཁན༌གུན༌ ཅིན༌ལབས༌ཅན༌ ཨིན༌,
ཅིའ༌ཟེར༌ན༌ ཁོང༌གུན༌ལ༌ ནམ༌ཁའེ༌ གྱལ༌སྲིད༌ ནོར༌སྐལ༌ལ༌ ཐོབ༌ཨིན༌།
4སེམས༌སི༌ ནང༌ང༌ རྡུག༌པོ༌ ཡོད༌ཁན༌གུན༌ ཅིན༌ལབས༌ཅན༌ ཨིན༌
ཅིའ༌ཟེར༌ན༌ དཀོན༌མཆོག༌གི༌ ཁོང༌གུན༌ལ༌ སེམས༌སོ༌ སལ༌ལ༌ ཛད༌ཨིན༌།
5པས༌མོ༌ ཡོད༌ཁན༌གུན༌ ཅིན༌ལབས༌ཅན༌ ཨིན༌
ཅིའ༌ཟེར༌ན༌ ཁོང༌གུན༌ལ༌ ཇིག༌རྟེན༌ གང༌པོ༌ ནོར༌སྐལ༌ལ༌ ཐོབ༌ཨིན༌།
6ཀྲང༌པོ༌ ཐེའ༌ ཛད༌ཅེས༌ལ༌ སྟོགས༌ཨིན༌ སྐོམས༌ཨིན༌ ཡོད༌ཁན༌གུན༌ ཅིན༌ལབས༌ཅན༌ ཨིན༌
ཅིའ༌ཟེར༌ན༌ ཁོང༌གུན༌ ཚིམ༌ཤུག༌ག༌ ཛད༌ཨིན༌།
7ཞན༌མའ༌ སྙིང༌རྗེ༌ སྟན༌ཁན༌གུན༌ ཅིན༌ལབས༌ཅན༌ ཨིན༌
ཅིའ༌ཟེར༌ན༌ ཁོང༌གུན༌ལ༌ སྙིང༌རྗེ༌ སྟན༌ན༌ ཛད༌ཨིན༌།
8སེམས༌ ལག༌མོ༌ ཡོད༌ཁན༌གུན༌ ཅིན༌ལབས༌ཅན༌ ཨིན༌
ཅིའ༌ཟེར༌ན༌ ཁོང༌གུན༌ནི༌ དཀོན༌མཆོག༌ ཇལ༌ཨིན༌།
9ཐུན༌བྲེལ༌ ཁྱོང༌ཁན༌གུན༌ ཅིན༌ལབས༌ཅན༌ ཨིན༌
ཅིའ༌ཟེར༌ན༌ ཁོང༌གུན༌ལ༌ དཀོན༌མཆོག༌གི༌ ཕྲུ༌གུ༌ མོལ༌ཨིན༌།
10ལམ༌ ཀྲང༌པོའེ༌ཀ༌ གྲུལ༌ཅེས༌པོའེ༌ རྡུག༌ངལ༌ ཐོང༌ཁན༌གུན༌ ཅིན༌ལབས༌ཅན༌ ཨིན༌
ཅིའ༌ཟེར༌ན༌ ཁོང༌གུན༌ལ༌ ནམ༌ཁའེ༌ གྱལ༌སྲིད༌ ནོར༌སྐལ༌ལ༌ ཐོབ༌ཨིན༌།”
11“ངའ༌ ཏད༌པ༌ ཅོ༌ཅེས༌པོའེ༌, ཞན༌མ༌གུན༌ནི༌ ཁྲེལ༌ ཅུགས༌ཏེ༌ ནགས༌བར༌དོ༌ ཡང༌ ཟུན༌བ༌ ཏམ༌ངན༌ སྣ༌ཙོགས༌ ཕོག༌ཁན༌གུན༌ ཅིན༌ལབས༌ཅན༌ ཨིན༌། 12གའ༌མོ༌ དང༌ ཐད༌པོ༌ ཅོ༌ཤིག༌, ཅིའ༌ཟེར༌ན༌ ནམ༌ཁའེ༌ ནང༌ང༌ ཁྱོ༌ཞའ༌ སོལ༌རས༌ ཀྲག༌པོ༌ ཡོད༌, ཁོང༌གུན༌ནི༌ ཁྱོ༌ཞའེ༌ སང༌ སྔུན༌ལ༌ ཡོངས༌ཁན༌ དཀོན༌མཆོག༌གི༌ ལུང༌སྟོན༌པ༌གུན༌ལའང༌ ཏེན༌ན༌ ཙོགས༌ ནགས༌བར༌དོ༌ སྟན༌ཏེ༌ ཨིན༌པིན༌།”
ཚཱ༌ དང༌ འོད༌།
5:13-16
13གཙོ༌བོ༌ ཡེ༌ཤུའི༌ མོལས༌, “ཇིག༌རྟེན༌པ༌གུན༌ནི༌ ཕིའ༌ ཁྱོ༌ཞ༌གུན༌ ཚཱ༌ ཨིན༌། ཨིན༌ནའང༌ ཀལ༌ཏེས༌ ཚཱའེ༌ བྲོད༌པོ༌ ཡོལ༌ན༌ ཏེ༌བོ༌ ཀ༌ཟུག༌གི༌ ལོགས༌ཏེ༌ ཁྱོང༌ཨིན༌? ཏེ༌བོ༌ ཕི༌ལོག༌ག༌ ཕངས༌ཏེ༌ མི༌གུན༌ནི༌ རྐང༌པའེ༌ ཡོག༌ག༌ ནན༌ཅེས༌ མ༌ནེ༌ ཡང༌ ཅའང༌ ཕན༌ཐོགས༌ མེད༌ཀྱག༌།”
14“ཇིག༌རྟེན༌པ༌གུན༌ནི༌ ཕིའ༌ ཁྱོ༌ཞའ༌ འོད༌ ཨིན༌ནོག༌, རི༌ཀ༌ ཡོད༌ཁན༌ནི༌ གྱལ༌ས༌ ཀབ༌ མི༌ཉན༌ཅེས༌ ཙོགས༌། 15མི༌གུན༌ནི༌ འོད༌ ཏུགས༌ཏེ༌ གོར༌མོའེ༌ ཡོག༌ག༌ མ༌བོར༌ར༌ ནང༌ང༌ ཡོད༌ཁན༌ ཚང༌མའ༌ ཐོང༌ཅེས༌ལ༌ འོད༌སྟག༌གི༌ཀ༌ བོར༌ཨིན༌། 16ཏེན༌ན༌ ཙོགས༌ལ༌ ཁྱོ༌ཞའེ༌ ལས༌ ཟང༌པོ༌གུན༌ ཐོང༌ཏེ༌ མི༌གུན༌ནི༌ ཁྱོ༌ཞའེ༌ ནམ༌ཁའ༌ ཞུགས༌ཁན༌ནི༌ ཡབ༌ དཀོན༌མཆོག༌ག༌ སྟོད༌པ༌ ཕུལ༌ཅེས༌སི༌ ཕིའ༌ ཁྱོ༌ཞའེ༌ འོད༌དི༌ ལྡངས༌པོ༌ ཁོང༌གུན༌ནི༌ཀ༌ ཕོག༌ཅུག༌ཤིག༌།”
དཀོན༌མཆོག༌གི༌ བཀའ༌ཁྲིམས༌པོ༌ ཁག༌ཅན༌ ཨིན༌།
5:17-20
17གཙོ༌བོ༌ ཡེ༌ཤུའི༌ མོལས༌, “ང༌ མོ༌ཟེས༌སི༌ བཀའ༌ཁྲིམས༌ ཡ༌ ལུང༌སྟོན༌པ༌གུན༌ནི༌ ལབ༌ཞ༌གུན༌ མེད༌ཁན༌ ཅོའ༌ ཡོང༌ཏེ༌ ཨིན༌ནོག༌ མ༌སམ༌། ཏེ༌གུན༌ མེད༌ཁན༌ མ༌ཅོའ༌ གྲུབ༌ ཅུག༌ག༌ལ༌ ཡོངས༌པིན༌། 18ངའེ༌ དེན༌བ༌ ཟེར༌རད༌ ནམ༌ཁའ༌ དང༌ ས༌ ཉིས༌ཀོ༌ སྟོར༌རི༌ སང༌ སྔུན༌ལ༌ དཀོན༌མཆོག༌གི༌ བཀའ༌ཁྲིམས༌སི༌ ཨི༌གེ༌ ཡ༌ ཚིག༌ཅིག༌གའང༌ མ༌སྟོར༌ར༌ ཏེ༌ ཚང༌མ༌ དྲན༌དྲ༌ གྲུབ༌ཨིན༌། 19ཀལ༌ཏེས༌ སུ༌ཞིག༌གི༌ དཀོན༌མཆོག༌གི༌ བཀའ༌རྒྱ༌ ཚང༌མའེ༌སང༌ ཆུ༌ངུན༌ཞིག༌གའང༌ ཅག༌ན༌ ཡང༌ ཏེན༌ན༌ ཙོགས༌ ཞན༌མ༌གུན༌ལ༌ ལབ༌བད༌ན༌ ཏེ༌ མི༌བོའ༌ ནམ༌ཁའེ༌ གྱལ༌སྲིད༌དི༌ ནང༌ང༌ ཚང༌མའེ༌སང༌ རིན༌མེད༌ རྩི༌ཨིན༌། ཨིན༌ནའང༌ ཀལ༌ཏེས༌ སུ༌ཞིག༌གི༌ བཀའ༌ སྲུངས༌ཏེ༌ ཞན༌མ༌ ཏེ༌ཙོགས༌ ཅོ༌ཅེས༌ ལབ༌བད༌ན༌ ཏེ༌ མི༌བོའ༌ ནམ༌ཁའེ༌ གྱལ༌སྲིད༌དི༌ ནང༌ང༌ རིན༌ཅན༌ རྩི༌ཨིན༌།”
20“ཏ༌ ངའེ༌ ཟེར༌རད༌, ཀལ༌ཏེས༌ ཆོས༌ཁྲིམས༌ལ༌ ཁས༌པ༌ དང༌ ཕ༌རུ༌ཤི༌པ༌ གུན༌ནི༌ མི༌ཚེ༌ ཀྲང༌པོ༌ཞིག༌ ཕུད༌ཁན༌བོའེ༌ སང༌ ཁྱོ༌ཞའེ༌ མི༌ཚེ༌ ཕུད༌ཁན༌བོ༌ མང༌ང༌ ཀྲང༌པོ༌ཞིག༌ མེད༌ན༌ ནམ༌ཁའེ༌ གྱལ༌སྲིད༌དི༌ ནང༌ང༌ ཁྱོ༌ཞ༌གུན༌ མ༌ནེ༌ ཞུགས༌ མི༌ཉན༌།”
སྲོའེ༌ སྐོར༌ལ༌ ཡེ༌ཤུའི༌ ལབ༌ཞ༌ སལས༌།
5:21-26
21གཙོ༌བོ༌ ཡེ༌ཤུའི༌ མོལས༌, “དཀོན༌མཆོག༌གི༌ ང༌དང༌ངི༌ ཕ༌མེས༌པོ༌གུན༌ལ༌ མོལ༌ཁན༌བོ༌ ཁྱོ༌ཞའེ༌ ཚོར༌ཏེ༌ ཨིན༌ནོག༌། ‘མི༌ མ༌སད༌, མི༌ སད༌ཁན༌གུན༌ལ༌ ཁྲིམས༌ཅད༌ ཕོག༌ཨིན༌།’#བིང༌ཏེ༌ ཆའ༌ཁན༌ 20:13 22ཨིན༌ནའང༌ ངའེ༌ ཟེར༌རད༌ རང༌ངི༌ སྤུན༌ལ༌ སྲོ༌ ཅོ༌ཁན༌བོའང༌ ཁྲིམས༌ཅད༌ ཕོག༌ཨིན༌། ཡང༌ རང༌ངི༌ སྤུན༌ལ༌ སྨད༌གྲ༌ ཏང༌ཁན༌བོའང༌ ཁྲིམས༌ཁུང༌ང༌ ཁྱོང༌ཨིན༌། ཀལ༌ཏེས༌ ‘ཁྱོ༌རང༌ངི༌ སྤུན༌ཞིག༌ག༌ བུང༌བུ༌ སམ༌མེད༌ ཨིན༌ནོག༌’ ཟེར༌ན༌ ཁྱོ༌རང༌ང༌ ཉལ༌ཝའེ༌ མེ༌ ཆད༌པ༌ ཕོག༌ཅེས༌སི༌ ཇིགས༌པ༌ ཨིན༌ནོག༌།”
23“ཏེ༌བོའེ༌ཕིའ༌ ཆོད༌ཁྲི༌ཀ༌ ཆོད༌པ༌ ཕུལ༌ལི༌ ཏུས༌, ཀལ༌ཏེས༌ རང༌ངི༌ སྤུན༌ཞིག༌གི༌ གྱབ༌གལ༌ལ༌ ངན༌པ༌ ཅོས༌ཁན༌བོ༌ ཁྱོ༌རང༌ང༌ ཨིད༌ཏུ༌ ཡོང༌ན༌, 24ཆོད༌ཁྲིའི༌ དུན༌ལ༌ ཆོད༌པ༌ བོར༌ཏེ༌ གོ༌མ༌ རང༌ངི༌ སྤུན༌ ཉམ༌པོ༌ ཐུན༌བྲེལ༌ ཅོས༌, ཏེ༌ནེ༌ སོང༌ཏེ༌ ཆོད༌པ༌ ཕུལ༌།”
25“ཁྱོ༌རང༌ང༌ ཉད༌ཀལ༌ཏེ༌ ཁྲིམས༌ཁུང༌ང༌ ཁྱེར༌ཁན༌བོ༌ ཉམ༌པོ༌ ཏེ༌རུ༌ ལེབ༌བི༌ སང༌ སྔུན༌ལ༌ ལམ༌མ༌ གྱོགས༌པ༌ ནང༌གྲིག༌ ཅོས༌། ཏེ༌ མན༌ན༌ ཁོའེ༌ ཁྱོ༌རང༌ ཁྲིམ༌སྤོན༌ལ༌ སྟད༌སྲིད༌ཅེས༌ ཨིན༌ནོག༌, ཡང༌ ཁྲིམ༌སྤོན༌ནི༌ ཁྲིམས༌ཁུང༌ངི༌ མག༌སྤོན༌ལ༌ སྟད༌ཏེ༌ ཁྱོ༌རང༌ ཙོན༌ཁང༌ང༌ ཀག༌ཨིན༌། 26ངའེ༌ ཁྱོ༌ཞའ༌ དེན༌བ༌ ཟེར༌རད༌, ཁྱོ༌རང༌ ཙོན༌ཁང༌ནེ༌ ཏེ༌ཏེ༌ཚོག༌པ༌ མི༌ཕུད༌ ནམ༌ཚོག༌པ༌ ཁྱོ༌རང༌ངི༌ ཆད༌པའེ༌ པེ༌ནེ༌ ཚང༌མ༌ མི༌ཤལ༌།”
ལོག༌ཡེམ༌མི༌ སྐོར༌།
5:27-30
27གཙོ༌བོ༌ ཡེ༌ཤུའི༌ མོལས༌, “དཀོན༌མཆོག༌གི༌ མོལ༌ཁན༌བོ༌ ཁྱོ༌ཞའེ༌ ཚོར༌ཏེ༌ ཨིན༌ནོག༌, ‘རང༌ངི༌ ཞིད༌མད༌ མན༌པ༌ ཞན༌མ༌ ཉམ༌པོ༌ ལུས༌བྲེལ༌ མ༌ཅོ༌།’#བིང༌ཏེ༌ ཆའ༌ཁན༌ 20:14 28ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, བུ༌མོའ༌ ལུས༌བྲེལ༌ལི༌ དོད༌པ༌ ཉམ༌པོ༌ ལྟའ༌ཁན༌བོའེ༌, ཁོ༌རང༌ངི༌ སྙིང༌ངི༌ ནང༌ང༌ ཁོ༌རང༌ངི༌ ཞིད༌མད༌ མན༌ཁན༌ནི༌ ཏེ༌ བུ༌མོ༌ ཉམ༌པོ༌ ལུས༌བྲེལ༌ ཅོས༌ཏེ༌ ཨིན༌ནོག༌། 29ཀལ༌ཏེས༌ ཁྱོ༌རང༌ངི༌ མིག༌ ཡས༌པའེ༌ ཁྱོ༌རང༌ང༌ སྡིག༌པ༌ ཅོ༌ཅུག༌གད༌ན༌, ཏེ༌ མིག༌པོ༌ བྲུས༌ཏེ༌ ཕངས༌ཏོང༌, ལུས༌ གང༌པོ༌ ཉལ༌ཝའེ༌ ནང༌ང༌ ཕང༌ངི༌ སང༌ ལུས༌སི༌ ཁག༌ཅིག༌ མེད༌ཁན༌ ཆ༌ན༌ གྱལ༌། 30ཡང༌ ཀལ༌ཏེས༌ ཁྱོ༌རང༌ངི༌ ལག༌པ༌ ཡས༌པའེ༌ ཁྱོ༌རང༌ང༌ སྡིག༌པ༌ ཅོ༌ཅུག༌གད༌ན༌, ཏེ༌ ལག༌པ༌ ཅད༌ཏེ༌ ཕངས༌ཏོང༌, ལུས༌ གང༌པོ༌ ཉལ༌ཝའེ༌ ནང༌ང༌ ཕང༌ངི༌ སང༌ ལུས༌སི༌ ཁག༌ཅིག༌ མེད༌ཁན༌ ཆ༌ན༌ གྱལ༌།”
ཞིད༌མད༌ ཅད༌ཅེས༌སི༌ སྐོར༌།
5:31-32
31གཙོ༌བོ༌ ཡེ༌ཤུའི༌ མོལས༌, “ཁྱོ༌ཞའེ༌ འི༌བོ༌ ཚོར༌ཏེ༌ ཨིན༌ནོག༌, ‘ན༌མ༌ ཅད༌ཁན༌ནི༌ བུ༌ཚའེ༌ ཁོ༌རང༌ངི༌ ན༌མ༌ ཅད༌ཁན༌བོའ༌ ཅད༌ཁན༌ནི༌ ལག༌ཁྱེར༌ ཏང༌གོས༌།’ 32ཨིན༌ནའང༌ ངའེ༌ ཁྱོ༌ཞ༌གུན༌ལ༌ ཟེར༌རད༌, རང༌ངི༌ ཞིད༌མད༌ མན༌ཁན༌ ཉམ༌པོ༌ ལུས༌བྲེལ༌ ཅོ༌ཅེས༌སི༌ ནས༌ལུག༌ མ༌སྟོགས༌, སུ༌ཞིག༌གི༌ ཁོ༌རང༌ངི༌ ན༌མ༌ ཅད༌ན༌, ཁོའེ༌ ཏེ༌ བུ༌མོ༌བོའ༌ ལོག༌ཡེམ༌ ཅོ༌ཅུགས༌ཏེ༌ ཨིན༌ནོག༌། ཡང༌ ཏེ༌ བུ༌མོ༌ ཉམ༌པོ༌ ན༌མ༌ ཅོ༌ཁན༌བོའེང༌ ལོག༌ཡེམ༌ ཅོས༌ཏེ༌ ཨིན༌ནོག༌།”
ནའ༌ སྐྱལ༌ཅེས༌སི༌ སྐོར༌།
5:33-37
33གཙོ༌བོ༌ ཡེ༌ཤུའི༌ མོལས༌, “ང༌དང༌ངི༌ ཕ༌མེས༌པོ༌གུན༌ལ༌ འི༌ ཟེར༌ཁན༌བོའང༌ ཁྱོ༌ཞ༌གུན༌ནི༌ ཚོར༌ཏེ༌ ཨིན༌ནོག༌། ནའ༌ ཁུར༌ཁན༌བོ༌ མ༌ཅག༌, ཨིན༌ནའང༌ ཁྱོ༌ཞའེ༌ གཙོ༌བོ༌ ཉམ༌པོ༌ ནའ༌ ཁུར༌ཁན༌བོ༌ གྲུབ༌ཅུག༌། 34ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, ནའ༌ མ༌ནེ༌ མ༌ཁུར༌ཤིག༌, ནམ༌ཁའེ༌ ནའ༌ མ༌ཁུར༌ ཅིའ༌ཟེར༌ན༌ ནམ༌ཁའ༌ ནི༌ དཀོན༌མཆོག༌གི༌ ཞུགས༌ཁྲིས༌ ཨིན༌, 35ཡ༌ ཇིག༌རྟེན༌ནི༌ ནའ༌ མ༌ཁུར༌ ཅིའ༌ཟེར༌ན༌ ཇིག༌རྟེན༌ནི༌ཀ༌ དཀོན༌མཆོག༌གི༌ ཞབས༌ བོར༌ར༌ ཛད༌ད༌ནོག༌, ཡ༌ ཡེ༌རུ༌ཤ༌ལེམ༌མི༌ ནའ༌ མ༌ཁུར༌ ཅིའ༌ཟེར༌ན༌ ཡེ༌རུ༌ཤ༌ལེམ༌ ནི༌ ཀྲག༌པོ༌ གྱལ༌པོའེ༌ གྱལ༌ས༌ ཨིན༌། 36རང༌ངི༌ གོའི༌ ནའ༌ མ༌ཁུར༌ ཅིའ༌ཟེར༌ན༌ ཁྱོ༌ཞའ༌ ཁྱོ༌ཞའེ༌ སྲ༌ ཅིག༌གའང༌ ཀར༌པོ༌ ཡ༌ ནག༌པོ༌ ཅོ༌ཉན༌ན༌ མ༌ནོག༌། 37ཁྱོ༌ཞའེ༌ ལན༌བོ༌ ཨིན༌ན༌ ཨིན༌ ཡ༌ མན༌ན༌ མན༌ ཟེར༌ ཅིའ༌ཟེར༌ན༌ འི༌གུན༌ནི༌ སང༌ ཐལ༌ཏེ༌ ཅི༌ཞིག༌ ཟེར༌ནའང༌ ཤེ༌ཏན༌ ངན༌པ༌ནེ༌ ཇུང༌ང༌ནོག༌།”
ངན༌པའེ༌ ལན༌ལ༌ ངན༌པ༌།
5:38-42
38གཙོ༌བོ༌ ཡེ༌ཤུའི༌ མོལས༌, “ཁྱོ༌ཞའེ༌ འི༌བོའང༌ ཚོར༌ཏེ༌ ཨིན༌ནོག༌, ཆད༌པ༌ སྐྱོན༌བོ༌ནའང༌ ཟོབ༌གོས༌, ‘མིག༌གི༌ ལན༌ལ༌ མིག༌, སོའི༌ ལན༌ལ༌ སོ༌’, 39ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, ཁྱོ༌ཞའ༌ ངན༌པ༌ ཅོ༌ཁན༌བོའ༌ ཏེན༌ན༌ ཙོགས༌ ལན༌ མ༌ཏང༌ཤིག༌། ཀལ༌ཏེས༌ སུ༌ཞིག༌གི༌ གྲམ༌པ༌ ཡས༌པའ༌ གྲམ༌ལྕགས༌ ཏང༌ན༌, གྲམ༌པ༌ ཡོ༌མའང༌ གྲམ༌ལྕགས༌ ལེན༌ན༌ལ༌ སྟོན༌། 40ཀལ༌ཏེས༌ སུ༌ཞིག༌གི༌ ཁྱོ༌རང༌ང༌ སྐྱོན༌ ཀལ༌ཏེ༌ ཁྲིམས༌ཁུང༌ང༌ ཁྱེར༌ཏེ༌ ཆད༌པའེ༌ ཚུལ༌ལ༌ ཁྱོ༌རང༌ངི༌ ཀྲི༌ལེན༌བོ༌ ཏོང༌ ཟེར༌ན༌ རང༌ངི༌ ཀོས༌པོའང༌ ཏངས༌ཏོང༌། 41ཀལ༌ཏེས༌ སུ༌ཞིག༌གི༌ ཁྱོ༌ཞའ༌ ཀི༌ལོ༌མི༌ཀྲར༌ ཅིག༌ ཝང༌ ཏངས༌ཏེ༌ གྲུལ༌ཅུག༌ན༌, ཁོ༌ ཉམ༌པོ༌ ཀི༌ལོ༌མི༌ཀྲར༌ ཉིས༌ གྲུལ༌ཏོང༌། 42ཏོང༌ ཟེར༌ཁན༌བོའ༌ ཏངས༌ཏོང༌, ཁྱོ༌ཞའེ༌ཀ༌ སྐྱིའ༌ ཡོང༌ཁན༌བོའ༌ ལག༌སྟོང༌ང༌ ལམ༌མ༌ཅུག༌།”
གྲ༌འོའ༌ ཅམས༌པ༌ ཅོས༌།
5:43-48
43གཙོ༌བོ༌ ཡེ༌ཤུའི༌ མོལས༌, “ཁྱོ༌ཞ༌གུན༌ནི༌ འི༌བོ༌ ཚོར༌ཏེ༌ ཨིན༌ནོག༌, ‘ཁྱིམ༌ཚེས༌པ༌ ཅམས༌པ༌ ཡང༌ གྲ༌འོ༌གུན༌ལ༌ ནཕ༌རད༌ ཅོས༌།’ 44ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, གྲ༌འོ༌གུན༌ལ༌ ཅམས༌པ༌ ཅོས༌ ཡང༌ ཁྱོ༌ཞའ༌ ནགས༌བར༌དོ༌ སྟན༌ཁན༌གུན༌ནི༌ ཕིའ༌ མོས༌ལམ༌ ཏོབ༌, 45ཏེ༌ཟུག༌ ཅོ༌ན༌ ཁྱོ༌ཞའ༌, ནམ༌ཁའ༌ ཞུགས༌ཁན༌ནི༌ ཡབ༌བི༌ ལམ༌མི༌ཀ༌ གྲུལ༌ལ༌ནོག༌། ཉི༌མའེ༌ འོད༌ དང༌ ཆར༌པ༌ གུན༌ དཀོན༌མཆོག༌གི༌ ཟང༌ངན༌ མ༌ཕེའ༌ མི༌ཚང༌མ༌ལ༌ སལ༌ལ༌ནོག༌། 46ཀལ༌ཏེས༌ ཁྱོ༌ཞའ༌ ཅམས༌པ༌ ཅོ༌ཁན༌གུན༌ལ༌ ཁྱོ༌ཞའེ༌ ཅམས༌པ༌ ཅོ༌ན༌, ཁྱོ༌ཞའ༌ སོལ༌རས༌ ཅིའ༌ ཐོབ༌ཨིན༌? གོབ༌སྐོར༌ ཏང༌ཁན༌ནི༌ ཁྲལ༌ནེན༌ཁན༌གུན༌ནིའང༌ ཏེ༌ཟུག༌ ཅོའ༌ནོག༌། 47ཀལ༌ཏེས༌ ཁྱོ༌ཞའེ༌ སྤུན༌ལ༌ ཅིག༌པོའ༌ ལོན༌ སྲུལ༌ན༌, ཞན༌མ༌གུན༌ནི༌ སང༌ ཁྱོ༌ཞའེ༌ མང༌ང༌ཞིག༌ ཅི༌ ཅོས༌ཏེ༌ ཨིན༌? ཞན༌ ཆོས༌ལུག༌གི༌ མི༌གུན༌ནིའང༌ ཏེ༌ཟུག༌ ཅོའ༌ མ༌ནོག༌ག༌? 48ཏེ༌བོའེ༌ཕིའ༌ ཁྱོ༌ཞའེ༌ ནམ༌ཁའེ༌ ཡབ༌, ཕུན༌སུམ༌ཚོགས༌པ༌ ཞུགས༌ཁན༌ ཙོགས༌ལ༌ ཁྱོ༌ཞའང༌ ཕུན༌སུམ༌ཚོགས༌པ༌ ཡོང༌གོས༌།”
Currently Selected:
མད༌ཐཱ༌ 5: lbj
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
