མད༌ཐཱ༌ 4

ཤེ༌ཏན༌ནི༌ ཡེ༌ཤུའ༌ ཚོད༌ལྟས༌།

4:1-11

1ཏེ༌ནེ༌ རྡུད༌གུན༌ནི༌ གོ༌བའ༌ ཚོད༌ལྟ༌ ཅུག༌ཅེས༌ལ༌ དཀོན༌མཆོག༌གི༌ ཐུག༌ཉིད༌དི༌ ཡེ༌ཤུ༌ རི༌སྟོང༌ངི༌ ནང༌ང༌ ཁྱེར༌ར༌ ཛདས༌། 2ཚན༌ཉིན༌ ཞིབ༌ཅུ༌ དོན༌ཏང༌ མ༌དོན༌ན༌ རོ༌ཟཱ༌ ཞུགས༌པ༌ ཡེ༌ཤུ༌ རིམས༌ཏེ༌ ཡོད༌པིན༌།

3ཚོད༌ལྡ༌ཁན༌ནི༌ ཤེ༌ཏན༌ ཁོང༌ངི༌ དུན༌ལ༌ ཡོངས༌ཏེ༌ ཟེརས༌, “ཀལ༌ཏེས༌ ཉེ༌རང༌ དཀོན༌མཆོག༌གི༌ སྲས༌ ཨིན༌ན༌ འི༌ རྡོའ༌གུན༌ ཏ༌གི༌ གྱུར༌ཅེས༌ལ༌ བཀའ༌ སལ༌?”

4གཙོ༌བོ༌ ཡེ༌ཤུའི༌ ལན༌སལས༌, “ཏམ༌པའེ༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ དུག༌, ‘མི༌ ཏ༌གི༌ ཅིག༌པོའེ༌ སོན༌ཏེའ༌ མི༌ལུས༌ ཨིན༌ནའང༌ དཀོན༌མཆོག༌གི༌ ཞལ༌ནེ༌ བིང༌ང༌ ཛད༌ཁན༌ནི༌ ཞལ༌ཏ༌ རེ༌རེའེ༌ ཁའ༌ ཉན༌ཅེས༌ནེ༌ སོན༌ཏེའ༌ ལུས༌ཨིན༌།’#བཀའ༌ཁྲིམས༌ ཉིས༌པ༌ 8:3 ”

5ཏེ༌ནེ༌ ཁོའེ༌ ཡེ༌ཤུ༌ ཏམ༌པའེ༌ གྱལ༌ས༌ ཡེ༌རུ༌ཤ༌ལེམ༌མ༌ ཁྲིད༌ཏེ༌ ཁྱེརས༌ ཡང༌ ཆོད༌ཁང༌ངི༌ གོ༌ལིང༌ང༌ ཁྱེར༌ཏེ༌ 6ཁོང༌ང༌ ཟེརས༌, “ཀལ༌ཏེས༌ ཉེ༌རང༌ དཀོན༌མཆོག༌གི༌ སྲས༌ ཨིན༌ན༌ འི༌ཀ༌ནེ༌ ཐུར༌ལ༌ ལྕེབ༌བའང༌ ཅིའ༌ཟེར༌ན༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ དུག༌

‘ཁྱོ༌རང༌ སྐྱོབ༌ཅེས༌ལ༌ དཀོན༌མཆོག༌གི༌ ཕོ༌ཉ༌གུན༌ལ༌ བཀའ༌ སལ༌ཨིན༌།

ཁྱོ༌རང༌ངི༌ རྐང༌པའང༌ རྡོའེ༌ཀ༌ ཕོག༌ མི༌ཅུག༌ཅེས༌སི༌ ཕིའ༌,

ཕོ༌ཉ༌གུན༌ནི༌ ལག༌པ༌ རྐྱངས༌ཏེ༌ ཁྱོ༌རང༌ ཟུམ༌མ༌ ཛད༌ཨིན༌།’#སུང༌གུར༌ 91:11,12 ”

7ཡེ༌ཤུའི༌ ཁོའ༌ ལན༌སལས༌, “ཏམ༌པའེ༌ སུང༌རབས༌སི༌ ནང༌ང༌ འི༌བོའང༌ མོལ༌དུག༌། ‘གཙོ༌བོ༌ ཁྱོ༌ཞ༌རང༌ངི༌ དཀོན༌མཆོག༌ག༌ ཚོད༌ མ༌ལྟའ༌།’#བཀའ༌ཁྲིམས༌ ཉིས༌པ༌ 6:16 ”

8ཡང༌སྐྱར༌ རྡུད༌དི༌ གོ༌བའེ༌ ཁོང༌ རི༌ ཐོན༌པོ༌ཞིག༌གི༌ཀ༌ ཁྱེར༌ཏེ༌ ཇིག༌རྟེན༌ནི༌ གྱལ༌སྲིད༌ ཚང༌མ༌ དང༌ ཏེ༌གུན༌ནི༌ སྤལ༌ སྟན༌ཏེ༌, 9ཟེརས༌, “ཀལ༌ཏེས༌ ཁྱོ༌རང༌ངི༌ ང༌ ཆག༌ཕུལ༌ཏེ༌ ཅོལ༌ན༌, ངའེ༌ ཁྱོ༌རང༌ང༌ འི༌ ཚང༌མ༌ ཏང༌ཨིན༌།”

10ཡེ༌ཤུའི༌ ཁོའ༌ མོལས༌, “ཤེ༌ཏན༌ ཁྱོ༌རང༌ འི༌ཀ༌ནེ༌ སོང༌, ཅིའ༌ཟེར༌ན༌ ཏམ༌པའེ༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ དུག༌, ‘ཁྱོ༌ཞའེ༌, ཁྱོ༌ཞ༌རང༌ངི༌ གཙོ༌བོ༌ དཀོན༌མཆོག༌ག༌ ཅོལ༌གོས༌ ཡང༌ ཁོང༌ ཅིག༌པོའ༌ ཞབས༌ཏོག༌ ཞུ༌གོས༌།’#བཀའ༌ཁྲིམས༌ ཉིས༌པ༌ 6:13 ”

11ཏེ༌ནེ༌ རྡུད༌གུན༌ནི༌ གོ༌བ༌ ཁོང༌ནེ༌ བེ༌ཏེ༌ སོང༌ ཡང༌ དཀོན༌མཆོག༌གི༌ ཕོ༌ཉ༌གུན༌ སྐྱོད༌ཏེ༌ ཁོང༌ང༌ ཞབས༌ཏོག༌ ཞུས༌།

གཙོ༌བོ༌ ཡེ༌ཤུའི༌ གཱ༌ལིལ༌ལིའི༌ ནང༌ང༌ ཞབས༌ཏོག༌ གོ༌ཟུག༌ ཛདས༌།

4:12-17

12ཡོ༌ཧཱ༌ནན༌ ཟུམས༌ཏེ༌ ཙོན༌ཁང༌ང༌ ཀགས༌ཁན༌བོ༌ གཙོ༌བོ༌ ཡེ༌ཤུའི༌ སན༌ན༌ཅིག༌, ཁོང༌ གཱ༌ལིལ༌ལིའི༌ ཡུལ༌ཇོངས༌ལ༌ ལོགས༌ཏེ༌ སྐྱོད༌ད༌ ཛདས༌། 13ན༌ཙ༌རེད༌དི༌ གྲོང༌ཁྱེར༌ལ༌ མ༌ཞུགས༌ས༌, ཚོའེ༌ དུན༌ལ༌ ཡོད༌ཁན༌ ཟེ༌བུ༌ལོན༌ དང༌ ནབ༌ཐལ༌ལིའི༌ ཡུལ༌ཇོངས༌སི༌ ཀ༌ཕར༌ན༌ཧུམ༌ གྲོང༌ཁྱེར༌ལ༌ སྐྱོད༌ཏེ༌ ཞུགས༌ས༌ ཛདས༌། 14སྔུན༌མའེ༌ ལུང༌སྟོན༌པ༌ ཡེ༌ཤ༌ཡཱ༌ གྱུད༌ཏེ༌ དཀོན༌མཆོག༌གི༌ མོལ༌ཁན༌བོ༌ དྲན༌དྲ༌ གྲུབ༌ཐུབ༌ཅེས༌སི༌ ཕིའ༌ ཡེ༌ཤུའི༌ ཏེ༌ ཚང༌མ༌ ཅོའ༌ ཛདས༌། ཡེ༌ཤ༌ཡཱའེ༌ བྲིའ༌ ཛད༌ཏེ༌ དུག༌,

15“ཟེ༌བུ༌ལོན༌ དང༌ ནཕ༌ཐལ༌ལི༌ ཡུལ༌གུན༌,

ཚོའེ༌ ལམ༌མི༌ཀ༌ ཡོར༌དཱན༌ ལྩངས༌པོའེ༌ ཕར༌ཀ༌,

གཱ༌ལིལ༌ལིའི༌ ཡུལ༌ཇོངས༌སི༌ ནང༌ང༌ དུག༌ཁན༌ ཡ༌ཧུ༌དཱ༌པ༌ མན༌ཁན༌,

16མུན༌པའེ༌ ནང༌ང༌ དུག༌ཁན༌གུན༌ལ༌

འོད༌ ལྡང༌ཤན༌ཞིག༌ ཐོང༌ཨིན༌།

ཤིན༌ ཡུལ༌ མུན༌པའེ༌ ནང༌ང༌ དུག༌ཁན༌གུན༌ལ༌

ཉི༌མ༌ ཤར༌ཏེ༌ འོད༌ ཕོག༌ཨིན༌།#ཡེ༌ཤ༌ཡཱ༌ 9:1,2 ”

17ཏེན༌ན༌ ཏུས༌ནེ༌ ཕར༌ལ༌ ཡེ༌ཤུའི༌ ཆོས༌ཤད༌ཅེས༌ གོ༌ཟུག༌ ཛདས༌, “ནམ༌ཁའེ༌ གྱལ༌སྲིད༌ ཉེ༌མོ༌ ཨིན༌ནོག༌, གྱོད༌པ༌ ཅོས༌ཏེ༌ དཀོན༌མཆོག༌ ཆོགས༌ལ༌ སེམས༌ གྱུར༌ཤིག༌།”

ཡེ༌ཤུའི༌ གོ༌མའེ༌ ལོབ༌ཕྲུགས༌གུན༌ ལྡམ༌མ༌ ཛདས༌།

4:18-22

18གཙོ༌བོ༌ ཡེ༌ཤུ༌ གཱ༌ལིལ༌ལིའི༌ ཚོའེ༌ ཐའ༌མ༌ནེ༌ ཞབ༌གྲུལ༌ ཛད༌ཨིན༌ ཡོད༌ཏུས༌, ཁོང༌ངི༌ ཨ༌ཅོ༌ནོ༌ ཉིས༌, ཤི༌མོན༌ ཀ༌བོའ༌ པི༌ཏྲར༌རའང༌ ཟེར༌རད༌ ཡང༌ ཁོའེ༌ ནོ༌ ཨེན༌གྲིའུ༌ ཟིགས༌། ཁོང༌གུན༌ནི༌ ཚོའེ༌ ནང༌ང༌ ཉ༌དོལ༌ ཕང༌ངད༌པིན༌ ཅིའ༌ཟེར༌ན༌ ཁོང༌གུན༌ ཉ༌ ཟུམ༌ཁན༌ ཨིན༌པིན༌། 19ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ གྱབ༌ནེ༌ ཡོངས༌ཏེ༌ ངའེ༌ ལོབ༌ཕྲུགས༌ གྱུར༌, ཏ༌ནེ༌ཕར༌ལ༌ ངའེ༌ ཁྱོ༌ཞ༌གུན༌ལ༌ ཉའེ༌ ཚབས༌ལ༌ མི༌གུན༌ ཟུམ༌ཅེས༌ ལབ༌ཨིན༌།” 20ཏེན༌ན༌མལ༌ལ༌ ཉ༌དོལ༌ སྤངས༌ཏེ༌ ཁོང༌གུན༌ ཡེ༌ཤུའི༌ གྱབ༌ནེ༌ བྲངས༌།

21ཡེ༌ཤུ༌ ཏེ༌ཀ༌ནེ༌ སྐྱོད༌ ཟ༌ནེ༌ ཨ༌ཅོ༌ནོ༌ ཉིས༌, ཟེ༌བེད༌དིའི༌ བུ༌ཚ༌ ཡ༌ཀོབ༌ དང༌ ཡོ༌ཧཱ༌ནན༌ ཟིགས༌, ཁོང༌གུན༌ནི༌ ཨ༌བ༌ ཉམ༌པོ༌, གྲུ༌ཟིང༌ངི༌ ནང༌ང༌ ཁོ༌རང༌གུན༌ནི༌ ཉ༌དོལ༌ གྲལ༌གྲིག༌ ཅོའད༌པིན༌, ཡེ༌ཤུའི༌ ཁོང༌གུན༌ལ༌ བོད༌ད༌ ཛདས༌། 22ཏེན༌ན༌མལ༌ལ༌ ཡ༌ཀོབ༌ དང༌ ཡོ༌ཧཱ༌ནན༌ནི༌ གྲུ༌ཟིང༌ དང༌ ཨ༌བ༌ བོར༌ཏེ༌ གཙོ༌བོ༌ ཡེ༌ཤུའི༌ གྱབ༌ནེ༌ བྲངས༌།

ཡེ༌ཤུའི༌ ནད༌པ༌གུན༌ ཕན༌ཅུག༌ག༌ ཛདས༌།

4:23-25

23གཙོ༌བོ༌ ཡེ༌ཤུ༌ གཱ༌ལིལ༌ལིའི༌ ཡུལ༌ཇོངས༌ གང༌པོའེ༌ ནང༌ང༌ སྐྱོདས༌, ཁོང༌ངི༌ དུ༌ཁང༌གུན༌ནི༌ ནང༌ང༌ ལབ༌ཞ༌ སལ༌ཨིན༌, ནམ༌ཁའེ༌ གྱལ༌སྲིད༌དི༌ གའ༌མོའེ༌ ནས༌ཚུལ༌བོ༌ ཤད༌ད༌ ཛདས༌, ཡང༌ ཟུ༌མོ༌ དང༌ ནད༌ ཚང༌མ༌ནེ༌ མི༌གུན༌ ཕན༌ཅུག༌ག༌ ཛདས༌། 24ཁོང༌ མིང༌ཅན༌ནི༌ ནས༌ཚུལ༌བོ༌ ཐག༌རིང༌ སི༌རི༌ཡཱ༌ ཡུལ༌ཇོངས༌ ཚོག༌པ༌ ཁྱེབས༌ པ༌སང༌ མི༌གུན༌ནི༌ ཟུ༌མོ༌ མིན༌དྲ༌ མིན༌དྲ༌ ཡོངས༌ཁན༌ནི༌ ནད༌པ༌གུན༌ ཁྱོངས༌: སྤེར༌ན༌ ན༌ཚ༌ མ༌སྲན༌ཏྲེ༌, རྡུད༌ ཞུགས༌ཁན༌, མིར༌གི༌ ཡོང༌ཁན༌ དང༌, ཟའ༌ཕོག༌ཁན༌ གུན༌, ཏེ༌ ནད༌པ༌ ཚང༌མ༌ གཙོ༌བོ༌ ཡེ༌ཤུའི༌ གྱལ༌ཅུག༌ག༌ ཛདས༌། 25གཱ༌ལིལ༌ལི༌, གྱལ༌ས༌ རྕུ༌ ཟེར༌ས༌, ཡེ༌རུ༌ཤ༌ལེམ༌, ཡ༌ཧུ༌དཱ༌ དང༌ ཡོར༌དཱན༌ ལྩངས༌པོའེ༌ ཉེ༌ཁོར༌ནེ༌ མི༌ མང༌པོ༌ གཙོ༌བོ༌ ཡེ༌ཤུའི༌ སྟིང༌རང༌ནེ༌ ཡོངས༌།

Currently Selected:

མད༌ཐཱ༌ 4: lbj

Highlight

Copy