ལུ༌ཀ༌ 6
6
ཡེ༌ཤུ༌, ཤབ༌བད༌དི༌ གཙོ༌བོ༌།
6:1-11
1གཙོ༌བོ༌ ཡེ༌ཤུ༌ ཤབ༌བད༌དི༌ ངལ༌ཚོའེ༌ ཞག༌ག༌ ཞིང༌ གྱུད༌ཏེ༌ སྐྱོད༌ཨིན༌ ཡོད༌ ཟ༌ནེ༌, ཁོང༌ངི༌ ལོབ༌ཕྲུགས༌གུན༌ནི༌ ཞིང༌ངི༌ སྙེ༌མ༌ ཅད༌ཏེ༌ ལག༌པའེ༌ཀ༌ སྙེས༌ཏེ༌ ཟོས༌། 2ཕ༌རུ༌ཤི༌པ༌ ཁ༌ཅིག༌གི༌ ཏྲིས༌, “ཁྱོ༌ཞ༌གུན༌ནི༌ ཤབ༌བད༌དི༌ ངལ༌ཚོའེ༌ ཞག༌ག༌ ལས༌ ཅོས༌ཏེ༌ ཅིའ༌ ཆོས༌ཁྲིམས༌ ཅག༌གད༌?”
3ཡེ༌ཤུའི༌ ཁོང༌གུན༌ལ༌ ལན༌སལས༌, “དཱ༌བིད༌ དང༌ ཁོའེ༌ ཕྲོ༌པ༌གུན༌ སྟོགས༌ཏེ༌ ཡོད༌ ཟ༌ནེ༌ ཅི༌ ཅོས༌ ཏམ༌པའེ༌ སུང༌རབས༌སི༌ ནང༌ནེ༌ ཁྱོ༌ཞའེ༌ མ༌ནེ༌ མ༌སིལ༌པིན༌ན༌? 4དཱ༌བིད༌ དཀོན༌མཆོག༌གི༌ ཀུར༌རི༌ ནང༌ང༌ ཆོད༌པ༌ ཕུལ༌སའེ༌ཀ༌ སོང༌ཏེ༌ ཏམ༌པའེ༌ ཏ༌གི༌ ཁུར༌ཏེ༌ ཟོས༌, ཏེ༌བོ༌ ཡ༌ཧུ༌དཱ༌པའེ༌ བླ༌མའ༌ མ༌ནེ༌ ཟའ༌ཆོག༌ག༌ མེད༌པིན༌, ཡང༌ ཁོའེ༌, ཕྲོ༌པ༌གུན༌ལའང༌ ཏངས༌།” 5ཏེ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌, “མི༌རིགས༌སི༌བུའ ཤབ༌བད༌དི༌ ངལ༌ཚོའེ༌ ཞག༌ག༌ ཅི༌ ཅོ༌ ཆོགས༌ ཡ༌ མི༌ཆོགས༌ ཟེར༌ཅེས༌སི༌ ཝང༌ཆ༌ ཡོད༌།”
6ཞན༌ ཤབ༌བད༌དི༌ ཞག༌ཤིག༌ག༌ ཡེ༌ཤུ༌ དུ༌ཁང༌ང༌ སྐྱོད༌ཏེ༌ ལབ༌ཞ༌ སལས༌, ཏེ༌རུ༌ ལག༌པ༌ ཡས༌པ༌ ཁོངས༌ཏེ༌ ཀོལ༌ མ༌ཉན༌ཁན༌ནི༌ མི༌ཞིག༌ ཡོད༌པིན༌། 7ཡེ༌ཤུའི༌ ཁོ༌ གྱལ༌ཅུག༌ན༌ ཤབ༌བད༌དི༌ ཞག༌ག༌ ལས༌ ཅོ༌ཅེས༌པོའ༌ སྐྱོན༌ ཀལ༌ཅེས༌ལ༌ ཆོས༌ཁྲིམས༌ལ༌ ཁས༌པ༌གུན༌ དང༌ ཕ༌རུ༌ཤི༌པ༌གུན༌ནི༌ ཁོང༌ང༌ གྱལ༌ལ༌ ཅོས༌ཏེ༌ སྟེན༌དུགས༌།
8ཁོང༌གུན༌ནི༌ སམ༌བ༌བོ༌ ཁྱེན༌ཏེའང༌ ལག༌པ༌ ཁོངས༌ཁན༌ནི༌ མི༌བོའ༌ ཡེ༌ཤུའི༌ མོལས༌, “ཡོང༌ ཡང༌ ཚང༌མའེ༌ དུན༌ལ༌ ལོངས༌།” ཏེ༌ནེ༌ ཁོ༌ ཡོངས༌ཏེ༌ ལངས༌ཏེ༌ དུགས༌། 9ཏེ༌ནེ༌ ཁོང༌ངི༌ ཁོང༌གུན༌ལ༌ མོལས༌, “ངའེ༌ ཁྱོ༌ཞའ༌ ཏྲིའད༌, ཆོས༌ཁྲིམས༌ ནང༌ཞིན༌ ཤབ༌བད༌དི༌ ཞག༌ག༌ ལས༌ ཟང༌པོ༌ ཅོ༌ ཆོག༌ག༌ནོག༌ག༌ ཡ༌ ངན༌པ༌, སྲོག༌ སྐྱོབ༌ ཆོག༌ག༌ནོག༌ག༌ ཡ༌ སད༌?”
10ཡེ༌ཤུའི༌ ཨུ༌ གྱུར༌ཨིན༌ ཁོང༌ རེ༌རེའ༌ ཟིགས༌, ཏེ༌ནེ༌ ལག༌པ༌ ཁོངས༌ཁན༌བོའ༌ མོལས༌, “ལག༌པ༌ རྐྱོང༌” ཡང༌ ཁོའེ༌ ལག༌པ༌ རྐྱངས༌པ༌ ཏེ༌བོ༌ སིང༌ གྱལ༌། 11ཨིན༌ནའང༌ ཁོང༌གུན༌ལ༌ སྲོ༌ སྲན༌ཏྲེ༌ ཡོངས༌ཏེ༌ ཡེ༌ཤུ༌ ཉམ༌པོ༌ ཅི༌ ཅོ༌ཨིན༌ ཟེར༌ཏེ༌ ཁོ༌རང༌གུན༌ནི༌ ནང༌ང༌ གྲབས༌ ཅོ༌ཅེས༌ གོ༌ཟུག༌།
ཡེ༌ཤུའི༌ སྐུ༌ཚབས༌ རྕུག༌ཉིས༌པོ༌ སྐོའ༌ ཛདས༌།
6:12-16
12ཞག༌ཤིག༌ གཙོ༌བོ༌ ཡེ༌ཤུ༌ མོས༌ལམ༌ ཞུའ༌ལ༌ རི༌ཞིག༌གི༌ཀ༌ སྐྱོདས༌, ཡང༌ ཚན༌ གང༌པོ༌ དཀོན༌མཆོག༌ག༌ མོས༌ལམ༌ ཞུས༌། 13ང༌ཏོག༌ ཆའ༌ཅིག༌ ལོབ༌ཕྲུགས༌གུན༌ བོད༌ད༌ ཛདས༌ ཡང༌ ཁོང༌གུན༌ནི༌ ཕྲོ༌ནེ༌ རྕུག༌ཉིས༌ ལྡམ༌མ༌ ཛད༌ཏེ༌ ཁོང༌གུན༌ སྐུ༌ཚབས༌ལ༌ སྐོའ༌ ཛདས༌། 14སྐུ༌ཚབས༌ རྕུག༌ཉིས༌པོའེ༌ མིང༌གུན༌,
ཤི༌མོན༌ ༼ཡེ༌ཤུའི༌ ཁོའེ༌ མིང༌ང༌ པི༌ཏྲར༌ ཏག༌ག༌ ཛདས༌༽, ཁོའེ༌ ནོ༌ ཨེན༌གྲིའུ༌, ཡ༌ཀོབ༌, ཡོ༌ཧཱ༌ནན༌, ཕི༌ལིབ༌, བར༌ཐོལ༌མཱ༌, 15མད༌ཐཱ༌, ཐོ༌མཱས༌ དང༌ ཨལ༌ཕི༌འུས༌སི༌ བུ༌ཚ༌ ཡ༌ཀོབ༌, ཤི༌མོན༌ ༼ཁོའ༌ ཡུལ༌དད༌ཅན༌ ཟེར༌རད༌པིན༌༽, 16ཡུ༌དཱ༌#6:16 ཡུ༌དཱ༌ ཐད༌དཱ༌འུས༌སའང༌ ཟེར༌རད༌པིན༌། ཡ༌ཀོབ༌བི༌ བུ༌ཚ༌ དང༌ ཡུ༌དཱ༌ ཀར༌ཡོད༌པ༌ ཀ༌བོའེ༌ གཙོ༌བོ༌ ཡེ༌ཤུའ༌ སྟིང༌ནེ༌ ངོ༌ལོག༌ ཅོས༌།
ཅིན༌ལབས༌ དང༌ ཇིགས༌ནང༌།
6:17-26
17གཙོ༌བོ༌ ཡེ༌ཤུ༌ ལོབ༌ཕྲུགས༌གུན༌ ཉམ༌པོ༌ རི༌ནེ༌ བབས༌ཏེ༌ ནས༌ས༌ ཉོམ༌ཤིག༌ ཕལ༌ཅན༌ཞིག༌གི༌ཀ༌ ཞུགས༌། ཏེ༌ཀ༌ ཁོང༌ངི༌ ལོབ༌ཕྲུགས༌ མང༌པོ༌ དང༌ ཡ༌ཧུ༌དཱ༌ ཡུལ༌ཇོངས༌, ཡེ༌རུ༌ཤ༌ལེམ༌ གྱལ༌ས༌ ཡང༌ གྱ༌ཚོའེ༌ ཐའ༌མ༌ ཡོད༌ཁན༌ནི༌ ཏཱ༌ཡིར༌ དང༌ སི༌དོན༌ གྱལ༌ས༌གུན༌ནེ༌ ཡོངས༌ཁན༌ནི༌ མི༌ཚོགས༌ ཆེན༌མོ༌ ཛོམ༌ཏེ༌ ཡོད༌པིན༌། 18ཁོང༌གུན༌ ཡེ༌ཤུ༌ ཡོད༌ས༌ ཁོང༌ངི༌ ལབ༌ཞ༌ ཉན༌ཅེས༌ ཡང༌ ཁོང༌རང༌གུན༌ནི༌ ནད༌ གྱལ༌ཅུག༌ག༌ལ༌ ཡོངས༌, ཡང༌ གོང༌པོ༌ ཞུགས༌ཏེ༌ ཡོད༌ཁན༌གུན༌ནའང༌ ཡེ༌ཤུའི༌ ཕན༌ཅུག༌ག༌ ཛདས༌། 19མི༌ཚང༌མའེ༌ ཡེ༌ཤུའ༌ ལག༌པ༌ ཐུག༌ཅེས༌སི༌ རྩོན༌གྲུས༌ ཅོའད༌པིན༌ ཅིའ༌ཟེར༌ན༌ ཁོང༌ངི༌ ནང༌ནེ༌ ཕན༌ཅུག༌ཅེས༌སི༌ སྟོབས༌ བིངས༌ཏེ༌ ནད༌པ༌ ཚང༌མ༌ གྱལ༌ཅུག༌ག༌ ཛདས༌།
20ཏེ༌ནེ༌ ཡེ༌ཤུའི༌ ལོབ༌ཕྲུགས༌གུན༌ལ༌ ཟིགས༌ཏེ༌ མོལས༌,
“ཉལ༌བ༌ཅན༌ ཁྱོ༌ཞའ༌ ཅིན༌ལབས༌ཅན༌ ཨིན༌,
ཅིའ༌ཟེར༌ན༌ ཁྱོ༌ཞའ༌ དཀོན༌མཆོག༌གི༌ གྱལ༌སྲིད༌ ནོར༌སྐལ༌ལ༌ ཐོབ༌ཨིན༌།
21དག༌ས༌ སྟོགས༌ཁན༌གུན༌ ཁྱོ༌ཞའ༌ ཅིན༌ལབས༌ཅན༌ ཨིན༌
ཅིའ༌ཟེར༌ན༌ ཁྱོ༌ཞ༌གུན༌ ཚིམ༌ཤུག༌ག༌ ཛད༌ཨིན༌།
དག༌ས༌ ངུ༌ཁན༌གུན༌ ཁྱོ༌ཞའ༌ ཅིན༌ལབས༌ཅན༌ ཨིན༌
ཅིའ༌ཟེར༌ན༌ ཁྱོ༌ཞ༌གུན༌ གོད༌ཨིན༌།
22མི༌རིགས༌སི༌བུའ༌ ཏད༌པ༌ ཅོ༌ཅེས༌པོའེ༌
མི༌གུན༌ནི༌ ནཕ༌རད༌ ཅོས༌ཏེ༌,
ཁྲེལ༌ ཅུགས༌ཏེ༌ ཕྲོའ༌ མ༌སྲེའ༌ ངན༌པ༌ ཐེ༌ཁན༌གུན༌
ཁྱོ༌ཞའ༌ ཅིན༌ལབས༌ཅན༌ ཨིན༌།
23ཏེ༌ཟུག༌ ཇུང༌ང༌ཅིག༌ ཐད༌པོ༌ ཅོས༌ཏེ༌ ཆོམས༌, ཅིའ༌ཟེར༌ན༌ ནམ༌ཁའེ༌ ནང༌ང༌ ཁྱོ༌ཞའ༌ སོལ༌རས༌ ཀྲག༌པོ༌ ཡོད༌། ཏེན༌ན༌ ཙོགས༌ ངན༌པ༌ ཁོང༌ངི༌ ཕ༌མེས༌པོ༌གུན༌ནིའང༌ དཀོན༌མཆོག༌གི༌ ལུང༌སྟོན༌པ༌གུན༌ ཉམ༌པོ༌ ཅོས༌པིན༌,
24ཨིན༌ནའང༌ ཁྱོ༌ཞའ༌ ཆུག༌པོ༌གུན༌ལ༌ ཙམ༌ཤིག༌གི༌ ཇིགས༌པ༌ མི༌ཡོང༌
ཁྱོ༌ཞ༌གུན༌ལ༌ སྐྱིད༌པོ༌ ཐོབ༌ ཚར༌ཏེ༌ ཨིན༌།
25དག༌ས༌ གྲོད༌པ༌ གྲངས༌ཁན༌གུན༌ ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌
ཁྱོ༌ཞའ༌ སྟོག༌རི༌ སྲན༌ཏྲེ༌ ཐོང༌ཨིན༌།
དག༌ས༌ གོད༌ཁན༌གུན༌ ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌,
ཁྱོ༌ཞ༌གུན༌ལ༌ རྡུག༌པོ༌ དང༌ ངུ༌ཅེས༌ ཡོང༌ཨིན༌།
26མི༌ཚང༌མའེ༌ སྟོད༌པ༌ ཏང༌ཁན༌ ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌
ཁོང༌གུན༌ནི༌ ཕ༌མེས༌པོ༌གུན༌ནིའང༌ ཟུས༌མའེ༌ ལུང༌སྟོན༌པ༌གུན༌ལ༌
སྟོད༌པ༌ ཏངས༌ཏེ༌ ཨིན༌པིན༌།”
གྲ༌འོ༌གུན༌ལ༌ ཡ༌ཤ༌ ཅོ༌ཅེས༌།
6:27-36
27“ཨིན༌ནའང༌ ངའེ༌ ཁྱོ༌ཞའ༌ ཉན༌ཁན༌གུན༌ལ༌ ཟེར༌རད༌, གྲ༌འོ༌གུན༌ལ༌ ཅམས༌པ༌ ཡང༌ ཁྱོ༌ཞའ༌ ནཕ༌རད༌ ཅོ༌ཁན༌གུན༌ལ༌ ཟང༌པོ༌ ཅོས༌, 28ཁྱོ༌ཞའ༌ ངན༌ ཏབས༌ཁན༌གུན༌ལ༌ ཅིན༌ལབས༌ ཏོང༌ ཡང༌ ཁྱོ༌ཞའ༌ ངན༌པ༌ ཅོ༌ཁན༌གུན༌ནི༌ ཕིའ༌ མོས༌ལམ༌ ཏོབ༌། 29ཀལ༌ཏེས༌ སུ༌ཞིག༌གི༌ ཁྱོ༌ཞའེ༌ གྲམ༌པ༌ ཡས༌པའ༌ གྲམ༌ལྕགས༌ ཏང༌ན༌, གྲམ༌པ༌ ཡོ༌མའང༌ གྲམ༌ལྕགས༌ ལེན༌ན༌ལ༌ སྟོན༌། ཀལ༌ཏེས༌ སུ༌ཞིག༌གི༌ ཁྱོ༌ཞའེ༌ ཀོས༌པོ༌ ཀོགས༌ཏེ༌ ཁྱེར༌ན༌ ཁོའ༌ ཀ༌མིས༌པོའང༌ ཁྱེར༌ཅེས༌ནེ༌ སྒག༌ མ༌སྒག༌། 30ཏོང༌ ཟེར༌ཁན༌ ཚང༌མ༌ལ༌ ཏོང༌, ཡང༌ མི༌འོས༌པ༌ ཅོས༌ཏེ༌ ཁྱོ༌ཞའེ༌ ནོར༌ ཁྱེར༌ཁན༌བོའ༌ ལོགས༌ཏེ༌ ཁྱོང༌ མ༌ཟེར༌། 31ཞན༌མའེ༌ ཁྱོ༌ཞའ༌ ཅོ༌གོས༌ སམ༌ཁན༌ ཙོགས༌ ཁྱོ༌ཞ༌གུན༌ནིའང༌ ཞན༌མ༌གུན༌ལ༌ ཅོས༌།”
32“ཀལ༌ཏེས༌ ཁྱོ༌ཞའ༌ ཅམས༌པ༌ ཅོ༌ཁན༌གུན༌ལ༌ ཁྱོ༌ཞའེ༌ ཅམས༌པ༌ ཅོ༌ན༌, ཁྱོ༌ཞའ༌ ཅི༌ ཕན༌ཐོགས༌ ཐོབ༌ཨིན༌། སྡིག༌ཅན༌གུན༌ནིའང༌ ཁོང༌ང༌ ཅམས༌པ༌ ཅོ༌ཁན༌གུན༌ལ༌ ཅམས༌པ༌ ཅོའ༌ནོག༌། 33ཡང༌ ཀལ༌ཏེས༌ ཁྱོ༌ཞའེ༌ ཁྱོ༌ཞའ༌ ཟང༌པོ༌ ཅོ༌ཁན༌གུན༌ལ༌ ཟང༌པོ༌ ཅོ༌ན༌ ཁྱོ༌ཞའ༌ ཅི༌ ཕན༌ཐོགས༌ ཐོབ༌ཨིན༌། མི༌ སྡིག༌ཅན༌གུན༌ནིའང༌ ཏེ༌ཟུག༌ ཅོའ༌ནོག༌། 34ཡང༌ ཀལ༌ཏེས༌ ཁྱོ༌ཞའེ༌ ལོགས༌ཏེ༌ ཐོབ༌ཅེས༌སི༌ རེ༌ཝའ༌ ཡོད༌ཁན༌གུན༌ལ༌ སྐྱིས༌ཏེ༌ ཏང༌ན༌, ཁྱོ༌ཞའ༌ ཅི༌ ཕན༌ཐོགས༌ ཐོབ༌ཨིན༌། མི༌ སྡིག༌ཅན༌གུན༌ནིའང༌ སྡིག༌ཅན༌གུན༌ལ༌ སྐྱིས༌ཏེ༌ གང༌པོ༌ ལོགས༌ཏེ༌ ཐོབ༌ཅེས༌སི༌ རེ༌ཝའ༌ བོར༌ར༌ནོག༌།”
35“ཨིན༌ནའང༌ ཁྱོ༌ཞའེ༌ གྲ༌འོ༌གུན༌ལ༌ ཅམས༌པ༌ དང༌ ཟང༌པོ༌ ཅོས༌ ཡང༌ ལོགས༌ཏེ༌ ཐོབ༌ཅེས༌སི༌ སམ༌བ༌ མ༌ཏང༌ང༌ ཁོང༌གུན༌ལ༌ སྐྱིས༌། ཏེ༌ནེ༌ ཁྱོ༌ཞའ༌ སོལ༌རས༌ ཆེན༌མོ༌ ཐོབ༌ཨིན༌ ཡང༌ ཁྱོ༌ཞ༌གུན༌ ཀུན༌ཝང༌ དཀོན༌མཆོག༌གི༌ ཕྲུ༌གུ༌གུན༌ གྱུར༌ཨིན༌ ཅིའ༌ཟེར༌ན༌ ཁོང༌ངི༌, ཀའ༌ཀྲིན༌ མི༌ཀྲན༌ཁན༌ དང༌ མི༌ངན༌པ༌ ཚང༌མ༌ལ༌ ཐུག༌རྗེ༌ ཟིག༌ས༌ནོག༌། 36ཁྱོ༌ཞའེ༌ ནམ༌ཁའེ༌ ཡབ༌ སྙིང༌རྗེ༌ཅན༌ ཞུགས༌ཁན༌ ཙོགས༌ལ༌ ཁྱོ༌ཞའང༌ སྙིང༌རྗེ༌ཅན༌ གྱུར༌།”
ཞན༌མའེ༌ སྐྱོན༌ ཕིང༌ཅེས༌།
6:37-42
37“ཁྱོ༌ཞའེ༌ ཞན༌མའ༌ སྐྱོན༌རྗོད༌ མ༌ཅོ༌ ཏེ༌ནེ༌ ཁྱོ༌ཞའང༌ སྐྱོན༌རྗོད༌ མི༌ཛད༌། ཞན༌མའ༌ ཉལ༌ཝའེ༌ ནང༌ང༌ ལེབ༌ཅེས༌སི༌ འོས༌པ༌ དུག༌ མ༌ཟེར༌, ཏེ༌ནེ༌ ཁྱོ༌ཞའང༌ ཉལ༌ཝའེ༌ ཆད༌པ༌ མི༌ཕོག༌། ཤགས༌པ༌ ཏོང༌ ཏེ༌ནེ༌ ཁྱོ༌ཞའང༌ ཤགས༌པ༌ སལ༌ལ༌ ཛད༌ཨིན༌། 38ཞན༌མ༌ ཏོང༌, ཏེ༌ནེ༌ ཁྱོ༌ཞའང༌ སལ༌ལ༌ ཛད༌ཨིན༌, ཏེ༌བོ༌ ཏབ༌ཅེས༌སི༌ ནོད༌དི༌ ནང༌ང༌ ནན༌ཏེ༌ སྐངས༌ཏེ༌ ལུད༌ཨིན༌ དཀོན༌མཆོག༌གི༌ སེམས༌སངས༌ཏེ༌ ཁྱོ༌ཞའེ༌ ཐོའེ༌ ནང༌ང༌ སལ༌ཨིན༌། ཁྱོ༌ཞའེ༌ ཀོལ༌ཁན༌ནི༌ ཏབ༌ཟའ༌བོ༌ ཁྱོ༌ཞ༌གུན༌ནི༌ ཕིའང༌ ཀོལ༌ལ༌ ཛད༌ཨིན༌།”
39ཁོང༌གུན༌ལ༌ རུངས༌ གྱུད༌ཏེ༌ ཡེ༌ཤུའི༌ མོལས༌, “ཞ༌ར༌ཞིག༌གི༌ ཞ༌རའ༌ ལམ༌སྟན༌ ཉན༌ཨིན༌ན༌? ཉིས༌ཀ༌ ས༌དོང༌ངི༌ ནང༌ང༌ མི༌གྱེལ༌ལའ༌? 40ལོབ༌ཕྲུགས༌ ལོབ༌བོན༌ནི༌ སང༌ ཆེའ༌ མ༌ནོག༌, ཨིན༌ནའང༌ ལོབ༌བོན༌ནེ༌ ལོབ༌ཇོང༌ ཐར༌ཁྱེལ༌ ཐོབས༌ཏེ༌ སྟིང༌ནེ༌ ལོབ༌ཕྲུག༌གའང༌ ཁོ༌ ཙོགས༌ གྱུར༌ཨིན༌།”
41“ཁྱོ༌ཞའེ༌ རང༌ངི༌ མིག༌གི༌ ནང༌ང༌ ཡོད༌ཁན༌ནི༌ རྡུང༌མ༌བོའ༌ ནང༌སྟག༌ ཅོའ༌ མེད༌ན༌ ཏེ༌ནེ༌ སྤུན༌ནི༌ མིག༌གི༌ ནང༌ང༌ ཡོད༌ཁན༌ནི༌ ཤིང༌ཟེལ༌བོའ༌ ཅིའ༌ ལྟའད༌? 42ཁྱོ༌རང༌ངི༌ སྤུན༌ལ༌, ‘ངའེ༌ ཁྱོ༌རང༌ངི༌ མིག༌གི༌ ནང༌ནེ༌ ཤིང༌ཟེལ༌བོ༌ ཕིང༌ཨིན༌’ ཟེར༌ཅེས༌སི༌ ཧམ༌པ༌ ཀ༌ཟུག༌གི༌ ཅོའད༌, ནམ༌ ཁྱོ༌རང༌ རང༌ངི༌ མིག༌གི༌ ནང༌ང༌ ཡོད༌ཁན༌ནི༌ རྡུང༌མ༌བོ༌ ཁྱོ༌རང༌ང༌ ཐོང༌ང༌ མི༌དུག༌། ཁྱོ༌ཞའ༌ ཁ༌ཆོས༌པ༌གུན༌, སྔུན༌ལ༌ རང༌ངི༌ མིག༌གི༌ རྡུང༌མ༌བོ༌ ཕིང༌, ཏེ༌ནེ༌ སྤུན༌ནི༌ མིག༌གི༌ ནང༌ནེ༌ ཤིང༌ཟེལ༌བོ༌ ཕིང༌ང༌ལ༌ ཁྱོ༌ཞའ༌ སལ༌པོ༌ ཅོས༌ཏེ༌ ཐོང༌ ཐུབ༌ཨིན༌།”
ལྕང༌མ༌ དང༌ ཏེ༌བོའེ༌ བྲས༌བུ༌།
6:43-45
43“ལྕང༌མ༌ ཟང༌པོ༌ཞིག༌ག༌ བྲས༌བུ༌ ངན༌པ༌ མི༌ཆགས༌ ཡང༌ ལྕང༌མ༌ ངན༌པ༌ཞིག༌ག༌ བྲས༌བུ༌ ཟང༌པོ༌ མི༌ཆགས༌། 44ལྕང༌མའེ༌ རིགས༌པོ༌ ཏེ༌བོའེ༌ བྲས༌བུའི༌ ཀ༌ནེ༌ ཤེས༌ས༌ནོག༌། ཚེར༌མང༌ངི༌ ཀ༌ནེ༌ ཕིག༌གི༌ ཁ༌ཟས༌ ཡ༌ ལྕང༌ཚེར༌རི༌ ཀ༌ནེ༌ རྒུན༌ནི༌ ཁ༌ཟས༌ མི༌ཏུ༌། 45མི༌ ཟང༌པོའེ༌ སེམས༌ ཟང༌པོའེ༌ བང༌ཛོད༌ནེ༌ བྲས༌བུ༌ ཟང༌པོ༌ སྨིན༌ན༌ནོག༌, ཡང༌ མི༌ ངན༌པའེ༌ སེམས༌ ངན༌པའེ༌ བང༌ཛོད༌ནེ༌ བྲས༌བུ༌ ངན༌པ༌ སྨིན༌ན༌ནོག༌། སྙིང༌ གངས༌ཏེ༌ ལུད༌ཁན༌བོ༌ ཁའ༌ནེ༌ བིང༌ང༌ནོག༌།”
མག༌ལྡན༌ སྣ༌ ཉིས༌།
6:46-49
46“ཁྱོ༌ཞའེ༌ ང༌ གཙོ༌བོ༌ལེ༌ གཙོ༌བོ༌ལེ༌ ཅིའ༌ ཟེར༌རད༌, ནམ༌ ཁྱོ༌ཞའེ༌ ངའེ༌ ཟེར༌ཁན༌གུན༌ ཅོའ༌ མི༌དུག༌? 47ངའེ༌ཀ༌ ཡོངས༌ཏེ༌ ངའེ༌ སྤེ༌ར༌གུན༌ ཉན༌ཏེ༌ ཏེ༌ཀ༌ ལག༌ལེན༌ ཅོ༌ཁན༌བོ༌ ཀ༌ཟུག༌ མི༌ཞིག༌ ཨིན༌ ངའེ༌ ཁྱོ༌ཞའ༌ སྟན༌ཨིན༌། 48ཁོ༌, ཁང༌པ༌ རྩིག༌ཅེས༌ལ༌ ཀོན༌དྲོ༌ བྲུས༌ཏེ༌ བྲག༌གི༌ཀ༌ མག༌ལྡན༌ ཏང༌ཁན༌ནི༌ མི༌ ཙོགས༌ ཨིན༌། ཆུ༌ལོག༌ ཡོངས༌ཏེ༌ ཁང༌པ༌ སྲན༌ཏྲེ༌ ཕོག༌ནའང༌ ཞིག༌ མ༌ཞིག༌ ཅིའ༌ཟེར༌ན༌ ཏེ༌བོ༌ སྟན༌པོ༌ རྩིགས༌ཏེ༌ ཡོད༌པིན༌། 49ངའེ༌ ཟེར༌ཁན༌གུན༌ ཚོར༌ཏེ༌ ལག༌ལེན༌ མ༌ཅོ༌ཁན༌བོ༌, མག༌ལྡན༌ མ༌ཏང༌ང༌ ཁང༌པ༌ སའེ༌ཀ༌ རྩིགས༌ཁན༌ ཙོགས༌ ཨིན༌། ཆུ༌ལོག༌གི༌ ཆུ༌ ཕོག༌ག༌ཅིག༌ ཁང༌པ༌བོ༌ རྡིབས༌ཏེ༌ པད༌ མེད༌ཁན༌ ཆེན༌།”
Currently Selected:
ལུ༌ཀ༌ 6: lbj
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
